Zawhna 1: Ka Nun Hian Thiltum A Nei Em?

ENGLAND rama seilian Rosalind-i chuan thil hriat châkna nasa tak a nei a. Mite ṭanpui pawh a duh bawk a ni. A graduate hnu chuan hna sâng tak a hmu a, a hnaah chuan awmna tûr nei lote ṭanpui a tel bâkah, piangsual te leh lehkha zir thiam thei lo bîk te ṭanpui pawh a tel bawk a ni. Hna lungawithlâk tak neiin nuamsa takin khawsa mah se, “‘Engvângin nge kan pian chhuah?’ tih leh ‘Nunin eng nge a tum?’ tih zawhnate ngaihtuahin kum tam tak ka hmang a ni,” tiin a sawi.

Engvângin nge he zawhna hi a lo chhuah? Mihringte hi ngaihtuahna nei lo ramsate ang kan ni lo va. Thil kal tawh aṭanga inzir theihna te, hma lam hun atâna ruahmanna siam theihna te, leh nuna thiltum neih theihna te kan nei a ni.

Mi ṭhenkhatte’n a chhânna nia an sawi chu eng nge ni? Mi tam takte chuan nunin a tum ber chu hausakna emaw, hmingthanna emaw neih a, chuta ṭanga hlimna neih chu niin an ngai.

An chhânnain a sawi tum chu eng nge ni? Nuna dah pawimawh tûr chu mahniin kan insiam ṭhîn a. Pathian duhzâwng aiin kan duhzâwng a pawimawh zâwk.

Bible zirtîrna chu eng nge ni? Lal Solomona chuan thil hlu tam tak khâwl khâwmin, a nuam tihzâwngte ûm mah se, chûngte chuan thiltum tluantling a nei lo tih a hmu chhuak a. Ani chuan hetianga ziakin nunin a tum dik tak chu a târ lang a ni: “Hêng thu zawng zawng khaikhâwmna hi i ngaithla teh ang: Pathian ṭih la, a thupêkte vawng rawh; hei hi mihring zawng zawng tih tûr chu a ni mai,” tiin. (Thuhriltu 12:13) Pathian thupêkte vawnnaah chuan eng nge tel?

 Kan tâna Pathian thiltum zîngah chuan hlim taka nun kan hman hi a tel a. Solomona chuan: “Mihring tân chuan ei leh in te leh a thawhrimnaa a rilru tihnawm te aliama ṭha a awm lo. Hei pawh hi Pathian kuta mi a ni tih ka lo hre ta,” tiin a ziak a ni.—Thuhriltu 2:24.

Pathian chuan kan chhûngkua hmangaih tûr leh enkawl tûrin min duh bawk a. Chhûngkuaa mi tinte tâna kaihhruaina tluangtlam tak leh ṭangkai tak a pêkte hi lo chhinchhiah ang che.

“Pasalte pawhin mahni taksate angin mahni nupuite chu an hmangaih tûr a ni.”—Ephesi 5:28.

“Nupui pawhin a pasal hlau thiam rawh se.”—Ephesi 5:33.

“Naupangte u, Lalpaah chuan in nu leh in pate thu zâwm rawh u.”—Ephesi 6:1.

Hêng Bible thu bulte hi kan nunpui chuan, hlimna leh lungawina engemaw chen chu kan hmu ang. Mahse, kan thil tih theihte zînga pawimawh ber chu kan theih ang tâwka min Siamtu chungchâng zir leh kan Ṭhian anga amah hnaih hi a ni. Dik takin, Bible chuan “Pathian hnaih” tûrin min sâwm a. Chu bâkah: “Anin a hnaih ang che u,” tih thu ropui tak hi min tiam bawk ni. (Jakoba 4:8) He sâwmna hi i pawm chuan, i nunin thiltum dik tak a nei ngei ang.

Atîr lama kan sawi tâk Rosalind-i chuan nun awmze dik tak hmu chhuak tawhin a inhria a ni. (w12-E 11/01)

Pathian tilâwm zâwnga i nun theih dân chungchâng hriat belh i duh chuan, Bible Zirtîrna Dik Tak Chu Eng Nge Ni? tih lehkhabu bung 12-na chu en rawh. Chu chu he Web site aṭang hian download theih a ni.www.pr418.com

[Phêk 5-naa bâwm]

Isua’n Nunin A Tum Chungchângah Eng Nge A Sawi?

Isua chuan a nunin a tum chu a hre chiang hle a. “Thutak hriattîr hi ka pian chhan leh khawvêla ka rawn kal chhan a ni,” tiin a sawi a ni. (Johana 18:37) A nun chu mite hnêna Pathian chungchâng thutak leh Pathian thiltumte zirtîr nân a hmang a ni.

Isua entawn tûr siam kan zui chuan nun awmze nei tak kan nei ang. Dik takin, Isua chuan a hnên aṭanga inzîr tûrin min sâwm a. (Matthaia 11:29) Kan inzir theih dân kawng hnih chauh lo ngaihtuah ta ila.

Isua chuan hlimna nei thei tûr chuan kan ‘thlarau lam mamawh [kan] hre’ tûr a ni tih min zirtîr a. (Matthaia 5:3, New World Translation) “Pathian tak chauh leh [a] tirh Isua Krista” hriatna kan neih chuan kan thlarau lam mamawhte chu kan phuhru thei a ni.—Johana 17:3.

Isua chuan a hnungzuitute chu an thu zirte mi dang hnêna zirtîr chhâwng tûrin thu a pe a. Ani chuan: “Chutichuan kal ula, hnam tina mi zirtîrahte siam ula, Pa leh Fapa leh thlarau thianghlim hmingah chuan baptis ula, thu ka pêk zawng zawng che u pawm tûrin zirtîr rawh u,” tiin a hrilh a ni.—Matthaia 28:19, 20.

Bible zirna leh an thil zirte nunpuina aṭanga an thlarau lam mamawh phuhrutute chuan a ṭha zâwngin an nun a inthlâk dang lam tih an hmu a ni. Chu bâkah, mi dangte chu Pathian chungchâng an zirtîr ṭan hian an nunin awmze dik tak a nei tih an ring nghet tial tial a ni.