Bible hi Pathian Thu a ni a. Hmangaihna ngah tak pa ber hnên aṭanga lehkha thawn ang a ni. (2 Timothea 3:16) Pathian chuan amah kan tih lâwm theih dân te, sual awm a phal chhan te, leh mihringte tâna thil a la tih tûr te chu Bible-ah a sawi a. Mahse, sakhaw zirtîrtute chuan Bible zirtîrna chu an la kawi a; chuvângin mi tam tak chuan Bible hi an hre thiam ngai dâwn lo niin an hria a ni.—Tirhkohte 20:29, 30.

Pathian Jehova chuan ama chungchânga thu dik kan hriat chu a duh a. Chuvângin, hriat thiam theih tûr lehkhabu pakhat min pe a ni.—1 Timothea 2:3, 4 chhiar rawh.

Pathian Jehova chuan Bible min pêk bâkah, chu mi hre thiam tûra ṭanpuitu tûr min pe bawk a. Min zirtîr tûrin Isua a rawn tîr a ni. (Luka 4:16-21) Isua chuan a thu ngaithlatute chu Bible hre thiam tûrin a ṭanpui a, Bible chângte chu a indawtin a hrilhfiah a ni.—Luka 24:27, 32, 45 chhiar rawh.

Isua chuan bul a lo ṭan tawh rawngbâwlna chhun zawm a nih theih nân Kristian kohhran a din a. (Matthaia 28:19, 20) Tûn laiah, Isua hnungzuitu dik takte chuan Bible-in Pathian chungchâng min zirtîr chu hre thiam tûrin mite an ṭanpui a ni. Bible hriat thiam i duh chuan, Jehova Thuhretute chuan lâwm takin an ṭanpui ang che.—Tirhkohte 8:30, 31 chhiar rawh. (w13-E 04/01)