1-3. (a) Engvângin nge Josua chuan nuna duhthlanna dik siamtu entawn tûr ṭha a nih? (b) Thu tlûkna kan siam hunah eng nge kan hriat reng ang?

“THLANG” tih hi thu mal thil ti thei tak a ni a. Mi chu duh thlang thei dinhmuna a din hian, a nun a kaihhruai dân tûr chu engemaw chen a thunun thei a ni. Entîr nân: Kal kawnga kal mi pakhat chu han mitthla teh, ani chuan kawng pêng ṭhuam pakhat a tâwk a. A khawi zâwk zawh nge a thlan ang? Rilrua pan tum lam a neih chuan, kawng khat chuan a tum lam a hnaihtîr lehzual ang a, a dang chuan a hlattîr zual ngei ang.

² Bible-ah hian chutiang dinhmun hmachhawntute entîrna tam tak a chuang a. Entîr nân, Kaina chuan a thinurna a thunun dâwn nge dâwn lo tih thu tlûkna a siam a ngai a. (Gen. 4:6, 7) Josua chuan Pathian dik rawng a bâwl dâwn nge, pathian dik lote a be dâwn tih a thlan a ngai bawk. (Jos. 24:15) Josua thiltum ber chu Jehova hnaiha awm a nih avângin, chuta hruai thlengtu kawng chu a thlang a. Kaina chuan chutiang thiltum a neih loh avângin, Jehova hlattîrtu kawng chu a thlang a ni.

³ A châng chuan, kawng pêng ṭhuam zawh zâwk tûr thlan angin thu tlûkna kan siam a ngai thei a. Chutiang hunah chuan i tum ram, a nih loh leh i thiltum—i thil tih zawng zawnga Jehova chawimawi leh amah hlattîr thei che thil engpawh pumpelh—chu hre reng ang che. (Hebrai 3:12 chhiar rawh.) He thuziak leh a dawta thuziakah, Jehova min hlattîr thei nun kawng pêng pasarihte kan bih chiang ang.

4. Engvângin nge ei zawnna hi thil pawimawh tak a nih?

⁴ Kristiante chuan mahni leh chhûngte enkawl tûrin mawhphurhna an nei a. Bible chuan a chhûngte châwm  duh lotu chu ring lotu aiin a sual zâwk a ti. (2 Thes. 3:10; 1 Tim. 5:8) Hnathawh chu nuna thil pawimawh zînga mi a nih tih a chiang hle a; mahse, kan fîmkhur loh chuan kan hnathawh chuan Jehova min hlattîr thei a ni. Engtin nge?

5. Hnathawh tûr kan pawm dâwnin eng thilte nge pawimawh?

⁵ Hna zawng lai ni ta la. Hna vânna rama awm i nih chuan i hna hmuh hmasak ber—eng pawh—chu thawh mai i duh thei a ni. Mahse, chu hna chuan Bible thu bulte kalh ta se, engtin nge ni ang? I hnathawh nêna inkûngkaiha zin ngai emaw, i hnathawh hun emaw avânga i Kristian thiltih a bahlah dâwn emaw, i chhûngte kianga a awmtîr dâwn lo che emaw a nih chuan engtin nge ni ang? Hna neih loh ai chuan a ṭha zâwk tiin i pawm mai dâwn em? Kawng dik lo thlanna chuan Pathian a hlattîr thei che tih hre reng rawh. (Heb. 2:1) Hna i zawng emaw, i hna tawh lai i enfiah emaw a nih chuan, engtin nge thu tlûkna fing tak i siam theih ang?

6, 7. (a) Hnathawh chungchângah mi chuan eng thiltumte nge a neih mai theih? (b) Eng thiltum zâwkin nge Jehova hnaihtîr ang che a, engvângin nge?

⁶ Atîra kan sawi tâk angin i pan tum lam chu rilruah dah rawh. Heti hian inzâwt rawh, ‘Ka hnathawh hian khawi lama min hruai nge ka duh?’ tiin. I hnathawh chu nang leh i chhûngte’n Jehova rawng an bâwl theihna tûra ṭanpuitu anga i thlîr chuan Jehova’n i thawhrimna chu mal a sâwm ang. (Mt. 6:33) Vawi leh khata hna i chhân thut emaw, ei zawnna lama i thlâkchhiat emaw hunah Jehova chu a hrilhhai mai lo. (Is. 59:1) Ani chuan ‘amah ngaihsaktute chu thlêmna ata chhan chhuah dân a hria’ a ni.—2 Pet. 2:9.

⁷ Kawng leh lamah chuan, i thiltum chu hausak nân mai ni ta se, engtin nge ni ang? I hlawhtling pawh a ni thei. Mahse, chutiang “hlawhtlinna” man chu a to hle ṭhîn tih hria ang che. (1 Timothea 6:9, 10 chhiar rawh.) Hausakna leh hna lam ringawt ngaihtuahna chuan Jehova a hlattîr ang che.

8, 9. An hnathawh lama an rilru put hmang chungchângah nu leh pate chuan eng nge an ngaihtuah ang? Hrilhfiah rawh.

⁸ Nu emaw, pa emaw i nih chuan, i entawn tûr siamin i fate a nghawng theih dân chu ngaihtuah rawh. I nuna i thil dah pawimawh chu eng nge ni a an hriat—i ei zawnna nge ni a, Jehova nêna in inlaichînna? I nunah nihna te, hmingthangna te, leh hausaknate chu i dah pawimawh ber a nih chuan, chutiang chhiatna kawngah chuan an zui ve che ang em? Anni chuan nu emaw, pa emaw i nihna chu an zah loh phah che ang em? Kristian ṭhalai pakhat chuan: “Ka hriat theih chin aṭang khân, ka pa chu a hnaah a in hmang zo vek a. Atîrah chuan kan chhûngkua tâna thil ṭha ber berte a duh vâng leh ṭha taka min enkawl a duh vânga thawkrim niin a lang a. Mahse, tûn hnai kum vêl aṭang khân thil awm dân chu a inthlâkthleng ta. Hna a thawk char char a; tichuan, kan mamawhte ni lovin nawmchenna thilte chu a rawn hâwn ṭhîn a. Chu mi avâng chuan, mi dangte thlarau lam thil ûm tûra fuihtu chhûngkua ang ni lovin, sum tam tak nei mi hausa chhûngkua anga hriat kan hlawh ta a ni. Engtik lai pawhin thlarau lam panga ka pa min ṭanpuina chu a pawisa aiin kan thlang zâwk ang,” tiin a sawi a ni.

⁹ Nu leh pate u, in hnathawh dah pawimawh lutukna chu Jehova hlat phah nân hmang suh u. In entawn tûr siam hmangin, in fate chu kan neih theih hausakna ropui ber chu tisa lam thil ni lovin, thlarau lam thila hausakna a ni tih in rinzia hmuhtîr ang che u.—Mt. 5:3.

10. Ṭhalaiin hnathawh tûr a thlan hunah eng nge a ngaihtuah ang?

¹⁰ Hnathawh tûr lam ngaihtuah ṭhalai i nih chuan, engtin nge kawng dik i thlan theih  ang? Kan sawi tawh angin, i nunin a pan lam chu i hriat a ngai a ni. I hnathawh tum leh training i dawn tum chuan Lalram a dah hmasaktîr thei lehzual dâwn che nge ni a, Jehova a hlattîr zâwk dâwn che? (2 Tim. 4:10) I thiltum chu an bank account emaw, stock emaw a len dân azira an hlim leh hlim loh innghat mite entawn chu a ni em? A nih loh leh: “Naupang ka lo ni tawh a, tûnah tar ka lo ni ta a, Nimahsela mi fel chu kalsana a awm ka hmu ngai lo va, a thlahte chaw khawn pawh ka hmu ngai hek lo,” tia ziaktu, Davida rin tlatna ang târ lan chu i thlang zâwk dâwn? (Sâm 37:25) Kawng khat chuan Jehova a hlattîr che laiin, kawng dang chuan i neih theih a zawnga nun ṭha berah a hruai dâwn che tih hre reng rawh. (Thufingte 10:22; Malakia 3:10 chhiar rawh.) Eng kawng nge i thlan ang? *

11. Intihhlimnate chungchângah Bible-in eng nge a sawi a, mahse eng nge kan hriat reng ang?

¹¹ Bible chuan hun hlimawm tak hman chu a dem lo va, intihhlimna chu hun khawhrâlna angin a târ lang hek lo. Paula chuan Timothea hnênah: “Taksa insawizawina hi sâwt zawng a sâwt ve bawk,” tiin lehkha a ziak a. (1 Tim. 4:8) Bible chuan “nuih hun” leh “lâm hun” a awm thu a sawi hial a, chawlh hahdamna hun ṭhahnem tâwk nei tûrin min fuih bawk. (Thur. 3:4; 4:6) Mahse, i fîmkhur loh chuan intihhlimna chuan Jehova a hlattîr thei che a ni. Engtin nge? A hlauhawmna chuan hmêlhmang pahnih a nei—i thlan intihhlimna chi leh chu mi atâna i hun hman zât, tiin.

12. Intihlimna thlan chungchângah engte nge i ngaihtuah ngai?

¹² A hmasain, intihhlimna chi kan thlan chu i lo ngaihtuah ang u. Infiamna leh intihhlimna ṭha i hmu thei tih ring tlat phawt ang che. Mahse, chûng zînga tam tak chuan tharum thawhna te, dawithiamna te, leh mipat hmeichhiatna hman sualnate pawh tiamin Pathian huat zâwngte chu a chawimawi a. Chuvângin, intihhlimna i thlan chu i bih chian a ngai a ni. Chu chuan i chungah eng nghawng nge a neih? Nangmahah tharum thawhna te, inelna, a nih loh leh mahni hnam chhuan bîkna leh hnam dang hmuhsitna rilru a neihtîr che em? (Thuf. 3:31) Sum leh pai a khawhraltîr che em? Mi dangte a titlu thei ang em? (Rom 14:21) I intihhlimna thlan chuan eng ang mite nge a  kawmtîr che? (Thuf. 13:20) Thil sual tih châkna a neihtîr che em?—Jak. 1:14, 15.

13, 14. Intihhlimna atâna hun i hman zât chungchângah eng nge i ngaihtuah ngai?

¹³ Intihhlimna atâna hun i khawhral zât pawh hi ngaihtuah bawk rawh. Heti hian inzâwt rawh: ‘Intihhlim nâna hun ka hman tam avângin thlarau lam thiltih nân hun ka nei mang lo ṭhîn em?’ tiin. Intihhlimna atâna hun tam tak hman i thlan chuan chûng hunte chu a nawm tûr angin a nuam lo tih i hmun ang. A nihna takah chuan, a tâwk chauhva intihhlimna hmangtute chuan hun an hmang nuam lehzual a ni. Engvângin nge? Thil pawimawh zâwkte an ti tawh tih inhriatna nei a, inthiam lohna awm lova chawlh hahdamna hun an hman avângin.—Philippi 1:10, 11 chhiar rawh.

¹⁴ Intihhlim nâna hun tam tak hman chu thil duhawm tak angin lang thei mah se, chutiang kawng zawhna chuan Jehova a hlattîr thei che a ni. Kum 20 vêl unaunu Kim-i chuan chu thil chu a tawng a ni. Ani chuan: “Party zawng zawngah kan tel ṭhîn a. Chawlhkâr tâwp—Zirtâwpni, Inrinni, leh Chawlhni—apiangin thil engemaw tak a thleng ṭhîn a ni. Mahse, tûnah chuan thil pawimawh zâwk tih tûr tam tak a awm tih ka hre ta. Entîr nân, pioneer ka nih angin thlawhhma rawngbâwlna atân zîng 6:00-a ka thawh a ngaih avângin, zîng lam dâr khat emaw, dâr hnih emaw thleng ṭhian ka kâwm thei lo. Intihhlimnate hi a ṭha lo vek kher lo tih ka hria a; mahse, nasa takin min la pêng thei a ni. Thil dangte ang bawkin, a awmna tûr dik takah kan dah tûr a ni,” tiin.

15. Engtin nge nu leh pate chuan an fate chu intihhlimna nuam tak thlang tûra an ṭanpui theih?

¹⁵ Nu leh pate tân mahni leh an fate tâna tisa lam, thlarau lam, rilru lam mamawhte pêk chu an mawhphurhna a ni. Chutah chuan intihhlimna pawh a tel. Nu leh pa i nih chuan intihhlimna thiltih zawng zawng chu a ṭha lo angah ngai suh. Chutih rual chuan a thununna ṭha lo lakah invêng rawh. (1 Kor. 5:6) Ngaihtuah lâwkna ṭha tâwk i hman chuan, nangmah leh i chhûngte tihahdam theitu intihhlimna chu i hmu thei a ni. * Chutiang chuan nang leh i fate chuan Jehova hnaihtîrtu kawng chu in thlang ang.

16, 17. Nu leh pa tam takte chuan eng dinhmun lungngaihthlâk tak nge an tawn a, engtin nge an hrehawmna chu Jehova’n a hre thiam tih kan hriat theih?

¹⁶ Nu leh pate leh fate inkâr inzawmna chu a ngheh êm avângin, Jehova chuan chu inlaichînna chu a mite a hmangaihzia târ lan nân a hmang a ni. (Is. 49:15) Chuvângin, kan hmangaih tak chhûngkaw zînga miin Jehova a kalsan huna nasa taka lungngaih chu thil pangngai tak a ni. A fanu hnawhchhuah tâwk unaunu pakhat chuan: “Nasa takin ka lungngai a. ‘Engvângin nge Jehova a kalsan?’ tiin ka ngaihtuah a. Mahni ka inthiam lovin, ka inmawhpuh a ni,” tiin a sawi a ni.

¹⁷ Jehova chuan i hrehawmna chu a hre thiam a. A mihring chhûngkaw zînga hmasa ber leh a hnu Tuilêt hmaa mi a tam zâwkte an hel a; chu chu “rilru nat nân a hman phah” a ni. (Gen. 6:5, 6) Chutianga thil hrehawm tuar ve ngai lote tân chuan a lungngaihthlâkzia hriat thiam chu a harsa mai thei. Amaherawhchu, chhûngkaw zînga hnawhchhuah tâwk kawng sual zawhtu avânga Jehova kan hlat chu a finthlâk lo hle ang. A nih chuan, engtin nge chhûngkaw zînga miin Jehova a kalsan avânga lungngaihna nasa tak chu i hmachhawn theih ang?

18. Engvângin nge nu leh pate chuan an fa’n Jehova a kalsan chuan mahni an inmawhpuh loh vang?

¹⁸ Thilthleng avângin mahni inmawhpuh suh ang che. Jehova chuan mihringte hnênah  duhthlan tûr a pe a, mahni inpumpêk a, baptisma chang tawh apiang chuan mahni mawhphurhna “phur an phur ṭheuh” tûr a ni. (Gal. 6:5) A tâwpah chuan, Jehova chuan nangmah ni lovin, thil sual titu chu a ni, a duh thlanna avânga mawh a phurhtîr chu. (Ezek. 18:20) Tin, mi dangte pawh mawhpuh suh ang che. Zilhhauna atân Jehova ruahmanna siam chu zah la. Kohhran vênghim tûra thil titu berâm vêngtute do lovin, Diabola chu do tlat zâwk rawh.—1 Pet. 5:8, 9.

19, 20. (a) An fate hnwhchhuah tâwk nu leh pate chuan an lungngaihna hmachhawn tûrin eng nge an tih theih? (b) Chûng nu leh pate chuan eng beiseina nge an neih theih?

¹⁹ Kawng leh lamah chuan, Jehova chunga i lungnih loh erawh chuan, ani chu i hlat ang. I hmangaih tak i chhûngkaw zînga miin a hmuh ngai chu, chhûngkaw inlaichînna pawh tiamin, thil dang zawng zawng aia Jehova dah pawimawh i tum tlatna hi a ni. Chuvângin, chu dinhmun hmachhawn thei tûr chuan, thlarau lama puitlinna nei zêl ang che. I Kristian unau rinawmte lakah inkulh hrang suh ang che. (Thuf. 18:1) Jehova hnênah ṭawngṭaiin i rilru veizâwng chu hrilh ang che. (Sâm 62:7, 8) Entîr nân SMS emaw, e-mail emaw ang chite hmanga hnawhchhuah tawh chhûngkaw zînga mi nêna inbiak pawh dân kawng dap suh. (1 Kor. 5:11) Thlarau lam thiltihah inhmang tlat zâwk rawh. (1 Kor. 15:58) A hmaa kan târ lan tâk unaunu chuan, “Ka fanu Jehova hnêna a lo kîr leh huna amah ṭanpui thei tûr dinhmuna kan din theihna tûrin Jehova rawngbâwlnaah kan intihbuai a ngai tih ka hria,” tiin a sawi a ni.

²⁰ Bible chuan hmangaihnain “engkim a beisei” a ti a. (1 Kor. 13:4, 7) I hmangaih lo kîr leh tûra beiseina i neih chu thil sual a ni lo. Kum tinin thil sual titu tam tak chu inlamlêtin, Jehova inawpna pâwlah an lo kîr leh a ni. An inlamlêt tawh hnu chuan an chungah Jehova a thinur reng lo. ‘Ngaihdam a peih’ zâwk mah a ni.—Sâm 86:5.

21, 22. Zalên taka duh thlan theihna i hman dân chungchângah eng nge i tum tlat?

²¹ Jehova chuan a mihring siamte hnênah zalên taka duh thlan theihna a pe a. (Deuteronomy 30:19, 20 chhiar rawh.) Mahse, chu zalênna chuan mawhphurhna rit tak a keng tel a ni. Kristian tinte chuan: ‘Eng kawng nge ka zawh? Hnathawhte, intihhlimnate, a nih lo leh chhûngkaw inlaichînnate chu Jehova hlat phah nân ka hmang em?’ tiin an inzâwt tûr a ni.

²² Jehova’n a mite a hmangaihna chu a dai ngai lo. Kawng dik lo zawh kan thlan chauhvin Jehova kan hlat thei a ni. (Rom 8:38, 39) Mahse, chu thil chu a thlen kher a ngai lo! Thil engmahin Jehova a hlattîr loh che chu tum tlat rawh. A dawta thuziakah chuan chu i tum tlatna târ lan theihna kawng dang palite sawiho a ni ang. (w13-E 01/15)