ISUA chuan nun awmze nei tak chu a nei tak tak em? Ani chu mi rethei chhûngkuaa sei lian niin a lang a, a dam chhûng zawngin khawvêl thil a nei thlêm hle a. “Lu nghahna” tak ngial pawh a nei lo. (Luka 9:57, 58) Chu bâkah, huat leh sawi chhiat a hlawh a, a tâwpah a hmêlmate thahin a awm ta a ni.

‘Chutiang nun chu nun awmze nei niin ka ngai lo!’ tiin i ngaihtuah mai thei. Mahse, Isua nunah hian ngaihtuah zui tûr thil dang a awm a. Chûng zînga pali chu i lo bih chiang ang u.

“Mitîrtu duhzâwng tih leh, a hna thawh zawh tûr hi ka chaw a ni.”—Johana 4:34.

Isua chuan a thusawi leh a thiltih aṭangin, a Pa vâna mi Jehova * duhzâwng tihfamkim a tum tlat a. Ani chuan Pathian duhzâwng tihnaah hlimna nasa tak a hmu a ni. Bible châng kan lâk chhuah tâk ang khian, Pathian duhzâwng tih chu Isua’n chaw nên a khaikhin a. Eng dinhmun hnuaiah nge chutianga a khaikhin tih i lo ngaihtuah ang u.

Isua chuan hêng thute hi chhûn chawfâk hun vêla a sawi a ni a. (Johana 4:6) Samari tlang ram pal tlangin kein tûk pumin a kal tawh a, chuvângin a ril a ṭam tawh hle a ni. A zirtîrte chuan “Zirtîrtu ei rawh,” an ti chiam a. (Johana 4:31) A chhân dân aṭangin Isua chuan Pathian hnathawh chu inchâwmna leh chaknaah a ngai tak zet tih a târ lang a ni. Chu chu nun awmze nei tak neitu ṭawngkam a ang a ni lâwm ni?

“Pa ka hmangaih.”—Johana 14:31.

Isua chuan a Pa vâna mi nên inlaichinna hnai leh ṭha tak a nei a. Pathian a hmangaihna thûk tak chuan a Pa chanchin—A hming te, a thiltum te, leh a mizia te—hriattîr tûrin a chêttîr a ni. A thusawi te, a thiltih te, leh a rilru put hmangte chuan a Pa mizia dik tak chu a târ lang a—Isuaah a Pa kan hmu hial a ni. Chuvângin, Philipa’n Isua hnêna: “Pa chu keini min hmuhtîr ta che,” tia a zawh khân, Isua chuan: “Tupawh mi hmu chu Pa hmu a ni,” tiin a chhâng a ni.—Johana 14:8, 9.

Isua chuan a Pa a hmangaih êm avângin a thih thlengin a thu a âwih a. (Philippi 2:7, 8; 1 Johana 5:3) Chutiang Pathian hmangaihna nasa tak chuan Isua nun chu awmzia a neihtîr a ni.

“Mihringin a ṭhian aia a nun a paih aliama hmangaihna nasa zâwk tuman an nei lo.” —Johana 15:13.

Mihring ṭha famkim lo kan nih angin kan hma lam hun a thim hle a. Bible chuan: “Mi pakhat [Adama] avângin sual khawvêlah a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a,” tiin a sawi a ni. (Rom 5:12) Sual sawhkhawk thihna lak ata inchhan chhuak thei kan awm lo.—Rom 6:23.

Pathian Jehova chuan mihringte dinhmun siam ṭhatna tûr min pe chu a lâwmawm hle. Ani chuan, mihringte thihna leh sual bawih ata chhan chhuah nâna an mamawh tlanna a pêk theih nân Isua tia kan hriat tâk, a Fapa sualna nei lo leh ṭha famkim chu hrehawm tuara a thih a remti a ni. Isua chuan a Pa leh mihringte a hmangaihna avângin, kan tâna a nun ṭha famkim pêk chu in huam takin a pawm ta a. (Rom 5:6-8) Chutiang mahni hmasial lo hmangaihna chuan nun awmze nei tak a neihtîr a ni. *

“Hei hi ka Fapa duh tak, ka lawm êm êma chu a ni.”—Matthaia 3:17.

Isua baptisma chan lai khân vân aṭangin Pathian Jehova chuan hêng thute hi a sawi a. Chutiang chuan Jehova chuan a Fapa Isua a hmangaihna leh a chunga a lâwmzia a sawi chhuak a ni. Isua’n: “Pain mi hmangaih a ni,” tia a sawi thei pawh hi a mak lo ve! (Johana 10:17) Isua chuan a Pa hmangaih leh lawm a hlawh tih a hriat avângin, dodâlna leh sawisêlna pawh huaisen takin a hma chhawn a. Inbûk tâwk tak leh rilru mangang lutuk lovin, thihna hial pawh a hma chhawn thei a ni. (Johana 10:18) Isua’n a Pa hmangaih leh lawm a hlawh tih a hriatna chuan nun awmze nei tak a neihtîr a ni tih hnial rual a ni lo.

Isua chuan nun awmze nei tak chu a nei chiang hle. Chuvângin, a hnên aṭangin nun awmze nei tak neih theih dân chu kan zir thei a ni. A dawta thuziakah chuan Isua’n a zirtîrte hnêna nun dân tûr chungchânga fuihna tlang tak a pêkte zînga ṭhenkhat chu sawiho a ni ang. (w13-E 04/01)