Engvângin Nge Corruption A Bo Theih Loh?

“Mi, mi dang chungah pawi khawpin a intilal ṭhîn.”—THUHRILTU 8:9.

HETA târ lan thu hian mihringte rorêlna chungchâng a sawi dik hle a. Mihringte rorêlna chuan hrehawm tawrhna leh manganna sawi sên loh a thlen a ni. Kum kal ta ahte khân, mipui inrêlbâwlna ṭha zâwk din tuma theih tâwp chhuahtu, tum ṭha tak nei mite chu duhâmna leh corruption chuan che thei lovin a siam a ni. Engvângin nge chutiang chu a nih? Engvângin nge corruption a bo theih loh? Hêng a hnuaia târ lan thununna ṭha lo tak pathumte vâng hi a ni deuh ber a ni.

1. Sual thununna

Bible chuan ‘sual bâwiha awm vek’ kan nih thu chiang takin a sawi a. (Rom 3:9) Natna inthlahchhâwn, tihdam theih loh ang maiin sual chu keimahniah ‘a awm,’ a nih loh leh min ‘chênchilh’ tlat a ni. Sual chuan kum sâng tam tak chhûng chu mihringte chungah lal ang maiin “ro a rêl” tawh a. A “dân” chuan keimahniah hna a thawk reng a ni. Rilru put hmang sual chuan mi tam takte chu mahni hamṭhatna tûr ngai pawimawh hmasa tûr emaw, mi dangte tawrh phahna tûr pawh ni se sum leh pai emaw, thuneihna emaw ringawt ngaihtuah tûrin a chêttîr a ni.—Rom 5:21; 7:17, 20, 23, 25.

2. Kan chênna khawvêl suaksual thununna

Kan chênna khawvêl hi duhâmna leh mahni hmasialnain a khat a. Mi ṭhenkhat chuan chutiang dinhmuna danglam bîk nih chu harsa an ti a. Mahni hmasial taka tumsânna thununa awmin, thuneihna lam ringawt an ngaihtuah ta ṭhîn a ni. Chu bâkah, mi ṭhenkhat chuan sum leh pai leh thil tam lehzual—an mamawh aia tam—neih châkna an nei bawk a. Chûng an thil duhte tipuitling tûr chuan rinawm lo taka thiltih pawh an hreh loh phah ṭhîn a ni. Chutiang mite chuan anmahni thununtu ṭha lo tak do ai chuan, ‘thil sual tih tumin mipui an zui’ zâwk a ni.—Exodus 23:2.

3. Diabol-Setana thununna

Thlarau thilsiam hel, Setana chuan ‘khawvêl zawng zawng hi a bum a.’ (Thu Puan 12:9) Ani chuan mihringte chawhleh kual vêl hi nuam a ti a. Mite chu khawvêl lama nawmsak châkna emaw, hausak châkna emaw hmanga fing vervêk taka thlêmin, dik lo taka thilti hial tûrin a siam thei a ni.

A nih chuan, Setana’n duh duha a pawh kual theihin kan awm tihna em ni? A chhânna chu a dawta thuziakah kan hria ang. (w12-E 10/01)