“I Duhzâwng Tih Mi Zirtîr Ang Che”
“I Duhzâwng Tih Mi Zirtîr Ang Che”
“I duhzâwng tih mi zirtîr ang che; ka Pathian i ni si a.”—SAM 143:10.
HRIAT RENG TUR THU PAWIMAWHTE
Davida’n Jehova thil thlîr dân a ngaih pawimawhzia a nuna thil thleng engte’n nge târ lang?
Engin nge Davida chu Pathian duhzâwng hmu thiam tûra ṭanpui?
Pathian duhsak ni reng tûrin engin nge min ṭanpui ang?
1, 2. Engtin nge Pathian duhzâwng ngaih pawimawhna chu kan hlâwkpui theih a, chu mi chungchângah chuan Lal Davida hnên aṭangin eng nge kan zir theih?
I LA hriat ngai loh hmun i paltlang a. Chu kawnga i kal mêk lai chuan pêng ṭhuam a lo awm ta tlat mai. Khawi lam zâwk nge i zawh ang le? Chu lai hmun hre chiangtu chu i kalna tûr kawng i zâwt thei a ni. Thutlûkna pawimawh tak kan siam hunah chutiang bawka tihna chuan min ṭanpui ang. Engkim hretu Jehova hnêna kan kawng zawh tûr min kawhhmuh tûra dîlna chuan Ama duh anga “kal” tûrin min ṭanpui ang.—Is. 30:21.
2 Hmân lai Israel Lal Davida chuan a dam chhûng zawng deuhthaw chu Pathian duhzâwng ngaih pawimawh lamah entawn tûr ṭha a siam a. Davida nuna thil thleng ṭhenkhatte enin, Pathian Jehova lama a thinlung ṭha famkim neih aṭanga kan zir theihte i lo en ho ang u.—1 Lal. 11:4.
DAVIDA CHUAN JEHOVA HMING A CHAWIMAWI
3, 4. Engin nge Davida chu Goliatha bei tûra chêttîr? (b) Engtin nge Davida’n Pathian hming chu a thlîr?
3 Davida’n Philistia mi chak Goliatha a hmachhawn ṭum kha han ngaihtuah teh. Chu mi hrawl, râl thuam famkima inthuam, fit kua leh a chanve (2.9 m) laia sâng chu bei tûrin engin nge tleirâwl Davida chu chêttîr? (1 Sam. 17:4) A huaisennain em ni? Nge Pathian a rinna zâwkin? A thiltih huaisenthlâk takah chuan chûng thil pahnihte chu a pawimawh ve ve a. Mahse, chu mi hrawl tak bei tûra Davida chêttîrtu ber chu Jehova leh a hming ropui tak a zahna hi a ni. Davida chuan thinrim êm êmin: “He serhtan loh Philistia mi hi tunge maw a nih a, Pathian nung sipaite a han cho vei le?” a ti a ni.—1 Sam. 17:26.
4 Râwlthar Davida chuan Goliatha chu hmachhawnin: “Nang zawng khandaih te, fei te, feitê te kengin i lo thawk a; kei zawng sipaite LALPA, Israel sipaite Pathian i chova hmingin ka lo thawk zâwk a ni,” tiin a sawi a. (1 Sam 17:45) Pathian dik rinchhanin virvawm lung pakhat chauhvin Philistia mi chak chu a hneh ta a ni. Davida chuan chu mi ṭumah chauh ni lovin, a dam chhûng zawngin Jehova a ring a, A hming chu a chawimawi tlat a. A Israel puite chu ‘Jehova hming thianghlim chhuang’ tûrin a fuih hial a ni.—1 Chronicles 16:8-10 chhiar rawh.
5. Goliatha’n Israelte a chona nêna tehkhin theih eng dinhmun nge i tawn mai theih?
5 I Pathiana Jehova i nei chu i inchhuang em? (Jer. 9:24) I ṭhenawm te, i hnathawhpui te, i classmate te, a nih loh leh i chhûngte’n Jehova an sawichhiat a, a Thuhretute an nuihzat hian engtin nge i chhân lêt? Jehova hming sawichhiat a nih chuan, a ṭanpuina rinchhan tlat chungin hrilhfiah i tum ngai em? “Ngawih hun” chu a awm ngei mai; mahse, Jehova Thuhretu nih leh Isua hnungzuitu nih chu kan zak ngai tûr a ni lo. (Thur. 3:1, 7; Mk. 8:38) Mi ṭha lote kan biak hunah chuan remhriatna leh fîmkhurna lantîr tûr ni mah se, Goliatha chona aw an hriat a, ‘zâm a, hlau ta êm êm’ Israel mite ang chu i ni lo vang u. (1 Sam. 17:11) Chutiang ni lovin, Pathian Jehova hming tihthianghlim nân hma i la vat zâwk ang u. Pathian Jehova nihna dik tak hre tûra mite ṭanpui hi kan duhthusâm chu a ni a. Chu mi atân chuan Pathian hnaih a pawimawhzia hre tûra mi dangte ṭanpui nân a Thu ziak chu kan hmang a ni.—Jak. 4:8.
6. Davida chuan Goliatha a beihna hmangin eng nge hlen chhuah a duh a, keini pawhin eng nge kan ngaih pawimawh ber ang?
6 Davida’n Goliatha a beihna chuan thil pawimawh dang pawh min zirtîr a. Davida’n indona hmun a rawn thlen chuan: “He Philistia mi hi tihluma Israel-ho hmingchhiatna tirehtu chu engtia tih tûr nge ni ang?” tiin a zâwt a. Mite chuan a hmaa an lo sawi tawh ang bawkin: “Tupawh amah [Goliatha] tihlum apiang chu lalin nasa takin sum lamin a tihausa ang a, tin, a fanu a pe ang,” tiin an chhâng a. (1 Sam. 17:25-27) Mahse, sum leh pai lama chawimawina chu Davida thil ngaih pawimawh ber a ni lo. Chu aia ngaih pawimawh zâwk a nei. Pathian dik chawimawi a duh a ni. (1 Samuela 17:46, 47 chhiar rawh.) Keini eng nge kan an ve? Mi hausa leh khawvêla mi hmingthang tak nih a, mahni tâna hming chher chu kan tum ber a ni em? Dik takin, “LALPA chu mi fakpui ula, a hming chu i chawimawi tlâng ang u,” tia hla satu Davida ang hi nih ve kan duh a ni. (Sâm 34:3) Chuvângin, mahni aia Pathian hming chu dah pawimawh zâwkin Amah chu i rinchhan tlat ang u.—Mt. 6:9.
7. Mi rilru ṭha lote kan tawh huna kan mamawh rinna chak tak chu engtin nge kan neih theih ang?
7 Davida tân huaisen taka Goliatha bei tûr chuan Jehova chunga rinna pum hlûm neih a ngai a. Râwlthar Davida chuan rinna chak tak a nei a ni. Chutianga rinna a neih dân kawng khat chu berâm vêngtu a nih anga a Pathian rinchhanna hmangin a ni a. (1 Sam. 17:34-37) Keini pawhin kan rawngbâwlna chhunzawm zêl tûr chuan rinna chak tak kan neih a ngai a, a bîk takin mi rilru ṭha lote kan tawn hunah a ngai lehzual a ni. Chutiang rinna chu kan nî tin thiltiha Pathian rinchhanna hmangin kan nei thei a. Entîr nân, vântlâng motor-a kan chuan hunah kan bula ṭhute hnênah Bible thutak sawipui kan tum thei a ni. Chu bâkah, in tin kala rawng kan bâwl hunah pawh engvângin nge kalkawnga kan mi tawhte chu kan biak loh vang ni?—Tirh. 20:20, 21.
DAVIDA CHUAN JEHOVA A NGHAK
8, 9. Engtin nge Davida chuan Lal Saula a cheibâwlnaah Jehova duhzâwng a ngaih pawimawhzia a târ lan?
8 Davida’n Jehova rinchhan a inhuamzia a lanna dang leh chu Israel lal hmasa ber Saula chungchângah a ni. Amah îtsîk êm êmtu Saula chuan Davida chu feiin vawithum lai banga khawh bûr a tum a; mahse, Davida chuan tihlêt tum lovin a tlân chhiatsan zêl a. A tâwpah phei chuan, Saula hnên aṭangin a tlân bo ta hial a ni. (1 Sam. 18:7-11; 19:10) Chutah, Israel zawng zawngte zînga a ṭha thlan chhuah mi 3,000 hruaiin, Saula chu Davida zawng tûrin thlalêrah a chhuak a. (1 Sam. 24:2) A tâwpah chuan, hre miah lovin Saula chu Davida leh a mite tawmna pûkah tak mai chuan a va kal leh ta nghâl a. Davida chuan chu hun chu a nunna lâk tuma veh rengtu lal thah theihna hun remchâng atân a hmang thei reng a ni. Davida’n Israel lal Saula a thlâk chu Pathian duhzâwng a ni tho bawk si nên. (1 Sam. 16:1, 13) Dik takin, Davida chuan a mite thurâwn chu zâwm ta sela chuan lal chu thah a ni ngei ang. Mahse, ani chuan: “LALPA hriak thih a ni tih hre reng chung sia, a chunga kut thawha LALPA hriak thih ka lalpa chunga he thil ka tih hi a âwm lo tawp mai,” tiin a mite chu a hrilh a ni. (1 Samuela 24:4-7 chhiar rawh.) Saula chu Pathian hriak thih lal a la ni reng a. Jehova’n a lal nihna ata a la paih thlâk loh avângin Davida chuan Saula lalna chu a chhuhsak duh lo. Saula kawr chung fêm chauh chu hlehsakin, amah tihnat tumna a neih lohzia a lantîr a ni.—1 Sam. 24:11.
9 Davida chuan chu lal chu a hmuh hnuhnûn ber ṭum pawhin Pathian hriak thih chunga zahna a lantîrzia a târ lang leh a. Chutih lai chuan, Davida leh Abisaia chu Saula leh a sipaihote inkulhna hmunah an rawn thleng a, Saula muhîl lai chu an rawn hmu a. Abisaia chuan hmêlma pa chu Pathianin Davida kutah a pe anga ngaiin, feia chhun a rawt a; mahse, Davida chuan a remti lo. (1 Sam. 26:8-11) Abisaia chuan nawr nasa hle mah se, Davida chuan Pathian kaihhruaina a zawn zêl avângin Jehova duhzâwng anga thiltih chu a tum nghet tlat a ni.
10. Eng dinhmun khirh tak nge a mi mal taka kan tawn mai theih a, ding nghet tlat tûrin engin nge min ṭanpui ang?
10 Keini pawh dinhmun harsa takah kan ding ve thei a ni; kan ṭhiante’n Jehova duhzâwng tihna lama min thlâwp lovin, an ngaih dân zui zâwk tûrin min nawr luih an tum thei a. Abisaia ang bawk khân, ṭhenkhat chuan thil engemaw chungchângah Pathian duhzâwng pawh râwn lova hma la mai tûr pawhin min fuih hial thei a ni. Chutih huna kan din ngheh theih nân Jehova thil thlîr dân chu chiang taka kan hriat a, a kawngte zawh kan tum tlat chu a ngai a ni.
11. Davida’n Pathian duhzâwng a rilrua a dah pawimawh berna aṭangin eng nge i zir?
11 Davida chu: “I duhzâwng tih mi zirtîr ang che,” tiin Pathian Jehova hnênah a ṭawngṭai a ni. (Sâm 143:5, 8, 10 chhiar rawh.) Ani chuan ama ngaihdân rinchhan emaw, mi dangte nawrna anga awm emaw ai chuan Pathian zirtîra awm chu a duh zâwk a. ‘Pathian thiltih zawng zawngte chu a ngaihtuah ṭhin a: a kut hnathawhte chu a chhût ṭhîn.’ Keini pawhin Pathian Lehkha Thu zirchianna leh Jehova’n mihringte a cheibâwl dân Bible-a chuang tam takte chhût ngunna hmangin Pathian duhzâwng chu kan hre thei a ni.
DAVIDA CHUAN DAN PHENA THU BUL AWMTE CHU A NGAIHLU
12, 13. Engvângin nge Davida chuan a mi pathumte tui rawn lâksak chu a leih buak?
12 Davida’n Dân thua chuang thu bulte a ngaih hlutna leh chu mi mila nun a duhna pawh chuan entawn a phu hle. “Bethlehem-a tuichhunchhuah tui” in a châkzia a sawi ṭuma thil thleng hi han ngaihtuah teh. Davida mi pathumte chuan khawpui—chutih laia Philistia-ho awm chilh—chu tâwn tlangin, tui chu an va chawisak a. Mahse, “Davida chuan a lo in duh lo va, LALPA tân a bun chhuak” ta zâwk a ni. Engvâng nge? Davida chuan heti hian a sawifiah a ni: “Hei hi ka in loh tûrzia mai chu: hêng thih huama inpehote thisen chu ka in dâwn em ni? Thih huama inpein an rawn la a ni si a,” tiin.—1 Chro. 11:15-19.
13 Davida chuan thisen chu ei tûr a ni lo tih leh Jehova tân leih buak tûr a ni tih Dân thu aṭangin a hria a. Chutianga tih tûr a nih chhan pawh a hrethiam bawk. Tin,“tisa nunna chu thisenah chuan a awm” tih pawh a hre bawk. Mahse, tûna mi hi chu thisen ni lovin, tui mai a ni si a. Engvângin nge Davida chuan a in duh loh le? Dânin a phût chhan, dân phêna thu bul chu a ngaihhlut vâng a ni. Davida tân chuan chu tui chu a mi pathumte thisen ang tluka hlu a ni a. Chuvângin, chu tui in chu ngaihtuah chhin chiah pawh a ngai lo va. Chutianga in ai chuan leia leih buak a titlu ta zâwk a ni.—Lev. 17:11; Deut. 12:23, 24.
14. Engin nge Davida chu Jehova thil thlîr dân nei tûra ṭanpui?
14 Davida chuan Pathian dân hriat thiamna pum hlûm neih tumin a bei a. Heti hian a zai a ni: “Aw ka Pathian, i duhzâwng tih hi ka lâwmzâwng tak a ni; A ni, i dân thu chu ka thinlungah a awm reng e,” tiin. (Sâm 40:8) Davida chuan Pathian dân chu a zirin, ngun takin a chhût ṭhîn a. Jehova thupêkte finna chu a rinchhan tlat a ni. Chuvângin, Davida chuan Mosia Dân ziah chhuahte mai bâkah, chûng dânte pêk a nih chhan thleng chuan zawm nuam a ti a. Keini pawh Bible kan zir rêng rêngin, thil engemaw chungchânga Jehova duhzâwng kan hriat theih nân kan thil chhiarte chu kan chhût ngunin, kan thinlungah kan vawng reng tûr a ni.
15. Eng kawngin nge Solomona chuan Pathian Dân zahna a lantîr loh?
15 Davida fapa Solomona pawh Pathian Jehova’n a duhsak êm êm a. Mahse, hun a lo ral zêl chuan Solomona chuan Pathian Dân chu a zah ta lo va. Israel lalin “nupui . . . a ngah tûr a ni lo” tih Jehova thupêk chu a ngai pawimawh ta lo a ni. (Deut. 17:17) Solomona chuan ram dang mi nupui tam tak a nei a ta hial a. A lo upat hnu chuan, “a nupuite chuan pathian dangte lamah a thinlung an hruai kawisak a.” Eng ang pawhin insawi thiam mah se, ‘Solomona chuan LALPA mithmuhin thil sual a lo ti ta a, a pa Davida angin LALPA chu a zui tlat ve ta lo a ni.’ (1 Lal 11:1-6) Pathian Thua kan hmuh dânte leh thu bulte zawm chu thil pawimawh a va ni tak êm! Entîr nân, nupui pasal neih kan tum hunah chutianga tih chu a pawimawh hle a ni.
16. Engtin nge “Lalpaa awm mi” chauh nei tûra thupêk a nih chhan hmuh thiamna chuan nupui pasal neih tumte chu a thunun ang?
16 Ringtu ni lote’n min ngaihzâwnna an lantîr huna kan chhân lêtna chuan Davida thil thlîr dân nge a lantîr a, Solomona thil thlîr dân zâwk? Pathian chibaibûktu dik takte chu “Lalpaa awm mi” chauh nei tûra hrilh an ni a. (1 Kor. 7:39) Kristianin nupui pasal neih a tum a nih chuan, Jehova betu, a hnêna inpumpêk a, baptisma chang tawh chauh a nei tûr a ni. Bible-in hetiang thil a phût chhan kan hriat thiam chuan, baptisma la chang lo neih chu kan duh loh mai bâkah, chutiang mite min ngaihzâwnna lo chhân lêt mai pawh chu kan duh hauh lo vang.
17. Saruak lemte thanga âwk lo tûrin engin nge min ṭanpui thei?
17 Pathian kaihhruaina theih tâwpa zawnna kawnga Davida entawn tûr siamin saruak lemte en châkna do tûra min ṭanpui theih dân hi lo ngaihtuah bawk teh. Hêng a hnuaia Bible chângte hi chhiar la, a thu bulin a ken telte ngaihtuahin, chu mi chungchânga Jehova duhzâwng chu hmuh thiam tum ang che. (Sâm 119:36, 37; Matthaia 5:28, 29; Kolossa 3:5 chhiar rawh.) Pathian tehna sâng takte chhût ngunna chuan saruak lemte thanga âwk lo tûrin min ṭanpui a ni.
PATHIAN THLIR DAN I RILRUAH VAWNG RENG RAWH
18, 19. (a) Davida chu ṭha famkim lo ni mah se, Pathian duhsak ni reng thei tûrin engin nge ṭanpui? (b) Eng nge tih i tum tlat?
18 Davida chu kawng tam taka entawn tlâk ni mah se, thil sual nasa tak engemaw zât a ti bawk a. (2 Sam. 11:2-4, 14, 15, 22-27; 1 Chro. 21:1, 7) Mahse, a dam chhûng zawngin a thil sual tiha a inchhîrzia a lantîr a ni. Ani chu Pathian hmaah ‘thinlung ṭha tak puin’ a awm a. (1 Lal. 9:4) Chutiang chuan a awm tih engvângin nge kan sawi theih? A chhan chu Jehova duhzâwng nêna inmila thil tih a tum tlat vâng a ni.
19 Ṭha famkim lo kan ni chung pawhin, Jehova duhsak kan ni reng thei a. Chutiang nih chu tum tlat chungin, Pathian Thu taima takin zir ila, chuta ṭanga kan thu zirte chu ngun taka chhût a, thinlunga vawng tlatin, chu mi mil chuan hma i la vat ang u. Chutianga kan tih chuan: “I duhzâwng tih mi zirtîr ang che” tia inngaitlâwm taka dîltu, fakna hla phuahtu ang hian Jehova hnênah kan ṭawngṭai ve tihna a ni ang. (w12-E 11/15)
[Zirlai Atâna Zawhnate]
[Phêk 10-naa milem]
Davida’n Saula tihhlum theihna hun remchâng a neih lai khân chutianga ti lo tûrin engin nge dang?
[Phêk 11-naa milem]
Davida’n a mi pathumte tui rawn lâksak a in duh loh aṭangin eng nge kan zir theih?
