1, 2. (a) Eng miziate’n nge fiahna hmachhawn tûra min ṭanpui ang? (b) Rinna chu engtin nge i hrilhfiah ang? Entîrna pe rawh.

JEHOVA rawngbâwlna chuan hlimna min pe a. Mahse, mihringte tawn ṭhin harsatna tlânglâwn erawh kan tawn bâkah, “felna avângin tuar” pawh kan awm thei bawk. (1 Pet. 3:14; 5:8, 9; 1 Kor. 10:13) Chutiang fiahnate hlawhtling taka hmachhawn thei tûr chuan, rinna leh huaisenna kan mamawh a ni.

² Rinna chu eng nge ni? Tirhkoh Paula chuan: “Rinna hi thil beiseite awm ngeia hriatna, thil hmuh lohte hriatfiahna a ni,” tiin a ziak a. (Heb. 11:1) Rinna chu in hmun lo ram neitu ngei kan nihzia târ langtu pass ang a ni. Pathian chuan a thu a thlen famkimtîr ziah tih kan rin avângin, kan la hmuh tûr malsâwmnate kan neih tûrzia târ langtu pass hlu tak nei ang kan ni. Kan rinna chuan kan beisei Bible ṭanchhan thutiamte thlen famkimna kan hmu ngei dâwn tih min hriat chiantîr a, mitin hmu thei lo mah ila chûngte chu a awm ngei tih kan hre fiah a ni.

3, 4. (a) Huaisenna chu eng nge ni? (b) Rinna leh huaisenna neih lehzual theih dân kawng khat chu eng nge ni?

³ Huaisenna chu “harsatna leh hlauhawm hmachhawn huna hlauhna nei lova ṭawng chhuak tûr leh thil ti tûra thlarau lam, rilru lam, leh nungchang lama chhelna” tia hrilhfiah a ni a. (The New Interpreter’s Dictionary of the Bible) Huaisenna kan neih chuan kan chakin, hlauh kan nei lo va, a châng chuan dik nia kan hriatah chuan tawrh pawh kan inhuam a ni.—Mk. 6:49, 50; 2 Tim. 1:7.

⁴ Rinna leh huaisena chu mize duhawm tak a ni a. Mahse, rinna neih tam lehzual ngai nia inhriain, huaisen lo niin kan inhre mai thei a. Bible-a chhinchhiah mi a sâng têlte chuan hêng miziate târ lannaah hian entawn tûr ṭha tak an siam a. Chuvângin, rinna leh huaisenna kan neih lehzual  theih dân kawng khat chu chûng an entawn tûr siam ṭhenkhatte ngaihtuah chu a ni.

5. A chanvo hlawhtling taka ti tûrin Josua’n eng nge a mamawh?

⁵ Kum 3,500 vêl kal taa thilthleng kha ngaihtuah kîr leh ta ila. Jehova kut chak takin Aigupta sal tânna ata Israel mi maktaduai têlte a chhan chhuahna pawh kum sawmli lai a liam tawh a. Zâwlnei Mosia chuan hma a hruai a ni. Chutih laia kum 120 laia upa Mosia chuan, Ram Tiam chu râl khat aṭangin a thlîr a; tichuan, Nebo tlâng chhîpah chuan a thi ta a ni. Amah thlâktu Josua chu “finna thlarauvin a khat a.” (Deut. 34:1-9) Israel mite chuan Kanaan ram an la ṭêp tawh a ni. An hruaitu hlawhtling tak ni tûrin Josua chuan Pathian pêk finna a mamawh dâwn a. Jehova chunga rinna a nghah a, huaisen tak leh chak taka a awm pawh a ngai dâwn a ni.—Deut. 31:22, 23.

6. (a) Josua 23:6 sawi angin, eng ti tûrin nge huaisenna kan mamawh? (b) Tirhkohte 4:18-20 leh Tirhkohte 5:29 thute aṭangin eng nge kan zir?

⁶ Kanaan ram an lâkna hun rei tak chhûnga Josua târ lan finna te, huaisenna te, leh rinnate chuan Israel mite chu a tichak ngei ang. Mahse, anni chu indonaa rorum tak an nih bâkah, Josua’n an tih atâna a sawite ti tûr chuan ngawi renga huaisenna neih pawh a ngai bawk a ni. A nun tâwp dâwn lama thuchah a sawiah, ani chuan: “Mosia dân lehkhabua ziak zawng zawngte hi ding lamah emaw, vei lamah emaw in pênsan hauh loh nân huai takin pawm ula, ti rawh u,” a ti a. (Jos. 23:6) Keini pawhin engtik lai pawha Jehova thu zâwm tûrin huaisenna kan mamawh a. Chutah chuan mite’n Pathian duhzâwng kalha thil ti tûra min tih hun pawh a tel a ni. (Tirhkohte 4:18-20; 5:29 chhiar rawh.) Jehova ring tlat chunga a kaihhruaina dîla kan ṭawngṭai chuan, ani chuan huaisen tûrin min ṭanpui ang.

7. Josua tân huaisen tak leh hlawhtling taka thil ti tûrin eng nge tih ngai?

⁷ Pathian duhzâwng ti tûra kan mamawh huaisenna nei tûr chuan a Thu kan zir a, kan nunpui a ngai a. Chu chu Josua’n Mosia a thlâk laia Jehova’n ti tûra a hrilh chu a ni: “Ka chhiahhlawh Mosian dân zawng zawng zawm tûra thu a pêk che kha zâwm tlat . . . ang che. He dân bu hian i kâ chu chhuahsan hlek suh se; chu mi thu ziak zawng zawng chu i zawm tlat theih nân chhûn leh zân i ngaihtuah zâwk tûr a ni: tichuan i kawngte chu i lo titluang zel ang a, i lo hmuingîl zêl dâwn nia,” tih thu chu. (Jos. 1:7, 8) Josua chuan chu fuihna chu a zâwm a, ‘a kawngte chu a titluang zêl’ a ni. Chutianga kan tih ve chuan, Pathian rawngbâwlnaah kan huaisenin, kan hlawhtling lehzual dâwn a ni.

8. Kum 2013 atâna kum châng chu eng Bible châng aṭanga lâk chhuah nge ni a, chûng thute chuan engtin nge a ṭanpui che i rin?

⁸ Jehova thusawi: “Chak tak leh huai takin awm rawh; hlau suh la, zâm hek suh: LALPA i Pathian chu i kalna apiangan i hnênah a awm zêl dâwn alâwm,” tih a hriat belhna chuan Josua chu nasa takin a tichak zual ngei ang. (Jos. 1:9) Jehova chu kan hnênah pawh a awm a. Chuvângin, kan harsatna tawn chu eng pawh ni se, ‘hlau lo leh zâm lovin’ i awm ang u. A bîk takin: ‘Chak tak leh huai takin awm rawh. . . . Jehova i Pathian chu i hnênah a awm e,’ tih  thu hi a chhinchhiah tlâk lehzual a. Josua 1:9-a hêng thute hi kum 2013 kumchâng atâna thlan a ni. Chûng thute leh rinna leh huaisenna târ langtu entîrna dangte thusawi leh thiltihte chuan hun lo la awm zêl tûrahte pawh min tichak ngei ang.

9. Eng kawngin nge Rahabi chuan rinna leh huaisenna a târ lan?

⁹ Josua’n enthlatu pahnih Kanaana a tirh khân, nawhchizuar Rahabi chuan anni chu lo thukruin, an hmêlmate chu kawng dik lo a kawhhmuh a. A rinna leh huaisenna thiltih avângin, Israelte’n Jeriko khawpui an lâk khân amah leh a chhûngte chu zuahin an awm a ni. (Heb. 11:30, 31; Jak. 2:25) Rahabi chuan Jehova tihlâwm nân a nun bawlhhlawh tak chu a kalsan ta a. Kristian lo ni ta mi ṭhenkhatte pawhin chutiang inthlâkthlengna nei tûrin rinna, huaisenna, leh mize nghet an nei a ni.

10. Ruthi chuan eng dinhmunah nge biakna dik a pawm a, chu chuan eng malsâwmna nge a thlen?

¹⁰ Josua thih hnu chuan, Moab mi Ruthi chu biakna dik atân huaisen takin a ding nghet a. A pasal thi ta chu Israel mi a nih avângin, Jehova chanchin engemaw chen a hriat ngei a rinawm hle. A pasala nu hmeithai, Naomi chu Moab ramah awm mah se, Israel rama, Bethlehem khuaah chuan kîr leh a tum ta a. An kal kawngah Naomi chuan Ruthi chu a mite hnêna kîr leh tûrin a ngên a; mahse, Moab hmeichhia chuan heti hian a chhâng a ni: “Nangmah ṭhen tûr leh nangmah zui lova haw leh tûr chuan min thlêm lo hrâm hrâm rawh: . . . i chite chu ka chite an ni ang a, i Pathian chu ka Pathian a ni ang,” tiin. (Rut. 1:16) Ruthi chuan a thusawi chu a ti tak zet a. A hnuah chuan, Naomi laichîn Boaza chuan Ruthi chu a nei a, ani chuan fapa a hrinsak a, Davida leh Isua thlahtu a lo ni ta a ni. Ni e, Jehova chuan rinna leh huaisenna thiltih chu mal a sâwm a ni.—Rut. 2:12; 4:17-22; Mt. 1:1-6.

11. Engtin nge Jehoiada leh Jehosebi chuan huaisenna an târ lan a, chu chuan eng nge a hlen chhuah?

¹¹ Mahni hmakhua ngaihtuah aia Pathian duhzâwng leh unaute ṭhatna tûr dah pawimawh zâwkte chu Pathianin a awmpui tih kan hmuh hian kan huaisen lehzualin, kan rinna pawh a nghet lehzual a ni. Entîr nân, Puithiam Lal Jehoiada leh a nupui, Jehosebi te hi han ngaihtuah teh. Lal Ahazia a thih hnu chuan a nu, Athali chuan Joasa tiam lohvin lal fapa dang zawng zawng chu thatin, lalṭhutthlêng a chuh a. Jehoiada leh Jehosebi chuan an nun thâpin Ahazia fapa Joasa chu kum ruk chhûng an thukru a. A kum sarihnaah Jehoiada chuan Joasa chu lalah puangin, Athali chu a tihlumtîr ta a ni. (2 Lal. 11:1-16) A hnuah Jehoiada chuan Lal Joasa chu biak in thawm ṭhatnaah a ṭanpui a. Jehoiada chuan “Israelte zîngah Pathian chungah leh a in chungchânga thil a tih ṭhat avângin,” kum 130 mi nia a thih khân lalte zîngah phûm a ni ta a ni. (2 Chro. 24:15, 16) Chu bâkah, Jehoiada leh a nupui huaisenna thiltih chuan Davida aṭanga Messia thlenga lal thlah kal zêl tûr chu an humhim a ni.

12. Ebedmeleka chuan huaisen takin eng nge a tih?

¹² Lal Zedekia ina awm, mi tilreh Ebedmeleka chuan Jeremia tân a nun a thâp a. Lal chuan Jeremia chu Juda hotute kutah a pe a, anni chuan hel tûra mite fuih pawrh anga puhin, lei hnuai ripah thi mai tûrin an paih lût a ni. (Jer. 38:4-6) Mite’n Jeremia an huat êm avângin lal hnêna ṭanpui tûra ngensak chu hlauhawm hle mah se, Ebedmeleka chuan a ngên ta a. Lal Zedekia chuan ṭha taka lo chhâng lêtin, Jeremia chhan chhuak tûrin Ebedmeleka rualin mi 30 lai a tîr a ni. Pathian chuan Ebedmeleka hnênah Babulon mite’n Jerusalem an lâk chhûngin a thi ve dâwn lo tih thu a zâwlnei hmangin a tiam a. (Jer. 39:15-18) Pathian duhzâwng huaisenna chu lâwmman pêk a ni ta a ni.

13. Hebrai mi pathum chuan engtin nge huaisenna an târ lan a, engtin nge an thiltawn chu kan hlâwkpui theih?

 ¹³ B.C.E. kum zabi sarihnaah khân, Jehova chhiahhlawh Hebrai mi pathum hnênah Pathianin rinna leh huaisenna lâwmman a pe ṭhîn tih finfiahna chiang tak pêk an ni. Chutih lai chuan, Lal Nebukadnezzara chuan Babulon mi pawimawhte chu a kal khâwmtîr a, rangkachaka siam milim hrawlpui chu be tûrin thu a pe a ni. Chutianga ti lo apiang chu rawhtuina meipuia thlâk tûr an ni a. Hebrai mi pathumte chuan Nebukadnezzara hnênah zahthiam takin: “Kan Pathian, a rawng kan bâwl ṭhina chuan rawhtuina meipui ata min chhan chhuak thei si a, i kut ata pawh, aw lalber, min chhan chhuak mai ang. Chutilo pawh ni sela, aw lalber, i pathiante rawng chu kan bâwl dâwn lo va, i rangkachak milim din pawh chu chibai kan bûk hek lo vang, tih hi hria ang che,” tiin an hrilh a ni. (Dan. 3:16-18) Hebrai mi pathumte chhan chhuah an nih dân phûrawm tak chu Daniela 3:19-30-ah chiang taka târ lan a ni. Rawhtuina meia tihhlum tûra vau chu kan ni lo mai thei a; mahse, kan rinawmna fiahnate chu kan tawng ṭhîn a, rinna leh huaisenna kan neih avângin Pathianin mal min sâwm dâwn tih kan hre chiang thei a ni.

14. Daniela bung 6-na sawi angin, engtin nge Daniela chuan huaisen taka thil a tih a, chu chuan eng nge a rah chhuah?

¹⁴ “Ni sawmthum chhûnga, aw lalber, nangma hnênah chauh lo chuan, pathian emaw mihring emaw hnêna dîlna nei apiang chu sakeibaknei pûka paih tûr” tih thupêk siam tûra Daniela hmêlmate’n Lal Daria an hmin khân, Daniela chuan rinna leh huaisenna a târ lang a. Ani chuan chu thu ziaka hming ziah hnan a nih tih a hriat veleh, “a inah a lût a (a pindana a tukverhte chu Jerusalem lam hawia hawn a ni a), a hmâa a tih dân ang bawkin ni khatah vawi thum a ṭhingṭhi a, a ṭawngṭai a, a Pathian hnênah lâwm thu a hrilh a.” (Dan. 6:6-10) Mi huaisen Daniela chu sakeibaknei pûka paih a ni a—mahse, Jehova’n a chhan chhuak a ni.—Dan 6:16-23.

15. (a) Akuila leh Priskilli chuan rinna leh huaisenna chungchângah eng entawn tûr nge an siam? (b) Johana 13:34-a chhinchhiah Isua thusawi awmzia chu eng nge ni a, engtin nge Kristian tam takte’n chutiang hmangaihna chu an târ lan?

¹⁵ Akuila leh Priskilli chuan Paula tân an nun an thâp thu Bible chuan a sawi a, an thâp dân erawh sawi lan a ni lo. (Tirh. 18:2; Rom 16:3, 4) Anni chuan Isua thusawi: “Thupêk thar ka pêk che u hi, inhmangaih ula; keiin ka hmangaih ang che u hian nangni pawh inhmangaih ula,” tih nêna inmilin huaisen takin thil an ti a ni. (Joh. 13:34) Mosia Dân chuan mi chu mahni a inhmangaih anga ṭhenawmte hmangaih tûrin a phût a. (Lev. 19:18) Mahse, hmangaihna chungchânga Isua thupêk chu a “thar” a ni, amah anga mi dangte  tâna kan nun pêk inhuam khawp hmangaihna a nih avângin. Kristian tam tak chuan an unaute chu hmêlmate tihnat emaw, tihhlum emaw tûr laka vênhim nân an nun thâpa humin hmangaihna an lantîr a ni.—1 Johana 3:16 chhiar rawh.

16, 17. Krista hnungzuitu hmasa ṭhenkhat chuan rinna fiahna eng nge an tawh a, engtin nge chu chu kan hun laia Kristian ṭhenkhatte thiltawn nêna a inan?

¹⁶ Isua angin, Kristian hmasate chuan huaisen takin Jehova chauh an bia a. (Mt. 4:8-10) Anni chuan Rom ram awptu chawimawi nâna rimtui hâl chu an duh lo. (Milem hi en rawh.) Daniel P. Mannix-a chuan heti hian a ziak a ni: “Maichâma mei chhit chu a remchân lehzual nân ennawm chhuahna hmunah dah a ni ṭhîn a; mahse, Kristiante zîngah rinna phatsan an awm meuh lo. Mi tâng tâna tih tûr awmchhun chu rimtui sawh khat lek meia theh a ni mai a, tichuan inthawina a hlân tih târ langtu Certificate of Sacrifice chu pêk a niin, chhuah zalên a ni ta ṭhîn a ni. Tin a hnênah chuan lalber chu Pathian angin a be lo va, Rom ram hruaitu berin pathian mizia ang a neihzia pawmna mai a ni tih ṭha taka hrilhfiah a ni bawk. Chuti chung pawh chuan, Kristiante zîngah chu hun remchâng hmang ṭangkai an awm meuh lo,” tiin.—Those About to Die.

¹⁷ Nazi concentration camp-a tâng tûn laia Kristiante pawh Jehova phatsanna lehkhaa hming an ziah chuan thihna pumpelh a, zalên theihna hun remchâng pêk an ni fo va. Mahse, hming sign an awm meuh lo. Tûn hnaia Rwanda rama hnam insuatna a thlen khân Tutsi leh Hutu Thuhretute chu thih pawh huamin an invênghim tawn a. Chutiang dinhmun hrehawm takah chuan huaisenna leh rinna neih a ngai a ni.

18, 19. Bible-a rinna leh huaisenna chungchânga entawn tûr engte’n nge kan thu hrilhna chhun zawm zêl tûra min ṭanpui thei ang?

¹⁸ Pathianin a chhiahhlawh mihringte hnêna a pêk tawh azawnga hna ropui ber—Lalram thuchah puan chhuahna leh zirtîra siamna hnaa tel ve theihna chanvo kan nei mêk a. (Mt. 24:14; 28:19, 20) Tlukpui nei lo Isua entawn tûr siam avângin kan va lâwm tak êm! Ani chuan “thu hril leh Pathian ram chanchin ṭha thlen chungin khaw lian leh khaw tê te a fang zêl a.” (Lk. 8:1) Amah angin, Lalram thuchah puang chhuak tûr chuan rinna leh huaisenna kan mamawh a ni. Pathian ṭanpuinain, khawvêl pum huap tuilêtin ‘Pathian ngaihsak lote awmna khawvêl’ a tihborâl tûr chungchânga “felna thu hriltu” mi huaisen Nova ang kan ni thei a ni.—2 Pet. 2:4, 5.

¹⁹ Ṭawngṭaina chuan thu hrilh hna thawk chhunzawm zêl tûrin min ṭanpui a. Krista hnung zuitu tihduhdahna tuar ṭhenkhatin ‘huai taka Pathian thu hril’ thei tûra ṭawngṭaia an dîl khân,’ an ngenna chu chhânsakin a awm a ni. (Tirhkohte 4:29-31 chhiar rawh.) In tina thu hrilh i tîm deuh a nih chuan, Jehova chuan rinna leh huaisenna tam lehzual nei tûra i dîlna chu a chhâng ang.—Sâm 66:19, 20 chhiar rawh. *

20. Jehova chhiahhlawh kan nih angin eng ṭanpuina nge kan dawn?

²⁰ He khawvêl suaksual leh buaithlâk takah hian harsatna tâwk reng chunga Pathian duhzâwng tih chu thil awlsam a ni lo. Mahse, mahni mai kan ni lo. Pathian chu kan hnênah a awm a. Kohhran Lû, a Fapa pawh kan hnênah a awm bawk a ni. Khawvêl pum puiah Jehova Thuhretu, kan unau 70,00,000 chuang kan nei bawk a. Anmahni nên chuan kum 2013 kumchâng: ‘Chak tak leh huai takin awm rawh. . . . Jehova i Pathian chu i hnênah a awm e,’ tih hi kan rilrua vawng reng chungin, rinna lantîrin chanchin ṭha chu i puang chhuak zêl ang u.—Jos. 1:9. (w13-E 01/15)