Corruption Hluarna Khawvêlah Rinawm Theih A Ni Em?

“Engkimah fel taka [“rinawm taka,” New World Translation] awm kan tumin . . . kan inhre si a.”—HEBRAI 13:18.

SUAL pianpui nei kan nih avâng te, kan chênna khawvêl avâng te leh Diabola avângtein nêksâwrna nasa tak kan tuar thei a, chuti chung pawh chuan chutiang thununna chu kan do thei a ni. Engtin nge kan do theih? Kum tam tak chhûnga lo finfiah tawh Pathian Thu, Bible-a thu bulte kan nunpui a, amah kan hnaih chuan kan do thei a ni. Entîrna pahnih lo ngaihtuah ta ila.

BILBE THU BUL: “He khawvêla mite nun dân angin nung suh u.”—Rom 12:2, New Jerusalem Bible.

Nuna thiltawn: Guilherme-a chu Brazil rama sumdâwng hlawhtling tak a ni a. Ani chuan rinawm taka awm chu thil awlsam a ni lo tih a pawm a. “Company thiltum tipuitling tûr emaw, he inelna khawvêla hmasâwn zêl tûr emawa nawrna avângin sumdâwng mi chu awlsam takin a rinawm lo ṭan thei a. Mi tam tak chuan thamna pêk leh lâk chu thil pângngai tak angin an ngai a. Sum tam tak hloh theihna sumdâwnna i ṭan a nih chuan, rinawm taka awm chu chona a tling a ni,” tiiin a sawi.

Chuti chung pawhin, Gulherme-a chuan rinawm lo tûra nawrna chu hlawhtling takin a do thei a. Heti hian a sawi a ni: “Mite’n dân an pawisak lohna, sumdâwnna hmunah pawh rinawm taka awm chu thil theih a ni a. Nungchang lama tehna nghet tak i neih a ngai a ni. Bible chuan rinawm taka awm hlâwknate hmu tûrin min ṭanpui a. Mi rinawm chuan chhia leh ṭha hriatna thiang tak, chhûngrila ngaihṭhatna, leh mahni inhlutna a nei a. A bula mite pawh a ṭha zâwnga thununtu a ni thei a ni,” tiin.

BIBLE THU BUL: “Hausak tumte chu thlêmnaah te, thangah te, âtthlâk leh tikhawlo thei duhna tam takah te an tlu lût ṭhîn, chûng duhnate chuan chhiatna leh boralnaah chuan mite a tipil ṭhîn. Tangka sum ngainat hi sual tinrêng bul a ni si a.”—1 Timothea 6:9, 10.

Nuna thiltawn: André-a chu vênhimna hmanraw lam thila sumdâwnna (security system) company neitu a ni a. Amah dâwrtute zîngah chuan football club lian tak pakhat pawh a tel a ni. Ṭum khat chu inkhelhna lian tham tak neih a nih hnuah, André-a chuan club office-ah an sum pêk tûr zât inziakna lehkha chu a han pe a. Sum lam khawihtu pâwl chu an ticket hralhna man chhiar felin an lo la buai hle a. A tlai tawh bawk si nên, an hotupa chuan André pawh tiamin an bungraw lâknate hnênah chuan hmanhmawh takin sum a lo pe hlawm a ni.

André-a chuan: “Ka haw kawngah chuan an hotupa’n ka dawn tûr aia tam sum min pe tih ka hmu chhuak a. Tu ber nge a pêk sual tih chu a hre chhuak ngai lo vang tih ka hria. Chutih rualin, chu pa chuan ama suma a hnawh khah leh a ngai ngei dâwn tih ka hre bawk a ni. Lêt leh chu ka tum ta a. Inkhêl entu mipui tam tak kârah chuan engtin tin emaw inhnawh  pheiin ka kal thleng thei hrâm a, sum chu ka pe kîr leh ta a ni. An hotupa chuan mak a lo ti hle mai a. Tuma’n sum an la pe kîr ngai lo rêng rêng a ni,” tiin a sawi.

“Chu rinawmna chuan an hotupa zah a hlawh ta hle a. Chu thil a thlen hnu chuan kum tam tak a liam tawh a, atîra bungrua an lâkna zawng zawngte zînga an dâwr chhunzawm awmchhun chu keimah chauh ka ni tawh a ni. Nungchang lama Bible tehna sâng tak ka nunpuinain hmingṭha min neihtîr avângin ka lâwm hle,” tiin a sawi zawm a ni.

Thununna ṭha lo takte pawh Pathian ṭanpuinain kan do thei tih hriatna chuan min tichak hle a. Amaherawhchu, mi mal thawhrimna mai chuan corruption chu a tibo vek thei ngai lo vang. Corruption awm chhan chu thil thûk tak a ni a—ṭha famkim lo mihringte siam ṭhat theih loh khawpa thûk a ni. A nih chuan corruption chu a tâwp ngai dâwn lo tihna em ni? He thuziak inzawma a tâwpna ber chuan Bible chhânna mi thlamuan thei tak chu a rawn târ lang ang. (w12-E 10/01)