Nunah Hlawhtlinna Dik Hmu Ang Che
Nunah Hlawhtlinna Dik Hmu Ang Che
“I kawngte chu i lo titluang zel ang a, i lo hmuingîl zêl dâwn nia.”—JOS. 1:8.
ENGTIN NGE KAN CHHAN ANG?
Eng angin nge Solomona kha a hlawhtlin?
Eng kawngin nge Paula chuan hlawhtlinna dik a neih?
Engtin nge chatuan daiha i hlawhtlin theih?
1, 2. (a) Engtin nge mi tam takte’n hlawhtlinna chu an hrilhfiah? (b) Engtin nge hlawhtlinna i thlîr dân chu i hriat theih ang?
NUN hlawhtling tih awmzia chu eng nge ni? Mite hnênah chu zawhna chu zâwt ta la, an chhânna chu a inang lo hlawm hle tih i hmu ang. Entîr nân, mi tam tak chuan hlawhtlinna chu sum leh pai te, thiamna te, a nih loh leh zir sânna te ûmnaa hlawhtlinna nasa tak niin an hrilhfiah a. Mi dangte erawh chuan mi hlawhtling ni tûr chuan chhûngte, ṭhiante, a nih loh leh hnathawhpuite nêna inlaichînna ṭha tak neih a ngai niin an sawi bawk. Pathian rawngbâwltu pawhin hlawhtlinna chu kohhrana mawhphurhna a chelh emaw, rawngbâwlnaa a thil hlen chhuah emaw nên a thlun zawm mai thei bawk.
2 Hlawhtlinna chungchânga i thlîr dân hriat theih nân, mi hlawhtling nia i ngaih—i mi ngaihsân leh zah berte hming ṭhenkhat chu i ziak chhuak thei a. Chûng mite inṭâwm mize langsâr tak chu eng nge? An hausa nge, an hmingthang? Nge ni a, an challang zâwk? A chhânnate chuan i thinlunga ngaihtuahna chu a hai lang chiang hle thei a, chu chuan i duhthlanna siam leh i thiltumte tihhlawhtlin tumna kawng chu nasa takin a thunun thei a ni.—Lk. 6:45.
3. (a) Josua khân a nun tihlawhtling tûrin eng nge a tih ngai? (b) Eng nge kan ngaihtuah ang?
3 Jehova’n hlawhtling anga min ngaih hi kan tâna thil pawimawh ber a ni a. Hlawhtling anga min thlîr chauhvin chatuana nunna kan nei thei a ni. Jehova’n Josua hnênah Ram Tiama Israelte hruai lût tûra mawhphurhna rit tak a pêk khân, Mosia Dân chu ‘chhûn leh zâna’ chhiar tûr leh a thute ṭha taka zâwm tûrin a hrilh a ni. Pathian chuan: “Tichuan i kawngte chu i lo titluang zel ang a, i lo hmuingîl zêl dâwn nia,” tiin a tiam a. (Jos. 1:7, 8) Josua kawngte chu a tluangin, a hlawhtling ngei tih i hria a ni. Kan chungchâng hi eng nge ni ve le? Hlawhtlinna kan thlîr dân chu Pathian thlîr dân nên a inmil tih engtin nge kan hriat ang? A chhânna hmuh nân, Bible-a târ lan mi pahnihte nun hi i lo ngaihtuah ang u.
SOLOMONA KHA A NUNAH A HLAWHTLING EM?
4. Engvângin nge Solomona chu a hlawhtling anga sawi theih a nih?
4 Solomona chu kawng tam takin, a hlawhtling lawr lak a ni. Engvângin nge? Kum engemaw zât chhûng chu, nasa taka malsâwmtu, Jehova ṭih a, a thu a zawm vâng a ni. Jehova’n Solomona hnêna thil dîl tûra a tih khân, lal chuan mipuite kaihruai tûrin finna a dîl tih hre reng rawh. A hnu lawkah, Pathian chuan finna leh hausakna a pe ta ve ve a ni. (1 Lalte 3:10-14 chhiar rawh.) A finna chuan “khawchhak fate zawng zawng finna leh Aigupta mite finna zawng zawng chu a khûm vek a.” Solomana chu “a vêl hnam zawng zawngte zîngah” chuan a hming a thang ta a ni. (1 Lal. 4:30, 31) Hausakna lamah chuan, kum tinin rangkachak chauh pawh ton 25 lai chu chhiah angin a dawng a nih chu! (2 Chro. 9:13, 14) Ram dang nêna indâwrna lam te, in sakna lam te, leh sumdâwnna lamte chu a thiam hle a. Ni e, Solomona chu Pathian mithmuha dik taka a awm chhûng zawng chuan a hlawhtling hle a ni.—2 Chro. 9:22-24.
5. Pathian hmaa hlawhtlingte chungchângah Solomona’n eng thu tâwp nge a siam?
5 Thuhriltu bua Solomona thuziakte chuan mi hausate leh challangte chuahvin hlawhtlinna leh hlimna an nei thei tih ngaih dân dik lo a nei lo tih a târ lang a. Chutiang ngaih dân chu a nei lo rêng rêng a ni. Ani chuan: “Hlim taka awma, an nun chhûnga thil ṭha an tih aliama an tâna ṭha zâwk engmah ka hre lo. Tichuan, mi tin ei leh in leh an thawhrimna zawng zawnga hlim taka an awm chu Pathian thilpêk a ni,” tiin a ziak a. (Thur. 3:12, 13) Ani chuan Pathian duhsakna hlawh a, Amah nêna inlaichînna ṭha neite tân chuan chutiang hlimna chuan awmzia a nei tak zet tih a hria a ni. Solomona chuan: “Hêng thu zawng zawng khaikhâwmna hi i ngaithla teh ang: Pathian ṭih la, a thupêkte vawng rawh; hei hi mihring zawng zawng tih tûr chu a ni mai,” tiin dik takin a sawi a ni.—Thur. 12:13.
6. Engting nge Solomona entawn tûr siam chuan hlawhtlinna dik hre thiam tûra min ṭanpui?
6 Kum tam tak chhûng chu Solomona chuan Pathian a ṭih a. “LALPA chu a hmangaih a, a pa Davida thuruatte chu a zâwm ṭhîn,” tiin kan chhiar a ni. (1 Lal. 3:3) Chu chu hlawhtlinna dik takah i ngai dâwn lâwm ni? Pathian kaihhruainain Solomona chuan biakna dik atân biak in ropui tak a sa a, Bible bu pathum a ziak bawk a ni. Chutiang chu ti ve tûra beisei kan ni lo mai thei; mahse, Pathian chunga a rinawm laia Solomona entawn tûr siam chuan hlawhtlinna dik tak min chhût thiamtîrin, chu mi kan neih theih nâna kan tih ngaite min hriatthiamtîr tûr a ni. He mi chungchângah hian, Solomona chuan thlarauva thâwk khumin tûn laia mi tam zâwkte’n hlawhtlinna chhinchhiahna anga an ngaih—hausakna te, finna te, hmingthanna te, leh thiltihtheihna te—chu engmah lo angin a ziak tih hre reng ang che. Chûng thilte chu awmze nei lo, “thil lothlâwn” a ni tak zet a ni. Hausak duh mi tam takte chuan neih belh zêl an duh tih i hmu a ni lâwm ni? Tin, an thil neihte chuan an rilru a tihah hle ṭhîn. Chu bâkah, engtik nîah emaw chuan an hausaknate chu mi dangte kutah a la awm ang.—Thuhriltu 2:8-11, 17; 5:10-12 chhiar rawh.
7, 8. Engtin nge Solomona chu a rinawm tâk loh a, chu chuan eng nge a rah chhuah?
7 A tâwpah chuan Solomona’n rinawmna kawng a pênsan tih i hre bawk a. Pathian Thu chuan heti hian a sawi a ni: “Heti hi a lo ni ta a, Solomona chu a lo upat hnu chuan, a nupuite chuan pathian dangte lamah a thinlung an hruai kawisak a: tichuan a pa Davida thinlung angin LALPA a Pathian lamah chuan a thinlung chu a lo ṭha famkim ta lo va. . . . Solomona chuan LALPA mithmuhin thil sual a lo ti ta,” tiin.—1 Lal. 11:4-6.
8 Solomona chunga Jehova a lâwm lo chu thil âwm tak a ni a; a hnênah: “Ka thuthlung te leh ka thuruatte pawm tûra thu ka pêk che hi i lo pawm ta si lo va, ram hi ka chhuhsak ngei ngei ang chia, i chhiahhlawh ka pe ang,” tiin a hrilh a ni. (1 Lal. 11:11) A va lungchhiatthlâk tak êm! Solomona chu kawng tam takin hlawhtling mah se, a hnuah Jehova a tilung ni lo va. Nuna thil pawimawh ber—Pathian chunga rinawmna—chungchângah chuan Solomona chu a hlawhchham ta a ni. Heti hian mahni kan inzâwt ṭheuh thei a ni, ‘Solomona nun aṭanga ka thil zir chhuah chu nun hlawhtling neih nâna min ṭanpuituah hman ka tum tlat em?’ tiin.
NUN HLAWHTLING DIK TAK CHU
9. Khawvêl tehna aṭangin Paula chu a hlawhtling em? Hrilhfiah rawh.
9 Tirhkoh Paula leh Lal Solomona nun chu a inang lo hle a. Paula tân chuan lalṭhutthlêng ropui tak a awm lova, lalte nên lah ruai a ṭheh ve hek lo. Chu ai mah chuan rilṭâm te, tuihâl te, khawsik te, leh saruaka awm châng te a nei zâwk a ni. (2 Kor. 11:24-27) Isua chu Messia a ni tih a pawm tawh hnu chuan Juda sakhuaa mite ngaihhlut tak dinhmun chu a chelh ta lo va. Juda sakhaw hruaitute chuan amah an haw tawh zâwk a ni. Ani chuan tân ina khung te, hlap te, tianga vuak te, leh lunga dente a tuar a. Paula chuan amah leh a Kristian unaute pawhin hauh te, tihduhdah te leh hêkte an tâwk tih a pawm a ni. “Tûn thleng pawh hian khawvêl hnâwmhnawk, thil zawng zawng bawlhhlawh angin miin min siam a ni.”—1 Kor. 4:11-13.
10. Engvângin Paula chu hlawhtlinna hnâwl anga a lan mai theih?
10 Tirhkoh Paula, a tleirâwl laia Saula tia hriat chuan hlawhtlin theihna hun remchâng tam tak a nei a. Ani chu chhûngkaw zahawm tak aṭanga lo piang chhuak ni ngeiin a lang a, zirtîrtu zahkai tak Gamaliela hnênah a zir bawk a, a hnuah: “Judate sakhaw biak dân kawngah chuan ka chite zînga ka rualpui tam takte ka lehpêl ta,” tiin a ziak a ni. (Gal. 1:14) Paula chuan Hebrai leh Grik ṭawng a thiam hle a, Rom khua leh tui nihna a nei bawk a, chu chuan mite awh ngawih ngawih hlâwkna leh dikna tam tak a pe a ni. Khawvêl lama hlawhtlinna ûm thlang ta se chuan, challang taka awmin, sum leh pai lamah pawh a insawh nghet zual zâwk ngei ang. Ani chuan chhûngkhatte hial pawh tiamin, mi dangte tâna kawng âtthlâk chu a thlang ta zâwk a ni. Engvângin nge?
11. Paula hlut leh duh êm êm thiltum chu eng nge ni a, engvâng nge?
11 Paula chuan Jehova a hmangaih a, hausakna leh mihringte zînga challanna aiin A pawm nih chu a duh zâwk a. Thutak hriatna dik chu neiin, Paula chuan khawvêlin a ngaihsak miah loh thil—tlanna te, Kristian rawngbâwlna te, vâna nun beiseinate—chu a hlut ta hle a ni. Paula chuan buaina chinfel ngai a awm tih a hria a. Setana chuan mihringte chu Pathian rawng an bâwlna aṭangin a la pêng thei niin a inchhâl tlat a. (Job. 1:9-11; 2:3-5) Eng ang fiahna pawh tâwk mah se, Paula chuan Pathian laka rinawm tlat leh biakna dik vawn reng chu a tum tlat a ni. Chu chu khawvêla hlawhtlin tum mi nâwlpuite neih loh thiltum a ni.
12. Engvângin nge Pathiana i beiseina nghah chu i thlan?
12 Paula tum ruhna ang chu i nei ve em? Rinawmna kawng zawh chu awlsam reng lo mah se, Jehova malsâwmna leh a pawm hlawhna a ni tih kan hria a, chu ngei chu a ni, mite hlawhtlintîrtu dik tak chu. (Thuf. 10:22) Tûnah hian kan hlâwkpui mêk a, nakina malsâwmnate pawh kan beisei thei tak zet a ni. (Marka 10:29, 30 chhiar rawh.) Chuvângin, kan beiseina chu ‘sum rinawm lovah ni lovin, thil zawng zawng lâwmna tûra tam taka min petu Pathian chunga’ nghah nachhan tûr ṭha tak kan nei a. ‘Nunna, nunna taktak chu kan vawn theih nân, hun lo thleng tûr atân lungphûm ṭha tak chu kan khâwl khâwm a ni.’ (1 Tim. 6:17-19) Ni e, tûn aṭanga kum za, a nih loh leh kum sâng emaw, a aia tam emaw hial pawh a ral hunah kan hun kal tawhte chu thlîr lêtin, “Hlawhtlinna kawng dik tak chu ka lo va thlang tak êm!” tiin kan sawi thei ngei ang.
I RO AWMNA HMUN CHU
13. Isua chuan ro khâwlkhâwm chungchângah eng fuihna thu nge a sawi?
13 Isua chuan ro chungchângah: “Leia sûlrûl leh tuiêkin a ei chhiatnaah, rûkruten an reh pawha an rûknaah hian, in tân rote khâwl khâwm suh u; vânah, sûlrûl leh tuiêkin a ei chhiat lohnaah, rûkruten an reh pawha an rûk hek lohnaah chuan, in tân rote khâwl khâwm zâwk rawh u; i ro awmna apiangah i rilru pawh a awm ang,” tiin a sawi a ni.—Mt. 6:19-21.
14. Engvângin nge lei lam ro khâwlkhâwm chu a finthlâk loh?
14 Miin lei lama ro a neih zîngah chuan pawisa mai aia tam pawh a tel thei a. Chutah chuan, Solomona’n mihringte mita hlawhtlinna nia a sawi—nihna sâng te, hmingthanna te, a nih loh leh thiltihtheihnate zînga a engemaw ber nêna inkûngkaih thil rêng rêng chu a tel thei tihna a ni. Isua pawhin Thuhriltu lehkhabua Solomona sawi ang chiah—khawvêla rote chuan chatuan a daih dâwn lo tih a sawi a. I hriat angin, chutiang ro zawng zawngte chu a chhe theiin, awlsam taka chân theih a ni. Professor F. Dale Bruner-a chuan chûng ro chungchângah chuan: “Hmingthanna chuan rei a daih ṭhîn lo tih tlâng hriat a ni a. Inrinni kal taa a changtupa lâr ber kha a kâr lehah chuan a lâr leh tawh lo va. Tûn kuma sum leh pai lama hlawhtling tak pawh nakumah chuan a tlachhe vek thei a ni. . . . [Isua] chuan mihringte a hmangaih a. Chuvângin, ropuina tlo lo tak ruala loh theih lova lo awm ṭhîn beidawnna chu pumpelh tûrin a fuih a ni. Chu chuan rei a daih lo va. Isua chuan [a] zirtîrte chu [an] lunghnual a duh lo. ‘Nî tin hian, sum leh ropuinaa an rinna nghattute chu an beidawng ṭhîn a ni,’” tiin a ziak a. Mi a tam zâwkte chuan chûng thute chu pawmpui mah se, chu thu dik mila an nun siamrem engzât nge awm? Nang i insiamrem ang em?
15. Eng ang hlawhtlinna nge neih kan tum tlat ang?
15 Sakhaw hruaitu ṭhenkhat chuan hlawhtlin tum chu thil sual ang leh chu mi atâna thawhrimna zawng zawngte chu dang bet tûrin an zirtîr a. Mahse, Isua chuan chûng thawhrimna zawng zawng chu a sawisêl lo tih chhinchhiah ang che. A zirtîrte chu hlawhtlinna dik tak neih nâna thawkrim tûrin a hrilh a. Tihchhiat theih lohna hmun ‘vânah rote’ khâwl khâwm tûrin a fuih a ni. Jehova thlîrna aṭanga hlawhtlin chu kan duh ber tûr a ni. Ni e, Isua thu chuan nuna kan thil ûm tûr thlan theihna kan nei tih min hriattîr a. Mahse, kan thinlunga awm, kan tâna thil hlu chu neih kan tum tlat dâwn a ni.
16. Eng nge kan rin tlat theih?
16 Kan thinlungah Jehova tihlâwm duhna kan neih chuan, kan thil mamawhte min pe ngei ang tih kan ring tlat thei a ni. Ani chuan Paula anga rei lo te chhûng kan rilṭâm emaw, kan tuihâl emaw chu a phal pawh a ni thei a. (1 Kor. 4:11) Mahse, Isua thurâwn pêk fing tak: “‘Engnge kan ei ang?’ emaw, ‘Engnge kan in ang?’ emaw, ‘Eng sinin nge kan awm ang?’ emaw tih, lungkham suh u, Jentailten chûng zawng zawng chu an zawng ṭhîn a ni. Chûng zawng zawng chu in mamawh tih in Pa vâna mi’n a hre reng a ni. A ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u nia,” tih hi kan ring tlat thei a ni.—Mt. 6:31-33.
PATHIAN MITHMUHA HLAWHTLINNA ZAWNG RAWH
17, 18. (a) Hlawhtlinna dik tak chu khawiah nge a innghah? (b) Hlawhtlinna chu khawiah nge a innghah loh?
17 Thil pawimawh ber mai chu hei hi a ni: Hlawhtlinna dik chu khawvêl mithmuha kan thil hlen chhuahah emaw, kan nihna chelhah emaw a innghat lo, tih hi. Chu bâkah hlawhtlinna dik tak chu kohhrana mawhphurhna engemaw chelh leh chelh lohva teh a ni lo bawk. Mahse, chutiang malsâwmna chu: “Enkawltu chu mi rinawm nih a ngai,” tia min hrilhtu, Pathian thu kan awihna leh a chunga kan rinawmnaah a innghat zâwk a. (1 Kor. 4:2) Kan rinawm chhunzawm zêl tûr a ni. Isua chuan: “A tâwp thlenga tuar peih apiang chu, chu mi ngei chu chhandamin a awm ang,” a ti si a. (Mt. 10:22) Chhandam nih chu hlawhtlinna târ langtu chiang tak a ni tih i pawm lâwm ni?
18 A chunga thute ngaihtuahin, Pathian chunga rinawmna chu challanna te, zir sânna te, sum leh pai dinhmun te, a nih loh leh khawtlânga dinhmunte nên a inkûngkaih lo va; finna te, thiamna te, a nih loh leh theihnaahte a innghat hek lo tih kan hmu thei a ni. Eng dinhmunah pawh ding ila, Pathian lakah kan rinawm reng thei a. Kum zabi khatnaa Pathian mite zîngah khân, ṭhenkhatte an hausa a, mi dangte erawh an rethei thung. Paula’n mi hausate chu “thil ṭha ti tûrin, thil ṭha tih ngah tûrin, thil phala thawhlâwm peih tûrin” a fuih a, chu chu a dik hle. Mi hausate leh retheite pawhin ‘nunna taktak chu an vuan’ thei a ni. (1 Tim. 6:17-19) Tûn laiah pawh chutiang bawk chu a ni. Kan vai hian rinawmna vawn reng theihna leh “thil ṭha tih ngah” theihna hun remchâng leh mawhphurhna inang kan nei ṭheuh a ni. Chuti chu, min Siamtu mithmuhah kan hlawhtlingin, amah kan tilâwm tih inhriatna aṭanga hlimna kan nei dâwn a ni.—Thuf. 27:11.
19. Hlawhtlinna chungchângah eng nge tih i tum tlat?
19 I dinhmun chu i thunun vek thei lo mai thei a; mahse, chûng dinhmunte i chinfel dân erawh chu i thlâk thei a ni. I dinhmun chu eng ang pawh lo ni se, rinawm tum tlat ang che. Chu chu thawhrim phû tak a ni. Jehova chuan tûnah leh chatuan thlengin nasa takin mal a sâwm ang che tih ring tlat rawh. Isua’n hriak thih Kristiante hnêna a hrilh: “Thih thlengin rinawmin lo awm rawh, tichuan nunna lallukhum ka pe ang che,” tih thu hi theihnghilh ngai suh. (Thup. 2:10) Chu ngei mai chu a ni, hlawhtlinna dik tak chu! (w12-E 12/15)
[Zirlai Atâna Zawhnate]
[Phêk 14-naa milem]
Mihringte thlîr dân aṭangin, Saula chuan hlawhtlinna kawng a zawh niin a lang
[Phêk 15-naa milem]
Paula chu a hlawhtling tak zet
