Enkawltu Rinawm I Ni!
Enkawltu Rinawm I Ni!
“Mahni ta pawh in ni lo.” —1 KOR. 6:19.
ENGTIN NGE KAN CHHAN ANG?
Hmân laia enkawltute mawhphurhna chu eng nge ni?
Pathianin enkawltua a dah zawng zawngte’n eng mawhphurhna nge an neih?
Enkawltu nihna min pêk chu engtin nge kan thlîr ang?
1. Mite’n bâwih tih hi eng angin nge an ngaih?
KUM 2,500 vêl kal ta khân, Grik ziaktu pakhat chuan: “Tumahin bâwih nghâwngkawl chu duh rêng vângin an bât lo,” tiin a ziak a. Tûn laia mi tam takte chuan chu thu chu an ṭâwmpui thlap ang. Bâwih han tih hian hnehchhiaha awm leh sal tâng, an hnathawh leh inpêknain anmahni hlâwkna tûr ni lova, an pute leh anmahni awpbettute tâna hlâwkna thlentute chu rilruah a lo lang ṭhîn.
2, 3. (a) Krista bâwih, a nih loh leh chhiahhlawh inhuam takte’n eng dinhmun nge an chelh? (b) Enkawltu nihna chungchângah eng zawhnate nge kan ngaihtuah ang?
2 Mahse, Isua chuan a zirtîrte chu chhiahhlawh, a nih loh leh bâwih inngaitlâwm tak an ni dâwn tih a sawi a. Heta bâwih tih hi Kristian dikte zah lohna emaw, awpbehna emaw lam a ni lo thung. Hêng bâwihte hi dinhmun zahawm takah an awm a, mite rin an kai bawk a ni. Entîr nân, Isua’n a thih hma lawka “bawi” pakhat chungchâng a sawi hi han ngaihtuah teh. Krista chuan “bawi rinawm, fing tak” hnênah hna thawh tûr a pe dâwn tih a sawi lâwk a ni.—Mt. 24:45-47.
3 Luka ziakah chuan “bawi” tih aiah “sum enkawltu” tih thu mal hman a ni hi lo chhinchhiah ang che. (Luka 12:42-44 chhiar rawh.) Tûna Kristian rinawm a la damte zînga a tam zâwkte chu sum enkawltu, a nih loh leh bâwih rinawm pâwla mi an ni lo va. Amaherawhchu, Bible chuan Pathian rawngbâwltu zawng zawngte’n enkawltu nihna an nei vek tih a târ lang a ni. Chutah chuan eng mawhphurhnate nge tel? Chûng mawhphurhnate chu engtin nge kan thlîr ang? A chhânna hre tûrin hmân laia enkawltute mawhphurhna neih chu i lo bih chiang ang u.
ENKAWLTUTE MAWHPHURHNA CHELH CHU
4, 5. Hmân laia enkawltute chuan eng mawhphurhnate nge an neih? Entîrna pe rawh.
4 Hmân lai chuan, enkawltu chu, a pu in chhûngkhur emaw, sumdâwnna emaw enkawl tûra ruat, bâwih rinawm tak a ni ṭhîn a. Enkawltu chuan thuneihna engemaw chen a nei a, in chhûnga an thil neih te, sum leh pai te, leh chhiahhlawh dang te enkawl tûra ruat a ni tlângpui ṭhîn a ni. Chu chu Abrahama thil neih tam tak enkawl tûra ruat Eliezera chungchângah kan hmu thei a. Abrahama chuan a fapa, Isaaka tâna nupui thlansak tûra Mesopotamia rama a tirh pawh kha Eliezera hi a nih ngei a rinawm. Mawhphurhna pawimawh leh ropui a va ni êm!—Gen. 13:2; 15:2; 24:2-4.
5 Abrahama tu-chhuan Josefa pawhin Potiphara in chhûngkhur a enkawl bawk a. (Gen. 39:1, 2) A hnuah chuan, Josefa chuan “Josefa in enkawltu,” tia koh, ama in ngei enkawltu a nei ve ta a ni. Ani chuan Josefa unau sâwmte chungah khualchhâwn thiamna a lo lantîr a. Tichuan, Josefa thupêk angin tangka no chu ‘rûkbo’ ang taka lang tûrin ruahmanna ṭha tak a siam a. Enkawltute chuan rin an kai tih a chiang hle a ni.—Gen. 43:19-25; 44:1-12.
6. Kristian upate chuan eng enkawltu nihna chanvo hrang hrang nge an neih?
6 Kum zabi tam tak a liam hnuah tirhkoh Paula chuan Kristian hotute chu “Pathian sum enkawltu” tûr an nih thu a sawi a. (Tit. 1:7) “Pathian pâwlho” vêng tûra ruat hotute chuan kohhranah kaihhruaina an pe a, hma an hruai bawk a ni. (1 Pet. 5:1, 2) Mawhphurhnate chu a inang lo hlawm ngei mai. Entîr nân, tûn laia Kristian upa a tam zâwkte chuan kohhran pakhatah rawng an bâwl a. Traveling overseer-te chuan kohhran tam takah rawng an bâwl thung. Tin, Branch Committee member-te chuan ram chhûnga kohhran zawng zawngte an enkawl a. Pathian hnêna “chanchin sawi tûr” an nih vek avângin, an tih tûr rinawm taka thawk ṭheuh tûra beisei an ni.—Heb. 13:17.
7. Kristian zawng zawngte chu kawng engemaw takin enkawltu an ni tih engtin nge kan hriat theih?
7 A nih chuan, upa ni lo Kristian rinawm tam takte chungchâng hi engtin nge ni ve ta ang le? Tirhkoh Petera chuan Kristiante hnêna a lehkha ziakah heti hian a sawi a ni: “Mi tinin thilpêk in hmuh ang zêlin Pathian khawngaihna tinrêng enkawltu ṭhate angin, chûng chuan rawng inbâwl tawn ṭheuh rawh u,” tiin. (1 Pet. 1:1, 2; 4:10) Pathian chuan kan chungah a khawngaihna lantîrin, kan Kristian unaute tâna hman ṭangkai theih tûr thilpêk te, thil neih te, theihna te, a nih loh leh thiamna te min pe vek a ni. Chuvângin, Pathian rawngbâwltu zawng zawng chu enkawltute an ni a, an enkawltu nihna chuan zahawmna te, mite rinkaina te, leh mawhphurhnate a keng tel a ni.
PATHIAN TA KAN NI
8. Thu bul pawimawh tak pakhat kan hriat reng ngai chu eng nge?
8 Kristian zawng zawngte’n enkawltu kan nih anga kan hriat reng ngai thu bul pathumte chu i lo ngaihtuah ang u. Pakhatnaah chuan: Kan vaiin Pathian ta kan ni a, a lakah mawhphurhna kan nei vek a ni. Paula chuan: “Mahni ta pawh in ni lo va, mana [Krista inthawina thisena] lei in ni tawh asin,” tiin a ziak a. (1 Kor. 6:19, 20) Jehova ta kan nih avângin, a thupêkte zawm chu kan bâ a ni, a thupêkte chu a khirh si lo va. (Rom 14:8; 1 Joh. 5:3) Krista bâwih kan lo ni ta bawk a. Hmân laia enkawltute angin, zalênna nasa tak pêk kan ni a—kan zalênna neih erawh chuan chin tâwk a nei a ni. Kan mawhphurhnate chu kaihhruaina kan dawn ang thlapin kan hlen tûr a ni a. Rawngbâwlnaah eng chanvo pawh chang mah ila, Pathian leh Krista chhiahhlawh kan ni reng tho a ni.
9. Engtin nge Isua chuan bâwih leh a pu inlaichînna chu tehkhin thu hmanga a sawi?
9 Isua chuan bâwih leh a pu inlaichînna hre thiam tûrin min ṭanpui a. Ṭum khat chu a zirtîrte hnênah bâwih, ni lênga hna a thawh hnua rawn haw chanchin a hrilh a. A pu chuan: “Chaw rawn kîl nghâl rawh,” a ti em? Ti lo. Ani chuan: “Ka ei tûr mi siamsak la, puan veng la, ka ei ka bâr zawh hma loh chu ka rawng mi bâwl rawh; chu mi hnuah chuan nangin i eiin i bâr ang chu,” a lo ti zâwk a ni. Engtin nge Isua’n chu tehkhin thu chu a hman? “Chutiang bawkin nangni pawhin in hnêna thupêk zawng zawng anga in tih hnuin, ‘Bâwih ṭhahnem lo kan ni e; kan tih tûr rêng a ni kan tih ni,’ ti rawh u,” tiin a hrilhfiah a ni.—Lk. 17:7-10.
10. Pathian Jehova’n a rawngbâwl tûra kan thawhrimna a hlut tih engin nge târ lang?
10 Pathian Jehova chuan a rawngbâwl tûra kan thawhrimna chu a hlut hle a. Bible chuan: “In hnathawh leh a hming chunga hmangaihna in lantîr . . . chu theihnghilh tûrin Pathian chu mi fel lo a ni si lo va,” tiin min tiam a ni. (Heb. 6:10) Jehova chuan kan tih theih bâk min phût ngai lo va. Chu bâkah, ti tûra min tih a piang chu kan tâna ṭha ber tûr a ni a, phurrit a ni ngai lo bawk. Isua tehkhin thu nêna inmil takin, bâwih chuan mahni lâwmna a zawng lo va, a pu duhzâwng a dah hmasa a ni. A sawi tum chu, Pathian hnêna kan inpumpêk hian, kan nunah a duhzâwng dah hmasak ber kan thlang tihna a ni. Chu chu i pawm a ni lâwm ni?
JEHOVA’N TI TURA MIN BEISEI ṬHEUH CHU
11, 12. Enkawltu kan nih angin eng mizia nge kan lantîr ang a, eng nge kan pumpelh ngai?
11 Thu bul pahnihna chu: Enkawltu kan nih angin, kan vai hian tehna thuhmun kan zâwm ṭheuh a ni. Kristian kohhran chhûngah hian mawhphurhna ṭhenkhat chu mi tlêm tê hnênah pêk a ni ngei mai. Amaherawhchu, mawhphurhna tam zâwk chu kan vaia tân a ni. Entîr nân, Krista zirtîr leh Jehova Thuhretute kan nih angin, inhmangaih tawn tûra thupêk kan ni. Isua chuan chu hmangaihna chu Kristian dikte chhinchhiahna a nih thu a sawi a. (Joh. 13:35) Mahse, kan hmangaihna chuan kan unaute chauh a huam lo thung. Kan rinna min ṭâwmpui lote chungah pawh hmangaihna lantîr kan tum tlat a. Chu chu mi tinin kan tih theih leh kan tih ngei tûr a ni.
12 Nungchang ṭha kan neih a ngai bawk a. Pathian Thuin a duh loh nungchang leh nun dân pumpelh chu kan duh a ni. Paula chuan: “Inngaih hmangte emaw, milem betute emaw, uirête emaw, mi hurte emaw, mawngkawhurte emaw, rûk hmangte emaw, mi duhâmte emaw, zu ruih hmangte emaw, mi hau hmangte emaw, hlêprute emawin Pathian ram an luah lo vang,” tiin a ziak a. (1 Kor. 6:9, 10) Pathian tehna felte zâwm tûr chuan thawhrim a ngai ngei mai. Mahse, chûng thawhrimnate chu a manhla a; hrisêlna ṭha awmtîrtu nun dân te, mi dangte nêna inlaichînna ṭha te, leh Pathian pawm tlâk nihnate pawh tiamin hlâwkna tam tak min pe a ni.—Isaia 48:17, 18 chhiar rawh.
13, 14. Kristian zawng zawng chu eng mawhphurhna nge pêk kan nih a, chu chu engtin nge kan thlîr ang?
13 Enkawltu chuan hna thawh tûr a nei tih pawh hi ngaihtuah lêt leh la. Keini pawhin kan nei ve a ni. Thilpêk hlu tak—thutak hriatna pêk kan ni a. Pathian chuan chu hriatna chu mi dangte hnêna kan hrilh ve a beisei a ni. (Mt. 28:19, 20) Paula chuan: “Keiniho hi Krista rawngbâwltuah leh Pathian thurûk enkawltuah miin min ngai rawh se,” tiin a ziak a. (1 Kor. 4:1) Ani chuan he enkawltu nihnaah hian “thurûk” ṭha taka enkawl leh a Pu, Isua Krista kaihhruaina anga rinawm taka mi dangte hriattîr chu a tel tih a hria a ni.—1 Kor. 9:16.
14 Tihah chuan, mi dangte hnêna thutak hriattîr chu an chunga hmangaihna lantîrna a ni si a. Kristian tinte dinhmun chu a inang lo ngei mai. Rawngbâwlnaa kan thawh theih zât pawh a inang vek lo va. Chu chu Pathian Jehova’n a hre thiam a ni. Thil pawimawh chu mi tinin kan tih theih apiang tih hi a ni a. Chutiang chuan Pathian leh kan ṭhenawmte chungah mahni hmasial lo hmangaihna kan lantîr tihna a ni.
RINAWM A PAWIMAWHNA
15-17. (a) Engvângin nge enkawltu chu a rinawm a pawimawh? (b) Engtin nge Isua’n rinawm loh a pawizia tehkhin thu hmanga a târ lan?
15 Thu bul pathumna chu a hmasa pahnih nên khân a inkûngkaih hnai hle a: Kan rinawmin, mite rin kan kai tûr a ni, tih a ni. Enkawltu chuan mize ṭha leh theihna tam tak a nei mai thei a; mahse, a pu tâna a rinawm loh emaw, mawhphurhna a hlen loh emaw chuan chûng a enga mah chuan awmzia a nei lo vang. Enkawltu ṭangkai tak leh hlawhtling tak ni tûr chuan rinawmna a pawimawh a. Paula’n: “Hetah hian enkawltu chu mi rinawm nih a ngai bawk a ni,” tia a ziak kha ngaihtuah lêt leh ang che.—1 Kor. 4:2.
16 Kan rinawm chuan, malsâwm kan ni ang; chu chu a chiang a ni. Kan rinawm loh erawh chuan kan chân thung ang. He thu bul hi Isua talent tehkhin thuah kan hmu a ni. A pu suma rinawm taka “sumdâwng” bâwih chuan fak a hlawh a, nasa taka malsâwm a ni. A puin a thil neih a kawltîr chunga mawhphurhna hlen lo bâwih chu “sual,” ‘zawmthaw,’ leh “ṭhahnem lo” anga ngaih a ni a. A hnêna talent pêk chu lâksak a ni a, amah ngei pawh paih chhuahin a awm bawk a ni.—Matthaia 25:14-18, 23, 26, 28-30 chhiar rawh.
17 Ṭum dangah pawh Isua chuan rinawm loh pawizia a târ lang leh a. Ani chuan: “Mi hausa tuin emaw sum enkawltu a nei a; chu mi chuan a sum a khawhralsak mai mai kawngah a hnênah an hêk a. Tichuan ani chuan amah chu a ko va a hnênah, ‘I chungchâng thu ka hriat hi engtizia nge ni? I sum enkawl chanchin mi ziah vek rawh; tûn achinah sum enkawltuah i ṭang thei tawh lo vang,’ a ti,” tiin a sawi a. (Lk. 16:1, 2) Enkawltu chuan a pu sum a khawhralsak avângin, a pu chuan bân a tum ta a ni. Kan tâna zir tûr pawimawh tak a va ni êm! Ti tûra min beisei thila rinawm loh chu kan duh ngai hauh lo vang.
MI DANGTE NENA INKHAIKHIN A FINTHLAK EM?
18. Engvângin nge mi dangte nên kan inkhaikhin loh vang?
18 ‘Enkawltu ka nihna chu engtin nge ka thlîr?’ tiin kan inzâwt ṭheuh thei a. Mi dangte nêna kan inkhaikhin hian harsatna a lo awm thei a ni. Bible chuan: “Mi tinin mahni thiltih fiah ṭheuh zâwk rawh se, chu mi hunah chuan mi dang chung ni lovin, mahni chung chauhvah chhuan tûr a nei ang,” tiin min fuih a ni. (Gal. 6:4.) Kan thil tihte mi dangte thiltih nêna khaikhin ai chuan, a mi mala kan tih theih chu kan ngaihtuah zâwk tûr a ni a. Chu chuan chapona lakah mai ni lovin, lunghnual lo tûr pawhin min vênghim ang. Kan hlutna kan chhût laiin dinhmun a inthlâk thleng thei tih kan hre tel tûr a ni. Hrisêl lohna te, kum upatna te, a nih loh leh mawhphurhna chi hrang hrangte avângin tûn hmaa kan lo tih ṭhinte chu kan ti thei tawh lo pawh a ni thei a. Kawng leh lamah chuan tûna kan tih aia tam pawh hi kan la ti thei mai thei bawk. Chutiang a nih chuan, engvângin nge hma sâwn zêl i tum loh vang?
19. Chanvo engemaw kan chang lo a nih pawhin, engvângin nge kan lunghnual loh vang?
19 Thil dang kan ngaihtuah leh tûr chu mawhphurhna kan chan mêkte leh chan kan duhte chungchâng hi a ni. Entîr nân, unaupa chuan kohhranah upa anga rawngbâwl emaw, inkhâwmpuitea chanvo chan emaw chu a duh thei a. Chutiang chanvo hlute chang thei tûra thawhrim chu thil ṭha a ni; mahse, kan inbeisei anga chutiang chanvote pêk kan nih loh pawhin kan lunghnual tûr a ni lo. Kan hriat thiam nghâl mai loh chhan engemaw avângin, chanvo ṭhenkhat chu kan beisei aia tlai daiha pêk kan ni thei a ni. Mosia chu Aigupta aṭanga Israelte hruai chhuak tûrin a inpeih hmêl tawh hle a; mahse, a hruai chhuah hmain kum 40 lai a nghah a la ngai tih hre reng rawh. Chu chuan luhlul leh hel hmangte kaihhruai tûra a mamawh miziate neihna hun tam tâwk a pe a ni.—Tirh. 7:22-25, 30-34.
20. Jonathana thiltawn aṭangin eng nge kan zir theih?
20 A châng chuan chanvo engemaw bîk chu pêk kan ni ngai lo pawh a ni thei a. Chutiang chu Jonathana pawhin a tawng a ni. Saula fapa a ni a, chuvângin Israel ram puma lal la ni mai tûr a ni a. Mahse, amah aia naupang daih, Davida chu lal tûrin Pathianin a thlang ta zâwk a ni. Chu chu Jonathana’n engtin nge a ngaih? A pawm a, a nun thâp hialin Davida chu a ṭanpui a. Davida hnênah: “Israelte lalah i awm ang a, kei i dawttu ka ni ang,” tiin a hrilh a ni. (1 Sam. 23:17) A sawi tum i hre thiam em? Jonathana chuan a dinhmun chu a pawm a, a pa angin, Davida chu a thîk ve lo. Mi dangte hnêna chanvo pêk thîk ai chuan, kan mawhphurhna neih chu a ṭha thei ang bera hlen chhuah ṭheuh kan tum zâwk thei a ni. Khawvêl tharah chuan, Jehova’n a chhiahhlawh zawng zawngte duhzâwng thil ṭhate chu a tihlawhtling ngei dâwn a ni.
21. Engtin nge enkawltu kan nihna chu kan thlîr ang?
21 Enkawltu rinawm kan nih angin, bâwihte’n an tawrh ṭhin hnehchhiahna leh mittui tlâkna chu kan tawng lo tih i hre ṭheuh ang u. Chu mi ang lo takin, he khawvêl kalhmang tâwpna hunah hian, thawh nawn leh ngai tawh loh tûr chanchin ṭha hril tûra chanvo ropui tak pêk kan ni a. Chu hna kan thawh lai chuan kan mawhphurhnate kan hlen chhuah dân tûrah zalênna tam tak kan nei a ni. Chuti a nih chuan enkawltu rinawm tak niin, lei leh vân zawng zawnga ropui ber rawngbâwlsak theihna chanvo kan neih chu i ngai hlu ang u. (w12-E 12/15)
[Zirlai Atâna Zawhnate]
[Phêk 20-naa milem]
Kan chanvo chante rinawm takin i thawk ang u
