1-3. (a) Inchhîrna engte nge awm thei a, chûngte chuan engtin nge min nghawng theih? (b) Paula hnên aṭangin inchhîrna nei lova Pathian rawngbâwl chungchâng eng nge kan zir theih?

HLA PHUAH THIAM pakhat chuan: “Thu sawi chhuah emaw, thuziak emawa lungchhiatthâk ber chu: ‘Sela chuan a chuti/khati mai tûr!’ tih hi a ni,” tiin a ziak a. Chu hla phuah thiam chu J. G. Whittier-a a ni a, tih ṭhat leh emaw, kawng danga tih emaw kan châk kan inchhîrna thilte a sawina a ni a. “Inchhîr” tih chu thil engemaw tih, a nih loh leh tih loh avânga rilrua lungngaihna, rilru natna a ni a, “ṭahpui leh” tihna pawh a ni thei. Kan vai hian kan thiltih tawh chu sût leh a, kawng danga tih leh châkna kan nei ṭheuh va. I thil tih tawh chungah chutiang inchhîrna i nei em?

² Mi ṭhenkhat chuan an nunah thil an tisual palh a, sual pawi takte pawh an ti hial a. Mi dangte erawh chuan thil pawi lutuk chu an ti lo va; mahse, duhthlanna an siam ṭhenkhat chu a ṭha ber a nih leh nih loh an ngaihtuah a. Mi ṭhenkhat chuan tûn hma thilte chu ngaihtuah tawh lovin, an nung chhunzawm zêl thei bawk a. Mi dangte chuan an nun hlui chungchângah ‘sela aw’ tih ngaihtuahin rilru hrehawm takin an awm a ni. (Sâm 51:3) A khawi ber ang nge i nih? A lo berah pawh, vawiin aṭanga inchhir lova Pathian rawngbâwl chu i duh em? Chutianga ti tûrin kan inzir theihna tûr hetiang thil a taka lo tawng tawh an awm em? Awm teh rêng mai, ani chu tirhkoh Paula a ni.

³ Paula chuan a dam lai khân thil sual pawi tak a tiin, duhthlanna fing tak pawh a siam bawk a. A nun hlui avângin a inchhîr êm êm a; mahse, rinawm taka Pathian rawngbâwlin a nun tihhlawhtlin dân pawh a zir bawk a ni. Inchhîrna nei lova rawngbâwl chungchângah a entîrnain min zirtîr theih chu i lo en ang u.

4. Tirhkoh Paula chuan tûn hma thiltih inchhîr awm tak eng nge a neih?

⁴ Pharisai tlangvâl, Paula chuan a hnua a inchhîrna tûr thilte chu a ti a. Entîr nân, Krista zirtîrte rawng taka tihduhdahnaah  hma a hruai a. Bible thuziak chuan Stephena tihhlum a nih hnu rei lo têah, “Saula [a hnua Paula lo ni ta] . . . chuan kohhranhote a tiduhdah êm êm a, in tinah a lût a, ahmei apain a hnûk chhuak a, tân inah a khung ṭhîn,” tiin a sawi. (Tirh. 8:3) Scholar Albert Barnes-a chuan “tiduhdah êm êm” tia lehlin Grik thu mal hi “ṭawngkam khauh tak a ni a, tihduhdahnaa ṭhahnemngai tak leh thinur taka [Saula] a inhmanzia a târ lang,” tiin a sawi. Chuvângin Barnes-a chuan, “Saula chuan ram sakawlh ang maiin kohhranhote chu a bei a ni,” a ti. Juda inpumpêk tak a nih angin, Saula chuan Kristianna nuai bo chu Pathian pêk a hnathawh tûr niin a ngai a. Chuvângin Kristiante chu rawng taka ûmin, “hmeichhia pawh, mipa pawh” ni se, ‘a vau thu leh thah a tum thu a chhâk chhuak a,’ anmahni tihboral chu a tum a ni.—Tirh. 9:1, 3; 22:4. *

5. Saula chu Isua hnungzuitute tihduhdahna aṭanga Isua chanchin hril tûra a inleh dân sawi rawh.

⁵ A hnuah Saula chuan Damaska khuaa kal a, Isua zirtîrte chu an in aṭanga hnûk chhuak a, Sanhedrin thinurna hmachhawntîr tûra Jerusalema hruai chu a tum a. Mahse, Kristian kohhran Lû chuan a lo dan avângin a hlawhchham ta a. (Eph. 5:23) Saula chu Damaska panna kawnga a kal lai chuan a hnênah Isua a inlan a, êng mak dang lam tak avângin Suala mit chu a dêl ta a. Tichuan, Isua chuan Saula chu Damaska khuaa kal a, kaihhruaina a pêk tûr chu nghâk tûrin a tîr a. A hnua thilthleng chu kan hre ṭheuh a ni.—Tirh. 9:3-22.

6, 7. Paula chuan tûn hmain thil pawi tak a ti tih a inhriatzia engin nge târ lang?

⁶ Paula tehna chu Kristian a lo nih ve leh a inthlâkthleng ta a. Kristiante hmêlma kawlh tak ni tawh lovin, Krista chanchin hrilhtu ṭhahnemngai tak a lo ni ta zâwk a. Chuti chung pawh chuan a hnuah a chanchin heti hian a ziak a ni: “Judate sakhaw biak dânah chuan hmân laia ka awm dân chu in hre tawh si a, khatia Pathian kohhranho nasa taka tiduhdahin ka tihbuai ṭhin kha,” tiin. (Gal. 1:13) A hnuah pawh Korinth khuaa mite, Philippi khuaa mite, leh Timothea hnêna lehkha a thawn khân, a tûn hma thiltih inchhîrawm tak chu a sawi leh a ni. (1 Korinth 15:9 chhiar rawh; Phil. 3:6; 1 Tim. 1:12, 13) Paula chuan chutianga a chanchin a ziah chu a inchhuan vâng a ni lo va, chutiang thil thleng lo ang maia awm pawh a tum lo bawk. Thil pawi tak a tisual palh tih a hre thlap a ni.—Tirh. 26:9-11.

⁷ Bible scholar Frederic W. Farrar-a chuan “tihduhdahna râpawm taka” Saula thiltihte chungchâng chu a sawi a. Ani chuan Paula nuna he hun lungchhiatthlâk tak hi ngun taka kan ngaihtuah chauhvin, “a chunga nghah phurrit anga sawi theih tûr inchhîrna nasa tak leh hmêlma sual takte sawi chhiatna a tawh tûrte chu kan hre thiam thei a ni,” tiin a sawi belh a ni. Paula’n kohhran hrang hrang a tlawhnaa unaute chuan an inhmuh hmasak ber ṭumah, ‘Min tiduhdah ṭhîntu Paula i lo ni maw!’ tih châng pawh an nei mai thei a ni.—Tirh. 9:21.

8. Engtin nge Paula chuan Jehova leh Isua’n a chunga zahngaihna leh hmangaihna an lantîr chu a ngaih a, chu chuan eng nge min zirtîr?

⁸ Mahse, Paula chuan Pathian khawngaihna avâng chauhva a rawngbâwlna hlen chhuak thei a ni tih a hria a. A lehkha thawn 14-ah Pathian khawngaihna mizia chu vawi 90 vêl lai a târ lang a—Bible ziaktu dang zawngte aiin a a sawi tam daih a ni. (1 Korinth 15:10 chhiar rawh.) Paula chu zahngai taka cheibâwl a nih avângin a lâwm hle a, a chunga Pathian khawngaihna lantîr chu a thlâwn mai nihtîr loh a tum tlat a. Chuvângin tirhkoh zawng zawng aiin a “thawk rim zâwk” a ni. A entîrna chuan kan sual kan inpuan a, kan nun kawng kan thlâkthleng chuan Isua tlanna inthawina azârah, Jehova chuan sual pawi tak pawh nuai bo a duh tih chiang takin a târ lang a ni. Hei hi Krista tlanna inthawina hi an tân liau liau a nih theih dân âwih harsa titute tân zir tûr ṭha a va ni tak êm! (1 Timothea 1: 15, 16 chhiar rawh.) Paula chu nasa taka Krista sawisatu ni ṭhîn mah se, “Pathian fapa, mi hmangaiha ka aia inpetu” tiin a ziak thei a ni. (Gal. 2:20; Tirh. 9:5) Ni e, Paula chuan inchhîrna tam lehzual chhêk khâwm lova rawngbâwl dân thu bul chu a zir chhuak a ni. Chu chu i thil zir a ni ve em?

9, 10. (a) Engvângin nge Jehova chhiahhlawh ṭhenkhatte chu an inchhîr? (b) Tûn hma thilte avânga lungngaih reng a dik lohna chu eng nge ni?

⁹ Tûna i inchhîrna thlentu thilte chu i lo ti tawh em? Thil dik lo ûm nân tha leh zung, leh hun hlu tak i khawh ral tawh ngai em? Mi dangte chhiatna thlentîrtu thil i ti tawh ngai em? A nih loh leh thil dang engemaw avânga inchhîrna neiin rilru nuam lo takin i awm pawh a ni mai thei a. Zawhna lo awm ta chu, Chu mi chungchângah eng nge i tih theih? tih hi a ni.

¹⁰ Mi tam tak chu an lungngai a. Lungngai renga awm chu mahni inhremna, intihnatna, intihhrehawmna a ni. Chu chuan lungkhamna nasa tak a thlen a. Lungngaihna chuan buaina a ching fel ang em? A ching fel lo vang! Lungngaih chu hun leh tha khawhralna mai a ni! Lungngaia awm reng aiin, hma lâkna ṭha chuan rah ṭha a chhuah mai thei a ni. A chunga thil sual i lo tihna hnênah chuan ngaihdam i dîl thei a, inlaichînna ṭha i nei lêt pawh a ni thei. Thil sual tihna thlentu thil engpawh chu pumpelhin, chutiang chuan buaina lo awm thei tûrte lakah i invêng thei a ni. Mahse, nuna dinhmun ṭhenkhat chu i tawrh chhuah mai a ngai thei a ni. Lungngaihna chu Pathian rawng ṭha taka min bâwltîr thei lo zeng hri chi khat a ni a. Lungngaihna chuan lâwmman engmah a nei lo!

11. (a) Engtin nge Jehova zahngaihna leh khawngaihna chu kan dawn theih? (b) Tûn hma thil sual tihte avânga lungngaihna ata rilrua thlamuanna nei tûra Pathian kaihhruaina chu eng nge ni?

¹¹ Ṭhenkhat chuan tûn hmaa an thil tihsual chu Pathian hmaa hlutna nei lo ang hiala inngaihtîr  tûr khawpin an intihbuaitîr a. An thiltih a pawi thui vâng emaw, an tihsual ngun êm vâng emawa Pathian zahngaihna dawng tlâk lo angin an inngai mai thei a ni. Mahse, a nihna takah chuan tûn hmaa an thil lo tih tawh chu eng pawh ni se, an inlam lêtin, an inthlâkthleng thei a, ngaihdamna an dîl thei a ni. (Tirh. 3:19) Mi dang tam takte ang bawkin, Jehova zahngaihna leh khawngaihna an dawng thei a ni. Jehova chuan mi inngaitlâwm, mi dik leh thinlung tih tak zeta inlam lêttu chu ngilnei takin a ngaidam ang. Pathian chuan “vut leh vaivuta ṭhuin ka sim ta,” a nih loh leh ka inchhîr ta titu Joba chu a ngaidam a ni. (Job. 42:6) Rilrua thlamuanna nei tûr chuan Pathian kaihhruaina kan zui ṭheuh a ngai a ni: “Bawhchhiatna zêptute chu an hmuingîl lo vang a, zêp lova inpuanga hawisantute chuan zahngaihna an hmu ang,” tih hi. (Thuf. 28:13; Jak. 5:14-16) Chuvângin, Pathian hnênah kan inpuangin, a ngaihdamna kan dîl thei a; tin, kan thil tihsual siam ṭha tûrin hma kan la thei a ni. (2 Kor. 7:10, 11) Chûng thilte kan tih tawh chuan, ‘nasa taka Ngaidamtu’ zahngaihna chu kan dawng thei a ni.—Is. 55:7.

12. (a) Chhia leh ṭha hriatnain thiam loh min chantîrna chin fel dân ṭha ber chungchângah Davida entawn tûr siam chuan eng nge min zirtîr? (b) Eng kawngin nge Jehova chu a inchhîr a, chu mi hriatna chuan engtin nge min ṭanpui? (Bâwm chu en rawh.)

¹² Ṭawngṭaina chuan thil a tithei a; chu mi hmang chuan Pathianin min ṭanpui thei a ni. Davida chuan ṭawngṭaia a thinlung chhûngril a sawi chhuahna chu Fakna hlaah mawi taka chhinchhiah a ni. (Sâm 32:1-5 chhiar rawh.) Davida’n a pawm angin, chhia leh ṭha hriatnain thiam loh a chantîrna khuhbo a tumna chuan a tichau hle! A inpuan loh avângin rilru lam leh taksa lama a sawhkhâwk ṭha lo zawng zawng chu tuarin, hlimna pawh a hloh a ni hmêl hle. Engin nge Davida chu ngaihdam hlawhtîr a, chhâwk zângkhai ta? Pathian hnêna a inpuanna chauh hian a chhâwk a ni. Jehova chuan Davida ṭawngṭaina chu chhânsakin, hma lam pana ke pên zêl tûr leh thil manhla engemaw hlen chhuak tûrin a tichak a ni. Chutiang bawkin, rilru tih tak zeta i ṭawngṭai chuan, Jehova chuan i ngenna a ngaihthlâksak tak zet ang che tih i ring tlat thei a ni. Tûn hmaa i thil tihsualin a tibuai che a nih chuan, thil awm dân chu i theih ang tâwkin siam ṭha la, tichuan Jehova’n a ngaidam che tih a tiamkamna chu ring tlat ang che!—Sâm 86:5.

13, 14. (a) Tûnah hian eng nge kan ngaihtuah ber ang? (b) Eng zawhnate’n nge tûna kan dinhmun bih chiang tûra min ṭanpui thei?

¹³ Hun kal tawh thlîr lêtna aṭangin nun ka hre thiam thei tih a ni ṭhîn a; mahse, hma lam hun thlîrin kan nung tûr a ni. Chuvângin tûn hma thilte avânga lungngaih ai chuan, tûn leh nakin hun chu kan ngaihtuah zâwk tûr a ni. Tûna kan thiltih emaw, tih loh emaw chu kum engemaw zât hnuah chuan lo ti lo ta ila tiin emaw, hetiang  lo deuh hian lo ti ta ila emaw tiin kan ngaihtuah ang em? Nakina kan inchhîrna thlen thei thil eng pawh laka invêng nân rinawmna kawng kan zawh tlat em?

¹⁴ Hrehawm nasa tak a hnaih tawh avângin, hêng a hnuaia thilte avânga lungkham chu kan duh lo: ‘Pathian rawngbâwlnaah kha ai khân ka nhmang lehzual thei lâwm ni le? Hun remchâng ka neih lai khân engvângin pioneer ka lo thawh loh? Kohhranho rawngbâwltu ka ni thei ta lo kha engvâng nge? Mihring thara inthuam tûrin kan lo thawk rim tâwk em? Jehova’n a khawvêl thara awm tûra a duh ang mi ka ni em?’ tihte hi. Hêng zawhna mûk takte avânga lungngaih ai hian, mahni inbih chiangin Jehova rawngbâwlnaah kan theih ang tâwk kan pe tih chu kan chian duh a ni. Chutiang a nih loh chuan, inchhîr lehzualna thlentu nun kawng chu kan zawh zêl thei a ni.—2 Tim. 2:15.

15, 16. (a) Mi tam tak chuan an nuna Pathian rawngbâwl dah hmasak nân eng ang inpêkna nge an neih? (b) Engvângin nge Lalram zawn hmasaknaa kan inpêkna engpawh chu kan inchhîr loh vang?

¹⁵ Hunbi kima Jehova rawngbâwl tûra inpe nangni chungchâng ve hi le? Nun tisamkhai a, Lalram rawngbâwlnaa hun in neih tam lehzual theih nân hna ṭha tak emaw, sumdâwnna hlawhtling tak emaw chu in kalsan pawh a ni thei a. A nih loh leh hunbi kima rawngbâwlna—Bethel-a rawngbâwlna te, international construction hna te, bial kan hna te, a nih loh leh missionary rawngbâwlnate—ang chia in tel zêl theih nân, nupui pasal nei lovin in awm emaw, in nei a nih pawhin fa neih lovin in awm emaw pawh a ni thei. Jehova rawngbâwla i lo upat tâk hnu hian, chûng i thutlûkna siamte avâng chuan i inchhîr tûr a ni em? I inpêkna chu thil ṭûl lo emaw, a hun lo emaw angin i ngai tûr a ni em? Ni lo ve!

¹⁶ Chûng thutlûknate chu Jehova i hmangaih tak zet vâng leh a rawngbâwl duhtu mi dangte ṭanpui i châk tak zet vânga siam i ni a. Nun kawng dang lo zawh la chuan a ṭha zâwk tûr anga i ngaihtuah a ngai lo. I chungchângah chuan thil dik nia i hriat i tihna aṭangin lungawina nasa tak i nei thei a. Jehova rawngbâwlnaah i theih tâwp i chhuah mêk avângin i hlim thei a ni. Ani chuan i inpêkna chu a theihnghilh lo vang. Nunna tak tak lo awm tûrah chuan tûna i duhthusâm aia ṭha daihin malsâwmna a vûr ang che!—Sâm 145:16; 1 Tim. 6:19.

17, 18. (a) Eng thu bulin nge Paula chu inchhîrna nei lova rawngbâwl tûra ṭanpui? (b) Jehova rawngbâwl chungchângah tûn hma, tûnah leh nakin atân eng nge i thil tum tlat chu?

¹⁷ Paula chuan inchhîr lehzualna nei lova Pathian rawng bâwl tûra amah ṭanpuitu eng thu bul nge a zir? J. B. Phillips ṭawng lehlinin a dah angin, Paula chuan: “Hun kal tawh chu ka hnuchhawn a, hma lama thil awmte ban tuma ka bân phar chhuakin, ka tum ram chu ngîl takin ka pan a ni,” tiin a ziak a. (Philippi 3:13, 14 chhiar rawh.) Paula chuan Juda sakhuaa a awm laia a lo ûm kawng dik lo chu a ngaihtuah reng lo. Nakina chatuan nunna lâwmman a hmuh theihna tûrin a chakna zawng zawng a sâwm khâwm zâwk a ni.

¹⁸ Paula thute phêna thu bul awm chu kan nunpui ṭheuh thei a. Siam ṭhat theih tawh loh tûn hma thilte ngaihtuaha lungngaih ai chuan; kan hma lama thil awmte chu kan ban zâwk tûr a ni. Tûn hmaa kan thil tihsualte chu kan theihnghilh tak tak thei dâwn lo va; mahse, chûngte avânga lungnih loh reng chu a ngai lo. Hun kal tawh hnuchhawn kan tumin, theih tâwp chhuahin tûnah Pathian rawngbâwl kan tum thei a, nakin hun ropui tak beisei chu kan thlîr tlat thei a ni! (w13-E 01/15)