1-3. Bible chhiarna leh a zirtîrnate nunpuina aṭangin eng hlâwknate kan neih theih?

“BIBLE hre thiam tûra min ṭanpui avângin tûk tin Jehova hnênah lâwmthu ka sawi ṭhîn.” He thu sawi chhuaktu Kristian unaunu upa tawh tak hian Bible hi vawi 40 lai a chhiar chhuak tawh a, a la chhiar chhun zawm zêl a ni. Unaunu ṭhalai pakhat chuan Bible chhiarnain Jehova chu a takzia hre tûra a ṭanpui thu a ziak a. Chumi avâng chuan a Pa vâna mi chu a hnaih lehzual a ni. Ani chuan, “Ka nunah hetiang khawp hian ka la hlim ngai lo rêng rêng!” tiin a sawi.

² Tirhkoh Petera chuan mi zawng zawngte chu Pathian Thu, “thlarau lam hnutê, engmah pawlh loh chu châk” tûrin a fuih a. (1 Pet. 2:2) Bible zirna hmanga chu châkna phuhrutute leh Bible zirtîrna nunpuitute chuan chhia leh ṭha hriatna thiang an nei a, nunah thiltum an nei bawk a ni. Anni chuan Pathian dik hmangaih a, a rawngbâwl vetu mi dangte nên inṭhianna nghet tak an nei a. Hêng zawng zawngte hi ‘Pathian dân chunga lâwm’ chhan tûr a tling a ni. (Rom 7:22) Mahse, hlâwkna tam lehzual a awm a. Chûng zînga ṭhenkhat chu eng nge ni?

³ Pathian Jehova leh a Fapa chanchin i zir tam poh leh anmahni leh mi dangte i hmangaihna chu a zual sauh vang. Pathian Lehkha Thu hriatna dik neihna chuan Pathianin he khawvêl tâwp ṭêp tawh aṭangin thuâwih mihringte a chhan chhuah thuai dân tûr hre thiam tûrin a ṭanpui che a ni. I rawngbâwlnaah mite hnêna chanchin ṭha hrilh tûr i nei a. Pathian Thu i chhiarna aṭanga i thil hriatte mi dangte hnêna i zirtîr hian Jehova’n mal a sâwm dâwn che a ni.

4. Bible ngun taka “ngaihtuah” chunga chhiar tih chu eng tihna nge ni?

⁴ Jehova chuan a chhiahhlawhte’n a Thu an chhiar  thuak thuak mai chu a duh lo va. Ani chuan hmân laia mi Josua hnênah: “He dân bu hian i kâ chu chhuahsan hlek suh se; . . . chhûn leh zân i ngaihtuah zâwk tûr a ni,” tiin a hrilh a ni. (Jos. 1:8; Sâm 1:2) Chu kaihhruaina awmzia chu ngun taka ngaihtuah nâna hun pe chunga chhiar tihna a ni. Ngun taka “ngaihtuah” chunga Bible i chhiar hian, chu chuan chutih hun laia i tâna ṭangkai zualte leh nangmah tichak theitu thute hre thei tûrin a ṭanpui ang che. Chutianga nangmah tichak thei ṭawngkauchhehte, a chângte, a nih loh leh chanchinte i hmuh hunah, a thu malte chu zâwi têa chhiar chhuak hialin muang chângin chhiar ang che. Chu Pathian Thu i chhiar chuan a mi mal takin i rilru a khawi tak zet thei a ni. Engvângin nge chu chu a pawimawh? Pathian zilhna thu hriat thiam tak zetna chuan nunpui tûrin nasa takin a chêttîr dâwn che avângin.

5-7. Ngun taka ngaihtuah chunga Pathian Lehkha Thu chhiarnain (a) nungchang thianghlimna vawng tûr te; (b) mi dangte chu dawhthei tak leh ngilnei taka cheibâwl tûr te; (c) hun harsa pawha Jehova rinchhan tûrtea a ṭanpui theih dân che chu târ lang rawh.

⁵ I hriat ṭhan loh Bible-a lehkhabute i chhiar hunah ngun taka ngaihtuah chu a ṭangkai hle a. Entîr nân, dinhmun chi thum hi han ngaihtuah teh. A hmasain, mahnia Bible chhiarna hun duan nei a, Hosea hrilh lâwkna chhiar mêktu Kristian unaupa pakhat han ngaihtuah teh. Ani chuan bung 4-na, châng 11 aṭanga châng 13-na chu ngun taka ngaihtuah chunga a chhiar hnuah a châwl lawk a ni. (Hosea 4:11-13 chhiar rawh.) Engvângin nge? School-ah nungchang bawlhhlawhna lama nêksâwrna a do reng avângin chûng Bible chângte chuan a rilru a la a ni. Chûng Bible chângte chu chhût ngunin: ‘Jehova chuan mite thil sual tih chu a fâla tih pawh ni se a hmu vek a. Chuvângin, amah tihlungnih loh chu ka duh lo,’ tiin a ngaihtuah a. Unaupa chuan Pathian hmaa nungchang thianghlim vawn chu a tum tlat a ni.

⁶ Dinhmun pahnihnaah chuan, Kristian unaunu pakhat chuan Joela hrilh lâwkna bu chu chhiarin, bung 2 châng 13-na chu a chhiar mêk a. (Joela 2:13 chhiar rawh.) Ngun taka chhût chunga chu Bible châng a han chhiar chuan, “khawngaih thei tak leh lainatnaa khat, thin nel leh ngilneihna ngah” Jehova a entawn dân tûr chu a ngaihtuah a. A pasal leh mi dangte a biak huna a chânga tihelna leh thinrimna ṭawngkam a hman ṭhinte chu paih bo a tum ta a ni.

⁷ A pathumnaah, a hna chân a, a nupui leh fate enkawl dân tûr lungkhamtu Kristian pa pakhat chu han mitthla teh. Nahuma 1:7-naah Jehova chuan “amaha an rinna nghattute chu a hria” a, “mangan nîa kulh nghet” angin anni chu a vênghim tih thu chu ngun taka ngaihtuah chungin a chhiar a. Chu chuan a hnêm a ni. Jehova ngaihsakna chu hre thiamin, a lungngai lutuk tawh lo a ni. Tichuan, châng 15-na chu ngun taka ngaihtuah chungin a chhiar leh a. (Nahuma 1:15 chhiar rawh.) Kan unaupa chuan hun harsaah pawh chanchin ṭha a hrilh chuan Jehova chu a kulh nghet anga a thlîrzia a târ lang a ni dâwn tih a hria a. Hna zawn zêl paha chawlhkâr chhûnga thu hrilhna ṭawiâwm tûra chêttîrin a awm ta a ni.

8. Bible chhiarna aṭanga i hmuh chhuah thlarau lam lunghlu chu tâwi têin sawi lang rawh.

⁸ A hlâwkna kan târ lan tâkte kha mi ṭhenkhatin hriat thiam harsa an tih mai theih Bible lehkhabute aṭangin a ni a. Zir châkna nêna Hosea te, Joela te, leh Nahuma bute i bih chian hian, chûng Bible bua a châng dangte pawh chu ngun taka ngaihtuah chunga chhiar chu i duh ngei ang. Chûng zâwlnei thuziakte chuan finna leh thlamuanna a pêk theihzia che chu han mitthla teh! Bible bu dangte chungchâng hi eng nge ni ve le? Pathian Thu chu lunghlu tam tak awmna lunghlu khur ang a ni a. Chu khurah chuan ṭha takin thawk rawh! A ni, lunghlu ang Pathian kaihhruaina leh thlamuanna hmuh tumin Bible bu pum chu chhiar ang che.

9. Engtin nge Pathian duhzâwng kan hriat thiamna chu kan tihpun theih?

⁹ Nî tina Bible chhiar chu a pawimawh hle laiin, i thil chhiarte hriat thiamna neih ngei pawh i duh bawk a. Chuvângin, Jehova inawpna pâwl tihchhuah thu leh hlate chu i thil chhiar laia mite, hmunte, leh thil thlengte chanchin zir chîk nân hmang ṭangkai rawh. A nih loh leh, Bible zirtîrna engemawin, i nun a nghawng dân tûr i hriat chian loh chuan kohhran upa emaw, Kristian puitling dang emaw chu i zâwt thei a ni. Kan hriat thiamna tihpun a pawimawhzia târ lan nân, chutianga tih tum tlattu kum zabi khatnaa Kristian pakhat—Appollova—entawn tûr siam chu i lo ngaihtuah ang u.

10, 11. (a) Chanchin ṭha rawngbâwltu thiam lehzual ni tûrin engtin nge Appollova chu ṭanpui a nih? (b) Appollova chanchin aṭangin eng nge kan zir theih? (“I Zirtîrna Chu Hriat Thiamna Thar Ber Nên A Inmil Em?” tih bâwm chu en rawh.)

¹⁰ Appollova chu Juda Kristian, “Pathian Lehkha Thute hre nasa êm êm” leh “rilrua ṭhahnemngai tak” a ni a. Tirhkohte bu chuan a chungchângah: “Isua chanchin chu ngun takin a hril a, a zirtîr ṭhîn a, Johana baptisma thu chauh a hre si a,” tiin a sawi a ni. Appollova chuan a hriat miah lohvin baptisma chungchânga hriat thiamna hlui chu a zirtîr a. Ephesi khuaa a zirtîrna an ngaihthlâk hnuah, Kristian nupa tuak khat Priskilli leh Akuila chuan “a hnênah Pathian kawng thu fel lehzualin an hrilhfiah” ta a ni. (Tirh. 18:24-26) Engtin nge chu chu Appollova chuan a hlâwkpui?

¹¹ Ephesi khuaa thu a hril hnu chuan, Appollova chu Akaia ramah a kal a. “A thlen chuanin Pathian khawngaihna avânga ringtute chu, nasa takin a pui a; vântlâng hriatin Judate chu nasa takin a tidang a, Pathian Lehkha Thu hmangin Isua kha Krista chu a ni tih a hriattîr ṭhîn a.” (Tirh. 18:27, 28) Tûnah chuan, Appollova chuan Kristian baptisma awmzia chu dik takin a hrilhfiah thei ta a ni. A hriat  thiamna pung chho hmang chuan mi tharte chu biakna dika hmasâwn tûrin “nasa takin a pui” a ni He thuziak aṭang hian eng nge kan zir theih? Appollova angin, Bible-a kan thil chhiarte hriat thiam chu kan tum tlat a ni. Mahse, kan Kristian unau tawn hriat ngah tuemaw chuan thiam lehzuala kan zirtîr theih dân chungchânga thurâwn min pêk hunah, chu ṭanpuina chu inngaitlâwm tak leh lâwm taka dawnsawn kan duh a. Chutianga kan tih chuan, kan rawngbâwlna thianghlim chuan hma a sâwn lehzual dâwn a ni.

12, 13. Pathian Lehkha Thu thiam taka hmannain Bible zirlai chu hmasâwn tûra a ṭanpui theih dân târ lang rawh.

¹² Keini pawh Priskilli te, Akuila te, leh Apollova te angin mi dangte tân malsâwmna kan ni thei a. Ngaihventu pakhat chu i fuihna pêkin thlarau lama hma a sâwnna tûr dâltu hneh tûra a ṭanpui hunah engtin nge i awm? A nih loh leh upa i nih angin, Kristian unau pakhat chuan harsatna a tawh laia Bible thurâwn i pêkin a ṭanpui avânga lâwm thu a hrilh hunah che engtin nge i awm? Mite nun tihmasâwn tûra ṭanpui nâna Pathian Thu hman chu lungawina leh hlimna hnâr a ni tak meuh mai. * Chumi i tih theih dân tûr chu lo chhinchhiah ang che.

¹³ Biakna dik leh dik lo chungchângah Elija hun laia Israel mi tam takte kha tuilairapin an awm a. Elija’n chûng mite a zilhhauna chuan Bible zirlai, thlarau lama hmasâwn lo leh thutlûkna siam hlei thei lote chu a ṭanpui thei a ni. (1 Lalte 18:21 chhiar rawh.) Dinhmun dang hi han ngaihtuah teh: Tuina lantîrtu mi pakhatin a ṭhiante emaw, a chhûngte emaw chhân lêtna a hlau a nih chuan, Isaia 51:12, 13-na thute chhûtpuina hmangin Jehova biak tlat a tumna chu i tihnghetsak thei a ni.—Chhiar rawh.

14. Mi dangte ṭanpui nâna i mamawh hunah Bible chângte chu hre chhuak tûrin engin nge ṭanpui thei che?

¹⁴ Bible-ah hian a chhiartute fuih theitu, siam ṭha theitu, a nih loh leh tichak theitu thu tam tak a chuang tih a chiang hle. Mahse, heti hian i inzâwt mai thei, ‘Engtin nge ka mamawh huna hman tûr Bible chângte chu ka hriat theih ang?’ tiin. Nî tinin Bible chhiar la, Pathian ngaihtuahnate chu chhût ngun rawh. Chutiang chuan i mamawh huna Jehova thlarau thianghlimin a hriat chhuahtîr theih tûr Pathian thusawite chu i lo khâwlkhâwm ang.—Mk. 13:11; Johana 14:26 chhiar rawh.

15. Engin nge Pathian Thu hre thiam lehzual tûrin ṭanpui ang che?

¹⁵ Theocratic mawhphurhnate i hlen theih nân Lal Solomona angin Jehova hnênah finna dîl ang che. (2 Chro. 1:7-10) Hmân lai zâwlneite angin, Jehova leh a duhzâwng hriatna dik nei tûrin Pathian Thuah ‘zawngin, ngun takin chhui’ ang che. (1 Pet. 1:10-12) Tirhkoh Paula chuan Timothea chu “rinna leh zirtîrna ṭha” nêna inchâwm tûrin a fuih a ni. (1 Tim. 4:6) Chutianga i tih chuan, mi dangte thlarau lama ṭanpui theihna dinhmun ṭha takah i awm ang a. Chutih rual chuan, i rinna ngei pawh a lo chak ang.

16. (a) Engtin nge Beroia khuaa mite chuan ‘ni tin Pathian Lehkhaa zawn ṭhinna’ chu an hlâwkpui? (b) Engvângin nge nî tina Bible chhiar chu tûn laia kan tân a pawimawh êm êm?

¹⁶ Makedonia ram Beroia khuaa Judate chuan “ni tin Pathian Lehkhaah an zawng ṭhîn a.” Paula’n chûng Judate hnêna chanchin ṭha a han hrilh chuan, a thusawi chu an lo hriat sa Pathian Lehkha Thu nên an khaikhin a ni. Eng nge a rah chhuah? Mi tam tak chuan thutak a zirtîr tih hriain, “an ring ta” a ni. (Tirh. 17:10-12) Hei hian nî tina Bible chhiarnain Jehova rinna a tinghet tih a târ lang a. Chutiang  rinna, “thil beiseite awm ngeia hriatna” chu Pathian khawvêl thara kan dam khawchhuah nân a pawimawh hle a ni.—Heb. 11:1.

17, 18. (a) Engtin nge rinna chak tak leh hmangaihna chuan Kristian thinlung chu a vênhim? (b) Engtin nge beiseina chuan hlauhawm laka min vênhim?

¹⁷ Chhan ṭha tak neiin, Paula chuan: “Keini zawng chhûna mi kan nih avâng hian rinna leh hmangaihna âwmphaw chu hain, chhandam beiseina chu lukhuma hmangin i ngaihven zâwk ang u,” tiin a ziak a. (1 Thes. 5:8) Sipai lung chu hmêlma lak aṭanga vênhim a ngai a. Chutiang bawkin, Kristian thinlung pawh sual thiltih theihna lak aṭangin vênhim a ngai a ni. Jehova chhiahhlawh chuan Pathian thutiama rinna chak tak a neih a, Amah leh mihringte hmangaihna a neih bawk chuan eng thil nge thleng? Chutiang mi chuan thlarau lam âwmphaw ṭha ber mai chu a ha a ni. Pathian duhsakna hlohtîr thei chi thil a tih chu a rinawm lo hle.

¹⁸ Paula pawhin “chhandam beiseina” lukhum pawh a sawi bawk a. Bible hun laia sipai chuan a lû a vênhim loh chuan, indonaah awlsam takin a nun a chân thei a. Mahse, lukhum ṭha tak nên chuan a lûa vuak a nih pawhin, na tuar lutuk lovin, a dam khawchhuak thei a ni. Jehova Thu zirna hmangin A chhandam theihnaah beiseina kan insiam a. Beiseina nghet tak chuan kalpêngte leh pân chhia anga min ei chhe thei an ‘thu sawi mai maite’ chu min dotîr thei a ni. (2 Tim. 2:16-19) Kan beiseina chuan Jehova duh loh zâwng nungchang min neihtîrtute chu hnâwl tûrin min tichak bawk a ni.

19, 20. Engvângin nge Pathian Thu chu kan ngaihhlut êm êm a, engtin nge kan ngaihhlutzia chu kan târ lan? (“Jehova Chuan Ka Mamawh Tak Min Pe” tih bâwm chu en rawh.)

¹⁹ Tâwpna kan hnaih telh telh hian Jehova Thu kan rinchhan lehzual a ngai a. Bible zilhna thute chuan thil chîn ṭha lote siam ṭha tûr leh thil sual tih kan duhnate thunun tûrin min ṭanpui ang. Bible fuihna leh thlamuanna nên Setana leh a khawvêlin a min tawhtîr fiahnate chu kan pal tlang thei ang a. Jehova’n a Thua min pêk kaihhruaina hmang chuan nunna kawngah chuan kan kal reng thei ang.

²⁰ Pathian duhzâwng chu ‘mi zawng zawng chhandama an awm’ a ni tih hre chhuak leh rawh. “Mi zawng zawng” zîngah chuan Jehova chhiahhlawhte pawh an tel a. Kan thu hrilhna leh zirtîrna hmanga kan ṭanpuite pawh an tel bawk a ni. Mahse, chhandam nih duh apiang chuan ‘thutak hriatna dik’ an neih a ngai a. (1 Tim. 2:4) Chuvângin, ni hnuhnûnga dam khawchhuak tûr chuan Bible kan chhiar a, thlarauva thâwk khum kaihhruainate kan nunpui a ngai a ni. Ni e, nî tina Bible kan chhiarna chuan Jehova Thu, thutak kan ngaihhlutzia chu a târ lang a ni.—Joh. 17:17. (w13-E 04/15)