1. Jehova chuan mihringte hlâwkpui atân eng nge a vawn ṭhat?

‘PATHIAN nung reng leh awm reng’ Jehova chuan mihringte hnêna nunna pe thei a thu chu a vawng ṭha tlat a. ‘Jehova thu chu chatuana a awm reng’ avângin, rei tak daih tûr a ni rêng a ni. (1 Pet. 1:23-25) Pathian Jehova’n chutiang thu pawimawhte chu a Thu, Bible-a a vawn ṭhat avângin kan va lâwm tak êm!

2. Pathianin a mite hman atân a Thu-ah eng nge a vawn ṭhat?

² Pathian chuan ama tâna a thlan a hming chu a mite hman atân a Thu-ah a vawng ṭha a. Bible chuan “lei leh vân siam dân” a sawi khân ‘Pathian Jehova’ * hming chu a hmasa ber atân a târ lang a ni. (Gen. 2:4) Pathian hming chu Thusâwm Pêk tia vuah lungphêkah chuan vawi tam tak mak tak maia ker a ni. Entîr nân, thupêk hmasa ber chu: ‘Kei, Jehova i Pathian ka ni,’ tiin a inṭan a. (Ex. 20:1-17) Setana’n Pathian Thu leh a hming chu tih bo vek tum mah se, Lal Chungnungber Jehova chuan a vawn ṭhat tlat avângin hmuh theihin a la awm reng a ni.

3. Sakhaw dik lo zirtîrnate a tam hle chung pawhin Pathianin eng nge a vawn ṭhat?

³ Pathian Jehova chuan a Thu-ah chuan thutak pawh a vawng ṭha bawk a. Khawvêl pumah hian sakhaw dik lo zirtîrnate a tam hle chung pawhin, Pathianin thlarau lama êng leh thutak min pêk avângin kan va lâwm tak êm! (Sâm 43:3, 4 chhiar rawh.) Mihring a tam zâwkte hi thim zîngah an awm laiin, keini erawh chu Pathian min pêk thlarau lam êngah hlim takin kan awm reng thung a ni.—1 Joh. 1:6, 7.

4, 5. Kum 1931 aṭang khân eng chanvo hlu tak nge kan neih?

⁴ Kristian kan nih angin, rochan hlu tak kan nei a. Rochan chu thil hlu engemaw chhuan khat aṭanga chhuan danga inhlan chhawn zêl thil a ni a. Kan thlarau lam  rochanah chuan Pathian Thu hriatna dik kan neih te, Pathian chungchânga thu dik hriatna leh a thiltum hriatthiamna dik kan neihte a tel a. Chutah chuan chanvo hlu bîk tak pawh a tel bawk a ni.

⁵ Chu chanvo chu kum 1931-a Columbus, Ohio, U.S.A. rama kan inkhâwmpuiah khân kan thlarau lam rochan zînga mi a lo ni a. “JW” tih hawrawp chu program-ah chuan a chuang a. Unaunu pakhat chuan: “JW lam pum chu an inrinsiak nasa hlawm hle a, a ṭhen chuan an ring dik a ni,” tiin a sawi a ni. Bible Zirlaite tia koh kan ni ṭhîn a; mahse, tûnah chuan Jehova Thuhretute (Jehovah’s Witnesses) tih chu Chawlhni, July 26, 1931 khân rawtna siamna hmanga pawm tlân a nih hnuah kan hming a lo ni ta a. Bible-a chuang ngei hming han put chu a phûrawm hle. (Isaia 43:12 chhiar rawh.) Unaupa pakhat chuan: “Inkhâwmpuina hmun nghawr nghîng khawpa au ri leh kut bêng ri nasa tak kha ka theihnghilh ngai lo vang,” tiin chutih hun laia thilthleng chu a hre chhuak leh a ni. He hming hi khawvêl mi tumahin duh lo mah se, Pathian malsâwmna zârah kum sawm riat chuang lai kan hmang tawh a ni. Jehova Thuhretu nih chu chanvo hlu a va ni tak êm!

6. Kan thlarau lam rochanah chuan eng chanchin dikte nge tel?

⁶ Kan thlarau lam rochanah chuan hmân lai thilthleng chanchin dik leh hlu tam tak a tel a. Entîr nân, Abrahama, Isaaka, leh Jakoba te hi ngaihtuah teh. Hêng min thlahtute leh an chhûngkuate hian Jehova tihlâwm dân chu an sawiho ṭhîn ngei ang. Chuvângin, mi dik Josefa’n ‘Pathian chunga thil tisual’ lo tûra mipat hmeichhiatna lama nungchang bawlhhlawhna a hnâwl pawh chu thil mak a ni lo. (Gen. 39:7-9) Kristian thuro chhiahte chu ṭawngkam emaw, entawn tûr siam emaw hmanga inhlan chhâwn a ni bawk. Chûng zîngah chuan Lalpa Zanriah chungchânga tirhkoh Paula’n Kristian Kohhrana a hrilh chhâwn pawh kha a tel a ni. (1 Kor. 11:2, 23) Tûn laiah hian ‘thlarau leh tih tak zeta’ Pathian chibai bûk tûra kan thil tih ngaite chu a Thu-ah a chuang a. (Johana 4:23, 24 chhiar rawh.) Bible chu mi zawng zawngte bengvârna tûra ziak mah ni se, keini Jehova chhiahhlawhte hian kan hlut zual bîk a ni.

7. Kan rochanah chuan thutiam phûrawm tak eng nge tel?

⁷ Kan thlarau lama rochanah chuan ‘Jehova chu kan lamah a ṭang’ tih târ langtu tûn hnaia thuziak kan tihchhuahte pawh a tel a. (Sâm 118:7) Chu chuan tihduhdah kan nih hunah pawh him nia inhriatna min neihtîr a ni. Kan thlarau lam rochan pung chho zêl a phûrawmna chu hei hi a ni: “Nangmah beina tûra hriam chher rêng rêng a sâwt lo vang; lei tinrêng thupawia nangmah rawn khingtute chu thiam loh i chantîr ang. Chu chu LALPA chhiahhlawhte rochan chu a ni a, an felna chu ka hnên ata a ni, LALPAN a ti,” tih hi. (Is. 54:17) Setana hriam chher engmahin chatuana chhiatna min thlen thei lo.

8. He thuziakah leh a dawta thuziakah eng nge kan ngaihtuah ang?

 ⁸ Setana chuan Pathian Thu tihboral te, Jehova hming thai bo te, leh thutak thup bote chu a tum a. Mahse, chûng a thiltum zawng zawngte tihlawhchhamtu Jehova chu Setana tân hneh rual a ni lo. He thuziakah leh a dawta thuziakah (1) Pathianin a Thu a vawn ṭhat dân; (2) Jehova’n a hming a vawn ṭhat dân; leh (3) kan Pa vâna mi chu kan neih thutak lo chhuahna Hnâr leh Vawng Ṭhatu a nih dânte chu kan hmu ang.

9-11. Beihna chi hrang hrang lakah pawh Bible a dam khawchhuak zêl tih eng entîrnate’n nge târ lang?

⁹ Jehova chuan tihboral tuma beihna zawng zawng lakah a Thu chu a vawng ṭha tlat a. Enciclopedia Cattolica (Catholic Encyclopedia) chuan: “Kum 1229-a Toulouse Rorêl Inkhâwm chuan Albigenses leh Waldenses kohhranhote nêna an indo lai a nih avângin mipui vântlâng tân [mahni hnam ṭawng Bible] hman a khap a . . . Kum 1234-a Spain ram Tarragona khuaa neih inkhâwm chuan James I-na hnuaiah chutiang bawk khapna chu a tichhuak a. . . . Kum 1559 khân, Paul IV-na Index lehkhabu chuan The Roman See phalna lovin mahni hnam ṭawng B[ible] chhiar khapin, ani chu he mi chungchângah a vawi khatna atân a inrawlh a ni,” tiin a sawi.

¹⁰ Bible chu chi hrang hranga beih a ni chung pawhin, vawn ṭhat a ni chho zêl a. Kum 1382 vêlah khân, John Wycliffe-a leh a ṭhiante chuan Sâpṭawnga Bible lehlin hmasa ber chu an tichhuak a. Bible letlingtu dang William Tyndale-a chu kum 1536 khân tihhlum a ni. Bana phuar beh a nih lai chuan, “Lalpa, England lal mit hi tihvârsak ang che,” tia au chhuak nia sawi a ni a. Tichuan, reh hlum a ni a, hâl a ni ta a ni.

¹¹ Bible chu dodâlna kârah pawh a dam khawchhuak zêl a. Entîr nân, kum 1535 khân, Miles Coverdale-a lehlin Sâpṭawng Bible chu a lo chhuak a. Coverdale-a chuan Tyndale-a lehlina “Thuthlung Thar” leh “Thuthlung Hlui” lama Genesis aṭanga Chronicles thleng chu a hmang a. A bâk zawng chu Latin ṭawng aṭang leh Martin Luther-a Bible, German ṭawng aṭangin a letling a ni. Tûn laiah, New World Translation of the Holy Scriptures chu a fiahna te, a dikna te, leh kan rawngbâwlnaa a ṭangkainate avânga ngaih hlut hle a ni a. Jehova Thu vawn ṭhatna chu Setana leh mihring thiltih theihna engmahin a dâl theih ngai dâwn loh avângin kan lâwm a ni.

12. Pathian hming vawn ṭhat chungchângah New World Translation chuan eng hmun nge a luah?

¹² Pathian Jehova chuan a Thu-ah a hming chu a vawng ṭha tlat a. He mi chungchângah hian New World Translation chuan hmun pawimawh tak a luah a ni. A thuhmahruaiah inpumpêka ṭawng letlingtu committee chuan  heti hian an ziak a ni: “He Bible hmêl hmang pawimawh ber chu Sâpṭawng Bible-a Pathian hming a awmna hmun dik taka dah lêt leh hi a ni a. Chu chu, Sâpṭawnga mi nâwlpuiin an pawm ‘Jehovah’ tih hming chu Hebrai Pathian Lehkha Thu-ah vawi 6,973 leh Grik Kristian Pathian Lehkha Thu-ah vawi 237 hmanga tih a ni,” tiin. Tûnah chuan New World Translation bu pum emaw, a ṭhen lai emaw chu ṭawng 116 chuanga hmuh theih a ni tawh a, copy 178,545,862 chuang chhut chhuah a ni tawh bawk.

13. Engvângin nge mihring siam ṭan tirh aṭangin mite’n Pathian hming an hria kan tih theih?

¹³ Pathian hming chu mihring siam ṭan tirh aṭang khân mite’n an hre tawh a. Adama leh Evi’n Pathian hming an hria a, a lam dân dik tak an hria a ni. Tuilêt hnua Hama’n a pa zah lohna a lantîr khân, Nova chuan: ‘Jehova, Sema Pathian chu fakin awm rawh se; [Hama fapa] Kanaana chu a chhiahhlawhah awm rawh se,’ tiin a sawi a ni. (Gen. 4:1; 9:26) Pathian ngei chuan: ‘Jehova chu ka ni; chu chu ka hming a ni: ka ropuina hi mi dang hnênah ka pe lo vang,’ tiin a puang chhuak a. ‘Kei hi Jehova chu ka ni, a dang rêng rêng an awm lo; keimah lo chu Pathian rêng rêng an awm lo,’ tiin a sawi belh bawk. (Is. 42:8; 45:5) Jehova chuan a hming chu vawng ṭhain, lei pumpuia mite a hriattîr a ni. Jehova hming kan hmang a, a Thuhretute anga rawng kan bâwl thei hi chanvo hlu a va ni êm! “Kan Pathian hmingin kan puanzârte hi kan la zâr ang,” tiin kan au chhuak a tih theih a ni.—Sâm 20:5.

14. Bible chhûng ni lo, khawiahte nge Pathian hming chu hmuh theih a nih?

¹⁴ Pathian hming chu Bible-ah chauh a chuang lo va. Dead Sea khawchhak lam mêl 13 (km 21)-a awm Dhiban (Dibon)-a hmuh chhuah Moab Lung (Moabite Stone) hi han ngaihtuah teh. Chu lungah chuan Israel Lal Omria chanchin leh Moab Lal Mesa’n Israel mite a beih thu pawh a chuang a ni. (1 Lal. 16:28; 2 Lal. 1:1; 3:4, 5) Mahse, chu Moab Lung a ngaihvenawm lehzual chhan chu Pathian hming Tetragrammaton form–a a chuan vâng a ni. Israel rama hmuh, lei bêl keh themahte chuan Lakis Hawrawpin Tetragrammaton chu hmuh a ni fo bawk.

15. Septuagint chu eng nge ni a, chu chu engtin nge a lo chhuah?

¹⁵ Bible letlingtu hmasate chuan Pathian hming vawn ṭhatnaah chanvo an nei ve a. B.C.E. 607 aṭanga B.C.E. 537 thleng Babulon sala an tân hnu chuan, Juda mi tam tak chu Judai ram leh Israel ramah an kîr leh tawh lo va. B.C.E. kum zabi thumnaaah chuan, Aigupta ram Alexandria khua chu chutih hun laia khawvêl ṭawng hman ber Grik ṭawnga Bible lehlin mamawh Juda mi tam takte inbengbelna hmun a lo ni a. Chu Bible lehlin chu B.C.E. kum zabi hnihnaah zawh fel a ni a, Septuagint tia koh a ni. Chu Septuagint copy ṭhenkhatah chuan Hebrai ṭawnga Jehova hming chu a chuang a ni.

16. Kum 1640-a lehkhabu chhut chhuah hmasak bera Pathian hming hman a nih dân entîrna pe rawh.

¹⁶ England awpna hnuaia American colony-a lehkhabu chhuah hmasak ber, Bay Psalm Book-ah chuan Pathian hming a chuang a. Chu lehkhabu original edition (kum 1640-a chhut chhuah)-ah chuan Sâm bu, chutih hun laia Hebrai ṭawng aṭanga Sâpṭawnga lehlin chu a chuang a ni. Chu lehkhabua Sâm 1:1, 2-ah te hian Pathian hming hman a ni a, chutah chuan mi suaksualte thurâwn anga awm lo va, “Iehova dâna lâwm” mi chu “a nihlawh” tih a sawi a ni. Pathian hming chungchâng hriat belh nân The Divine Name That Will Endure Forever tih brochure chu en ang che.

17, 18. (a) “Thutak” tih thu mal chu engtin nge i hrilhfiah ang? (b) ‘Chanchin ṭha thutakah’ chuan eng nge tel?

¹⁷ “Thutak Pathian,” Jehova rawng chu hlim takin kan bâwl a. (Sâm 31:5) Collins Cobuild  English Dictionary chuan: “Thil engemaw chungchânga thutak tih chu ngaihruatna emaw, siam chawp emaw ni lovin, a chungchânga thil dik tak a ni,” tiin a sawi. “Thutak” tia lehlin fo Bible hun laia Hebrai ṭawng awmzia chu thu dik, rin tlâk, rinawm, a nih loh leh thil nih dân dik tak tihna a ni a. Grik thu mal “thutak” tia lehlin hi thil dik tak nêna inmil emaw, thil inâwm leh ṭha emaw tihna a ni bawk.

¹⁸ Jehova chuan thlarau lam thutak chu a vawng ṭhain, chu mi hriatna chu tûn hma zawng aia nasain min pe a ni. (2 Joh. 1, 2) ‘Mi felte kawng chu chhûn ên lai tak pawha êng zual deuh deuh, êng fîm tak ang’ a nih avângin, thutak kan hriatthiamna chu a fiah chho tawlh tawlh a ni. (Thuf. 4:18) Dik takin, Pathian hnêna Isua ṭawngṭaina: “I thu chu thutak a ni,” tih chu kan pawm thlap a. (Joh. 17:17) Pathian Thu chuan “chanchin ṭha thutak” a pai a, chutah chuan Kristian zirtîrna zawng zawng a tel a ni. (Gal. 2:14) Chûng zîngah chuan Jehova hming te, a lal chungnunna te, Isua tlanna inthâwina te, thawhlehna te, leh Pathian Ram te chungchânga thu dikte a tel a ni. Tûnah chuan Setana’n thutak thup bo a tum chung pawha Pathianin a vawn ṭhat dân chu i lo ngaihtuah ang u.

19, 20. Nimroda chu tu nge ni a, a hun laiin eng thiltum nge hlawhchham?

¹⁹ Tuilêt hnu khân: “Jehova dotu sa pêl chak tak Nimroda ang maiin,” tih ṭawngkam a lo chhuak a. (Gen. 10:9, NW) Pathian Jehova dotu a nih angin Nimroda chuan Setana a bia tih theih a ni a, ani chu Isua’n: “Nangni zawng in pa diabola hnêna chhuak in ni a, in pa duhzâwng tih in duh a ni. Ani chu . . . thutakah a awm lo,” tia an chungchâng a sawi dodâltute ang chu a ni.—Joh. 8:44.

²⁰ Nimroda ram awp chhûngah chuan Babel khua leh Tigris leh Euphrates lui inkâra khawpui dangte pawh a tel a. (Gen. 10:10) B.C.E. 2269 vêla Babel khua leh a in sâng sakna pawh kha a kaihhruaina hnuaia thawh a nih hmêl hle. Lei pum puia mihringte awm darh tûra Jehova duhzâwng nêna inkalhin, in satute chuan: “Hawh u, khawpui siam ila, in sâng a chhîpina vân tawng tûrin sa bawk ila, kan hming i tithang ang u; chutilochuan lei chung zawng zawngah hian tihdarhin kan awm dah ang e,” an ti a. Mahse, Pathianin “leia mi zawng zawng ṭawng chu a tihhransak tâk” avângin chu ruahmanna chu kalsan a lo ngai ta a, in sâng satu tûrte chu an darh zo ta vek a ni. (Gen. 11:1-4, 8, 9) Setana chuan amah betu zawng zawng tâna sakhaw pakhat din a lo tum a nih chuan, a thiltum chu a hlawhchham chiang hle. Mihringte chanchin tluan chhuakah hian Pathian Jehova biakna chu a hlawhling a, a kum têlin a hlawhtling chho telh telh a ni.

21, 22. (a) Engvângin nge sakhaw dik lo chuan biakna dik chu dinhmun hlauhawm lutuka a dah ngai loh? (b) A dawta thu ziakah eng nge kan sawi ho vang?

²¹ Sakhaw dik lo chuan biakna dik chu dinhmun hlauhawm lutukah a la dah ngai lo. Engvângin nge? A chhan chu min Zirtîrtu Ropuiin a Thu a vawn ṭhat a, mihringte hmaah a hming a târ lan a, thutak Hnâr tâwp nei lo a nih bawk vâng a ni. (Is. 30:20, 21) Thutak nêna inmila Pathian biakna chuan hlimna min pe a; mahse, chutianga ti tûr chuan thlarau lama kan harhvân reng a, Jehova kan rinchhan tlat leh a thlarau thianghlim kaihhruaina zui a ngai a ni.

²² A dawta thuziakah chuan zirtîrna dik lo ṭhenkhat a lo chhuah dân kan chhui chiang ang a. Chûng zirtîrna dik lote chu Bible êng hmanga kan fiah hian a keh chhe vek tih kan hmu ang. Chu bâkah, thutak Vawngtu ṭha ber Jehova chuan kan thlarau lam rochan zînga mi anga kan ngaihhlut zirtîrna dik min pêk dân chu kan hmu bawk ang. (w13-E 02/15)