1, 2. Eng indona tak tak nge lo thleng ṭêp a, chu indonaah chuan Pathian chhiahhlawhte’n eng nge an tih ngai lo?

KUM 1938, October 30 khân United States-a mi maktaduai tam tak chuan lemchan chhuahna radio program lâr tak chu an ngaithla a. Chu mi tlaia tihchhuah chu The War of the Worlds tih science lam thila ngaihruatna thawnthu ṭanchhana siam lemchan a ni. A changtute chu chanchin thar puangtu anga changin, Leilung nasa taka tichhetu tûr Sikeisen (Mars) aṭanga rûntu a lo thlen thu an puang a. Chu radio program chu lemchan mai a ni tih puan lâwk ni mah se, ngaithlatu tam tak chuan chu beihna chu a tak emaw tiin an hlau hle a. A ṭhen phei chuan chûng khawvêl pâwna mi (aliens) anga ngaihte laka invênhim nân hma an lo la hial a ni.

² Tûnah hian indona tak tak chu a lo thleng ṭêp tawh a. Mahse, mi tam tak chuan chu thil lo thleng tûr chu an ngaihsak lo. Chu indona chu science lam thila ngaihruatna thawnthuah ni lovin, Pathian thlarauva thâwk khum, Bible-ah sawi lâwk a ni a. Chu chu Pathianin he khawvêl suaksual a beihna, Armageddon indona a ni. (Thup. 16:14-16) Chu indonaah chuan, leia Pathian chhiahhlawhte chu khawvêl danga mi, aliens-te laka an invên a ngai lo vang. Chuti chung chuan, thilthleng mak tak leh Pathian thiltihtheihna târ lanna ṭihbaiawm tak chu mak an ti hle ang.

3. Eng hrilh lâwkna nge kan ngaihtuah ang a, engvângin nge chu chu kan ngaihven ang?

³ Zakaria bung 14-a chhinchhiah Bible hrilh lâwkna chuan Armageddon indona chungchâng tam tak min hrilh a. Kum 2500 vêl kal taa ziak ni mah se, he hrilh lâwkna hian kan nun ngei hi a nghawng a ni. (Rom 15:4) Chutah chuan kum 1914-a vâna Messia Lalram  din a nih aṭanga Pathian mite nghawngtu dinhmunte leh nakin lawka lo awm tûr thilthleng phûrawm takte chungchâng tam tak târ lan a ni a. Hrilh lâwknaa hmêlhmang pawimawh takah chuan “ruam nasa tak” insiamna leh “tui nung” lo chhuahna chungchâng a tel a ni. (Zak. 14:4, 8) Chu ruam chuan Jehova betute vênhimna kawngah hmun pawimawh tak a chelh a. Tin, tui nung chuan kan tâna awmzia a neih dân kan hriat thiam hian, kan in a ngaihzia kan hre mai ni lovin, in kan duh ngei dâwn bawk a ni. Chuvângin, he hrilh lâwkna ngaihsak hle hi kan hlâwkna tûr a ni.—2 Pet. 1:19, 20.

4. (a) Engtik khân nge ‘Jehova nî’ chu a inṭan? (b) Kum 1914 a thlen hma kum sâwm bîahte chuan Jehova betute chuan eng nge an puan chhuah a, engtin nge khawvêl hruaitute chuan an chhân lêt?

⁴ Zakaria bung 14-na chu ‘Jehova nî’ chungchâng sawinain a inṭan a. (Zakaria 14:1, 2 chhiar rawh.) Chu nî chu eng nge ni? Chu chu ‘Lalpa ni’ a ni a, “khawvêl ram” chu “kan Lalpa leh a Krista ram” a lo nih khân a inṭan a ni. (Thup. 1:10; 11:15) Chu ni chu vâna Messia Lalram a pian hun, kum 1914 khân a inṭan a ni. Kum 1914 a thlen hma, kum sâwm bîahte chuan Jehova betute chuan hnamte hnênah chu mi kuma “Jentailte nî” a kin tûr thu leh khawvêlah hian tûn hma zawng aia nasaa buaina a thlen tûr thu an puang chhuak a. (Lk. 21:24) Engtin nge hnamte chuan an chhân lêt? Politics leh sakhaw hruaitute chuan chu a hun taka vaukhânna chu ngaihven a hnêkin, an nuihzat a, chanchin ṭha hriltu chûng hriak thih ṭhahnemngai takte chu an tiduhdah zâwk mah a ni. Chutianga tiin, khawvêl hruaitute chuan Pathian Engkimtitheia ngei mai chu an nuih sawh a ni; hriak thih Lalram palaite chu an tel vena “vân Jerusalem”—Messia Lalram—aiawhtute an nih avângin.—Heb. 12:22, 28.

5, 6. (a) Hnamte chuan “khawpui” leh ‘a khua leh tuite’ chungah hrilh lâwkna thlen famkim nân eng nge an tih? (b) Tute nge “mipui la awm chhunte” chu?

⁵ Zakaria chuan hnamte thiltih tûr chu a lo sawi lâwk a ni: “[Jerusalem] khawpui chu lâk a ni ang,” tiin. Chu “khawpui” chuan Pathian Messia Lalram a entîr a. Chu chu leiah hian a ‘khua leh tui,’ hriak thih Kristian a la bângte chuan an entîr a ni. (Phil. 3:20) Indopui I-na chhûng khân Jehova lei lam inâwpna pâwla mi challangte chu “lâk,” a nih loh leh man an ni a, U.S.A, Georgia, Atlanta-a lung ina tântîr an ni. Chûng mite leh mi dang an rinawmna vawng tlattu pawi sawi lote chunga dik lo taka rorêl leh kut thlâkna hmangin an “inte . . . chu rawk a ni.” A beitute chuan an thu leh hla chhuahte leh Lalram puang chhuaktute anga an rawngbâwlna khapsakin, a la bângte neih thuneihna chu an rawk a ni.

⁶ Pathian mite chu a beitute nêna khaikhin chuan an tlêm hlein, dik lo taka puh te, dodâl te, leh tihduhdahte ni mah se, biakna dik chu nuai bo theih a ni lo. Hriak thih a la bângte chu “mipui la awm chhunte” an ni a, anni chuan rinawm takin “khawpui ata tihbo” nih chu an duh lo a ni.

7. Jehova hriak thih Thuhretute kawng zawh chuan tûn laia betu dik zawng zawngte tân eng entawn tûr nge a siam?

⁷ Indopui I-na a zawh khân chu hrilh lâwkna chu a thleng famkim vek em? Thleng famkim vek lo. Hriak thih a la bângte leh lei lam beiseina nei an ṭhian rinawmte chu hnamte chuan an bei zêl dâwn a ni. (Thup. 12:17) Indopui II-naah chutiang chuan an bei zêl a. Chutih hun laia Pathian hriak thih Thuhretute rinawmna kawng zawh chuan tûn laia Pathian chhiahhlawhte chu fiahna engpawh tuar tûrin a tichak hle a. An fiahna  tawhte zîngah chuan ring lotu chhûngkhatte leh an hnathawhpuite hnên aṭanga dodâlna te, a nih loh leh, an rinna avânga school kalpuite nuihsawhna pawh a tel a ni. (1 Pet. 1:6, 7) Khawiah pawh awm se, betu dikte chuan anmahni “dotute eng kawngah mah hlau lovin,” tûn hma zawng aia ‘thlarau hmunkhata din ngheh’ chu an tum lehzual a ni. (Phil. 1:27, 28) Mahse, anmahni hawtu khawvêlah hian Jehova mite chuan khawiah nge himna an hmuh theih ang?—Joh. 15:17-19.

8. (a) Bible-ah tlângte chuan eng nge a entîr theih? (b) “Oliv tlâng” chuan eng nge a entîr?

⁸ Jerusalem—“khawpui”—chuan vân lam Jerusalem a entîr avângin, ‘Oliv tlâng chhak lama Jerusalem rawn chhawng’ pawh chu entîr neia lâk tûr a ni ngei ang. Chu tlâng chuan eng nge a entîr? Engtin nge chu tlâng chu ‘a laia phel a,’ tlâng pahnih a lo nih ang? Engvângin nge Jehova’n “ka tlâng kâr ruamahte chuan in tlân bo vang” tih sawiin chûng tlângte chu ama ta anga a sawi? (Zakaria 14:3-5 chhiar rawh.) Bible-ah chuan tlângte chuan lalramte, a nih loh leh sâwrkârte chu a entîr thei a. Chu bâkah, malsâwmna leh vênhimna chu Pathian tlâng nêna thlunzawm a ni bawk. (Sâm 72:3; Is. 25:6, 7) Chuvângin, Pathian dinna lei lam Jerusalem chhak lama oliv tlâng chuan Jehova lalchungnunna, a rorêlna sâng ber a entîr a ni.

9. Eng kawngin nge “Oliv tlâng” chu phel a nih?

⁹ Oliv tlâng a phelna chuan eng nge a târ lan? Jerusalem chhak lama tlâng chu phel a ni a, chu chuan Jehova’n rorêlna dang, ṭanpuitu pakhat a din tihna a ni. Chu rorêlna dang chu Isua Krista kuta Messia Lalram a ni a. Chuvângin, Jehova chuan Oliv tlâng a phel avânga lo awm tlâng pahnihte chu “ka tlâng” tiin a sawi a. (Zak. 14:4) A pahnihin a ta a ni.

10. Tlâng pahnih inkâra “ruam nasa tak” chuan eng nge a entîr?

¹⁰ Entîr nei tlâng a tiave hmâr lamah leh a tiave chhim lama a phel khân, Jehova’n a kete chu tlâng pahnihah a nghat a. Chutah, Jehova ke aia hniamah chuan “ruam nasa tak” a lo awm a ni. He entîr nei ruam hian lei leh vâna Jehova lalchungnunna leh a Fapa Messia Lalram hnuaia Jehova chhiahhlawhte hmuh vênhimna chu a entîr a. Jehova chuan biakna dik nuai bo chu a phal ngai lo vang. A nih leh, engtik khân nge chu Olive tlâng chu phel a nih? Kum 1914-a Jentailte Nî a kin a, Messia Lalram din a nih khân phel a ni. Engtik khân nge betu dikte chu entîr nei ruamah chuan an tlân luh ṭan?

11, 12. (a) Engtik khân nge entîr nei ruama tlân luhna chu a inṭan? (b) Jehova bân chak tak chu a mite hnênah a awm tih engin nge finfiah?

¹¹ Isua chuan a hnung zuitute chu: “Ka hming avângin hnam zawng zawng huat in ni ang,” tiin a vaukhân a. (Mt. 24:9) Kum 1914 aṭanga he khawvêl ni hnuhnûng chhûng hian chu huatna chu a bîk takin a zual a ni. Indopui I-na chhûng khân hriak thih a la bângte chu an hmêlmate’n nasa takin bei mah se, chûng mi rinawmte pâwl chu a boral lo. Anni chu kum 1919 khân Babulon Khaw Ropui—khawvêl sakhua dik lo lalram—thununna hnuai aṭangin an zalên ta a ni. (Thup. 11:11, 12) * Chu hun chu a ni Jehova vênhimna ruama tlân luhna inṭan hun chu.

¹² Kum 1919 aṭang khân Pathian vênhimna ruam chuan lei pum puia betu dikte chu a a vênghim chhunzawm zêl a. Kum sâwm bi  tam tak kalta chhûng chuan khawvêl hmun hrang hrangah Jehova Thuhretute thlawhhma rawngbâwlna leh Bible thu leh hla chhuahte chu khap beh leh khuahkhirh a ni a. Chutianga khuahkhirhna chu ram ṭhenkhatah chuan a la awm cheu a ni. Mahse, hnamte chuan eng ang pawhin tum mah se, biakna dik chu an nuai bo ngai lo vang! Jehova bân chak tak chu a mite hnênah a awm zêl dâwn si a.—Deut. 11:2.

13. Engtin nge Jehova vênhimna ruama kan awm a, engvângin nge chuta awm chu tûn hma zawng aia a pawimawh lehzual?

¹³ Jehova kan vawn tlat a, thutaka kan din ngheh chuan amah leh a Fapa, Isua Krista chuan an tih tûr chu an ti ang a, Pathian chuan tumah emaw, engmah emawin kan awmna ‘A kut ata a chhuhsak’ chu a remti lo vang. (Joh. 10:28, 29) Jehova chuan Lei leh Vâna Lalchungnungber a nih anga a thu kan âwih a, Messia Lalram khua leh tui rinawm kan nih reng theihna tûra kan mamawh ṭanpuina engpawh min pêk chu a inhuam a ni. Chu vênhimna ruama awm chu a pawimawh hle a ni, chu chuan lo thleng thuai tûr hrehawm nasa tak chhûngin betu dikte tân awmzia a nei lehzual dâwn si a.

14, 15. A hmêlmate chunga ‘[Pathian] indona nîah’ chuan ruama awm lote dinhmun chu eng ang nge ni dâwn?

¹⁴ He khawvêl tâwpna nî a hnaih lehzual hian, Setana chuan Jehova chhiahhlawhte chu a bei nasa lehzual dâwn a. Tichuan, a hmêlmate chungah ‘[Pathian] indona nî’ chu a lo thleng ang. Jehova chuan Setana beihna zînga a engemaw ber chu a tâwpna a nihtîr ang a. Chu mi nîah chuan, lei leh vâna Lalchungnungber chuan tûn hmaa ‘indona nî’ lo awm tawh zawng zawngte aia ropuiin, Sipai Huaisen a nihzia a târ lang ang.—Zak. 14:3.

¹⁵ Pathian indona nîah chuan, vênhimna “ruam nasa tak” pâwna awmte dinhmun chu eng ang nge ni dâwn? Anni chuan Pathian duhsakna “êng” chu an nei lo vang. Chu indona nî lo thleng tûr chuan hnamte indona hmanrua entîrtu—‘sakawr te, sabengtung te, sanghâwngsei te, sabengtung tê chi te’—chu a nghawng vek ang. Chu mi awmzia chu indo nâna hman hriamhrei leh khâwlte chuan ṭangkaina a nei lo vang tihna a ni. Jehova chuan hri leh “hripui” pawh a hmang ang a. Chu hripui chu a tak tak a ni emaw, entîr nei emaw pawh ni se, chu chuan thil hlauhawmte chu a tireh vek ang. Chumi nîah chuan,‘mitte leh lei pawh a ral ang,’ a awmzia chu dotute chuan mitdel chung chauhvin an bei theiin, thunun loh an thusawi pawh tihngawihin a awm ang. (Zak. 14:6, 7, 12, 15) Leilung a khawi lai mah hi tihchhiat lohvin a awm lo vang. Indonaah chuan Setana lama ṭang chu tam tak an ni ang a. (Thup. 19:19-21) “Chumi nîa LALPA thahte chuan lei tâwp aṭangin lei tâwp thlengin an dâp ang.”—Jer. 25:32, 33.

16. Pathian indona nî a hnaih tawh avângin, eng zawhnate nge kan ngaihtuah ang a, eng nge kan tih ngai ang?

¹⁶ Indona chuan a tâwpa hnehtu lamah pawh ni se, hrehawm tawrhna a thlen fo ṭhîn. Ei leh bâr tûr a vâng thei a. In leh lote chân a ni thei bawk a. Nunphung a tlahniam theiin, mi mal zalênna pawh khuahkhirhin a awm thei bawk a ni. Chûng harsatnate chu tawng ta ila, engtin nge kan chhân lêt ang? Kan chiai mai dâwn nge? Nêksâwrna hnuaiah kan rinna kan phatsan zâwk dâwn? Beiseina hlohvin, kan lunghnual dâwn em ni? Hrehawm nasa tak chhûnga Jehova chhanhim theihna kan rin tlat leh a vênhimna ruama kan awm reng chu a va pawimawh tak êm!—Habakuka 3:17, 18 chhiar rawh.

17, 18. (a) “Tui nung” chu eng nge ni? (b) ‘Chhak lam tuipui’ leh ‘thlang lam tuipui’ chuan eng nge a entîr? (c) Nakin hun tûr i thlîr hian eng nge tih i tum tlat?

¹⁷ Armageddon hnuah chuan Messia Lalram aṭangin “tui nung” chu a luang chhuak reng ang a. He “tui nung” hi nunna atâna Jehova ruahmanna siamte a ni. ‘Chhak lam tuipui’ chu Tuipui Thi, Dead Sea sawina a ni a, ‘thlang lam tuipui’ chu Mediterranean Tuipui sawina a ni thung. A pahnih hian mipuite sawi nâna hman a ni. Tuipui Thi chuan thlânna awm zawng zawngte a entîr ṭha hle a. Mediterranean Tuipui chu nunna nei thil siama khat a nih avângin, Armageddon-a dam khawchhuak “mipui tam tak” a entîr a ni. (Zakaria 14:8, 9 chhiar rawh; Thup. 7:9-15) Chuvângin, chung pâwl hnihte chuan entîr nei tui nung, a nih loh leh ‘nunna tui luia’ tui chu an in ang a, Adama thlah an nih avânga thihna lak ata chhuah zalen an ni ang.—Thup. 22:1, 2.

¹⁸ Jehova vênhimna hnuaiah chuan he khawvêl suaksual tâwpnaah kan dam khawchhuak ang a, Pathian felna khawvêl tharah kan lût dâwn a ni. Hnam zawng zawngte huat hlawh mah ila, Pathian Ram khua leh tui rinawm nih tum tlatin, Jehova vênhimna ruama awm zêl chu i tum tlat ang u.   (w13-E 02/15)