Pathian Thu Aṭangin Inzir Rawh

Pathianin Khawvêl Puma Rorêltu Tûr Sawrkâr A Pe Ang Em?

He thuziak hian i zawh mai theih zawhnate zâwtin, i Bible-a a chhânna i hmuh theihna laite a târ lang a. Jehova Thuhretute chuan chûng chhânnate sawipui che chu an châk hle a ni.

1. Engvângin nge mihringte’n khawvêl puma rorêltu tûr sawrkâr an mamawh?

Tûn laiah hian mihringte harsatna chu khawvêl pum huap a nih fo ṭhin vâng a ni. Ram ṭhenkhatah chuan, mi tam zâwkte chu rethei tak leh hnehchhiahin an awm a. Hmun dangah erawh, mi tam takte chuan an thil mamawh aia tam an nei niin an lang thung. Chuvângin, khawvêl puma thuneihna chelhtu chauhvin leilung hausaknate hi a sem rual thei ang.—Thuhriltu 4:1; 8:9 chhiar rawh.

2. Khawvêl puma sawrkârna chelh tûrin tu nge rin tlâk ang?

Tumahin ṭha taka ro an rêl theih dâwn loh avângin mite’n khawvêl pum atâna rorêltu neih chu an duh lo va. Mi zawng zawngin an pawm theih mihring rêng a awm thei lo. Chu bâkah, thuneihna a chan huna ei ru lo tu nge awm? Lal nunrâwn takin mi zawng zawng chunga rorêlna chang tûr anga ngaih chu a thlabârthlâk hle a ni.—Thufingte 29:2; Jeremia 10:23 chhiar rawh.

Pathian Jehova chuan mihringte chunga chatuana rorêltu atân a Fapa Isua chu a thlang tawh a. (Luka 1:32, 33) Isua chuan leiah a nun a hman tawh avângin, leia nun awm dân chu a hria a ni. Leia a awm chhûng chuan dam lote a tidam a, thuhnuairawlhte a zirtîr a, naupangte bulah hun a hmang bawk. (Marka 1:40-42; 6:34; 10:13-16) Chuvângin, Isua chu Rorêltu atâna duhthusâm a ni.—Johana 1:14 chhiar rawh.

 3. Khawvêl puma rorêltu tûr sawrkâr neih chu thil theih a ni em?

Pathian chuan a Fapa chu vân aṭanga he lei hi awp tûrin a ruat a. (Daniela 7:13, 14) Mihring rorêltute chuan an rorêlna khaw tin an awm chilh a ngai kher lo ang bawkin, mihringte chunga rorêl tûrin Isua chu leia a rawn awm kher a ngai lo a ni.—Matthaia 8:5-9, 13 chhiar rawh.

Mi tinin Isua chu Rorêltu angin an pawm ang em? Pawm lo vang. Ani chu ṭhatna ngainatute chauhin an pawm dâwn a ni. Pathian Jehova chuan hmangaih tak leh fel taka Rorêltua a ruat pawm duh lotute chu lei ata a tiboral ang.—2 Petera 2:9 chhiar rawh.

4. Khawvêl puma Rorêltu chuan eng nge a tih ang?

Berâmpuin a berâmte a hruai khâwm angin, Isua chuan hnam tina mi thuhnuairawlhte hruaikhâwmin, Pathian hmangaihna kawng a zirtîr mêk a ni. (Johana 10:16; 13:34) Chûng mite chu Isua leh a thuneihna phûr taka thlâwptute an lo ni ta a. (Sâm 72:8; Matthaia 4:19, 20) Khawvêl puma Isua khua leh tui rinawmte chuan inlungrual takin Isua chu Lal a nih thu an puang a ni.—Matthaia 24:14 chhiar rawh.

Isua chuan ei rûk chîng mihring sawrkâr tiboral tûrin a thiltihtheihna a rawn hmang thuai ang. A hnungzuitu rinawm ṭhenkhatte chu vân aṭanga amah nêna lei chunga rorêl tûrin a thlang a ni. (Daniela 2:44; 7:27) Isua Lalram chuan leilung hi Jehova hriatnain a tikhat ang a, mihring awm ṭan tirha hloh tâk paradis ang khân a din leh ang.—Isaia 11:3, 9; Matthaia 19:28 chhiar rawh. (w12-E 11/01)

Hriat tam lehzual nân, Jehova Thuhretute tihchhuah Bible Zirtîrna Dik Tak Chu Eng Nge Ni? tih lehkhabu bung 8-na hi en rawh.