1, 2. (a) “Chawimawina” leh “ropuina” tia lehlin atîra thu mal awmzia chu eng nge ni? (b) He thuziakah hian eng zawhnate nge kan ngaihtuah ang?

“CHAWIMAWINA,” a nih loh leh “ropuina” tih thu mal i hriat hian i rilruah eng nge lo lang? Thil siamte ropuina em ni? (Sâm 19:1) Mi hausa chungchuang te, mi fing te, a nih loh leh hlawhtlingte hnênah fakna, chawimawina, leh ropuina pêk hi em ni zâwk? Bible-ah chuan atîra ziaka thu mal thuhmun chu “chawimawina” leh “ropuina” tia lehlin a ni a, thil rih zâwng a kâwk a ni. Hmân lai—thîr hlu tak chia pawisa siam a nih lai—chuan pawisa thîr chu a rih poh leh a hlu a ni. Chuvângin, rih zâwng sawina thu mal hi thil ngaih hlut, thil ropui, a nih loh leh rilru khawih tak sawina anga hriat thiam a lo ni ta a ni.

² Mi dangte thiltihtheihna te, dinhmun te, a nih loh leh hmingthannate chuan kan rilru a khawih mai theih laiin, Pathian chuan mihringah eng nge a en? Bible chuan Pathianin mihringte hnêna chawimawina a pêk chungchâng a sawi a. Entîr nân, Thufingte 22:4 chuan: “Inngaihtlâwmna leh LALPA ṭih man chu sum te, chawimawina te, nunna te a ni,” tih a sawi a ni. Tin, zirtîr Jakoba pawhin: “Lalpa mithmuhin inngaitlâwm rawh u, tichuan a chawimawi ang che u,” tiin a ziak bawk. (Jak. 4:10) Pathian Jehova’n mihringte hnêna chawimawina a pêk chu eng nge ni? Engin nge chu chawimawina chu dawng lo tûra min dâl thei? Engtin nge mi dangte chu he chawimawina hi dawng tûra kan ṭanpui theih?

3-5. Pathian Jehova chuan eng ropuinaah nge min hruai thlen ang?

³ Fakna hla phuahtu chuan Jehova’n a kut ding lama chelhin ropuina dik takah a hruai thleng dâwn tih a rin tlatzia a sawi chhuak a. (Sâm 73:23, 24 chhiar rawh.) Engtin nge Pathian Jehova’n chu chu a tih? Ani chuan a  chhiahhlawh inngaitlâwm takte chu kawng hrang hranga chawimawiin ropuinaah a hruai thleng a. A duhzâwng hriatthiamtîrin mal a sâwm bawk a. (1 Kor. 2:7) A thu ngaithlaa, zâwmtute chu amah nêna mi mal inlaichinna neihtîrin a chawimawi bawk a ni.—Jak. 4:8.

⁴ Pathian Jehova chuan a chhiahhlawhte chu Kristian rawngbâwlna ro hlu tak a kawltîr bawk a. (2 Kor. 4:1, 7) Chu chuan ropuinaah min hruai thleng a ni. Pathian chawimawi nân leh mi dangte hlâwkpui nâna rawngbâwlna chanvo ṭha hmangtute chu Jehova’n: “Mi chawimawi apiangte chu ka chawimawi ang,” tiin a tiam a ni. (1 Sam. 2:30) Chutiang mite chu Jehova laka hming ṭha neihna hmanga chawimawi an ni a; tin, Pathian chhiahhlawh dangte fak an hlawh a rinawm bawk a ni.—Thuf. 11:16; 22:1.

⁵ ‘LALPA nghâk a, a kawng zawhtute’ hma lam hun chu eng nge ni le? Anni chu: “Ram hi luah tûrin [Jehova’n] a chawimawi ang che: mi suaksual tihborala an awm lai chu i la hmu ang,” tia tiam an ni a. (Sâm 37:34) Chatuana nunna changa chawimawina sâng tak dawn hlân chu an nghakhlel hle a ni.—Sâm 37:29.

6, 7. Engvângin nge mi tam takin Isua an rin duh loh?

⁶ Pathian Jehova’n min pêk a duh chawimawina kan dawnna tûr chu engin nge dâl thei? Min dâl theitu thil pakhat chu Pathian nêna inlaichînna nei lote ngaih dân pawisak lutuk hi a ni. Isua hun laia thuneitu tuemawte chungchâng tirhkoh Johana ziak hi ngaihtuah teh: “Hotute a ṭhen tam takin Isua an ring ta a; amaherawhchu Pharisaite avângin an inpuang lo, chutilochuan inkhâwmna in hnawngin an awm ang; Pathian hnêna ropuina ai chuan mihring hnêna ropuina an duh zâwk si a,” tih hi. (Joh. 12:42, 43) Chûng roreltute chuan Pharisaite ngaih dân pawisa lutuk lo se la chuan a va ṭha zâwk dâwn êm!

⁷ Isua chuan a rawngbâwl ṭantirh lamah khân mi tam takte’n amah an pawm loh va, an rin loh chhan tûr chiang takin a târ lang a ni. ( Johana 5:39-44 chhiar rawh.) Israel hnam chuan Messia lo lan hun chu kum zabi tam tak chhûng an lo nghâk tawh a. Isua’n mite a zirtîr ṭan khân, ṭhenkhatte chuan Krista lo lan hun a thleng tawh tih Daniela hrilh lâwkna chu an hre thiam pawh a ni thei. Chu mi hma thla engemaw zâta Baptistu Johana’n thu a hrilh chuan, mi tam takte chuan: “Krista a lo ni mial dah law maw?” an ti a ni. (Lk. 3:15) Tûnah chuan, hun rei tak an lo nghah tawh Messia chuan an zîngah mite a zirtîr mêk a. Mahse, Dân hretute chuan amah chu an pawm thei lo. A chhan chu târ langin, Isua chuan heti hian a sawi a ni: “Nangni inchawimawi tawn lâwm te u, engtin nge in rin theih ang? Pathian tak chauhva chhuak chawimawina chu in zawng si lo,” tiin.

8, 9. Mihring chawimawinain Pathian chawimawina a hliahkhuh theih dân chu êng chungchânga tehkhin thu hmangin târ lang rawh.

⁸ Mihring chawimawinain Pathian chawimawina a hliah khuh theih dân chu chawimawina leh êng khaikhinin kan entîr thei ang. Vân sâng boruak hi êng tak leh ropui tak a ni a. Zân thiang taka arsi pêt unna vân i thlîr hnuhnun ber lai kha i la hre reng em? “Arsite ropuina” chu a mak hle. (1 Kor. 15:40, 41) Chu mi vân tho chu kawtthlêr ṭha taka chhit ên aṭanga i thlîr chuan engtin nge a lan thung? Khawpui êngte chuan hla taka arsi êngte chu min hmuh lohtîr ṭhelh a ni. Chu chu kawng vêl te, khêl mual te, leh in aṭangtea êng lo chhuak chu arsi aia a ên zâwk leh a mawi zâwk vâng em ni? Ni lo ve! Khawpuia êngte chu kan hnaih zâwk avângin chu chuan Jehova thil siamte hmuh chu a tiharsa a. Zâna vân mawina hmu tûr chuan engtin emaw tak êng siam chawpte chu kan dan chah a ngai a ni.

⁹ Chutiang bawkin, chawimawina dik lo kan ngaina lutuk a nih chuan, Jehova’n chawimawina tlo tak min pêk a duh chu kan ngaihlu lo vang a, kan zawng hek lo vang. Mi tam  takte chuan an hmêlhriatte emaw, an chhûngte emaw ngaih dân an pawisak luat avângin Lalram thuchah chu an pawm lo va. Mahse, mihringte chawimawina dawn duhna chuan Pathian chhiahhlawh inpumpêk tawhte pawh a nghawng ve thei em? Entîr nân, tleirâwl pakhat chu miin an hriat lar êm êmna hmun, mahse, Jehova Thuhretute zînga pakhat anga an la hriat ngai lohna hmunah thu hril tûrin tih a ni a. Chuta thu hrilh chu a tîm ang em? A nih loh leh, theocratic thiltum a ûm avângin tu emawin nuihzat ta se engtin nge ni ang? Chûng thlarau lama mit fîm lote’n a duhthlanna a thunun chu a phal ang em? A nih loh leh, Kristian pakhat chuan sual pawi tak a ti pawh a ni thei a. Kohhrana a dinhmun a chân duh loh vâng emaw, a hmangaihte a tihbeidawn duh loh vâng emawin a thil tihsual chu a thup ang em? A hnuhnûng zâwk dinhmunah hian, Jehova nêna an inlaichînna siam ṭhat a ngaih pawimawh ber chuan, ‘kohhran upate a kovin,’ an ṭanpuina a zawng ang.—Jakoba 5:14-16 chhiar rawh.

10. (a) Engtin nge mi dangte min thlîr dân tûr pawisak lutukna chuan kan thu tlûkna siam a tihbuai theih? (b) Inngaitlâwm taka thil kan tih chuan eng nge kan rin tlat theih?

¹⁰ Kristian puitlinna lam kan pan chho zêl pawh a ni thei a; mahse, unau pakhat chuan min zilh ta tlat mai a. Chapona avânga lo invên te, hmai phih fai duhna te, a nih loh leh inthiam duhnate kan neih loh chuan chu unaupa thu min hrilh chuan min ṭanpui thei a ni. A nih loh leh, unau pakhat nên hna inthawk dûn angah lo inngai ta la. In thawh dunna chu i ngaihtuahna ṭha leh i thawh rimna chungah tuin nge hming ṭhat hlawh ang tih ngaihtuahnain a thunun ang em? Hêng dinhmun a engemaw ber hi i chungah a thleng a nih chuan: “Mi rilru inngaitlâwm chuan chawimawi a hlawh ang,” tih hi ring tlat ang che.—Thuf. 29:23.

11. Mite’n min fak huna chhûngrila kan lo chhân lêt dân tûr chu eng nge ni a, engvângin nge?

¹¹ Kohhrana hotute leh hotua ‘ṭan duhte’ pawh chutianga mite fak hlawh duhna lakah chuan an fîmkhur tûr a ni. (1 Tim. 3:1; 1 Thes. 2:6) Unaupa chuan a chanvo ṭha taka a tih avânga tih tak zeta fakna a dawn hunah engtin nge a chhân lêt ang? Ani chuan Lal Saula ang khân mahni inchawimawi nân lung a phun chu a rinawm lêm lo. (1 Sam. 15:12) Mahse, a hlawhtlinna chu Pathian khawngaihna vâng a ni tih leh, a hlawhtlin leh zêlna tûr pawh Pathian malsâwmna leh ṭanpuinaah a innghat bawk tih chu a pawm thlap em? (1 Pet. 4:11) Mite’n min fak huna chhûngrila kan lo chhân lêt dân chuan eng ang chawimawina nge kan zawn tih a târ lang a ni.—Thuf. 27:21.

12. Juda mi ṭhenkhatte’n Isua thu an ngaihthlâk loh chhan chu eng nge ni?

¹² Pathian min pêk chawimawina kan dawnna dal theitu dang leh chu kan châkna neihte hi a ni a. Châkna ṭha lote chuan thutak kan hriatna tûr a dang hmiah thei a ni. ( Johana 8:43-47 chhiar rawh.) Isua chuan Juda mi ṭhenkhatte’n ‘an pa diabola duhzâwng tih an duh’ avângin a thu an ngaithla lo tih a sawi.

13, 14. (a) Kan thluakin mihring aw a lo thliar hran dân chungchângah mithiamte’n eng nge an sawi? (b) Tu nge kan ngaihthlâk tih chu engin nge hril?

¹³ Kan châkna chuan kan thil hriat dân a thunun ṭhîn. (2 Pet. 3:5) Jehova chuan kan ri hriat duh lohte hnâwl theihna mak danglam tak neiin min siam a ni. Han châwl lawk la, tûnah ri chi hrang engzât nge i hriat theih han ngaithla teh. Nichin lawk khân chûng zînga tam tak te chu i lo hre miah lo. I thluak chuan ri chi hrang hrang hriat theihna a nei chung pawhin, thil pakhatah insawrbing tûrin a ṭanpui che a ni. Thil zir chîk mite chuan vawi khatah mi pakhat ṭawng chauh ngun takin kan ngaithla thei tih an hmu chhuak a. Chu mi awmzia chu, vawi khatah mi pahnih aw i ngaihthlâk kawp chuan, uluk taka i ngaihthlâk zâwk tûr chu i thlan a ngai tihna a ni a. I thlan zâwk chu i ngaihthlâk duh zâwkah a innghat  ang. An pa Diabola duhzâwng tih duhtu Juda mite chuan Isua thu chu an ngaithla lo a ni.

¹⁴ ‘Mi fing in’ leh ‘mi mâwl in’ atangin thute kan dawng a. (Thuf. 9:1-5, 13-17) Finna leh mâwlna chuan thil min hrilh reng anga ngaih theih a nih avângin, chu chuan duhthlan tûr min siam sak a ni. Tu thu nge kan ngaihthlâk zâwk ang? A chhânna chu tu duhzâwng nge kan tih duh zâwk, tihah a innghat a. Isua berâmte chuan a aw an hria a, an zui a ni. (Joh. 10:16, 27) Anni chu “thutaka mi” an ni a. (Joh. 18:37) Anni chuan ‘Mi dangte aw chu an hre lo.’ (Joh. 10:5) Chutiang mi inngaitlâwmte chuan chawimawina an dawng a ni.—Thuf. 3:13, 16; 8: 1, 18.

15. Engtin nge Paula hrehawm tawrhna chu mi dangte tâna “ropuina,” a nih loh leh chawimawina a nih theih?

¹⁵ Jehova duhzâwng kan tih ṭâng ṭângna chuan mi dangte chu chawimawina dawng tûrin a ṭanpui a. Paula chuan Ephesi kohhran hnênah heti hian a ziak a ni: “Nangmahni vânga ka hrehawm tuarnate avâng hian beidawng lo tûrin ka ngên a che u, chûngte chu in ropuina a ni,” tiin. (Eph. 3:13) Engtin nge Paula hrehawm tawrhna chu Ephesi mite tân “ropuina,” a nih loh leh chawimawina a nih theih? Harsatna tâwk chung pawha Paula’n unaute rawng bâwlsak chhunzawm zêl a inhuamna chuan Kristian an nih anga an chanvo neih chu ropui tak leh hlu tak a ni tih Ephesi mite a hmuhtîr a ni. Kawng lehlamah Paula chu hrehawm a tawrhte avângin lo tlâwm ta mai se chuan, chu chuan Jehova nêna an inlaichînna te, an rawngbâwlna te, leh an rinna te chu thil hlu lo angin a târ lang dâwn lâwm ni? Paula chhelna chuan Kristianna chu a chawi sâng a, zirtîr nihna chuan inpêkna eng pawh a phu tih a târ lang a ni.

16. Lustra khuaa Paula hrehawm tawrh chu eng nge ni?

¹⁶ Paula ṭhahnemngaihna leh chhelnain nghawng a neihte chu han ngaihtuah teh. Tirhkohte 14:19, 20 chuan heti hian a sawi a ni: “Antiokei leh Ikonion khuaa mi Juda tute emaw chutah chuan an lo kal a, mipuite chu an thlêm thlu ta a; tichuan Paula chu Iungin an dêng a, thia an rin avângin [Lustra] khua ata chu an hnûk chhuak ta a. Nimahsela zirtîrhote chu a vêla an din laiin, a lo tho va, khuaah chuan a lût leh ta a. Tin, atûkah chuan Barnaba nên Derbe khuaah an kal ta a,” tiin. A hma ni-a thi tûra kalsan tawh ni si, vawiin nî anga mêl 60 (100 km) lai kêa han kal leh tâk si chu han ngaihtuah teh!

17, 18. (a) Eng kawngin nge Timothea chuan Lustra khuaa Paula hrehawm tawrhna chu a hriat hle? (b) Paula chhelna chuan Timothea chungah eng nghawng nge a neih?

¹⁷ Timothea chu Paula ṭanpui tûra kalkhâwm “zirtîrhote” zîngah a tel em? Tirhkohte buah chiang faka sawina awm lo mah se, an  zînga mi a nih theih dân a awm a ni. Paula’n Timothea hnêna a lehkha thawn pahnihnaa: “Nang erawh chuan ka zirtîrna te, ka awm dân te, . . . i hre hle mai; Antiokei khuaah [khua aṭanga hnawhchhuahna] te, Ikonion khuaah [lunga den tumna] te, Lustra khuaah [lunga denna] te ka chunga thil thleng leh tihduhdahna ka tuarnate kha; chûng zawng zawngah chuan Lalpa chuan mi chhandam ta si a,” tia a ziah avângin.—2 Tim. 3:10, 11; Tirh. 13:50; 14:5, 19.

¹⁸ Timothea chuan chûng thilthlengte leh Paula chhelzia te pawh chu a “hre hle” a. Chu chuan Timothea rilru chu a hneh hle a ni. Lustra khua a tlawh leh chuan, Paula chuan Timothea chu Kristian entawn tlâk tak, ‘Lustra leh Ikonion khuaa unau awmte fak’ hlawh tak a lo ni tawh tih a hmu a. (Tirh. 16:1, 2) A hnuah chuan, Timothea chu mawhphurhna lian tak takte thawk thei tûrin a tling chho ta a ni.—Phil. 2:19, 20; 1 Tim. 1:3.

19. Kan chhelnain mi dangte chungah eng nghawng nge a neih theih?

¹⁹ Pathian duhzâwng chhel taka kan tihna chuan mi dangte chungah—a bîk takin Pathian chhiahhlawh ṭha tak lo la ni tûr ṭhalai tam takte chungah chutiang bawk chuan nghawng a nei ve thei a ni. Chûng thalaite chuan min en rengin, kan rawngbâwlnaa kan thusawi dânte aṭanga an lo inzir mai ni lovin, nuna harsatna kan chinfel dânte pawh an lo hlâwkpui ṭhîn a ni. Paula chuan rinawmna vawngtu zawng zawngte’n ‘chhandamna chu chatuana ropuina nên an hmuh ve theihna tûrin engkim a tuar ṭhîn a ni.’—2 Tim. 2:10.

20. Engvângin nge Pathian hnên aṭanga chhuak chawimawina chu kan zawn chhunzawm zêl ang?

²⁰ Chuti a nih chuan, ‘Pathian tak chauhva chhuak chawimawina chu kan zawng’ chhunzawm zêl tûr a ni dâwn lâwm ni? (Joh. 5:44; 7:18) Tehrêng mai! (Rom 2:6, 7 chhiar rawh.) Jehova chuan ‘chawimawina zawngtute hnênah chuan chatuan nunna’ a pe a ni. Chubâkah, ‘thil ṭha kan tih fan fanna’ chuan mi dangte chu chatuana an hlâwkpui atâna ding nghet reng tûrin a chawk tho a ni. Chuvângin, Pathian pêk chawimawi i hlawhna tûr chu engmahin dang che suh se. (w13-E 02/15)