Inngaihtlâwmna chu chapona leh intihveina lakah a fihlîm a. Mi inngaitlâwm chuan mi dangte chu a aia hnuaihnung zâwk angin a thlîr lo. A ṭha famkim lo tih a inhria a, tih theih loh a nei tih a pawm bawk a ni.

Mosia chuan a thu neihna chu a chapopui lo. Miin thu neihna tlêm an han neih hian inngaihtlâwmna a neihzia—a nih loh leh a tlâkchhamzia—chu a lang nghâl ṭhîn a ni. Kum zabi sâwm pakua-naa ziaktu Robert G. Ingersoll-a chuan heti hian a sawi: “Mi tam zâwk chuan harsatna an tuar thei a. Mahse, mi nihna dik tak i hriat duh chuan thu neihna pe rawh,” tiin. Chu mi kawngah chuan, Mosia’n inngaihtlâwmna kawnga entawn tûr ṭha chungchuang a siam a ni. Engtin nge a siam?

Jehova’n Israelte hruaitu ni tûra a ruat avângin Mosia chuan thu neihna sâng tak a dawng a. Mahse, chu a thu neihna chu chapo phah nân a hmang ngai lo. Entîr nân, ro khawm dân tûr chungchânga zawhna khirh tak a chinfel dân kha han ngaihtuah teh. (Number 27:1-11) He mi chungchânga thu tlûkna siam rêng rêng hi nakin leh zêl atân pawha hman tûr a nih avângin, he zawhna hi a pawimawh hle a ni.

Engtin nge Mosia’n a tih? Israel hote hruaitu a nih angin, he mi chungchânga thu tlûkna siam tûra tlingah a inngai ang em? Ani chuan a pianpui thiamna emaw, kum tam tak chhûnga a thiltawn emaw, Pathian Jehova thil ngaihtuah dân a hriatna emaw chu a rinchhan ang em?

Mi chapo tak chuan chutiang chuan a ti mai thei. Mahse, Mosia chuan a ti lo. Bible chuan “Mosian an thu chu LALPA hmaah a thlen a,” tiin min hrilh a ni. (Number 27:5) Han ngaihtuah lawk teh! Mosia chuan Israel hnam chu kum 40 vêl a hruai hnuah pawh mahni inrinchhan lovin Jehova a rinchhan a ni. Hetah hian Mosia chu a inngaitlâwm tak zet tih kan hmu a ni.

Mosia chuan amah chauhvin thu neihna chelh a tum lo. Jehova’n Israel mi dangte chu a ruala zâwlnei a nihtîr khân a lâwm hle a ni. (Number 11:24-29) A pu zawnin a hna ṭhenkhata ṭanpuitu tûr mi thlang tûra thurâwn a pêk khân, Mosia chuan inngaitlâwm takin a zâwm a ni. (Exodus 18:13-24) A nun tâwp dâwn lam thlengin tisa lamah la chak ṭha viau mah se, Jehova hnênah a ai awhtu tûr a ngên a. Jehova’n Josua a thlan khân, Mosia chuan a aia naupang zâwk Josua chu a thinlung zawng zawngin a thlâwp a, Ram Tiama lût tûra Josua hruaina chu zawm tûrin mipuite chu a fuih a ni. (Number 27:15-18; Deuteronomy 31:3-6; 34:7) Ani chuan Pathian biakna kawnga Israel mite kaihhruai chu chanvo hlu takah a ruat a ni tih a chiang hle. Mahse, a thu neihna chu mi dangte ṭhatna tûr aiin a ngai pawimawh zâwk lo.

Thiltihtheihna te, thu neihna te, a nih loh leh pianpui thiamna kan neihte chu chapo phah nân kan hmang duh ngai lo. Jehova tâna mi ṭangkai tak ni tûr chuan kan inngaihtlâwmna chu kan thiamna aiin a pawimawh zâwk a ni tih hre reng rawh. (1 Samuela 15:17) Kan inngaitlâwm tak tak a nih chuan: “I thinlung zawng zawngin LALPA ring la, nangma hriatnaah innghat suh,” tih Bible thurâwn fing tak hi zawm kan tum ngei ang.—Thufingte 3:5, 6.

Mosia entawn tûr siam chuan kan dinhmun emaw, kan thu neihna emaw chu ngai pawimawh lutuk lo tûrin min zirtîr bawk.

Ingaihtlâwmna kawnga Mosia entawn chu kan hlâwkpui em? Kan hlâwkpui a ni tih rinhlelh rual a ni lo! Inngaihtlâwmna dik tak kan neih hian kan chheh vêla mite tân kan khirh lo vang a, an tân mi duhawm tak kan ni ang. A pawimawh berah chuan, he mize ṭha tak lantîrtu Pathian Jehova tân mi duhawm tak kan ni bawk ang. (Sâm 18:35) “Pathianin chapote a dodâl a, inngaitlâwmte erawh chu khawngaihna a pe si ṭhîn.” (1 Petera 5:5) Chu chu, Mosia inngaihtlâwmna entawn chhan tûr a va tling tak êm! (w13-E 02/01)