“Khualzin” Anga Awm Rengin
“Khualzin” Anga Awm Rengin
“Mikhual leh khualzin in nih avângin . . . tisa châknate bânsan tûrin ka ngên a che u.”—1 PET. 2:11.
ENGTIN NGE KAN CHHAN ANG?
Engvângin nge hriak thihte chu khualzin anga kan sawi theih?
Engtin nge ‘berâm dangte’ chu khualzin anga sawi theih an nih?
Nakin hun lo thleng tûrah eng nge i nghahhlelh?
1, 2. Petera’n tute nge “thlante” tia a sawi chu ni a, engvângin nge “khualzin” tia a sawi?
ISUA vâna a chhoh hnu kum 30 vêlah, tirhkoh Petera chuan ‘Ponto ram te, Galatia ram te, Kappadokia ram te, Asia ram te, Bithunia ram tea darhho . . . hnênah’ chuan lehkha a thawn a. (1 Pet. 1:1, 2) Ani chuan “thlante” tih thu mal hi amah anga thlarauva hriak thih, vâna Krista nêna rorêl tûra ‘beiseina nung hmu tûra hrinte’ sawi nân a hmang tih a chiang hle. (1 Petera 1:3, 4 chhiar rawh.) Mahse, engvângin nge chu mi hnu chuan chûng thlante chu “mikhual leh khualzin” tia a sawi? (1 Pet. 2:11) Chu bâkah, khawvêl pum puia Thuhretu 650 zêla 1 vêl chauh hriak thih anga an inchhâlna hian tûn laiah kan tân awmzia eng nge a neih?
2 Kum zabi khatnaa hriak thihte sawi nâna “khualzin” tih thu mal hman chu a inâwm hle a ni. Anni chu an pâwla mi tûn laia a la damte ang bawkin he leia awm hlen tûr an ni lo. Hriak thih “pâwl tlêmte” zînga mi ngei, tirhkoh Paula chuan heti hian a hrilhfiah a ni: “Keini zawng vân khua leh tui kan ni si a, vân aṭanga min chhandamtu Lal Isua Krista lo kal tûr chu nghâkhlel takin kan thlîr a ni,” tiin. (Lk. 12:32; Phil. 3:20) Hriak thihte chu an thihin “vân khua leh tui” nihna pêk an ni a, lei chhuahsanin dinhmun ṭha zâwk daih vâna thih theih lohna nun chu an han chang ta a ni. (Philippi 1:21-23 chhiar rawh.) Chutiang chuan, Setana thununna hnuaia awm he leia “khualzin” tak tak ang maia sawi theih an ni.
3. ‘Berâm dangte’ chungchângah eng zawhna nge lo chhuak?
3 Mahse, ‘berâm dangte’ chungchâng chu eng nge? (Joh. 10:16) He leia awm hlen tûrin Bible ṭanchhan beiseina nghet an nei a ni lâwm ni? Nei ngei mai, chu chu chatuana an awmna tûr hmun a ni si a! Chuti chung chuan, anni pawh tûnah rih chuan khualzin anga ngaih theih an ni. Eng kawngin nge?
‘THIL SIAM ZAWNG ZAWNG CHU AN RUM’
4. Khawvêl hruaitute’n eng nge an tihtâwp theih loh?
4 Setana kal hmang suaksual awm phalsak a la nih chhûng chuan, Kristiante pawh tiamin mi tinte hian Pathian Jehova laka Setana helna rah chhuah chu kan la tuar chhunzawm zêl ang. Rom 8:22-ah heti hian kan chhiar a ni: “Thil siam zawng zawngte chu tûn thlengin rûm leh nauvei na tuarin an awm hlawm tih kan hre si a,” tiin. Chu chu khawvêla hruaitute, scientist-te, leh tlâwmngai pâwlte chuan tihtâwp tumin theih tâwp chhuah mah se, an titâwp thei lo a ni.
5. Kum 1914 aṭang khân, mi maktaduai têlte chuan eng tih nge an thlan a, engvângin nge?
5 Chuvângin, kum 1914 aṭang khân mi maktaduai têlte chuan Pathianin Lala a ruat, Krista Isua hnuaia mahni duh thu ngeia intukluh chu an thlang tawh a ni. Anni chuan Setana khawvêla mi nih chu an duh lo va, an thlâwp duh hek lo. Chu ai chuan, Pathian Ram thlâwp nâna an nun leh an thil neihte hman chu an duh zâwk a ni.—Rom 14:7, 8.
6. Eng tin nge Jehova Thuhretute chu mikhual anga sawi theih an nih?
6 Ni e, Jehova Thuhretute chu ram 200 chuangah khua leh tui dân zâwm ṭha tak an ni a, khawi hmuna cheng pawh ni se, an vaiin mikhual ang an ni. Anni chu an hun laia politics leh khawtlâng buainaa inrawlh lovin, an tualdâwih tlat a. Tûnah ngei pawh Pathian siam khawvêl thar khua leh tui angin an inngai tawh a ni. He khawvêl kal hmang ṭha famkim lo tâwp thuai tûra khualzin an nih avângin an lâwm hle a ni.
7. Engtin nge Pathian chhiahhlawhte chu an awm hlen ang a, khawi hmunah nge?
7 Krista chuan Setana khawvêl suaksual tichhe tûrin a thuneihna a rawn hmang thuai ang. Krista sawrkârna ṭha famkim chuan leia sualna leh lungngaihna a rawn titâwp ang a. Jehova’n lal tûra dikna a neih laka hel, hmuh theih leh hmuh theih loh zawng zawngte chu a rawn tibo vek dâwn a ni. Pathian chhiahhlawh rinawmte chuan lei Paradise-a awm hlen theihna hun ṭha an nei ang. (Thu Puan 21:1-5 chhiar rawh.) Chutih hunah chuan thil siamte chu “chhiatna bâwih ata tihchhuahin an awm ang a, Pathian fate zalênna ropuiah chuan an lût” vek tawh dâwn a ni.—Rom 8:21.
KRISTIAN DIKTE HNEN ATANGIN ENG NGE BEISEI A NIH?
8, 9. ‘Tisa châknate bânsan tûra’ Petera sawi awmzia chu hrilhfiah rawh.
8 Petera chuan: “Duh takte u, mikhual leh khualzin in nih avângin, thlarau do ṭhîntu tisa châknate bânsan tûrin ka ngên che u,” tia a sawi chhunzawm khân Kristiante hnên aṭanga thil beisei chu a hrilhfiah a ni. (1 Pet. 2:11) Chu thurâwn chu Kristian hriak thihte tâna sawi ni mah se, Isua berâm dangte tân pawh a ni.
9 Siamtu duhzâwng anga tihpuitlin a nih chuan châkna ṭhenkhat chu amah mai chuan sual a ni lo. Nunah hlimna a belhchhah zâwk mah a ni. Entîr nân, chaw ṭha leh in tûr ṭha châkna te, mi tihahdam thei tak intihhlimna neih châkna te, ṭhian ṭha kawm châkna te neih chu thil pângngai tak a ni a. Mahni nupui pasalte nêna tisa châkna hman duhna neih chu thil pângngai tak a ni bawk. (1 Kor. 7:3-5) Amaherawhchu, Petera chuan “tisa châknate” tia a sawi hi “thlarau do ṭhîntu” chauh a sawina a ni a. Chu mi awmzia tihfiah nân Bible lehlin ṭhenkhat chuan “hurna” (King James Version), a nih loh leh “châkna sual” (New International Version) tiin a sawi a ni. Jehova târ lan thiltum leh Pathian nêna inlaichînna ṭha a chhe zâwnga nghawng thei mihringte neih châkna eng pawh enfiah reng tûr a ni tih a chiang hle. Chutiang a nih loh chuan, Kristianin a nun chhanhim nâna beiseina a neih chu a derthâwng hle thei a ni.
10. Setana’n a khawvêla mi ni tûra Kristiante a beih dân ṭhenkhat chu eng nge ni?
10 Setana thiltum ber chu Kristian dikte’n he khawvêla “khualzin” anga an inngaihna tihchhiatsak hi a ni. Hausak âtchilhna îtawm tak te, nungchang chhiatnaa thlêmna te, challan duhna te, engkima a hmasa ber nih duhna te, leh mahni ram chhuan bîk tlatna te—chûng zawng zawng chu Setana thang a ni a, kan hre thiam tûr a ni. Chûng tisa châkna ṭha lote lakah chuan inthiar fihlîm tum tlatin, Setana khawvêl suaksual zînga mi nih kan duh lohzia chiang takin kan târ lang a. Khualzin mai anga kan nunzia kan târ lang bawk. Kan thil duh ber leh tihpuitlin tum tlat chu Pathian felna khawvêl thara awm hlen hi a ni.
NUNGCHANG ṬHA
11, 12. A châng chuan ram dang mite chu eng anga ngaih nge an nih a, Jehova Thuhretute chungchângah eng nge sawi theih awm?
11 Petera chuan châng 12-naah: “Jentailte zînga in chêtzia chu mawi tak ni rawh se, chutichuan thil tisualtute anga an sawichhiat che u kawngah chuan in thil tihṭhat an hmuhte avângin fanin an awm hunah chuan Pathian an chawimawi thei ang,” tia sawiin Kristian ‘khualzinte’ laka thil beisei chu a hrilhfiah zawm a ni. A châng chuan mahni ram ni lova awm, ram dang mite chu sawisêl an ni ṭhîn a. Ṭhenawmte laka an dang lam vâng maiin thil sual titute anga thlîr hial pawh an ni thei. An thusawi te, an chêt dân phung te, an silhfên te, leh an lan dânte chu engtin emaw takin a dang lam pawh a ni thei a. Mahse, an nungchang ṭhatna chuan dang lam bîk nia mite sawisêlna chu a dik lo tih a tilang a ni.
12 Chutiang bawkin, Kristian dikte chu kawng hrang hrangin an ṭawngkam chhuakah te, intihhlimna an thlanah te, leh an ṭhenawmte lakah pawh an dang lam a ni. An silhfên leh inchei dân te chuan vêng chhûnga mi a tam zâwkte lakah a tidang lam fo ṭhîn. A châng chuan chutianga an dang lamna avâng chuan mite’n thil dik lo ti-ah an puh phah ṭhîn a. Mi dangte erawh chuan an nun dân chu an fak thei thung a ni.
13, 14. Engtin nge finna chu ‘thiltih aṭangin a dikzia a lan’? Entîrna pe rawh.
13 Ni e, nungchang ṭha chuan dik lo taka sawisêlna chu a tireh thei a ni. Ṭha famkima Pathian laka rinawm thei awmchhun Isua hial pawh dik lo taka puh a ni a. Ani chu “chaw heh mi, uain heh mi, chhiahkhawntute leh mi sualte ṭhian,” tiin mi ṭhenkhatte’n an ko bawk. Mahse, fing taka Pathian rawng a bâwlna chuan thil sual ti anga puhna chu a dik lohzia a tilang thung a ni. Isua chuan: “Finna chu a thiltih aṭangin a dikzia a lang,” tiin a sawi. (Mt. 11:19) Chu chu tûnah pawh hian a la dik reng a ni. Entîrna atân, Germany ram, Selters-a Bethel-a hnathawk tûra inpe unaute chu an ṭhenawma mi ṭhenkhatte chuan mak ti takin an en a. Mahse, an vêng chhûnga mayor chuan an thlavâng hauhsakin: “Chuta rawngbâwl Thuhretute chuan nun dân kawng bîk an nei a; mahse, vêng chhûnga mite chu engti kawng mahin a tibuai lo,” tiin a sawi a ni.
14 Entîrna dang atân, Russia ram Moscow khuaa awm Jehova Thuhretute chu thil sual tam tak tia puh an ni a. Ṭhenkhat chuan Thuhretute chu chhûngkua tikehchhia a, mahni intihlum tûra mite fuihtu ang leh damdawia inenkawlna dawng duh lo angin an sawi a ni. Mahse, France ram Strasbourg khawpuia the European Court of Human Rights chuan June, 2010-ah khân Jehova Thuhretute sakhaw biaknaa Moscow sawrkâr a inrawlh chu a dik lo va, an inkhâwmte tihtâwpsak tûrin dikna a nei lo tih thu tlûkna a siam a. Tin, Russia rama court-te’n Jehova Thuhretute thiltih a dik lohna a finfiah lo va. Chûng court-te chuan an ram dân khauh takte chu Jehova Thuhretute chungah dik lo takin an hmang tih a sawi bawk.
INTUKLUHNA ṬHA
15. Khawvêl puma Kristian dikte chuan eng Bible thu bul nge an zawm?
15 Moscow ram leh khawvêl puma Jehova Thuhretute chuan Petera sawi Kristiante laka thil beisei dang pawh an zâwm thlap a ni. Ani chuan: “Lalpa avâng chuan mihring ruat apiangte hnênah intulût rawh u, chungnunga awm lalber hnênah emaw, . . . Ram Awptu hnênah pawh,” tiin a ziak a ni. (1 Pet. 2:13, 14) Paula pawhin kaihhruaina a pêk angin Kristian dikte chu he khawvêl suaksuala mi ni lo mah se, sawrkâr thuneitua ‘ruatte’ lakah inhuam takin an intulût a ni.—Rom 13:1, 5-7 chhiar rawh.
16, 17. (a) Engin nge sawrkâr dotu kan ni lo tih târ lang? (b) Politics hruaitu ṭhenkhat chuan eng nge an pawm?
16 Jehova Thuhretute chu he khawvêla “khualzin” anga an awm hian mi dangte do nâna ti an ni lo; Politics leh khawtlâng enkawlna lama mite thutlûkna siamah an inrawlh lo va, an dodâl hek lo. Sakhaw ṭhenkhatte ang lo takin, Jehova Thuhretute chu politics-ah an inrawlh lo bawk. Anni chuan politics hruaitute chu mipuite an kaihhruai dân thlâktîr an tum ngai lo. Jehova Thuhretute’n sawrkâr laka hel tumna emaw, mi dangte heltîr tumna emaw an nei anga ngaih chu thil dik lo hulhual a ni.
17 Kristiante chuan ‘lalber chawimawi’ tûra Petera fuihna nêna inmilin vântlâng thuneitute thu zâwmin, an nihna milin zahna leh chawimawina an lantîr a ni. (1 Pet. 2:17) A châng chuan, thuneitute chuan Jehova Thuhretute ngaihmawh chhan tûr an nei lo tih an pawm a. Entîr nân, German rama politician pakhat, an ram state pakhata cabinet minister hlui leh a hnua German parliament-a member ni ta chuan, Jehova Thuhretute chuan Nazi hovin an nghaisak hun chhûng zawng pawh khân nungchang ṭha tak an lantîr tih a sawi a. Thuhretute chuan nghaisak an ni reng chung pawhin, an rinna an phatsan lova, an tânpui mi dangte chungah an ngilnei hle a. Mi ṭhenkhatte chu ram dang mite emaw, sakhua leh politics lama an rinna ṭâwmpui lotute emaw chunga an nunrâwn sâwt êm avângin, chûng miziate chu German ang ramte atân hian a pawimawh hle a tih a sawi belh a ni.
HMANGAIHNA LANTIRIN
18. (a) Engvângin nge unau zawng zawngte hmangaih chu kan tâna thil âwm a nih? (b) Thuhretu ni lo mi ṭhenkhatte’n eng nge an sawi?
18 Tirhkoh Petera pawhin: “Unauhote chu hmangaih rawh u. Pathian ṭih dêk rawh u,” tiin a ziak a. (1 Pet. 2:17) Jehova Thuhretute chuan Pathian tihlâwm loh hlauhna ṭha an nei a, chu chuan a duhzâwng tih duhna a neih zualtîr a. Khawvêl pum puia thil thuhmun duh unaute nêna Jehova rawng an bâwl ho avângin anni chu an hlim hle a ni. Chuvângin, ‘unauhote an hmangaih’ hle a. Tûn lai mahni hmasialna khawvêla hmuh tûr vâng tak, chutiang unau inhmangaihna chuan mi dangte mak tih hlawh châng a nei ṭhîn. Entîr nân, American travel agency-a thawk tour guide pakhat chuan kum 2009-a, German rama Thuhretute international inkhâwmpuiah a chhim tûra lo kal, ram dang mite chunga Jehova Thuhretute târ lan hmangaihna chu mak a ti hle a. Ani chuan tour guide anga kum tam tak hna a thawh chhûngin hetiang hi a la hmuh ngai loh thu a sawi. A hnuah, chu mi chungchâng chu sawiin Thuhretute zînga pakhat chuan: “Kan chanchin a sawi zawng zawngah khân mak tihna leh phûrna a lang a ni,” a ti. I tel tawhna inkhâwmpuiah Thuhretute lo hmutu hnên aṭanga chutianga fakna chu i hre ve tawh em?
19. Eng nge tih kan tum tlat ang a, engvângin nge?
19 A chunga kan hmuh tâk zawng zawng—leh a aia tam—hmangin Jehova Thuhretute chuan he Setana khawvêlah hian “khualzin” ang maia an nun tak zetzia an târ lang a ni. Hlim takin chutianga nun reng chu an tum tlat a. Pathian felna khawvêl thara awm hlen tûrin Bible ṭanchhan beiseina an nei a ni. Chu chu i nghâkhlel hle lâwm ni? (w12-E 12/15)
[Zirlai Atâna Zawhnate]
[Phêk 23-naa milem]
Setana khawvêl thlâwptu nih kan duh lo. Pathian khawvêl thar kan thlâwp
[Phêk 25-naa milem]
Bible thutak chuan he Russian chhûngkua hi inpumkhat tûrin a ṭanpui
