Zawhna 2: Ka Thih Hian Engtin Nge Ka Awm Ang?

ROMAN-A chu a ṭhian ṭha tak pakhat car accident-a a thih lai chuan mipa naupang mai a la ni a. Ani chuan: “Ka ṭhianpa thihna chuan nasa takin min ṭhawng a. Accident hnu kum rei tak chhûng chu, kan thih hian kan chungah eng thil nge thleng tih ka ngaihtuah fo ṭhîn a ni,” tiin a sawi.

Engvângin nge he zawhna hi a lo chhuah? Mihringte thihna hi thil pangngai lo tak niin a lang. Kum eng zât mi pawh ni ila, thih chu kan duh lo tlângpui ṭhîn. Mi tam tak chuan thih hnua thilthleng chu an râp a ni.

Mi ṭhenkhatte’n a chhânna nia an sawi chu eng nge ni? Mi tam tak chuan mi a thih hian, dam chhun zawm zêl thei thil engemaw a awm an ring a. Anni chuan mi ṭhate chuan vân lâwmman an chang ang a, mi sualte erawh chu an sualna avângin chatuana hrem an ni ang tih an ring a ni. Mi dangte chuan mi a thih hian a awm tawh lo va, a tâwpah phei chuan theihnghilh ṭhak a nih an ring thung.

An chhânnain a sawi tum chu eng nge ni? Chhânna hmasa chu mi a thih hian a thi tak tak lo tihna a ni a. A pahnihna chuan nunin tum a nei lo angin a sawi thung. A chhânna pahnihna pawmtute chuan beidawnna rilru put hmang an nei a ni: “I eiin i in ang u hmiang, naktûkah kan thi dâwn alâwm,” tiin.—1 Korinth 15:32.

Bible zirtîrna chu eng nge ni? Bible chuan mi a thih hian, dam chhun zawm zêl thei thil engemaw a awm tih a zirtîr lo. Pathian thlarauva thâwk khum Lal Solomona chuan: “Mi nungdamte chuan an la thi dâwn tih an hre si a, mitthi erawh chuan engmah an hre lo,” tiin a ziak a ni. (Thuhriltu 9:5) Chûng ‘engmah hre lote’ chuan an chhehvêla thilthlengte chu an hre lo. Thil hriat theih emaw, tih theih emaw an nei lo. Chuvângin, mitthite chuan min ṭanpui thei lo va, min tina thei hek lo.

Mi tam takte rin dân nêna inkalh takin, mihringte an thih hi Pathian thiltum a ni lo. Ani chuan mihring hmasa ber, Adama chu leia chatuana nung thei tûrin a siam a. Pathianin  thihna a sawi ṭum awmchhun chu Adama hnêna thuâwih loh hremna a hrilh khân a ni. Ani chuan Adama hnênah thing pakhat rah ei lo tûra a khap thu a hrilh a, tichuan i ei chuan “i thi ngei tûr a ni,” tiin a vaukhân lâwk a ni. (Genesis 2:17) Adama leh Evi-te chuan Pathian thu zâwm ta se chuan, anmahni leh Pathian chunga rinawm an thlahte zawng zawngin leia chatuan nunna an nei ang.

Adama chuan Pathian vaukhânna zawm loh chu a thlang a. Pathian thu a âwih loh khân, thil sual a ti a, a thi ta a. (Rom 6:23) Adama a thih hnu chuan a hnên aṭangin dam chhunzawm zêl thei thil engmah a kal chhuak lo. Ani chu a awm tawh lo mai zâwk a ni. Pathian chuan Adama hnênah: “Leia i kîr leh hma loh chuan i hmaia thlantui luang zawih zawihin chaw i ei tawh ang: vaivut i ni a, vaivutah i kîr leh tûr a ni,” tiin a hrilh a ni. (Genesis 3:19) Adama thlahte kan nih avângin mi zawng zawng chuan a hnên aṭangin sualna leh thihna chu kan rochung ta vek a ni.—Rom 5:12.

Adama chuan thu âwih loh a thlang chung pawhin, Pathianin Adama thlahte leilung luah khahtîr a tum chu a thlen famkimtîr ang. (Genesis 1:28; Isaia 55:11) Mitthi tawh a tam zâwkte chu Pathian Jehova chuan nunna a pe kîr leh thuai ang. Tirhkoh Paula chuan chu mi hun chungchâng chu heti hian a sawi a ni: “Mi felte leh fel lote thawhlehna a awm ang,” tiin.—Tirhkohte 24:15.

Atîr lama kan sawi tâk Roman-a chuan Bible a zir a, thihna leh Pathian Jehova chungchânga Bible zirtîrna chu a hre thiam ta a. Chu chuan amahah nghawng nasa tak a nei a ni. (w12-E 11/01)

Thih huna thilthleng chungchâng hriat belh tûr chuan, Bible Zirtîrna Dik Tak Chu Eng Nge Ni? tih bung 6-na chu en rawh. Chu chu he Web site aṭang hian download theih a ni.www.pr418.com

[Phêk 7-naa bâwm]

Isua’n Thihna Chungchângah Eng Nge A Sawi?

Isua chuan a hun laia mitthi thawhlehna a awm lo nia sawitu sakhaw hruaitu ṭhenkhatte ngaih dân chu a pawmpui lo va. (Luka 20:27) Mi a thih hian dam chhun zawm zêl thei thil engemaw a awm tih a zirtîr hek lo. A hnuaia mi ang hian a zirtîr zâwk a ni.

Thihna hi muthilh ang a ni. Isua chuan a ṭhian Lazara a thih khân: “Kan ṭhian Lazara chu a muhîl ta a; a muhîl kai harh tûrin ka kal dâwn a ni,” tiin a sawi a. Isua zirtîrte chuan a sawi tum chu an hre thiam lo va. Anni chuan: “Lalpa, a muthilh tawh chuan a dam leh ang chu,” tiin an chhâng a. Bible chuan heti hian a sawifiah a ni: “Isuan a thih thu a sawi a ni a; nimahsela anni chuan a chawlh chhûnga a muthilh thu a sawi emaw an ti a. Chutichuan Isuan fiah takin an hnênah a sawi a, ‘Lazara a thi a ni,’” tiin.—Johana 11:11-14.

Mitthite chu kaihthawh leh an ni ang. Lazara-te khua a va thlen chuan, Isua chuan Lazara farnu Marthi chu thlamuanin:“I nuṭa a tho leh ang,” tiin a hrilh a. Tichuan, ani chuan he thutiam ropui tak: “Kei hi thawhlehna leh nunna chu ka ni; tupawh mi ring chu thi mah sela a nung reng ang,” tih thu hi a sawi chhuak a ni. Isua thutiam chu a ruak ngawt a ni lo. Ni li lai thi tawh Lazara chu mi tam tak mithmuh ngeiah a kaitho a ni.—Johana 11:23, 25, 38-45.

Tirhkoh Johana hnêna inlârna a pêkah khân, Isua chuan mitthite an tho leh ang tih a tiam nawn leh a. Ani chuan nakin lawka thihnain a hrên behte chhuah zalen an nih hun tûr chungchâng chu a sawi a ni.—Thu Puan 20:13.