Tûn Laia Harsatnate Chu Huaisen Takin Hmachhawn Rawh
Tûn Laia Harsatnate Chu Huaisen Takin Hmachhawn Rawh
“Pathian chu kan inhumhimna leh kan chakna, mangan laia ṭanpui vartu hnai reng a ni.”—SAM 46:1.
KAN CHHANG THEI EM?
Engtin nge thilthleng ṭha lo takte avânga beidawnna chu kan pumpelh theih?
Huaisenna lantîrna tûr chhan engte nge kan neih?
Harsatnate hma chhawn thei tûrin Jehova chuan eng ang ṭanpuinate nge min pêk
1, 2. Mi tam takin eng harsatnate nge an tawh a; mahse, Pathian chhiahhlawhte duhzâwng chu eng nge ni?
HARSATNA tinrêng awmna hunah kan chêng a. Lei hi chhiatna chi hrang hrangin a chîm a ni. Lîrnghîng te, tsunami te, kângmei te, tuilian te, tlângkâng te, tornado thlipui te, typhoon thlipui te, leh hurricane thlipuite chuan mihringte a suasam nasa hle. Chu bâkah, chhûngkaw buaina leh mi mal harsatnate’n hlauhna leh lungngaihna a thlen bawk nên. Mi zawng zawng chungah “hun leh khawrêl,” a nih loh leh hunin a rawn her chhuahpui hriat lâwk loh thilte a thleng ṭhîn tih chu a dik hle a ni.—Thur. 9:11.
2 Pathian chhiahhlawhte chuan chûng dinhmun manganthlâk tak takte chu chhel takin an tuar chhuak a. Chuti chung pawhin, he kalhmang tâwpna a hnaih hle tawh laia kan hma lama harsatna lo thleng thei engpawh tuar thei tûra inbuatsaih chu kan duh a ni. Engtin nge chûng harsatnate chu mangan lutuk lo va, kan hmachhawn theih ang? Engin nge tûn laia harsatnate chu huaisen taka hmachhawn tûrin min ṭanpui ang?
HUAISEN TAKA HARSATNA HMACHHAWNTUTE HNEN AṬANGIN INZIR RAWH
3. Rom 15:4-a târ lan angin, dinhmun manganthlâk tak kan tawh hunah engtin nge thlamuanna kan hmuh theih?
3 Dinhmun harsa tak chuan mite chu tûn hma zawng aiin tlâk buak tam tawlh tawlh mah se, chûngte chu mihringte tân thil thar a ni lo. Tûnah chuan hun kal tawha harsatnate huaisen taka lo tuar chhuaktu Pathian chhiahhlawh ṭhenkhatte hnên aṭanga kan thil zir theihte chu i lo en ang u.—Rom 15:4.
4. Eng harsatnate nge Davida’n a tawrh a, engin nge tuar chhuak tûra ṭanpui?
4 Davida chungchâng hi ngaihtuah teh. Thil dang tam tak bâkah, lal thinurna te, hmêlma beihna te, a nupuite rûk bosakna te, a sipai ṭhenkhat phatsanna te, leh rilru mangannate a tuar a ni. (1 Sam. 18:8, 9; 30:1-5; 2 Sam. 17:1-3; 24:15, 17; Sâm 38:4-8) Davida chanchin Bible-a chhinchhiahte chuan chûng a harsatnate avânga a tawrhtîr nasatzia a târ lang chiang hle. Mahse, chu chuan thlarau lamah chhiatna a thlen chuang lo. Rin tlatna nên heti hian a sawi zâwk a ni: “LALPA chu ka nunna kulhbîng a ni; tunge ka hlauh vang?” tiin.—Sâm 27:1; Sâm 27:5, 10 chhiar rawh.
5. Engin nge Abrahama leh Sari chu nun harsa tak tuar chhuak tûra ṭanpui?
5 Abrahama leh Sari chuan an nun pum pui deuhthaw chu ram dangah mi khual anga awmin puan inah an hmang a. An tân chuan nun chu a awlsam reng lo. Mahse, ṭâmte leh an hual vêltu hnamte aṭanga thil hlauhawmte chu chhel takin an tuar a ni. (Gen. 12:10; 14:14-16) Engtin nge chutianga an tih theih? Pathian Thu chuan Abrahama’n “khuaa lungphûmte nei mi, Pathian rêlbâwl leh siam chu a nghâk reng” tih min hrilh a ni. (Heb. 11:8-10) Abrahama leh Sari chu an chhehvêl dinhmun avânga lunghnual mai lovin, thil lo la thleng tûrte an thlîr tlat zâwk a ni.
6. Engtin nge Joba kan entawn theih?
6 Joba pawhin nêksâwrna nasa tak a tuar a. A nuna thil engkim mai kal sual anga a lan laia a rilru put hmang tûr chu han ngaihtuah teh. (Job. 3:3, 11) Chu achhapah, a chunga chûng thil zawng zawngte a thlen chhan chu a hre thiam lo va. Chuti chung pawhin ani chu a tlâwm mai lo. Pathian a rinna leh a laka a rinawm nghehna chu a vawng tlat tho a ni. (Joba 27:5 chhiar rawh.) Kan tân entawn tûr ṭha a va ni êm!
7. Paula’n Pathian rawng a bâwlnaah eng thilte nge a tawn a, eng a hriat chhuahnain nge a rawng bâwl chhunzawm zêl tûra huaisenna pe?
7 Tirhkoh Paula entawn tûr siam pawh hi ngaihtuah bawk teh. Ani pawhin ‘khawpuia hlauhawm te, thlalêra hlauhawm te, leh tuifinriata hlauhawm te’ a tawng a. ‘Rilṭâm leh tuihâl te, khawsik leh saruaka awm te’ chungchâng pawh a sawi bawk. Tin, “zan khat leh ni khat tuifinriatah” hun a hman thu a sawi bawk a ni; chu chu lawng chhiatna a tawnte zînga pakhat a sawina a nih hmêl hle. (2 Kor. 11:23-27) Chûng thilte a tawng chung pawhin, Pathian rawngbâwlna avânga thih mai hmabâka a inhriat hnuah pawh heti hian a sawi a ni: “Mahni inring lova, Pathian, mitthi kai thotu chu kan rin zâwk theihna tûr a lo ni. Chutianga thihna râpthlâk ata chu Pathianin min chhanchhuak tawh a; min la chhanchhuak leh ang,” tiin. (2 Kor. 1:8-10) Paula thiltawn ang tluka râpthlâk tawng chu an tam lo hle a. Mahse, kan zînga tam tak hian a rilru awm dân chu kan hre thiam theiin, huaisenna lama a entawn tûr siam aṭang hian thlamuanna kan nei thei a ni.
THILTHLENG ṬHA LOTE AVANGIN BEIDAWNG MAI SUH
8. Engtin nge tûn laia harsatnate hian min nghawng theih? Hrilhfiah rawh.
8 Tûn lai khawvêla chhiatna te, harsatna te, leh nêrsâwrnate a tam êm avâng hian mi tam tak chu an beidawng hle a. Kristian ṭhenkhatte pawh chutiang bawkin an beidawng a ni. Australia rama a pasal nêna hunbi kima rawngbâwl ṭhîn Lani-i * chuan hnute cancer a vei tih a hriat chuan a rilru a nâin, ṭêk den ang mai nia a inhriat thu a sawi a. Heti hian a sawi a ni: “Min enkawlna damdawi chuan min tichau êm êm a, hlutna rêng rêng nei lo niin ka inhria,” tiin. Chutih nâk a laiin, a hnungzâng ruh zai tâwk a pasal a enkawl a ngai bawk nên. Chutiang dinhmunah chuan ding ve ta ila, eng nge kan tih ang?
9, 10. (a) Setana chu eng nge kan tihtîr phal loh vang? (b) Tirhkohte 14:22-a târ lan chu engtin nge kan hmachhawn theih ang?
9 Setana chuan kan hrehawm tawrhte chu rinna min phatsantîr nân a hmang duh tih kan hre reng tûr a ni a. Mahse, chutianga kan hlimna a lâk bo mai chu kan phal tûr a ni lo. Thufingte 24:10 chuan: “Mangan nîa i chauh mai chuan i chakna a bei tham a ni,” tiin a sawi a ni. A hmaa kan sawi tâk ang chi Bible-a entawn tûr târ chhuahte chanchin chhût ngunna chuan harsatnate huaisen taka hmachhawn thei tûrin min ṭanpui ang.
10 Buaina zawng zawng kan tibo vek thei lo tih kan hriat pawh a pawimawh bawk a. Dik takin, buainate chu kan tâwk thei reng a ni. (2 Tim. 3:12) Tirhkohte 14:22 chuan heti hian min hrilh a: “Hrehawm tam tak tuarin Pathian ramah kan lût tûr a ni rêng a ni,” tiin. Chuvângin, hrehawmnate avânga beidawn hle ai chuan engvângin nge chûng dinhmunte chu nangmah ṭanpui tûr chea Pathianin thiltihtheihna i rinzia târ lanna hun remchâng anga i thlîr zâwk loh vang?
11. Engtin nge nuna harsatnate avânga beidawnna chu kan pumpelh theih?
11 Thil ṭha lamte kan ngaihtuah chu a pawimawh hle. Pathian Thu chuan heti hian min hrilh a ni: “Thinlung hlimin hmêl hlim a siam a, thinlung lungngaihna erawh chuan rilru a tilungchhe ṭhîn,” tiin. (Thuf. 15:13) Damdawi lama mi thiamte chuan a ṭha lama thil ngaihtuah a hlutzia an hriatna a rei tawh hle a ni. Dam lo tam tak chuan ṭanpuina dawng nia an inhriat avângin thil thlum (placebos) mai mai pawh damdawi anga pêk an nih hian an ṭhatpui a. Chu mi kalh chiah nocebo nghawng tia hriat pawh hi a awm thei tih finfiah a ni bawk. Dam lote chuan an damdawi eiin an chungah nghawng ṭha lo a nei ang tih hrilh hriat a nih vâng maiin, an chhiat phah lehzual bawk a ni. Kan thlâk danglam theih loh tûr dinhmunte ngaihtuah ngut ngutna chuan beidawnna chauh min thlen thei a. Jehova erawh chuan thil thlum mai mai min pe lo. Chhiatna kan tawh hunah pawh, a Thu-a fuihna kan hmuh te, unaute ṭanpuina te, leh thlarau thianghlim tihchaknate kal tlangin ṭanpuina dik tak chu min pe ṭhîn. Chûng thilte ngaihtuahna hian min tichak dâwn a ni. Chuvângin, thilthleng ṭha lote ngaihtuah reng ai chuan, harsatna tinte tuar thei tûra hma lain, i nuna thilthleng a ṭha laite chu ngaihtuah zâwk ang che.—Thuf. 17:22.
12, 13. (a) Engin nge Pathian chhiahhlawhte chu leilung chhiatna thlengte chhel taka tuar chhuak thei tûra ṭanpui? Entîrna sawi rawh. (b) Chhiatna a lo thlen hian mihringte nuna thil pawimawh ber chu engtin nge a lo lan chian ṭhin?
12 Tûn hnai hian, ram ṭhenkhat chuan leilung chhiatna râpthlâk tak tak an tawng a. Chûng rama unau tam takte chuan chhelna nasa tak an lantîr a ni. Chu chu thil awlsam a ni lo. Kum 2010 tîr lamah chuan, Chile rama lirnghîng nasa tak leh tsunami thleng chuan unaute in leh thil neih tam tak a tichhia a, ṭhenkhat chuan an eizawnnate pawh an chân hial a ni. Chuti chung chuan unaute chu thlarau lamah an ding nghet chhunzawm tlat a. A in a chhiat vek hnuah pawh Samuela chuan heti hian a sawi a ni: “Chûng dinhmun khirh tak kan tawh lai pawh chuan kan nupain inkhâwm kan ṭhulh ngai lo. Chu chuan beidawng lutuk lo tûrin min ṭanpui niin ka hria,” tiin. Anni leh mi dang tam tak chuan chhiatna an tawhte chu hnuchhawnin, Jehova rawngbâwlnaah an inhmang chhunzawm chho zêl a ni.
13 Kum 2009 September thla khân, Philippines rama Manila khua chu zaa 80 lai tuilianin a chhîm pil vek a. Thil tam tak chântu mi hausa tak pakhat chuan heti hian a sawi a ni: “Tuilian chuan mi hausa leh mi retheite chungah harsatna leh tawrhna inang reng min thlen a, thil sem rualtu ropui tak a ni,” tiin. Chu chuan Isua thurâwn fing tak: “Vânah, sûlrûl leh tuiêkin a ei chhiat lohnaah, rûkruten an reh pawha an rûk hek lohnaah chuan, in tân rote khâwlkhâwm zâwk rawh u,” tih chu min hriat chhuahtîr a ni. (Mt. 6:20) Mitkhap kâr lova ral thei khawvêl thilte rinchhanna chuan lunghnualna min thlen fo ṭhîn. Kan vêlah eng thil pawh lo thleng mah se, chhe ve ngai lo tûr Jehova nêna kan inlaichînna ngaih pawimawh ber chu a va finthlâk zâwk tak êm!—Hebrai 13:5, 6 chhiar rawh.
HUAISENNA KAN LANTIR CHHAN
14. Huaisenna lantîr chhan tûr ṭha eng nge kan neih?
14 Isua chuan a lo awmna hun chhûng chuan harsatnate a awm dâwn tih a sawi a; mahse, “Hlau suh ang che u,” tiin a sawi bawk a ni. (Lk. 21:9) Kan Lal Isua Krista leh lei leh vân Siamtu Jehova ṭanpuina kan dawn avângin, huaisen chhan tûr ṭha tak kan nei a ni. Paula chuan Timothea chu heti hian a fuih a: “Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zâwk si,” tiin.—2 Tim. 1:7.
15. Pathian chhiahhlawhte’n Amaha rinna nghet tak an neihzia târ langtu entîrna pe la, chutiang huaisenna kan lantîr theih dân sawi bawk rawh.
15 Pathian chhiahhlawh ṭhenkhatte’n rin tâwkna an neihzia târ langtu an ṭawngkam ṭhenkhat hi lo en ta ila. Davida chuan: “LALPA chu ka chakna leh ka phaw a ni a; ka thinlung hian amah chu a ring a, tichuan puihin ka awm a; chuvângin ka thinlung hi nasa takin a hlim a,” tiin a sawi a. (Sâm 28:7) Paula pawhin rin tâwkna tihnghîn rual lo a neihzia chu hetiang hian a lantîr bawk: “Chûng zawng zawngah chuan min hmangaihtu avâng hian, ropui taka ngamtu kan ni,” tiin. (Rom 8:37) Chutiang bawkin, Isua pawhin dinhmun hlauhawm a hmachhawn dâwn chuan thlîrtute mithmuhah Pathian nêna inlaichînna nghet a neihzia târ langin, heti hian a sawi a: “Pa ka hnênah a awm avângin mahni chauhvin ka awm si lo,” tiin. (Joh. 16:32) Hêng kan ngaihtuah tâk ṭawngkamahte hian eng nge lang chiang êm êm? Hêng ṭawngkam tinahte hian Jehova chunga rinna nghet tak, tihnghîn rual loh an neihzia a lang a ni. Chutiang bawka Pathiana rinna nghet neihna chuan tûn laia harsatna engpawh tuar chhuak tûrin huaisenna min pe thei a ni.—Sâm 46:1-3 chhiar rawh.
HUAISENNA NEI ZEL TURA ṬANPUINATE CHU HLAWKPUI RAWH
16. Engvângin nge Pathian Thu zir chu kan tân thil pawimawh tak a nih?
16 Kristian huaisenna chu mahni inrintâwkna aṭanga kan neih a ni lo. Pathian hriatna leh amaha innghahna aṭanga kan neih a ni zâwk a. Chu chu a Thu, Bible zirna hmangin kan ti thei a ni. Rilru beidawnna (depression) tuartu unaunu pakhat chuan amah ṭanpuitu chu hetiang hian a sawi: “A bîk takin mi thlamuan thei Bible chângte chu ka chhiar nawn fo ṭhîn,” tiin. Chhûngkuaa Pathian biakna nei ziah tûra kaihhruaina pêk chu kan zui em? Chûng thilte tihna chuan: “I dân hi ka va ngaina êm! Nilênga ka ngaihtuah ṭhin a ni,” tia sawitu fakna hla phuahtu rilru put hmang ang chu nei ve tûrin min ṭanpui ang.—Sâm 119:97.
17. (a) Eng thilin nge huaisenna nei reng tûra min ṭanpui ang? (b) Nun kawng chanchin thuziak tihchhuah tawhin a ṭanpui dân che chu entîrna atân sawi rawh.
17 Jehova kan rinna tinghet thei thute chuanna Bible ṭanchhan thu leh hla chhuahte pawh kan nei bawk a. Unau tam tak chuan kan magazine-a nun kawng chanchin thuziakte chu an ṭangkaipui hle. A lutuka rilru awm dân inthlâkna (bipolar mood disorder) nei Asia khawmualpuia unaunu pakhat chuan nun kawng chanchin thuziaka unaupa pakhat, missionary lo thawk ṭhinin chutiang bawk natna hlawhtling taka a tawrh chhuah dân chungchâng a chhiar chu a ṭangkaipui hle a. Heti hian a ziak a ni: “Chu thuziak chuan ka harsatna hre thiam tûra min ṭanpui bâkah, beiseina pawh min be bawk a ni,” tiin.
18. Engvângin nge min ṭanpuitu ṭawngṭaina chu kan hman ṭangkai ang?
18 Ṭawngṭaina hian eng dinhmun hnuaiah pawh min ṭanpui thei a. Tirhkoh Paula chuan he ṭanpuitu hlutzia chu hetiang hian a sawi a ni: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u,” tiin. (Phil. 4:6, 7) Harsatna kan tawh laia chakna kan neih theih nân he ṭanpuina hi kan hmang ṭangkai em? Hun rei tak chhûng rilru beidawnna (depression) lo nei tawh unaupa Alex-a chuan heti hian a sawi a ni: “Ṭawngṭaia Jehova biakna leh Bible chhiara a thusawi ngaihthlâkna chu ka nunna chhawm nungtu a ni,” tiin.
19. Kristian inkhâwmna chu eng angin nge kan thlîr ang?
19 Kohhran inkhâwmnaa inhmuhkhâwm ṭhin chu min ṭanpuitu pawimawh tak dang leh a ni. Fakna hla phuahtu chuan heti hian a ziak a: “Ka nunna hian LALPA biak in hung chhûng kawtlaite chu a ngai êm êm a, a ni; a chauh phah hial a,” tiin. (Sâm 84:2) Chutiang bawk chuan kan awm ve em? A hmaa kan sawi tâk Lani-i chuan Kristian inkawmkhâwmna a thlîr dân chu heti hian a sawi a: “Inkhâwma tel chu tihmâk mawh a ni. Harsatnate tuar chhuak tûra Jehova ṭanpuina ka beisei chuan ka inkhâwm a ngai tih ka hria,” tiin.
20. Engtin nge thu hrilh rawngbâwlnaa telna chuan min ṭanpui ang?
20 Lalram thu hrilh rawngbâwlnaa buai rengna aṭang pawhin huaisenna kan nei thei bawk. (1 Tim. 4:16) Harsatna tam tak tâwktu, Australia rama unaunu pakhat chuan heti hian a sawi a ni: “Thu hrila chhuah chu ka thil tih duh loh ber a ni a; mahse, upa pakhatin a ruala kal tûra min sâwm avângin ka kal ve ta a. Jehova’n min ṭanpui a ni ngei ang; rawngbâwlnaa ka tel apiangin ka hlim hle ṭhîn a ni,” tiin. (Thuf. 16:20) Mi tam tak chuan Jehova chunga rinna nei tûra mi dangte an ṭanpui hian anmahni rinna ngei pawh tihchakin a awm tih an hria a. Chutianga an tih hian, an mi mal harsatnate rilru ata dah bovin, thil pawimawh zâwkte chu an ngaihtuah tlat a ni.—Phil. 1:10, 11.
21. Harsatna kan hma chhawnte chungchângah eng thutiam nge pêk kan nih?
21 Jehova chuan tûn laia harsatnate huaisen taka kan hma chhawn theih nân ṭanpuina tam tak min pe a. Chûngte kan hman ṭangkai vek a, Pathian chhiahhlawh huaisente entawn tûr siam ṭha takte chhût nguna entawnin, keini pawhin harsatnate hlawhtling takin kan hmachhawn ve thei tih thutiam kan nei a ni. He kalhmang suaksual tâwpna a hnaih zêl rual hian thil ṭha lo tam tak a la rawn thleng zêl ang; mahse, Paula thusawi: “Vuak thlûkin kan awm a, nimahsela tihboralin kan awm si lo; . . . kan dawl lo va,” tih ang hian kan awm ve thei a ni. (2 Kor. 4:9, 16) Keiin pawhin, Jehova ṭanpuinain tûn laia harsatna chi hrang hrangte chu huaisen takin kan hma chhawn ve thei a ni.—2 Korinth 4:17, 18 chhiar rawh. (w12-E 10/15)
[Footnote]
^ par. 8 Hming ṭhenkhat chu thlâk danglam a ni.
[Zirlai Atâna Zawhnate]
[Phêk 11-naa milem]
[Phêk 14-naa milem]
Harsatna i tawh hunah Jehova pêk chhuah ṭanpuina chu hmang ṭangkai rawh
