A KAWM THU: MOSIA CHANCHIN AṬANGA KAN THU ZIRTE
Tu Nge Mosia Chu?
Mosia tih hming i hriat hian i rilruah eng nge lo lang? I thil ngaihtuah chhuah chu . . .
-
nausên, a nuin bâwm chhûnga daha Nile Luia a thuhrûka kha em ni?
-
naupang, Pharaoa fanuin nuamsa taka a enkawl seilian chung pawha Israel mi a ni tih theihnghilh ngai lova kha em ni?
-
Midian rama kum 40 vêl berâm vênga awma kha em ni?
-
hnim buk alh hmaa Jehova * nêna inbiaa kha em ni?
-
Aigupta lal hmaa dinga Israel mite an sal tânna ata chhuahtîr tûra huaisen taka dîltu kha em ni?
-
Aigupta lalin Pathian dik a pawisak loh avânga Pathian kaihhruaina anga a rama Hri Sâwm a lên tûr thu puangtu kha em ni?
-
Aigupta ram aṭanga Israel mite ropui taka hruai chhuaktu kha em ni?
-
Tuipui Sen ṭhen hrang tura Pathian mi hmana kha em ni?
-
Israelte hnêna Pathian Thu Sâwm Pêk petu kha em ni?
MOSIA chuan hêng zawng zawngte bâkah hian thil dangte pawh a ti a ni. He mi rinawm tak hi Kristian te, Juda te leh Mosolman-te’n an ngaisâng hle pawh hi a mak lo ve!
Mosia chu thil ‘hlauhawm tak takte’ lantîrtu zâwlnei pakhat a ni tih a chiang hle. (Deuteronomy 34:10-12) Pathianin ani chu ropui takin a hmang a ni. Dik takin, Mosia chu mihring pângngai ve mai a ni a. Isua’n leia rawng a bâwl laia inlârnaa a inlanpui Elija ang bawkin Mosia chu “keimahni nungchang ang pu” a ni. (Jakoba 5:17; Matthaia 17:1-9) Mosia chuan kan tawh ang buaina tam tak a tâwk a, chûng chu hlawhtling takin a hma chhawn thei a ni.
Chutianga a hma chhawn theih dân chu hriat i duh em? Mosia lantîr mize ṭha pathumte leh a entawn tûr siam aṭanga kan zir theihte chu i lo ngaihtuah ang u. (w13-E 02/01)
^ par. 7 Jehova tih chu Bible-a lang Pathian hming a ni.