Dominican Republic, Santo Domingo-ah ka piang a, unau pali zînga a naupang ber ka ni. Ka nu leh pate chu lehkha thiam tak an ni a, an fate chu mi ṭha leh rinawmte kâra an seilen an duh a ni. Ka pian hma kum li vêlah ka nu leh pate chuan Mormon missionary-te chu an tawng a. An ṭhalaite inchei dân fel fai tak leh an hawihhâwmna chuan an rilru a khawih êm avângin, ka nu leh pate chuan kan awmna thliarkâra Church of Jesus Christ of Latter-day Saints, a nih loh leh Mormon Church zawmtu chhûngkua hmasa ber nih an tum ta nghâl a ni.

Ka rawn ṭhan chhoh zêl chuan, church-a thiltih vêlte chu nuam ka ti a, Mormon ho chuan chhûngkaw nun leh nungchang lam an ngaihsak avângin ka zah hle a. Mormon nih chu ka chhuang hle a, missionary nih ka tum ta a ni.

Kum 18 mi ka nih chuan, college-a lehkha ka zir theih nân kan chhûngkuain United State-ah kan insawn a. Kum khat vêl hnuah, ka nutei leh a pasal Jehova Thuhretu ve ve chuan Florida-ah min rawn tlawh a. Anni chuan an ruala Bible thu ṭanchhan inkhâwmpuia tel tûrin min sâwm a. Chutah chuan, ka bul vêla awm tupawhin Bible an keu va, note an la tih ka hmuh chuan ka rilru a khawih hle a. Chuvângin, pen leh lehkha ka dîl a, an tih ang chuan ka ti ṭan ve ta a.

Inkhâwmpui zawh chuan ka nutei leh a pasal chuan missionary-nih ka duh avângin, Bible chungchâng thu engemaw hre tûra min ṭanpui theih thu an sawi a. Chutih lai chuan Bible thu aia Mormon Lehkhabu ka hriat chian zâwk avângin, Bible zir chu thil ṭha tak niin ka hre ta a ni.

Phone hmanga Bible thu kan sawiho lai chuan, ka nutei leh a pasal chuan ka thu rin chu Bible zirtîrnate nêna khaikhin zêl tûrin min fuih ṭhîn a. Anni chuan mahni ngeia thutak fiah tûrin min duh a ni.

 Mormon thurinte zînga tam tak chu ka pawm a, mahse, chung rin dânte chu Bible thute nêna a inmil leh mil loh ka hre chiang lo a ni. Ka nutei chuan Jehova Thuhretute tihchhuah Awake! magazine November 8, 1995 chu min rawn thawn a, chuta thuziak ṭhenkhatah chuan Mormon rinna a tel a. Ka la hriat ngai loh Mormon zirtîrna tam tak a awm chu mak ka ti hle a. Chu chuan Awake! thuziaka chuang thute a dik leh dik loh fiah nâna official Mormon Web site-a zawng tûrin min chettîr a. Thuziak chu a dik tih a nemnghet a, a hnua Utah state-a Mormon museum ka tlawhna chuan a dikzia a nemnghet lehzual a ni.

Mormon Lehkhabu leh Bible hi inmil vek tûrah ka lo ngai ṭhîn a. Mahse, Bible ngun taka ka’n chhiar ṭan chuan Mormon zirtîrna leh Bible thuziakte inkalhna chu ka hmu ta a.

Thurin a inmil lote mai bâkah, Mormon sakhuain hnam hmangaihna a zirtîrte chuan min tibuai hle a ni. Entîr nân, Mormon-ho chuan Eden huan chu Jackson County, Missouri, U.S.A.-ah a awm niin an zirtîr a. An sakhaw zâwlneite sawi dân chuan “Pathian Ramin ro a rêl hun chuan United State hnam puanzâr chu zalênna leh intluktlânna banah hian chhuanawm taka târ chhuah vah a ni dâwn a ni.”

Ka pianna ram emaw, ram dang engpawh emaw chunga thilthleng tûr chungchânga Mormon-ho zirtîrna chu eng tak ni ang maw, tiin ka ngaihtuah a. Tlai khat chu, Mormon mossionary ni tûra zirtîrna dawng tawh ṭhalai pakhat hnên aṭanga phone ka dawn chuan he mi chungchâng hi ka sawipui a. A unau Mormon dangte awmna ram leh a ram chu lo indo ta se, a unaute do a duh dâwn leh dâwn loh tlang takin ka zâwt a. Do duh dâwn nia min chhânna chu mak ka ti kher mai! Ka thurinte chu ka chîk lehzual a, mawhphurhna nei Mormon Church-a hruaitute pawh ka be râwn bawk a. Ka zawhnate chu êng a lo ên zual deuh hun engtik nî emawa la hriatthiam theih tûr, tûna hriat phâk loh thil a nih thu min hrilh hlawm a ni.

An mi hrilhfiahna chuan min tibeidawng a, mahni leh Mormon missionary nih ka duh chhante chu ka inenfiah lehzual a. Missionary pakhat nih ka duh chhan chu mi retheite ṭanpui ka duh vâng a ni tih ka hre chhuak ta a. Ka nih duh chhan dang leh chu mite zahkai nih ka duh vâng a ni. Mahse, Pathian chungchângah chuan hriat ka nei êm êm hran lo. Tûn hma khân Bible hi vawi tam tak ka chhiar chhuak tawh ṭhîn tak nâ a, ka ngaihlu tak tak lo. Lei leh mihringte tâna Pathian thiltum chu ka hre lo rêng rêng.

Jehova Thuhretute nêna Bible ka zirna aṭangin, thil dang tam takte bâkah Pathian hming te, kan thih huna thilthleng te, leh Pathian thiltum tihfamkimnaa Isua chanvo neih te ka lo hre ta a. A tâwp a tâwpah chuan he lehkhabu ṭha tak mai chu ka hre bel theiin, ka thu zirte mi dangte hnêna hrilh chhâwn chu nuam ka ti hle a. Tûn hma chuan Pathian a awm tih chu ka hre ṭhîn a, mahse tûnah chuan ka ṭhian ṭha ber angin ani chu ṭawngṭaiin ka be thei tawh a ni. July 12, 2004-ah Jehova Thuhretute zînga mi angin baptisma ka chang a, a hnu thla rukah chuan hun bi kimin Kristian rawngbâwlnaah ka tel ṭan ta a ni.

Khawvêl puma Jehova Thuhretute hmunpui Brooklyn, New York-ah kum nga chhûng hna ka thawk a. Khawvêl puma mi tam takte hlâwkpui Bible leh Bible ṭanchhan thu leh hla chhuahte tihchhuahnaa ka ṭanpui thei chu ka lâwm hle a, hlim leh lâwm takin mi dangte chu Pathian chungchâng hre tûrin ka ṭanpui chho zêl a ni. (w13-E 02/01)