‘Khualzinte’ Chu Biakna Dikah An Inlungrual
‘Khualzinte’ Chu Biakna Dikah An Inlungrual
“Ram dang mite . . . chu in leilettu-ahte leh in grêp hrui enkawltuahte an awm ang. Nangni erawh chu, ‘LALPA puithiamte,’ tia vuahin in awm ang.”—IS. 61:5, 6.
ENGTIN NGE KAN CHHAN ANG?
Engtin nge mi ṭhenkhatte chuan ram dang mite chu an thlîr a, Bible thlîr dân erawh engtin nge a dang lam?
Hnam tina mite hnênah eng sâwmna nge pêk chhuah a nih?
Eng kawngin nge ram dang mi awm lohna khawvêlah kan awm dêr tawh?
1. Engtin nge mi ṭhenkhat chuan ram dang mite chu an ngaih a, chu chu engvângin nge a dik loh?
THUZIAK hmasa lama târ lan tâk ang khân mite chuan “ram dang mi” tih thu mal hi mi dangte ngaihnêpna, hmuhsitna, leh a lang a pauva huatna târ lanna ang hialin an hmang a. Mahni rama mite aia ram dang mite hnuaihnung zâwka ngaih chu anmahni zah lohna a ni. Chu bâkah, chutiang rilru put hmang chuan thil nih dân phung an hriat lohzia a târ lang. The Races of Mankind tih thuziak chuan: “Mihringte zînga hnam tinte chu Bible sawi angin unau an ni,” tiin a sawi a. Unaute chu inang lo hlawm ṭhîn hle mah se, unau an ni reng tho a ni.
2, 3. Jehova’n ram dang mite a thlîr dân chu eng nge ni?
2 Dik tak chuan, khawi hmunah pawh awm mah ila, ram dang mite chu kan zîngah an awm reng a. Dân thuthlung avânga Pathian Jehova nêna inlaichînna ṭha bîk tak nei hmân lai Israelte zîngah pawh khân ram dang mite an awm tho a. Israel mi ni lote dikna neih chuan chin tâwk a nei a; mahse, Israelte chuan anni chu zah tak leh dik takin an cheibâwl tûr a ni. Kan zui atâna entawn tûr ṭha a va ni tak êm! Kristian dikte zîngah chuan thlei bîk neihna emaw, inthliar hranna emawin hmun a chang lo. Engvângin nge? Tirhkoh Petera chuan: “Pathianin mi duhsak bîk a nei lo tih dik takin ka hria e; nimahsela hnam tin zîngah tupawh amah ṭiha fel taka ti apiang a lâwmzâwng mi an ni ṭhîn,” tiin a sawi a ni.—Tirh. 10:34, 35.
3 Hmân lai Israel rama ram dang mite chuan chuta chên chu an hlâwkpui a ni. Engvângin nge? A chhan chu ram dang mite chu Pathian Jehova’n a pawm vâng a ni. A hnuah chuan tirhkoh Paula’n Jehova chungchângah: “Pathian chu Judate Pathian chauh em ni? Jentailte Pathian pawh a ni ve lo vem ni? Ni ve e. . . . Jentailte Pathian pawh a ni ve ang chu,” tiin a sawi a ni.—Rom 3:29, 30; Joel. 2:32.
4. Engvângin nge “Pathian Israelte” zîngah tumah ram dang mi anga ngaih an nih loh?
4 Thuthlung thar hmangin Kristian hriak thih kohhran chuan Pathian nêna inlaichînna ṭha bîk nei Israel hnam tak tak chu a rawn thlâk a. Chuvângin, “Pathian Israelte” tia koh an ni. (Gal. 6:16) Tin, Paula hrilhfiah angin, he hnam tharah hian, “Grik mi leh Juda mi, serhtan leh tan loh, awze mite, Skuthia mi te, bâwih te, bâwih lo te pawh a awm theih loh; Krista chu engkim ni zâwkin, engkimah a awm bawk a ni.” (Kol. 3:11) Chutiang a nih chuan, Kristian kohhranah ram dang mi a nih theih loh tihna a ni.
5, 6. (a) Isaia 61:5, 6 chungchângah eng zawhna nge chhuak thei? (b) Isaia târ lan “LALPA puithiamte” leh “ram dang mite” chu tute nge an nih? (c) Eng kawngin nge he pâwl pahnihte hi an thawh dun?
5 Kawng leh lamah chuan, mi tuemaw chuan Kristian kohhrana thleng famkim mêk hrilh lâwkna chuanna Isaia bung 61-na chu a ngaihtuah mai thei a. Châng 6-na chuan “LALPA puithiamte” anga rawngbâwl tûrte chanchin a sawi a. Mahse, châng 5-na chuan chûng “puithiamte” thawhpui a, ṭanpuitu tûr “ram dang mite” chungchâng a sawi thung a ni. Hei hi engtianga hriat thiam tûr nge?
6 “LALPA puithiamte” chu ‘thawhlehna hmasa bera tel,’ ‘Pathian leh Krista puithiam, amah nêna kum sângkhat rorêl’ tûr Kristian hriak thihte an ni tih kan hre thiam a ni. (Thup. 20:6) Chu bâkah, lei lam beiseina nei Kristian rinawm tam tak an awm a. Anni chuan vân lama rawngbâwl tûrte chu thawhpuiin, kâwm hlawm mah se, ram dang mite anga sawi theih an ni. “LALPA puithiamte” tâna “leilettu-ahte” leh “grêp hrui enkawltuahte” ṭang anga sawi theihin rawng an bâwlpui a, anni chu hlim taka ṭanpuiin, an thawhpui a ni. Mite thutak hrilh leh zirtîrna hmangin Pathian chawimawi tûrin hriak thihte chu an ṭanpui a. Dik takin, hriak thihte leh ‘berâm dangte’ chuan chatuana Pathian rawngbâwl duh mi rilru ṭha pute chu an zawng chhuak a, hmangaih takin an enkawl a ni.—Joh. 10:16.
ABRAHAMA ANGA “KHUALZIN”
7. Engtin nge tûn laia Kristiante chu Abrahama leh hmân laia mi rinawm dangte ang an nih?
7 Thuziak hmasaa kan hmuh tâk ang khân, Kristian dikte chu Setana khawvêl suaksualah hian ram dang mi, a nih loh leh khualzin ang an ni a. Abrahama pawh tiamin anni chu “mikhual leh khualzin mai an ni” tia sawi, hmân laia mi rinawmte ang an ni. (Heb. 11:13) Nakin huna kan beiseina chu eng pawh ni se, Abrahama neih ang Jehova nêna inlaichînna neih theihna chanvo kan nei a. “‘Abrahama chuan Pathian a ring a, chu rinna chu a felnaah ruat a ni,’ . . . tichuan Pathian Ṭhiana vuahin a awm ta a,” tiin Jakoba chuan a hrilhfiah a ni.—Jak. 2:23.
8. Abrahama hnênah eng thutiam nge pêk a nih a, chu mi thlen famkimna chu engtin nge a ngaih?
8 Pathian chuan Abrahama leh a thlahte hmangin, lei chunga chhûngkua zawng zawng—hnam khat chauh ni lo—chu malsâwm an ni ang tih a tiam a ni. (Genesis 22:15-18 chhiar rawh.) Pathian pêk chu thutiam chu hun rei tak hnua thleng famkim tûr ni mah se, Abrahama chuan chu mi thlen famkimna tûr chu a ring tlat a. A dam chhûng hun chanve aia tam chu a chhûngte nên hmun hrang hrangah an in sawn kual reng a. Chûng hun chhûng zawng chuan Abrahama chuan Jehova nêna an inṭhianna chu a vawng reng a ni.
9, 10. (a) Eng kawngin nge Abrahama chu kan entawn theih ang? (b) Mi dangte hnênah eng sâwmna nge kan pêk chhuah theih?
9 Abrahama chuan a beiseina thlen famkimna hmu tûra a nghah rei zâwng tûr hre lo mah se, Jehova a hmangaihna leh a hnêna a inpumpêkna chu a nghîng ngai lo. Chu thutiam chu a thlîr tlat a, ram ṭhenkhata awm hlen a, inbenbel chu a tum lo. (Heb. 11:14, 15) Neihnunna te, khawtlânga nihna te, a nih loh leh hnathawh lam te lungkham lutuk lovin, Abrahama entawn tûr siam chu zui a, tluangtlam taka nun chu a va finthlâk dâwn em! He khawvêl tâwp ṭêp tawhah hian engvângin nge nun phung pângngai tia mite sawi anga nun chu kan tum tehlul ang? Engvângin nge rei lote daih tûr thilah chuan kan inhnamhnawih ang? Abrahama ang thovin keini pawhin, thil ṭha zâwk daih chu kan nghâk ve a. Kan beiseina a taka a lo thlen thlenga dawhtheihna leh nghah peihna lantîr chu kan inhuam a ni.—Rom 8:25 chhiar rawh.
10 Jehova chuan Abrahama chi thlah hmanga malsâwmna dawng tûrin hnam tina mite chu a la sâwm reng a. Hriak thih “LALPA puithiamte” leh berâm dang “ram dang mite” chuan khawvêl pumah ṭawng 600 chuangin he sâwmna hi an pe chhuak a ni.
HNAM ZAWNG ZAWNGA MITE HMANGAIH RAWH
11. Solomona chuan hnam tina mite chu eng ti tûrin nge a sâwm?
11 Abrahama hnêna Jehova thutiam nêna inmilin, Solomona chuan B.C.E. 1026-a biak in hawnnaah Jehova chawimawinaa tel ve tûrin hnam tina mite chu a sâwm a ni. Tih tak zeta a ṭawngṭainaah chuan: “I mi Israelte ni lo hnam dang mi, i hming avânga ram hla tak ata lo kalte chungchâng thu pawh hi; (i hming ropui tak te, i kut chak tak te, i bân i phar thu te hi an la hre hlawm dâwn si a;) chûngte chuan he mi in lam hawia an rawn ṭawngṭai hunin, nangin i awmna vân aṭangin lo ngaithla la, hnam dang mi chuan a dîl ang ang che chu lo tihsak ang che; i mi Israelte ang bawka khawvêla hnam tinin i hming an hriat a, an ṭih . . . theih nân,” tiin a sawi a ni.—1 Lal. 8:41-43.
12. Engvângin nge mi ṭhenkhatte’n Jehova Thuhretute chu mak tak ang emaw, ‘ram dang mi’ ang emawa an thlîr?
12 Ram dang mi tih chu a nihna takah chuan mahni ram ni lova awm, a nih loh leh tualchhûng mi ni lo sawina a ni a. Hei hian Jehova Thuhretute nihna chu a sawi chiang hle. Khawvêl pum puia ram tam takah chêng mah se, anni chuan vâna Pathian Ram leh a Lal, Isua Krista chauh chu an thlâwp a. Chuvângin, mi ṭhenkhatte’n tûn lai khawtlângah an tih tûr ti lo angin mak takin thlîr mah se, politics-ah chuan an tualdâwih tlat a ni.
13. (a) Eng kawngin nge “ram dang mi” tih ngaih dân hi kan thlîr dân mai a nih? (b) Atîra Jehova thiltumah khân ram dang mi tih ngaih dân hi a tel em? Hrilhfiah rawh.
13 Ram dang mite chu an hnam ze tlângpuite aṭanga hriat theih an ni a. Chu chu an ṭawng hman te, an thil chîn ṭhan dân te, an pian phung te, an chêt dân te, a nih loh leh an inthuam dân te a ni thei. Chuti chung chuan, eng hnam pawh ni ila hêng inan lohnate ai hian mihring zawng zawngte inanna lai chu a pawimawh zâwk a ni. Chuvângin, ram dang mi tih chu kawng ṭhenkhata an dang lam vânga mite thlîr dân mai a ni. Mite kan laka an danglamna ngaihtuah loh kan zir chuan ram dang mi angin kan thlîr lo ngei ang. He leia mi zawng zawngte hi sawrkâr pakhat hnuaia awm ni ta ila chuan, tumah hi ram dang mi an ni lo vang. Dik takin, atîra Jehova thiltum chu mihring zawng zawngte a rorêlna—rorêlna pakhat hnuaia chhûngkaw pakhat anga an inpumkhat hi a ni. Tûnah hian khawvêl puma hnam tina mite tân chutianga tih chu thil theih a ni em?
14, 15. Jehova Thuhretute chuan a pâwl angin eng nge an tih theih?
14 Mahni hmasialna leh mahni hnam chhuan bîknaa khat khawvêlah hian hnam zawng zawng hmangaih theitute hmuh chu a hahdamthlâk hle a. Inthliar hranna neih loh chu thil harsa tak a ni ngei mai. TV-a CNN network dintu Turner-a chuan ram hrang hranga mi thiam bîk, a thawhpuite chungchâng sawiin: “Hêng mite nêna intawn hi thil ropui tak a ni a. Ram dang aṭanga lo kalte chu ‘ram dang mite’ ang ni lovin, he leia khua leh tui ka nihpuite angin ka en a ni. ‘Ram dang mi’ tih thu mal chu mi dangte sawisêlna ṭawngkamah ka ngai ṭan ta a; tichuan, CNN-a thawkte chuan office chhûngah leh an thil puan chhuahnaah chu ṭawngkam chu an hmang thei lo vang, tih dân ka siam ta a ni,” a ti.
15 Khawvêl puma ram tam takah Jehova Thuhretute chuahvin a pâwl angin Pathian ngaihtuahna ang chu an chhawm a. Anni chuan Jehova thil thlîr dân anga thlîr chu zirin, rilru lam leh ngaihtuahna lama ramri khamte chu an ṭhiat thei a ni. Mahni ram mi ni lote chu rinhlelh emaw, a lang apauva huat emaw ai chuan, chûng an mizia leh theihna chi hrang hrang neihte chu thil duhawm tak anga thlîr dân leh hlut dân an zir zâwk a ni. He thil hlen chhuah a nih dân hi i lo ngaihtuah tawh ngai em? Engtin nge chu chuan mi dangte i dâwrnaah a mi mal taka hlâwkna a pêk che?
RAM DANG MITE AWM LOHNA KHAWVEL
16, 17. Thu Puan 16:16 leh Daniela 2:44 thlen famkimna chuan i tân eng awmzia nge a neih?
16 Tûn laia hnam zawng zawngte chuan Pathian rorêlna dovin, Isua Krista leh a vântirhkohte chu indona hnuhnûng berah an hmachhawn thuai ang, chu indona chu “Hebrai ṭawnga Har–Magedon” an tih chu a ni. (Thup. 16:14, 16; 19:11-16) Kum 2,500 chuang kal ta khân, zâwlnei Daniela chu Pathian thiltum dodâltu mihring sawrkârte awm dân tûr sawi lâwk tûra thlarauva thâwk khum a ni a, heti hian a ziak a ni: “Chûng lalte nîah chuan vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng ram zawng zawngte hi a tikeh sawmin a tiral zâwk ang a, kumkhuain a ding reng ang,” tiin.—Dan. 2:44.
17 Chu thil thlen famkimnain i tân awmzia a neih dân tûr chu i ngaihtuah thei em? Tûna mihring zawng zawngte ram dang mi anga min siamtu, mihring siam ramri khamte chu a awm tawh lo vang. Kan lan dâna dang lamna awm thei apiang te leh taksa pian hmang te chu Pathian thil siama ze chi hrang hrang ropui takte târ langtu mai a ni tawh ang. Chutiang beiseina phûrawm tak chuan theih tâwp chhuaha min Siamtu, Pathian Jehova chu chawimawi leh fak zawm zêl tûrin min chêttîr ṭheuh tûr a ni.
18. Tûn hnaia hmasâwnna engin nge “ram dang mi” tih ngaih dân chu tihbo theih a nihzia târ lang?
18 Khawvêl puma chutiang inthlâkthlengna thleng thei tûra rin chu thil âwm lo a ni em? Ni lo ve. A thleng ngei dâwn tih rin chu thil âwm tak a ni zâwk. Tûnah pawh hian, Jehova Thuhretute chuan mi dangte chu ram dang mi angin an ngai tawh lo a ni. Entîrna atân, tûn hnai mai khân hna enkawl a awlsam zâwk nân leh Lalram chanchin ṭha hrilhnaa hlen chhuah tam lehzual a nih theih nân branch office tê zâwkte chu ram danga branch office-te fintîr a ni nual a. (Mt. 24:14) Dânin a phal pawt chuan, chutiang thutlûkna siam a nih hunah ramri inkhamnate chu ngaihthah a ni ṭhîn. Chu chu Jehova’n Rorêl tûra a ruat, Isua Krista’n mihringte indaidanna a ṭhiahzia finfiahna hmuh theih dang leh chu a ni a, ani chu ‘hnehna’ chang thuai tûra chu a va ni êm!—Thup. 6:2.
19. Thutak thu, ṭawng thianghlim chuan eng nge a tihtîr theih?
19 Jehova Thuhretute chu hnam tam tak kal khâwm, ṭawng hrang tam tak hmang an nih avângin thutak thu, hmui thianghlim, a nih loh leh ṭawng thianghlim hman chu an tum tlat a. Chu chuan tihchhiat rual loh inlungrualna a siam a ni. (Zephania 3:9 chhiar rawh.) Hei hi khawvêl puma chhûngkaw pakhat, he khawvêl suaksual tak zînga awm chung pawha chu mi laka inla hrang si chu a ni a. He chhûngkua hi khawvêl lo awm tûr—ram dang mi awm lohna khawvêl—tem lâwkna a ni. Chutah chuan, mi nung dam zawng zawngte chuan atîr lama kan lâk chhâwn lehkhabu pakhatin a sawi: “Mihringte zînga hnam tinte chu Bible sawi angin unau an ni,” tih a dikzia chu lâwm takin an pawm ngei ang.—The Races of Mankind. (w12-E 12/15)
[Zirlai Atâna Zawhnate]
[Phêk 28-naa milem]
Abrahama angin Pathian thutiam thlen famkimna chu i thlîr tlat ang em?
[Phêk 30-naa milem]
Jehova mitah chuan tumah hi ram dang mi an ni lo
[Phêk 31-naa thu lâk chhuah]
Mihringte siam chawp ramri khamnate a awm tawh lohna hun leh “ram dang mi” tih ngaih dânte tûn hma thil a nih hun chu i nghâkhlel em?
