Hmangaihnaah chuan mi dangte ngainatna nasa tak a tel a. Hmangaihna neitu chuan a hmangaihte chunga a rilru vei zâwng chu a thu sawite leh a thiltihte hmangin a lantîr ṭhîn a, chu chu mahni ṭhatna tûr thil chân inhuam pawhin a ti hial ṭhîn a ni.

Mosia chuan Pathian a hmangaihna a târ lang a. Eng kawngin nge? Awle, 1 Johana 5:3 thu: “Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va,” tih hi hre chhuak leh ang che. Mosia chuan he thu bul hi a nunpui a ni. Pathianin ti tûra a tih zawng zawng—thiltih tûr huphurhawm tak Pharaoa hmachhawn a ni emaw, ho lam tak anga lang Tuipui Sen chunga a tiang lek mai emaw pawh ni se—Mosia’n a zawm fai vek a ni. Thupêk chu zawm a awl emaw, a harsa emaw pawh ni se, Mosia chuan a zâwm a. “A ti vek” a ni.—Exodus 40:16.

Mosia chuan a chipui Israelte chungah hmangaihna a lantîr a. Anni chuan Jehova’n a mite kaihruai tûrin Mosia a hmang tih an hria a, chuvângin an buaina chi hrang hrangte chu Mosia hnênah an rawn thlen ṭhîn. “Mipuite chu zîng ata tlai thlengin Mosia kiang vêlah chuan an ding reng a,” tiin kan chhiar a ni. (Exodus 18:13-16) Israelte rawn thlen an buainate nilênga ngaihthlâksak chu Mosia tân a va hahthlâk dâwn êm! Mahse, Mosia chuan a hmangaih mipuite ṭanpui chu nuam a ti a ni.

Mosia chuan mipuite thusawi a ngaihthlâksak bâkah, a hmangaih takte tân a ṭawngṭai bawk a. Ṭha lo taka amah cheibâwltute tân pawh a ṭawngṭai hial a nih chu! Entîr nân, a farnu Miriami chu Mosia laka a phunnawi khân Jehova chuan phâr natna a veitîr a. A hremna avânga lâwm ahnêkin, Miriami tâna remna siam sak tûrin Mosia chuan: “Aw Pathian, tidam leh teh khai,” tiin a ṭawngṭaisak nghâl zâwk a ni. (Number 12:13) Hmangaihna lo chuan eng dangin nge Mosia chu chutianga ṭawngṭaitîr tehrêng ang?

Tih tak zeta Pathian hmangaihna neiin Mosia kan entawn thei a. Chutiang hmangaihna chuan ‘rilru tak zeta’ a thu pêkte zâwm tûrin min chêttîr a ni. (Rom 6:17, 18) Kan rilru tak zeta Jehova thu kan âwih hian a thinlung kan tilâwm a. (Thufingte 27:11) Mahni ngei pawhin kan hlâwkpui bawk a ni. Tihah chuan, hmangaihna dik tak avânga Pathian rawng kan bâwl hian thil dik kan ti mai ni lovin, thil dik tih nuam kan ti bawk dâwn si a!—Sâm 100:2.

Mosia kan entawn theih dân kawng dang leh chu mahni hmasial lo mi dangte hmangaihna neih hi a ni. Ṭhiante emaw, chhûngkaw zînga mite emawin an buaina avânga min rawn pan hian, hmangaihna chuan (1) kan thinlung taka lo ngaihsak tûr te; (2) anmahni khawngaih tûr, a nih loh leh an rilrua vei zâwng hriatthiam tum tûr te; leh (3) kan ngaihsakzia hriattîr tûr tein min chettîr a ni.

Mosia angin, kan hmangaih takte tân kan ṭawngṭai thei a. A châng chuan, an buainate min hrilh a, kan chinfelsak theih loh hian kan beidawng mai thei a ni. “I tân ṭawngṭai bâk tih theih ka nei lo hi pawi ka ti ngawt mai,” tiin kan tuarpui thu kan sawi hial thei bawk. Mahse, hei hi hre reng rawh: “Mi fel ṭawngṭaina chuan thil nasa tak a ti ṭhîn,” tih hi. (Jakoba 5:16) Kan ṭawngṭainate chuan Pathian Jehova chu, chu mi atâna A tih tum lohte pawh ti tûrin a chêttîr thei a ni. Chuti chu, kan hmangaihte tâna ṭawngṭaisak aia thil ṭha eng nge kan tihsak theih awm chuang? *

Mosia chanchin aṭangin thil tam tak kan zir thei tih i pawm dâwn lâwm ni? Ani chu keimahni ang, mi pângngai ve mai a ni a, mahse, rinna kawngah te, inngaihtlâwmna kawngah te leh hmangaihna kawngah te chuan entawn tûr ṭha chungchuang a siam a ni. Mosia kan entawn ṭhat zawh poh leh keimahni leh mi dangte hlâwkna kan thlen lehzual thei a ni.—Rom 15:4. (w13-E 02/01)