Corruption—Eng Ang Takin Nge A Hluar?
Corruption—Eng Ang Takin Nge A Hluar?
“Kan company chuan tual chhûng sawrkâr tân hna a thawh sak a. Kan hlawh la tûrin thla hnih emaw, thla thum emaw lai kan nghah a ngai ṭhîn. Mahse, tûn hnai mai khân sawrkâr hnathawk pakhat hnên aṭangin phone ka dawng a. Thamna sum tlem azâwng kan pêk chuan kan hlawh a rawn thawn thuai tûr thu min hrilh a ni.”—JOHN-A. *
CORRUPTION titute avângin i tuar tawh em? A chunga kan sawi tâk ang kher khi chu i la tawng lo pawh a ni thei; mahse, corruption titute avângin i tawrh tawh ngei a rinawm.
Transparency International (TI) 2011 Corruption Perceptions Index * sawi dânin, ram lian deuh deuh 183 leh ram bial ṭhenkhatte chuan corruption avângin harsatna nasa tak an tâwk a. A hma kum hnihah TI chuan kum 2009 report-in corruption a hluarzia a târ lan chu pawmin heti hian a sawi a ni: “He khawvêla eng sakhua mah hi corruption lakah a fihlîm lo tih a chiang hle,” tiin.
Corruption avânga chhiatna nasa tak a thlen châng a awm ṭhîn a. Entîr nân, Time magazine chuan kum 2010-a lîrnghîng râpthlâk takin Haiti a nuai ṭuma mi tam tak an thih chhan pawh kha “corruption leh fîmkhur lohna” vâng a ni tel tih a sawi a. Heti hian a sawi belh a ni: “Engineer-ten sawrkâr inspector-te an biak ṭhat deuh va, thamna tam tham tak an pêk chuan in sâng pui pui a ding mai a ni,” tiin.
Chutianga chhiatna thlentu corruption chu nuai bo hlenna a awm thei ang em? Chu zawhna chhân nân chuan corruption awmtîrtu thilte kan hriatthiam a ngai a ni. Chu mi chungchâng chu a dawta thuziakah kan ngaihtuah ang. (w12-E 10/01)
[Footnote-te]
^ par. 2 Hming thlâk a ni.
^ par. 4 “The Corruption Perception Index chuan khawvêl ramte corruption dân chu sawrkâr enkawlna hnuaia awm sumdâwnnate eirûk dân aṭangin a teh a ni.”—Transparency International.
[Phêk 3-naa thu lâk chhuah]
“Corruption chu mi mal hlâwkna atâna thuneihna hman khaw loh hi a ni a. Chu chuan thuneitute rinchhantu zawng zawngte nunna te, eizawnna te, leh hlimna te chu a tihchhiatsak a ni.”
—TRANSPARENCY INTERNATIONAL
