Bible chuan: “Thinlungah hian ngaihtuahna sualte, tualthahnate, uirênate, inngaihnate, rûkrûknate, hêknate, sawichhiatnate a lo chhuak si ṭhîn,” tiin min vaukhân a ni. (Mt. 15:19) Kan thinlung chuan min bumin, Pathian duhzâwng kalha thil tih pawh thiam min chantîr thei a. Tin, thil âtthlâk tak kan tih hnu thlengin eng nge thleng tih kan hre chhuak lo thei a ni. Thil dik lo kan tih hmaa kan thinlunga thiltumte hre thei tûrin engin nge min ṭanpui ang?

Bible chu nî tin chhiar la, a thute chhût ngun rawh.

“Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thlîng phel hrang khawp hialin a chhun thei a,” tiin tirhkoh Paula chuan a ziak a. Bible-a hmuh Pathian thu chuan “thinlunga ngaihtuah leh tumte hi a hre nghâl thei a ni.” (Heb. 4:12) Bible thu sawi ênga mahni inen chu thinlunga thiltumte hre thei tûra min ṭanpuitu thiltithei tak a ni. Pathian Thu nî tina chhiar leh a thute chhût ngun a, Jehova ngaihtuahna leh a thlîr dânte hriat chu a va pawimawh tak êm!

Bible fuihna pawm leh Bible thu bulte nunpuina chuan kan chhia leh ṭha hriatna—chhûng lama thil min ‘hriatpuitu’—chungah nghawng a nei ang. (Rom 9:1) Kan chhia leh ṭha hriatna chuan thil dik lo ti chunga thiam inchantîr lo tûrin min dang thei a.  Chu bâkah, Bible-ah chuan keimahni “min zilhna” tûr entîrnate a chuang bawk. (1 Kor. 10:11) Chûng aṭanga inzirna chuan kawng dik lo lama pên khat lek pawh pên chhuak lo tûrin min dang thei a ni. Kan tih ṭheuh tûr chu eng nge ni ta ang?

I thinlunga thiltumte hre thei tûrin Pathian ṭanpuina dîlin ṭawngṭai rawh.

Jehova chu ‘thinlung fiahtu’ a ni. (1 Chro. 29:17) Ani chu “kan rilru [thinlung] aiin a ropui zâwk a, engkim a hre si a.” (1 Joh. 3:19, 20) Pathian chu bum theih a ni lo. Ṭawngṭainaa kan rilru veizawng te, ngaih dân te, leh châkzâwngte tlang taka kan hrilh chuan, Jehova chuan kan thinlunga thiltumte hmu chhuak tûrin min ṭanpui thei a ni. ‘Thinlung thianghlim tak min siam sak’ tûrin Pathian hnênah kan dîl thei hial bawk. (Sâm 51:10) Chuvângin, kan thinlung âwn lam kan hriat theih nân ṭawngṭai chu hmaih theih a ni lo.

Kristian inkhâwmnaah ngun takin ngaithla rawh.

Kristian inkhâwmnaa thu sawite kan ngun taka ngaihthlâkna chuan chhûng lama kan nihna—kan thinlung—bih chiang tûrin min ṭanpui thei a. Kan inkhâwm apiangin thu thar dawng lo mah ila, inkhâwmna aṭangin Bible thu bulte hriatthiam lehzualna leh thinlunga kan thiltumte hre tûra min ṭanpuitu hriattîrna hlu takte chu kan dawng a ni. Chhûng lama kan nihna siam ṭhat nân kan unaute chhânna pêkte chu a ṭangkai hle bawk. (Thuf. 27:17) Inkhâwmnaa Kristian unaute nêna inkâwm hlim lova, mahni inkulh hran chu kan tân thil pawi tak a ni thei a. Chu chuan ‘mahni duhzâwng chauh zawng’ tûrin min hruai thei a ni. (Thuf. 18:1) Chuvângin, ‘Inkhâwm zawng zawnga telin, chûngte chu ka hlâwkpui ṭhîn em?’ tia inzawh chu a finthlâk a ni.—Heb. 10:24, 25.

Kan thinlung bum hmang tak chuan kawng tam takin kan nun a hruai pêng thei a ni. Kawng li lo ngaihtuah ta ila: sum leh pai ûmna te, zu hman dân te, kan ṭhian thlan te, leh intihhlim nâna kan thiltih te hi.

Sum leh pai ûmna.

Kan tisa lam mamawh phuhrûk duhna neih hi thil pangngai tak a ni a. Amaherawhchu, Isua chuan sum leh pai ngaih pawimawh lutukna chungchângah vaukhânna min pe a ni. Tehkhin thu a sawite zînga pakhatah, Isua chuan buh inte khat liama nei mi hausa chungchâng ngaihtuah tûrin min ti a. Ani chuan thlai tharte dahna tûr a nei tawh lo va. A buh inte ṭhiat a, a aia lian zâwka sak chu a tum ta a. Tin: “Chutah chuan ka buh leh ka sum zawng zawng ka dah khâwm ang. Tin, ka thlarau hnênah, ‘Thlarau, kum tam tak chhûng atân sum tam tak i khâwl hi; châwl la, eiin bâr la, hlim takin awm rawh ka ti ang,’” tiin a ngaihtuah a ni. Amaherawhchu, he mi hausa pa hian a pumpelh theih loh thil pakhat chu a ngaihtuah tel lo: Chu mi zânah ngei chuan a nunna chu a tâwp theih, tih chu.—Lk. 12:16-20.

Kan lo upat chhoh zêl hian, kan tar huna sum leh pai hman tûr chungchâng kan lungkham lutuk avângin inkhâwm zâna overtime-a hnathawh emaw, kawng engemaw taka kan Kristian mawhphurhnate ngaihthah emaw chu kan inthiam chawp ṭan thei a ni. Chutiang ngaihtuahna lakah  kan invêng tûr a ni lâwm ni? A nih loh leh, ṭhalai kan ni a, hun kima rawngbâwlna aia ṭha zâwk a awm lo tih kan hria pawh a ni thei ang. Chuti chung pawhin, sum leh pai lama ngelngheh phawt a ngai nia hriain, pioneer kan la thawk lo vem? Pathian lama hausa tûrin tûnah theih tâwp kan chhuah tûr a ni zâwk lâwm ni? Naktûk thleng kan dam ang tih tu nge hria?

Zu hman dân.

Thufingte 23:20 chuan “Uain heh mite zîngah . . . tel suh,” a ti a. Mi chuan zu a châk ngawih ngawih chuan in reng mai chu a inthiam mai thei a. Ani chuan rui tûra in ni lovin, intihhahdam nâna in angin a sawi mai thei a ni. Intihhahdam nâna zu kan mamawh a nih chuan, thinlunga kan thiltum ṭha taka inenfiah a hun tawh tihna a ni thei ang.

Kan ṭhian thlante.

School kalnaah te, hna thawhna hmunah te, leh rawngbâwlnaahte hian ring lotute nêna inzawmna ṭhenkhat neih chu pumpelh theih a ni lo ngei mai. Mahse, anni nêna in kâwm a, ṭhian ṭha anga neih hial chu thil dang daih a ni. Chutianga inkawmna chu mize ṭha tam tak an nei tiin kan inthiam chawp em? Bible chuan “Bumin awm suh u; ṭhian sualte chuan nungchang ṭha an tikhawlo ṭhîn,” tiin min vaukhân a ni. (1 Kor. 15:33) Tui thianghlim tak chu bawlhhlawh tê tak tê pakhatin a tibawlhhlawh thei ang bawkin, Pathian ngaihsakna nei lote nêna inṭhianna chuan kan thlarau lam a tibawlhhlawh theiin, khawvêl mite ngaih dân te, silhfên te, ṭawngkam te, leh nungchangte chu min chhawmtîr thei a ni.

Intihhlim nâna kan thiltih.

Tûn lai thiamna chuan intihhlimna chi hrang hrangte chu awlsam taka hmuh theihin a siam a, chûng zînga tam tak chu Kristian tâna inâwm lo emaw, rinhlelh kai emaw a ni hlawm a. Paula chuan: “Bawlhhlawhna zawng zawng in zîngan lam pawh lamin awm suh se,” tiin a ziak a ni. (Eph. 5:3) Kan thinlung hian thil bawlhhlawh en emaw, ngaithlâk emaw châk ta se engtin nge ni ang? Mi tin hian tlêma intihhahdam emaw, intihhlim emaw an mamawh ṭheuh va, chutiang thil kan neih dân chu mi mal duh thlanna a ni tiin kan ngaihtuah mai thei bawk. Mahse, Paula fuihna chu ngai pawimawhin, kan mit leh beng aṭanga thil bawlhhlawh a lo luh chu i phal suh ang u.

Thinlung chhe lailet dêr âwn lam chu zuiin, thil dik lo tihte kan inthiam chawp ṭhîn a nih pawhin kan inthlâk danglam thei a ni. (Eph. 4:22-24) Tûn laia entîrna pahnih i lo ngaihtuah ang u.

Miguel-a  *chuan sum leh pai chungchânga a ngaih dân chu a thlâk a ngai a. Ani chuan “Ka nupui leh ka fapa nên chuan tûn lai thiamna thil chhuak thar ber berte neih leh nuamsa taka nun dah pawimawhna rama awm kan ni a. Ṭumkhat phei chu hausak âtchilh si lova tih theih ka inrin avângin khawvêl aṭanga ka neih theih zawng zawng neih tumin ka inpumpêk a. Mahse, khawvêl hausak ûmna chuan tâwp chin a nei lo tih ka hre chhuak ta thuai a. Ka thil thlîr dân leh thinlunga ka thiltumte chungchângah Jehova hnênah ka ṭawngṭai a. Chhûngkua anga a rawngbâwl kan duhzia ka hriattîr a ni. Kan nun tisamkhai tûr leh mamawh zualna hmuna insawn thei tûrin thu tlûkna kan siam thei ta a. Pioneer kan ni thei ta thuai a ni. Nun hlim tak leh lungawithlâk tak nei tûrin hausak a ngai lo tih kan hre ta,” tiin a sawi a ni.

Lee-a thiltawn chuan ṭha taka in enfiahnain ṭhian sual kawm bânsan tûra a ṭanpui dân a târ lang a. Ani chuan “Ka hnathawh avângin ram dang mite ka kawm a ngai a. Chûng kan inhmuhkhâwmnaahte chuan a lutuka zu inna a awm dâwn tih ka hria a, mahse, ka phûr êm êm ṭhîn. Vawi tam tak chu ka rui chhe ṭêp ṭhîn a, a hnuah ka inchhîr leh ṭhîn a ni. Chutah, ka thinlung ṭha taka ka en fiah a ngai ta. Pathian Thu aṭanga fuihna leh upate thurâwn min pêkte chuan ka zawn dik tak chu Jehova hmangaih lotute nêna inkawm hi a ni tih min hriat chhuahtîr ta a. Tûnah chuan, ka hnathawh chu a theih phawt chuan phone hmangin ka thawk a, ram dang mite a tlêm thei ang berin ka kâwm tawh a ni,” tiin a sawi.

Mahni ṭha taka inenfiah a, kan thinlunga thiltumte kan hriat chu a ngai a. Chutianga kan tih lai chuan, Jehova’n “thinlunga thurûkte hi a hre reng,” tih hre chungin a ṭanpuina kan zawng tûr a ni. (Sâm 44:21) Pathian chuan dârthlalang anga kan hman theih tûr a Thu Bible min pe bawk a. (Jak. 1:22-25) Kristian thu leh hla chhuahte leh kan inkhâwmna aṭanga kan dawn fuihna leh thu hriattîrte chu a hlu hle bawk! Chutiang thilte hmang chuan kan thinlung kan vêng ṭha theiin felna kal kawngahte chuan kan kal reng thei a ni. (w13-E 02/15)