‘Pathian In Lo Hriat Hnu’ Hian Eng Nge In Tih Ang?
“Pathian in lo hriat . . . hnu hian.”—GAL. 4:9.
1. Engvângin nge pilot chuan a thlawh chhuah hmain thil a endik thlap ṭhin?
THLAWHNA siam chhuah tawh zînga a ṭha ber khalhtu pilot-te pawhin an thlawh hmain endik tûr thil 30 aia tam an nei ṭhîn a. Chutianga an thlawh chhuah hmaa checklist fîmkhur taka an endik loh chuan chhiatna râpthlâk tak an tâwk thei dâwn a ni. Eng ang pilot-te nge checklist endik ziah tûra tih bîk an nih i rin? Pilot tawn hriat ngah takte an ni! Anni chuan awlsam taka ngaihngamna neiin, chipchiar takin an endik tûrte chu an en dik lo thei si a.
2. Kristiante tân endik tûr eng checklist nge neih ngai?
2 Himna ngaihtuahtu pilot ang maiin, i mamawh hun lai bera rinna i hloh loh nân checklist i hmang thei a. Baptisma i chang hlim emaw, kum tam tak chhûng Pathian rawng i lo bâwl tawh emaw pawh ni se, i rinna leh Pathian Jehova hnêna i inpêkna endik ṭhin chu a pawimawh hle. Taima tak leh a hun taka endik ṭhin lohna chuan thlarau lama chhiatna a thlen thei a ni. Bible chuan: “Dinga inring chu fîmkhur rawh se, chutilochuan a tlu dah ang e,” tiin min vaukhân a ni.—1 Kor. 10:12.
3. Galatia rama Kristiante chuan eng nge an tih ngai?
3 Galatia rama Kristiante tân an rinna nghehzâwng an endik leh thlarau lama an zalênna an hlut a ngai a. Isua chuan a inthâwina hmangin, amaha rinna neite tân kawng danglam bîk taka Pathian hriat theihna kawng a hawng a—anni chu Pathian fate an ni thei dâwn a ni! (Gal. 4:9) Galatia rama mite tân chuan chu inlaichînna hlu tak an vawn reng theih nân Mosia Dân zawm ngiattu Judate zirtîrna chu an hnâwl a ngai a ni. Tihah chuan, kohhran chhûnga serh tan loh Jentailte chu Dân hnuaia an awm a ngai si lo! Judate leh Jentailte tân thlarau lama hma sâwn a ngai ve ve a. Chutianga hma sâwn tûr chuan Mosia Dân hmangin felna an hmu thei lo tih hriat a tel a ni.
PATHIAN HRIATNA TURA RAHBI HMASATE
4, 5. Galatia rama mite hnênah Paula chuan eng zilhna thu nge a pêk a, engvângin nge chu chu kan tân a pawimawh?
4 Galatia rama mite hnêna tirhkoh Paula zilhna thu hi thiltum neia Bible-a chhinchhiah a ni a, chu chu eng hun pawha awm Kristian dikte’n Bible thutak kalsan lo tûr leh an thil kalsan tawhte lama kîrleh ngai lo tûra vênhim nân a ni. Jehova chuan tirhkoh chu Galatia rama kohhrana mite chauh ni lovin, Amah chibai bûktu zawng zawngte chu nghet taka awm reng tûra fuih tûrin thlarauvin a thâwk khum a ni.
5 Kan vai hian thlarau lam sal tânna aṭanga zalên a, Jehova Thuhretute zînga mi kan lo nih dân kan ngaihtuah lêt tûr a ni. Chutianga ti tûr chuan, hêng zawhna pahnihte hi ngaihtuah ang che: Baptisma chang thei tûra rahbi i rah chhohte chu i hre chhuak em? Thlarau lama zalênna dik tak nei tûra Pathian i lo hriat dân leh a mi hriat i lo nih dân chu i la hria em? tihte chu.
6. Eng checklist nge kan ngaihtuah ang?
6 A thlângpui thuin, kan za hian rahbi pakua kan rap chho a ni. Chûng rahbite chu thlarau lam checklist angin, “Baptisma Channa leh Ṭhan Chhoh Zêlna Thlentu Rahbite” tih bâwmah târ lan a ni. Hêng rahbi pakhuate inhriat nawntîr ṭhinna chuan khawvêl lam thila kîr leh lo tûrin min tichak ang. Pilot tawn hriat ngaha fîmkhur bawk si chuan thawh chhuah hmaa checklist endikna hmanga him taka thlawhna a khalh ṭhin ang bawkin, thlarau lam checklist hmanga inendikna chuan rinawm taka rawngbâwl zêl tûrin a ṭanpui ang che.
PATHIAN MI HRIATTE CHUAN THLARAU LAMAH HMA AN SAWN ZEL
7. Eng dân nge kan zui ngai a, engvângin nge?
7 Pilot neih checklist chuan a thlawh chhuah hma apiangin fîmkhur taka a tih tûr thilte chu a hriattîr ṭhîn a. Keini pawhin mahni inendikin, baptisma chan aṭanga kan tih ṭhinte chu kan endik, a nih loh leh kan bih chiang ve thei a ni. Paula chuan Timothea hnênah: “Krista Isuaa awm rinna leh hmangaihna neiin, thu dik dân ka kaa i hriatte kha nei tlat rawh,” tiin a ziak a. (2 Tim. 1:13) Chûng “thu dik dân” chuan Pathian Thu-ah a chuang a ni. (1 Tim. 6:3) Lem ziak thiam chuan milem riruang min pêk angin, ‘thutak dân’ chuan Jehova’n kan laka a thil phûtte kan hriat theihna tûr a riruang min pe a ni. Chuvângin, thu dik dân kan zui ṭhat leh ṭhat loh hre tûrin baptisma channa min thlentu rahbite chu i lo en ang u.
8, 9. (a) Engvângin nge hriatna leh rinnaah chuan kan ṭhan chhoh vang? (b) Thlarau lama ṭhan chhoh zêl a hlutna leh chu chu thil tih chhunzawm zêl ngai a nih chhan hrilhfiah rawh.
8 Kan checklist-a endik tûr hmasa ber chu hriatna kan neih a ngai hi a ni a. Chutiang chuan, rinna kan nei chho thei a ni. Mahse, a pahnihah hian kan ṭhang lian zêl tûr a ni. (2 Thes. 1:3) Ṭhan lennaah chuan zawi zawia inthlâkthlengna neih a tel a. ‘Ṭhang lian’ tih awmzia chu tipung, tizau tihna a ni. Chuvângin, baptisma kan chan hnu chuan kan ṭhuanawp loh nân thlarau lama puitlin chhoh kan tum zêl tûr a ni.
Thingkûng chu a ṭhang chho zêl a. Kristiante pawh an ṭhang chho zêl tûr a ni
9 Thlarau lama kan ṭhan chhohna chu thing ṭhan chhoh dân nêna khaikhin theih a ni a. Thingkûng chuan zung thûk tak leh zau taka a kaih chuan mak tih khawpin a ṭhang lian thei a ni. Entîr nân, Lebanon-a sidar kûng lian ropui tak ṭhenkhat chu inchhâwng 12-a sângin a ṭhang thei a, zung nghet tak neiin, a kûng chu teh kualin feet 40 (meter 12) laia lian a ni thei a ni. (HTK. 5:15) Chutiang thing chu atîr lamah chuan hmuh theih khawpin a ṭhang thut a, a hnuah chuan la ṭhang chho zêl mah se, hriat theih khawpin a ṭhang tawh lo. Kumte a lo liam zêl chuan, a kûng chu a lian telh telh a, a zung a kaih thûk telh telhin, a inpharh zau telh telh a, thing kûng nghet tak a lo ni ta a ni. Thlarau lama Kristian ṭhan chhoh dân pawh chutiang bawk chu a ni. Bible kan zir tirh lamah chuan thlarau lamah kan ṭhang chho thutin, baptisma kan chang pawh a ni mai thei a. Kohhran chhûnga mite chuan kan ṭhan chhoh dân chu an hmuin, an hlim hle a. Pioneer thawk tûr emaw, chanvo dang dawng tûr emawin kan tling chho hial pawh a ni thei. Chu mi hnu lamah chuan, thlarau lama kan ṭhan chhoh dân chu hmuh mai theih a ni tawh lo mai thei a ni. Mahse, ‘puitling a, Krista famkimna lenzia tluka kan awm theih nân’ hriatna leh rinnaah chuan kan ṭhang chho zêl tûr a ni. (Eph. 4:11-13) Chutiang chuan, thing ṭiak te tak tê aṭanga thingkûng lian leh nghet taka a ṭhang chho ang maiin, Kristian puitling takah kan ṭhang chho a ni.
10. Kristian puitling tawhte tân pawh engvângin nge ṭhan chhoh zêl a pawimawh?
10 Mahse, kan ṭhan chhohna chu chutah chuan a tâwp mai tûr a ni lo. Kan hriatna chu a zau zêl a ngai a, kan rinna pawh chu a ngheh zual zêl a ngai a. Chutiang chuan Pathian Thu lei ṭhaah chuan kan intuh nghet lehzual a ni. (Thuf. 12:3) Kristian kohhranah hian chutianga ti tawh unau tam tak an awm a. Entîr nân, kum sawm thum aia tam upa lo ni tawh unaupa pakhat chuan thlarau lamah a la ṭhan chhoh zêl thu a sawi a. Ani chuan: “Bible kan hlutna chu nasa takin a pung a. Bible thu bulte leh dânte kawng hrang hranga nunpui theihna hun remchâng kan hmuh belh zêl a. Rawngbâwlna ka ngaihhlutna pawh a ṭhang chho zêl bawk,” tiin a sawi.
PATHIAN NENA INṬHIANNA KAWNGAH ṬHANG CHHO ZEL RAWH
11. Engtin nge hun a liam zêl rualin Jehova kan lo hriat chian lehzual theih?
11 Kan ṭhan chhohnaah chuan Jehova chu kan Ṭhian leh Pa anga kan hnaih lehzualna pawh a tel a. Ani chuan min pawmzia kan hriat a duh a. Naupangin amah ngaihsaktu a nu leh pate’n an kuah lai leh kan ṭhian ṭha leh rinawmte kan kawm lai ang bawkin, Pathian chuan a hmangaihna leh a vênhimna kan dawng tih kan hriat chu a duh a ni. I hriat angin, Jehova nêna hetianga inṭhianna hi zan khat thil thua neih theih a ni lo. Amah kan hriat a, kan hmangaih theih nân chuan hun engemaw chen a liam a ngai a ni. Chuvângin, Jehova hre chiang lehzual tûrin, nî tina a Thu chhiar nân hun insiam tum tlat ang che. Vênnainsâng leh Awake! bâkah Bible ṭanchhan thu leh hla chhuah apiangte chu chhiar ziah ang che.
12. Jehova mi hriat kan nih theih nân eng nge ngai?
12 Pathian ṭhiante chu tih tak zeta ṭawngṭaina leh inṭhian ṭhate an kawmna aṭangin thlarau lamah an ṭhang chho va. (Malakia 3:16 chhiar rawh.) Jehova chuan ‘a beng chu an ṭawngṭaina lamah a chhi ṭhîn.’ (1 Pet. 3:12) Hmangaihna ngah tak nu leh pate angin Jehova chuan ṭanpuina dîla kan ṭawngṭaina chu a ngaithla a. Chuvângin, kan “ṭawngṭai fan fan” a ngai a ni. (Rom 12:12) Pathian ṭanpuina tel lo chuan Kristian puitling kan ni reng thei lo. He khawvêl nêksawrnate hi mahni maia do hneh theih a ni lo. Kan ṭawngṭai fan fan tawh lo a nih chuan, Pathian min pêk theih leh min pêk duh chakna chu dawng lo tûrin kan insiam tihna a ni. I ṭawngṭaina chu ṭha tâwk niin i hria nge ni a, hma sâwn lehzual ngai niin i inhre zâwk?—Jer. 16:19.
13. Thlarau lama ṭhan chhoh nân Kristian unaute nêna inkawmho chu engvangin nge a pawimawh?
13 Jehova chuan ‘amaha an rinna nghattu,’ a nih loh leh amaha inhumhimna zawngtu zawng zawngte chu a lâwm vek a; chuvângin, Pathian kan lo hriat hnu pawhin amah hretu mi dangte awmna kohhran belh reng chu kan duh a ni. (Nahum. 1:7) Lunghnualnaa khat khawvêlah hian, min tichaktu kan unaute hual vêla awm chu finthlâk a ni. Chutianga awm chu eng nge a hlâwkna? Kohhran chhûngah chuan “hmangaih leh thil ṭha tiha” chawk thotu che chu i hmu ang. (Heb. 10:24, 25) Paula’n Hebrai mite hnêna a ziah ang inhmangaih tawnna chu kohhran kan belh loh chuan kan nei thei lo vang. Chuvângin, inkhâwma tel ziah leh chhânna pêkte chu i checklist-ah telh ang che.
14. Engtin nge simna leh inlamlêtna chu thiltih chhunzawm zêl ngai a nih?
14 Kristian kan nih ṭanna chu kan sualte simna leh inlamlêtna, a nih loh leh hawisannaah a innghat a. Amaherawhchu, simna chu thiltih chhunzawm zêl ngai a ni. Mihring ṭha famkim lo kan nih avângin, keimahniah hian mi chuk mai tûra inpeihsaa awm rûl ang maiin sual a biru a. (Rom 3:9, 10; 6:12-14) Chuvângin, kan dik lohnate chu ngaihthah lovin, mit fîm tak i nei ang u. Kan chak lohnate kan do tlat a, a ṭûl anga inthlâkthlengna kan siam lai hian Jehova’n kan chunga dawhtheihna a lantîr chu a lâwmawm hle. (Phil. 2:12; 2 Pet. 3:9) Mahni hmasialna thiltih bânsan a, kan hun leh thil neihte kan hman dân thunun chu thil ṭangkai tak a ni. Unaunu pakhat chuan heti hian a ziak a ni: “Thutaka enkawl seilen ni mah ila, mi tam takte’n Jehova an thlîr dân nêna inang lo tak neiin ka ṭhang chho va. Ani chu hlauhawm tak leh tihlâwm theih ngai loh niin ka hre tlat a ni,” tiin. A hnuah chuan mi mal harsatna hrang hrang avângin chu unaunu chu “thlarau lamah a chak ta lo va.” “Chu chu Jehova ka hmangaih loh vângin ni lovin, amah ka hriat chian loh vâng zâwk a ni. Tih tak zeta vawi tam tak ka ṭawngṭai hnuah erawh chuan, ka inthlâkthleng ṭan ta a. Jehova chuan naupang ang maiin min kaihruai a, a tahtawl tê têin harsatnate lakah min ṭanpui a, dimdawi takin ka thiltih ngaite chu min hmuhtîr a ni,” tiin a sawi belh a ni.
15. Isua leh a Pa chuan eng nge an hmuh a, an hriat?
15 Chanchin ṭha chu ‘mite hnênah sawi zêl rawh.’ Pathian vântirhkoh chuan Petera leh tirhkoh dangte tân in aṭanga mak tak maia a chhuahtîr hnuah hêng thute hi a sawi a ni. (Tirh. 5:19-21) Ni e, chawlhkâr tina thu hrilh rawngbâwlnaa telna chu kan endik tûr checklist zînga pakhat a ni a. Isua leh a Pa chuan kan rinna leh kan rawngbâwlna chu an hria a ni. (Thup. 2:19) Paragraph hmasa lama kan sawi tâk upa chuan: “Kan thlawhhma rawngbâwlna chu kan nihna hriltu a ni,” a ti.
16. Engvângin nge Jehova hnêna kan inpumpêkna kan ngaihtuah chu a ṭhat?
16 I inpumpêkna ngaihtuah lêt rawh. Kan thil neih hlu ber chu Jehova nêna kan inlaichînna hi a ni a. Ani chuan a tate chu a hria a ni. (Isaia 44:5 chhiar rawh.) Amah nêna in inlaichînna ṭhat dân leh thûk dân chu ṭawngṭaiin bih chiang ṭhîn ang che. Chu mi nêna inzawmin, baptisma i chan nî, ni pawimawh tak chu hre reng rawh. Chu pawh chuan i baptisma channa chuan thutlûkna i siam tawh azawnga pawimawh ber a entîr a ni tih a hriat nawntîr dâwn che a ni.
CHHEL TAKA AWMIN PATHIAN JEHOVA HNAIH RAWH
17. Pathian Jehova hnaih tûrin engvângin nge chhelna kan mamawh?
17 Galatia rama mite hnêna a lehkha thawnah Paula chuan chhelna neih a ṭûlzia a sawi a. (Gal. 6:9) Chu chu tûn laia Kristiante tân pawh a pawimawh a ni. Fiahna chu i tâwk ang a; mahse, Pathian Jehova’n a ṭanpui ang che. Thlarau thianghlim dîlin ṭawngṭai reng la. Lungngaihna chu hlimna, rilru manganna chu remnaa a thlâksak che hian i hahdam huai ang. (Mt. 7:7-11) Hei hi ngaihtuah rawh: Jehova’n chunglêng savate mah a ngaihsak si chuan amah hmangaih a, hnêna inpe hial chu engtiang khawpin nge a ngaihsak ang che?, tih hi. (Mt. 10:29-31) Eng ang nêksawrna pawh tâwk mah la, hawi kîr lo la, tlâwm ngai hek suh. Pathian Jehova mi hriat kan nih avângin malsâwmna kan va dawng tak êm!
18. “Pathian mi hriat” i lo nih hnu hian eng nge tih i duh?
18 Chuvângin, tûn hnai maia Pathian hria a, baptisma chang i nih chuan, eng nge i tih ang? Pathian Jehova chu hre chiang lehzualin, thlarau lamah puitling tûrin ṭhang chho chhun zawm zêl ang che. Kum tam tak baptisma chang tawh i nih chuan, eng nge i tih ang? Nang pawhin Pathian Jehova i hriatna chu tithûkin, tizau zawm zêl ang che. Amah nêna kan inlaichînnaah ngaihngam takin i inthlahdah mai lo vang u. Chu ai mah chuan, kan za hian hmangaihna ngah tak kan Pa, kan Ṭhian, leh kan Pathian—Jehova—nêna kan inlaichînna a ṭhang chho zêl tih kan chian theih nân thlarau lama kan checklist hmangin kan inendik fo zâwk tûr a ni.—2 Korinth 13:5, 6 chhiar rawh. (w13-E 03/15)
