KUM 2,500 lai kal taa Grik thilthleng chanchin ziaktu Herodotus-a chuan a dam laia Aigupta mi pakhat chanchin a sawi a. Heti hian a ziak a ni: “Mi hausa tak ruai ṭhehnaah lûtin, ani chuan thinga siam ruang, a tak ang tûra ker leh rawng hnawih chu tawng khat emaw, tawng hnih emawa sei kuanga dahin a keng kual a. Ruai ṭhehnaa awm zawng zawng chu hmuhtîrin, ‘In rawh u, hlim rawh u, in thih hun chuan hetianga nunna rêng nei lo in ni dâwn si a,’ a ti a,” tiin.

Nunna leh thihna chungchânga chutiang rilru put hmang chu Aigupta mite tân chuan thil thar a ni lo. Tûn laiah hian, “Ei la, in la, hlim takin awm rawh,” tih thu chu an vawrh lâr hle a. Nunna hi thihnaah a tâwp a nih chuan, engah nge i hlim theih laia i hlim loh vang? Engah nge thil dik tih hrâm hrâm kan tum ang? Thihna hi tâwp hlenna ni sela chuan, tûn hun atân chauhva nun hi a finthlâk hle dâwn a ni. Tirhkoh Paula pawhin chutiang deuh bawk chuan a sawi a. A dam laia thawhlehna ring lotute rilru put hmang chu heti hian a sawi a ni: “Mitthi kaihthawha an awm dâwn loh chuan i eiin i in ang u hmiang, naktûkah kan thi dâwn alâwm,” tiin.—1 Korinth 15:32.

Mahse, Paula ngei chuan mitthite theihnghilh kumkhua an nih chu a ring lo. Mitthite chu thih leh tawh ngai loh beiseina neiin an nung leh thei tih a ring tlat a ni. Chu a rin tlatna chu thilthleng pawimawh tak, a thleng ngei tih hnial rual loh Krista Isua thawhlehnaah * a innghat a ni. Chu thawhlehna chu a nihna takah chuan zirtîr hmasate rinna tichaktu vawi khata thilthleng ropui ber a ni.

Mahse, Isua thawhlehna chuan kan tân eng awmzia nge a neih? A tho leh tak zet tih engtin nge kan hriat? Korinth khuaa awm Kristiante hnêna a lehkha thawnah hêngte chungchânga Paula chhût dân chu i lo en ang u.

Hmân lai Korinth khuaa Kristian ṭhenkhat chu he mi chungchângah hian an buai a, a dangte chuan a taka thawhlehna a awm chu an ring lo  a ni. Chuta awm Kristiante hnêna a lehkha thawn hmasa zâwkah, tirhkoh chuan thawhlehna chu thilthleng dik tak a nih loh chuan, chu miin a nghawng tûrte chu a ziak chhuak a ni: “Mitthi thawhlehna rêng rêng a awm si loh chuan Krista pawh kha kaihthawhin a awm lo vang; tin, Krista kha kaihthawhin a awm loh chuan kan thu hrilh hi engmah lo a ni ang a, in rin pawh engmah lo a ni bawk ang. . . . Pathian lam thu-ah hriatpuitu dawthei kan lo ni bawk ang. . . . In rin chu engmah lo a ni ang a, in sualnaah chuan in la awm fo a ni ang. Chuti a nih chuan Kristaa muhîl tawhte kha an boral ta a ni ang.”—1 Korinth 15:13-18.

“Chu mi hnuah chuan unau zanga aia tam hnênah a inlâr leh a, . . . chu mi hnuah chuan Jakoba hnênah a inlâr leh a; chu mi hnuah chuan tirhkoh zawng zawngte hnênah; tin, a tâwp berah chuan . . . keima hnênah pawh a inlâr a.”​—1 Korinth 15:6-8

Paula chuan a thusawi chu hnial buai theih loh tûr thu hmangin a ṭan a ni: Mitthite kaihthawh tûr an nih loh chuan, thi ta Krista ngei pawh kaihthawh leh a ni lo vang, tiin. Krista chu kaihthawh ni lo ta se, chu chuan eng nge a rah chhuah dâwn? Chutiang a nih chuan, chanchin ṭha hrilhna chu dâwt hlâwm lian tak bâk a ni lo vang. Tihah chuan, Krista thawhlehna chu Kristian thurin bul ber a ni a, Bible zirtîrna bul berte zînga mi, Pathian lalchungnunna te, a hming te, a Lalram te, leh kan chhandamna te nên thliar hran theih miah lohvin a inzawm tlat si a. Thawhlehna hi thleng lo sela chuan Paula leh tirhkoh dangte thu hrilh chu engmah lo mai a ni ang.

Sawhkhâwk dangte pawh a la awm a. Krista chu thihna ata kaihthawh a nih loh chuan, Kristian rinna chu a thlâwn mai, dâwta innghat a ni ang. Chu bâkah, Paula leh mi dangte chuan Isua thawhlehna thu dik lo an sawi mai ni lovin, Isua kaithotu nia an sawi, Pathian Jehova chungchângah pawh dâwt an sawi a ni ang. Chu tah, ‘Krista chu kan sualte avângin a thi,’ tih pawh chu thu dik lo a ni ang—Chhandamtu mah thihna ata chhandam a nih loh chuan, mi dangte chu a chhandam thei lo vang. (1 Korinth 15:3) Chu mi awmzia chu, Kristian thi tate—a ṭhen martyr anga thi tate—chu kaihthawh nih beiseina dik lo nei chungin an boral thlâwn thihna a ni ang.

Paula chuan heti hian thu tâwp a siam a ni: “Tûn dam chhûng chauhva Krista chunga beiseina kan neih chuan mi zawng zawnga khawngaihthlâk ber kan lo ni ang,” tiin. (1 Korinth 15:19) Kristian dangte ang bawkin Paula chuan thawhlehna leh chu miin a tihhlawhtlin tûrte a rin avângin, a thil neihte a chân a, tihduhdahnate a tuar bawk a; tin, thihna hial pawh a tâwk bawk a ni. Thawhlehna hi dâwt mai a nih chuan a va thlâwn dâwn tak êm!

Paula chuan Kristiante thurin chu dâwta innghat niin a hre lo. Ani chuan Isua chu thihna ata kaihthawh a ni tih a hria a, Korinth mite tân a finfiahna chu heti hian a sawi a ni, “Krista chu Pahtian Lehkha thu ang zêla kan sualte avânga a thih a, an phûm a, Pathian Lehkha Thu ang zêla ni thum nia kaihthawha a awm a, Kiphaa hnêna a lo inlâr te kha; chu mi hnuah chuan sâwm leh pahnihte * hnênah a inlâr leh a, chu mi hnuah chuan unau zanga aia tam hnênah a inlâr leh a, chu mi zînga mi tam zâwk chu tûn thlengin an la dam cheu va, ṭhenkhat erawh chu an muhîl ta a; chu mi hnuah chuan Jakoba hnênah a inlâr leh a; chu mi hnuah chuan tirhkoh zawng zawngte hnênah; tin a tâwp berah chuan . . . keima hnênah pawh a inlâr a.”—1 Korinth 15:3-8.

Paula chuan kan sualte tâna Krista thih thu, phûm a nih thu, leh kaihthawhleh a nih thu inring tâwk taka sawiin a ṭan a. Engin nge Paula chu rinnghehtîr? Pakhatah chuan mit ngeia hmutute thusawi hi a ni. Tholeh Isua chu (Paula pawh tiamin) mite hnênah a inlâr a, mi tlêm tê awmho aṭangin, mi 500 chuang punkhâwmnaah a inlan a, an zînga tam tak chu Isua a tho leh tawh tih ringhleltute an nih ngei a rinawm! (Luka 24:1-11) Paula hun lai chuan chûng mita hmutu tam takte chu an la dam a, mite tân zawhfiah theihin an awm a ni. (1 Korinth 15:6) Hretu pahnih khat vêl thusawi chu pawm loh awlsam tak pawh ni se, mit ngeia hmutu 500 chuangte thusawi chu hnial rual a ni lo.

Tin, Paula chuan Isua thihna, phûm a nihna, leh a thawhlehna te chu “Pathian Lehkha Thu ang zêla” thleng a nih thu ṭum hnih lai a sawi tih chhinchhiah rawh. Chûng thilte chuan Hebrai Pathian Lehkha Thu-a Messia chungchâng hrilh lâwknate a thleng dik tih a nemnghet a, chutiang chuan Isua chu Messia a ni tih a finfiah a ni.

Mita hmutute bâkah, Pathian Lehkha Thu-in a sawi chung pawhin, Isua a tho leh a ni tih ringhlel  an la awm a, an awm mêk bawk a ni. Ṭhenkhat chuan Isua ruang chu zirtîrte’n an ru chhuak a, tichuan thawhlehna hretu angah an insawi a ni, an ti. Mahse, zirtîrte chuan Isua ruang ru chhuak thei tûrin thlân vêngtu Rom sipaite hneh theihna emaw, thunun theihna emaw an nei lo. Mi dangte chuan thawhleh hnua inlârnate hi mitthla mai a ni an ti bawk. Chu ngaih dân kalhtu chu, mi tam tak hnênah hun inang lo tak takahte a inlanna hi a ni. Tin, tho leh Isua’n Galili dîl kama a tih angin, mitthlaa mi chuan sangha hemin, a pe thei tûr anga ngaih chu a inâwm em? (Johana 21:9-14) Mitthlaa mi chuan a hmutute chu amah dek tûrin a sâwm ang em?—Luka 24:36-39.

Chuti chung pawhin, thawhlehna hi zirtîrte tihchhuah inbumna lian tak nia ring an la awm cheu va. Mahse, chutianga tihna chuan eng hlâwkna nge a neih tehrêng ang? Thawhlehna chungchânga an thu hrilhna chuan zirtîrte chu nuihzat te, hrehawm tawrhna te, leh thihna hial pawh a thlen a. Engvângin nge dâwt thu atân chutiang taka an nun an thâp ang? Chu bâkah, Isua thawhlehna thu chu anmahni dodâltute mit hmuhah, thiam loh chantîr theihna remchâng châng rengtute awmna Jerusalem khuaah an puang ṭan bawk a ni.

Thawhlehna chu tihduhdahna râpthlâk ber berte tâwk reng chunga an Lalpa chanchin sawi chhuak tûra zirtîrte hnêna chakna petu ber a ni. Thawhlehna chu Kristian rinna pêng pawimawh tak a lo ni a. Kristian hmasate chuan an nun chu zirtîrtu fing tak, a hnua tihhlum tâk chanchin hrilh nân an thâp mai mai lo. An nun chu Isua thawhleh thu puan chhuah nân an thâp zâwk a, chu chuan Isua chu Krista, Pathian Fapa, anmahni hruaitu leh ṭanpuitu thiltithei tak leh mi nung a nihzia a finfiah vâng a ni. Isua thawhlehna chu anni pawh thihna ata an tho leh dâwn tihna a ni a. Dik takin, Isua chu tholeh lo ta se chuan, Kristianna hi a awm lo vang a. Keini pawhin a chanchin hi ka hre miah lo pawh a ni thei a ni.

Mahse, Krista thawhlehna chuan tûn laiah kan tân eng awmzia nge a neih? (w13-E 03/01)