‘Inthlahdah Suh’
“Thil ṭha tih i ning suh ang u.”—GAL. 6:9.
1, 2. Lei leh vân huap Jehova inawpna pâwl ngaihtuahna aṭangin engtin nge kan rinna a pun chhoh?
LEI leh vân huap inawpna pâwl lian takah kan awm tih ngaihtuah chu a ropui hle a. Ezekiela bung 1-na leh Daniela bung 7-naa chhinchhiah inlârna chuan Jehova’n thilte chu a vawr tâwp ropui tak thleng tûrin a thunun tih a târ lang a ni. Isua chuan chanchin ṭha hrilhna ngaihsak tûr te, chu hna thawktute thlarau lama enkawl tûr te, Jehova biakna dik chawisâng tûr tein Jehova inawpna pâwl lei lam pêngah chuan hma a hruai a ni. Chu chuan Jehova inawpna pâwl chungah rinna min va pe tak êm!—Mt. 24:45.
2 He inawpna pâwl ropui tak rual hian a mi mal takin kê kan pên ve em? Thutak atâna kan phûrna chu a pung zêl nge ni a, a kiam lam zâwk? Hêng zawhnate kan ngaihtuah hian, kan inthlahdah ṭan emaw, kan ṭhahnemngaihna ṭhenkhat kan hloh ṭan emaw tih kan hmu pawh a ni thei. Chu chu thilthleng thei a ni. Kum zabi khatnaah khân, tirhkoh Paula chuan a Kristian unaute chu Isua ṭhahnemngaih dân ngaihtuah tûrin a fuih a. Chu chuan ‘thlarau lama inthlahdah lo tûr leh hah lo tûrin’ a ṭanpui dâwn tih a sawi a ni. (Heb. 12:3) Chutiang bawkin, Jehova inawpna pâwl thil hlen chhuahte târ langtu thuziak hmasa bih chianna chuan kan phûrna leh chhelna vawng reng tûrin min ṭanpui tûr a ni.
3. Inthlahdah lo tûrin eng nge ngai a, he thuziakah hian eng nge kan ngaihtuah ang?
3 Mahse, inthlahdah lo tûr chuan thil tam zâwk tih a ngai tih Paula chuan a târ lang a. “Thil ṭha” kan tih a ngai tih a sawi. (Gal. 6:9) Chuvângin, keimahni lamah thil kan tih a ngai a. Nghet taka ding reng tûr leh Jehova inawpna pâwl ruala kê pên tûra min ṭanpui thei thiltih tûr chi nga chu i lo ngaihtuah ang u. Tichuan, mahni emaw, kan chhûngkua emawin ngaihsak lehzual a ngaihna lai a neih leh neih loh chungchângah thu tlûkna kan siam thei ang.
INFUIH TUR LEH PATHIAN BE TURA INKHAWMNA
4. Engvângin nge inkhâwm chu biakna dik pêng pawimawh tak a ni kan tih theih?
4 Inkhâwm chu Jehova chhiahhlawhte tân chuan thiltih pawimawh tak a ni reng a. Vâna thlarau thilsiamte chu hun ruatah tak Jehova hmaa kal tûra sâwm an ni. (1 Lal. 22:19; Job. 1:6; 2:1; Dan. 7:10) Hmân lai khân, Israel mite chu “an ngaihthlâk a, an zir” theihna tûrin an kalkhâwm ṭhîn tûr a ni a. (Deut. 31:10-12) Kum zabi khatnaa Judate chu Pathian Lehkha Thu chhiar tûrin inkhâwmna inah an kal ṭhîn bawk a ni. (Lk. 4:16; Tirh. 15:21) Chutiang inkhâwm ngaih pawimawhna chu Kristian kohhran din a nih hunah pawh chhawm chhoh zêl a ni a, kan biakna pêng pawimawh tak a la ni chho zêl a ni. Kristian dikte chu “hmangaih leh thil ṭha tiha inchawk tho tûrin inngaihtuah tawn” tûr an ni a. ‘[Jehova] ni chu lo hnai telh telha kan hriatin kan infuih tawn nasa lehzual sauh’ tûr a ni.—Heb. 10:24, 25.
5. Engtin nge kan inkhâwmnaah kan infuih tawn theih?
5 Inkhâwmnaa kan infuih tawn theihna kawng pawimawh tak pakhat chu chhânna pe a, tel vena hi a ni a. Zawhna chhut chhuahsa chhânna te, Bible châng nunpui dân tûr sawina te, Bible thu bulte zawm a finthlâkzia târ langtu thiltawn tawi sawina te, a nih loh leh kawng dangtein vântlâng hmaah rinna kan sawi chhuak thei a ni. (Sâm 22:22; 40:9) Kum eng zât pawh lo inkhâwm tawh mah ila, kan unau apui apangte’n thinlung taka chhânna an pêk ngaihthlâkna chu min tichaktu a ni reng tih i pawm ngei ang.
6. Engtin nge kan inkhâwmte chuan thlarau lama harhvâng tûra min ṭanpui?
6 Kan Pathianin inkhâwm ziah a ngaih pawimawhna chhan dang leh chu eng nge ni? Kan inkhâwmte leh inkhâwmpuite chuan huai taka thusawi tûr leh kan thu hrilhna biala dodâlna emaw, ngaihsak lohna emaw hmachhawn thei tûrin min ṭanpui a. (Tirh. 4:23, 31) Pathian Lehkha Thu sawihona chuan rinnaah min tichakin, min tinghet a ni. (Tirh. 15:32; Rom 1:11, 12) Pathian be tûra kan inkhâwmnaa kan dawn zirtîrna leh infuih tawnna chuan hlimna dik tak hmu tûrin min ṭanpui a, ‘mangan nîah min hahchawlhtîr’ a ni. (Sâm 94:12, 13) Governing Body-a Teaching Committee chuan khawvêl puma Jehova mite zirtîrna tûr thlarau lam hun duan zawng zawng buatsaihna chu a enkawl a. Kum tluana chawlhkâr tin inkhâwmnaa zirtîrna ṭha tak tak kan dawnte avângin kan va lâwm tak êm!
7, 8. (a) Kan kohhran inkhâwmte’n a tum ber chu eng nge ni? (b) Engtin nge inkhâwmte chuan thlarau lama a ṭanpui che?
7 Mahse, kan inkhâwmna aṭanga kan dawn hlâwknate aia pawimawh zâwk thil dang a awm a. Kan inkhâwmin a tum ber chu Jehova chibai bûk hi a ni. (Sâm 95:6 chhiar rawh.) Kan Pathian ropui tak kan fak thei chu chanvo hlu a va ni êm! (Kol. 3:16) Jehova chuan inkhâwmna leh inkhâwmpuinaa kan tel a, chhânnate pêkna hmanga kan biak ziah chu a phu a ni. (Thup. 4:10, 11) Chuti chu, ‘ṭhenkhat tih dân anga kan inkhâwmte bânsan lo’ tûra fuih kan ni pawh hi a mak lo ve!—Heb. 10:25.
8 Kan Kristian inkhâwmte hi Jehova’n he khawvêl suaksual a tihboral thlenga chhel taka tuar thei tûra min ṭanpuitu a ni tih kan hria em? Kan hria a nih chuan, inkhâwmte chu “thil pawimawh zâwkte” zîngah kan dahin, kan nun buai tak kârah pawh hian hun kan insiam dâwn a ni. (Phil. 1:10, NW) Jehova be tûra kan unaute nêna kan inhmuhkhâwmna chu loh theih loh thil a nih loh chuan kan pelh tûr a ni lo.
MI RILRU ṬHATE ZAWNG RAWH
9. Engtin nge thu hrilh rawngbâwlna a pawimawh tih kan hriat?
9 Thu hrilh rawngbâwlnaa ṭhahnemngai taka kan telna hian Jehova inawpna pâwl ruala kê pên zêl tûrin min ṭanpui bawk a. Isua chuan leia a awm lai khân he hna hi a bul a lo ṭan a ni. (Mt. 28:19, 20) Chuta ṭang chuan Lalram thu hrilh leh zirtîr siam hi Jehova inawpna pâwl thil ngaih pawimawh ber a ni ta reng a. Tûn laia thiltawn tam tak chuan kan hnaah hian vântirhkohte’n min ṭanpui a, “chatuana nun duhna rilru dik tak” neite hnênah min hruai ṭhîn tih a târ lang. (Tirh. 13:48, NW; Thup. 14:6, 7) Jehova inawpna pâwl lei lam pêng thiltum ber chu thu hrilh rawngbâwlna ruahman leh ṭanpui a ni. Thu hrilh rawngbâwlna chu kan nuna thil pawimawh ber a ni ve em?
10. (a) Thutaka kan phur reng theih dân târ lang rawh. (b) Engtin nge rawngbâwlna chuan inthlahdah lo tûra a ṭanpui che?
10 Thu hrilh rawngbâwlnaa ṭhahnemngaihna chuan thutaka phûr reng tûrin min ṭanpui a. Kum rei tak upa ni a, regular pioneer thawk bawk Mitchel-a thusawi hi ngaihtuah teh. Ani chuan: “Mite hnêna thutak hrilh chu nuam ka ti hle a. Vênnainsâng emaw, Awake! emawa thuziak thar chu ka ngaihtuah a, thuziak tina awm finna te, hriat thiamna te, leh a inbûk tâwk ṭhatnate chu mak ka ti a ni. Rawngbâwlnaa chhuah a, mite’n an chhân lêt dân tûr leh an tuina ka chawh thawhsak theih dân tûr hmuh chu ka châk a. Ka rawngbâwlna chuan ngelnghehna min pe a ni. Thil dangte chu thu hrilh rawngbâwl hma, a nih loh leh a hnua tih ka tum tlat ṭhîn,” tiin a sawi. Chutiang bawkin, rawngbâwlna thianghlima kan buai rengna chuan hêng ni hnuhnûngah hian ding nghet reng tûrin min ṭanpui thei a ni.—1 Korinth 15:58 chhiar rawh.
THLARAU LAM CHAW CHU EI RAWH
11. Engvângin nge Pathian Jehova hnên aṭanga thlarau lam chaw kan dawnte chu a ṭangkai thei ang bera kan hman ang?
11 Pathian Jehova chuan chakna min pe tûrin thlarau lam chaw thuziak tam tak min pe a. Thu leh hla chhuah i chhiar hnua, ‘Hei hi ka mamawh tak chu a ni! Ka tân liau liauva Jehova’n a ziahtîr ang mai a nih hi!’ tia i ngaihtuah lai i hre thei ngei ang. Chu chu intawng fuh ve mai a ni lo. Hêng thlarau lam chawte hmang hian Jehova chuan min zirtîrin, min kaihruai a ni. Ani chuan heti hian a sawi: ‘Fing taka awmtîr chein i kalna tûr kawng chu ka entîr ang che,’ tiin. (Sâm 32:8) Thlarau lam chaw kan dawn zawng zawngte chu eiin, chûngte chhût ngun chu kan tum tlat em? Chutianga tihna chuan he tâwpna hun harsa takah hian rah chhuah chhun zawm zêl tûr leh thlarau lama chau lo tûrin min ṭanpui dâwn a ni.—Sâm 1:1-3; 35:28; 119:97 chhiar rawh.
12. Engin nge thlarau lam chaw kan dawnte ngainêp lo tûra min ṭanpui thei?
12 Thlarau lam chaw a hun taka kan dawn theih nâna thil tih ngaite ngaihtuah chu kan tân a ṭha a ni. Governing Body-a Writing Committee chuan kan thu leh hla chhut chhuah tûr leh kan Web site-a pho lan tûrte zir chianna te, ziak chhuahna te, ngun taka chhiar chhuaka tihdikna te, milem hman tûr thlan te, leh ṭawng chi hrang hranga lehlinna te chu a enkawl a. Kan thu leh hla chhuahte chhu chhuaktu branch-te chuan an thil chhut chhuahte chu kohhran hla leh hnaiah an thawn chhuak a ni. Engvângin nge hêng hna zawng zawng hi thawh a nih? Jehova mite chu thlarau lama ṭha taka châwm an nih theih nân a ni. (Is. 65:13) Pathian Jehova inawpna pâwl hmanga kan dawn thlarau lam chaw zawng zawng chu taima takin i ei ang u.—Sâm 119:27.
INAWPNA PAWL RUAHMANNATE CHU THLAWP RAWH
13, 14. Vânah tute’n nge Jehova ruahmanna chu thlâwp a, engtin nge leiah hian chutiang bawka kan thlâwpzia kan lantîr theih?
13 Tirhkoh Johana hnêna pêk inlârnaah, Jehova laka helte hneh tûra sakawr vâr chunga chuang angin Isua chu hmuh a ni a. (Thup. 19:11-15) Isua bulah chuan hriak thih, lei aṭanga hnehna changa vâna an lâwmman dawng tawhte an awm tih leh a hnungah vântirhkoh rinawmte an awm tih hriatna chuan rinna a va tichak tak êm! (Thup. 2:26, 27) Jehova ruahmanna thlâwpna kawnga entawn tûr ṭha ber an va ni tak êm!
14 Chutiang bawkin mipui tam tak chuan leia la awm Krista unau hriak thihte hna leh tûn laia inawpna pâwla hmahruaitute chu engkimah an thlâwp a ni. (Zakaria 8:23 chhiar rawh.) Engtin nge mi mal takin Jehova ruahmannate kan thlâwpzia kan târ lan theih? Kan târ lan theih dân kawng khat chu hmahruaitute laka intukluh hi a ni. (Heb. 13:7, 17) Chu chu kan awmna kohhran ngei aṭangin a inṭan a. Kohhran upate chungchâng kan sawite chuan anmahni leh enkawltu an nihna kan zahzia a lantîr em? Chûng mipa rinawmte chu zah tûr leh an hnêna Bible thurâwn la tûrin kan fate chu kan fuih em? Chu bâkah, thawhlâwm thawhna hmanga khawvêl pum huap rawngbâwlna kan ṭanpui theih dân chu chhûngkua angin kan sawiho ṭhîn em? (Thuf. 3:9; 1 Kor. 16:2; 2 Kor. 8:12) Kingdom Hall ṭha taka enkawlna hnaa tel ve theihna chanvo chu kan ngai pawimawh em? Chutiang inzahna leh inpumkhatna a awmna hmunah chuan Jehova thlarau chuan ṭha takin hna a thawk a. Chu thlarau hmang chuan, hêng ni hnuhnûngah hian inthlahdah lo tûrin ṭanpuina kan dawn chhunzawm zêl a ni.—Is. 40:29-31.
KAN THUCHAH KEN NENA INMILIN NUNG RAWH
15. Engvângin nge Jehova thiltum ropui tak mila nung tûrin kan beih zêl ang?
15 A tâwp ber atân, chhel taka tuar chhuak tûr leh Jehova inawpna pâwl ruala kê pên zêl tûr chuan kan mi mal nunah “Lalpa lâwm zâwng engnge ni tih fiahin,” kan thuchah ken nêna inmila kan nun a ngai a ni. (Eph. 5:8-11) Kan ṭhat famkim lohna avâng leh Setana leh he khawvêl suaksual beihna avângin, kan nunah hian thununna ṭha lote chu kan do reng a ngai a. Kan unau duh tak, in zînga ṭhenkhat chuan Jehova nêna in inlaichînna vawng tûrin nî tin hian nasa taka inbeih a ngai ṭhîn a ni. Chu chuan Pathian tân mi duhawm tak a nihtîr che u a ni. Chuvângin, tlâwm mai suh ang che u! Jehova thiltum nêna inmila nunna chuan lungawina nasa tak min peiin, kan Pathian biakna chu a thlâwn lo tih a tichiang ang.—1 Kor. 9:24-27.
16, 17. (a) Sual pawi tak kan tih chuan eng nge kan tih ang? (b) Anne-i chungchâng chu engtin nge kan hlâwkpui theih ang?
16 Amaherawhchu, sual pawi tak kan tih chuan eng nge kan tih ang? A rang thei ang berin ṭanpuina zawng rawh. Chu mi chungchâng zêpna chuan dinhmun a ti ṭha lo zual sauh mai mai dâwn a ni. Davida’n a sual a zêp khân, ‘nilênga a rûm ṭhinna lamah a ruhte a chang zo vek’ tih a sawi kha hre reng ang che u. (Sâm 32:3) Ni e, thil sual tih zêpna chuan rilru lam leh thlarau lamah min tichau ang a, inthlahdahna a thlen ang; mahse, “zêp lova inpuanga hawisantute chuan zahngaihna an hmu ang.”—Thuf. 28:13.
17 Anne-i * chungchâng hi han ngaihtuah teh. A han nulat chhoh chuan regular pioneer a thawk a. Mahse, nun chi hnihin a nung ṭan ta a. Chu chuan amahah nghawng nasa tak a nei a. Ani chuan: “Chhia leh ṭha hriatna chuan min thiam lo va. Englai mai pawh hian ka hlim lova, ka lunghnual reng mai a ni,” tiin a sawi. Eng nge a tih tâk? Anne-i chuan ni khat chu inkhâwmnaah, Jakoba 5:14, 15-na sawiho a nih thu a sawi a. Ṭanpuina a mamawh tih inhmu chhuakin, upate chu a pan ta a ni. Thil awm dân chu ngaihtuah lêtin, heti hian a sawi: “Chûng Bible chângte chu thlarau lam damna tûra Jehova ziak damdawi chawhna lehkha a ni a. Chu damdawi chu lem har hle mah se; ka dampui a ni. Chûng Bible chânga thurâwnte chu ka zâwm a, chu chuan min siam ṭha a ni,” tiin. Kum engemaw zât a liam leh tawh a, Anne-i chuan chakna thar nên chhia leh ṭha hriatna thiang tak neiin Jehova rawng chu ṭhahnemngai takin a bâwl leh tawh a ni.
18. Eng nge tih kan tum tlat ang?
18 Hêng ni hnuhnûnga nung a, Jehova inawpna pâwl ropui taka kan awm hi chanvo hlu a va ni êm! Kan thil neih chu ngaihnêp ngai loh i tum tlat ang u. Chu ai mah chuan, chhûngkua anga tualchhûng kohhrana Pathian be tûra inkhâwmho ziah tûrte, kan thu hrilhna bial chhûnga mi rilru ṭha pute taima taka zawng chhuak tûrte, thlarau lam chaw a hun apianga kan dawnte hlut tûrtein i thawkho vang u. Hmahruaitute chu thlâwpin, kan thuchah ken milin i nung bawk ang u. Chutianga kan tih chuan, Jehova inawpna pâwl rualin kê kan pên mai ni lovin, thil ṭha tihna kawngah kan inthlahdah ngai lo vang! (w13-E 04/15)
^ par. 17 A hming tak a ni lo.
