Bible-in a hman dânin, “rinna” tihah chuan finfiahna chiang taka innghat thu rin nghet tak a tel a ni. Pathian ringtu chuan A thutiamte chu A tifamkim ngei ang tih a ring nghet tlat a ni.

Mosia chuan a nunah Pathian thutiam a rinzia a târ lang a. (Genesis 22:15-18) Aigupta rama nuamsa taka chên theihna hun remchâng ṭha tak nei mah se, chu chu hnâwlin “rei lo tê atân sual nawmna hlimpui ai chuan Pathian mite nêna tihduhdah tuar a thlang ta zâwk” a ni. (Hebrai 11:25) Chu chu ngaihtuah chiang mang lova a hnua a inchhîrna tûr thu tlûkna siamna a ni em? Ni lo ve, Bible chuan Mosia’n “hmuh theih lohva chu a hmuh avângin a tuar ṭan ṭan a ni,” tiin a sawi si a. (Hebrai 11:27) Mosia chu Pathian thutiamte a rinna avânga a duh thlanna siamah a inchhir ngai lo.

Mosia chuan mi dangte rinna tihngheh a tum tlat a. Entîr nân, Israel mite chu a ûmtu Pharaoa sipaite leh Tuipui Sen inkâra dan beh anga an lan lai kha han ngaihtuah teh. Chhiatna lo thleng thuai dâwn anga a lan tâkah Israel mite chuan thlaphâng takin Jehova leh Mosia chu an au va. Engtin nge Mosia’n a chhân lêt?

Mosia chuan Pathianin Tuipui Sen chu ṭhenin, Israel mite tân tlân chhuahna kawng a hawng dâwn tih a hre lo mai thei a. Mahse, Mosia chuan Pathianin A mite humhim nân thil engemaw a ti ang tih a ring nghet tlat a. A chipui Israelte chu chutiang rin tlatna nei tûrin a duh a ni. “Mosian mipuite hnênah chuan, ‘Hlau suh u, awm hle hle mai ula, LALPA chhandamna, vawiina a thawhsak tûr che u hi en ngawt mai rawh u,’” tia a sawi thu kan chhiar a ni. (Exodus 14:13) Mosia’n a Israel puite rinna tihngheh a tumna chu a hlawhtling em? Hlawhtling e, Bible chuan Mosia chauh ni lo Israel mi zawng zawngte chungchângah “rinnain khawmuala kal angin Tuifinriat Senah khân an kal kai a,” tiin a sawi. (Hebrai 11:29) Mosia rinna chu amah chauh ni lovin, chu mi aṭanga inzir apiangin an hlâwkpui a ni.

Kan nuna Pathian thutiam dah pawimawh berin Mosia kan entawn thei a ni. Entîr nân, Pathian biakna chu kan nuna kan dah pawimawh ber chuan, ani chuan kan tisa lam mamawhte min pe ang tih min tiam a. (Matthaia 6:33) Tûn laia mi a tam zâwkte chuan an nunah tisa lam thilte an dah pawimawh ber avângin, chutianga tih loh chu a harsa kan ti pawh a ni thei. Mahse, kan theih tâwpa samkhai taka nun a, Pathian Jehova kan biakna kan dah pawimawh ber chuan, ani chuan kan mamawh zawng zawng min pe ang tih kan chiang thei a ni. Ani chuan: “Engtikah mah ka thlahthlam tawp lo vang chia, kal pawh ka kalsan tawp lo vang che,” tih min tiam a ni.—Hebrai 13:5.

Mi dangte chu rinnaa ṭhang lian tûra ṭanpui chu kan tum ve thei bawk. Entîr nân, nu leh pa fingte chuan an fate chu Pathian ring tûra ṭanpui theihna hun remchâng ropui tak an neih chu an hre thiam a ni. An lo ṭhan chhoh hian, naupangte chuan Pathian a awm tih leh ani chu thil dik leh dik lo min zirtîrtu a ni tih hriatna pawimawh tak an neih a ngai a. Chu bâkah, a tehna zui hi nun kawng ṭha ber a ni tih an rin tlat a ṭûl a ni. (Isaia 48:17, 18) Nu leh pate chuan an fate chu ‘Pathian chu a awm tih leh tih tak zeta zawngtute hnêna lâwmman pêk hmang a ni tih’ rinna nei tûra an ṭanpui hian thil hlu tak an pe a ni.—Hebrai 11:6, Holy Bible—Easy-to-Read Version. (w13-E 02/01)