THUZIAK hmasaa kan hmuh angin, Isua chuan nun awmze nei tak a nei a. Chuvângin, nun awmze nei tak neih kan duh chuan amah kan entawnin, a thurâwn pêkte kan zâwm tûr a ni.

Chutiang taka ti tûrin, a chunga târ lan Bible chângah Pathian Jehova chuan min fuih a. Isua kal anga kal tûr chuan kan nun kawng zawng zawng chu a entawn tûr siam leh a zirtîrnate mila siam danglam a ngai a. Chutianga tihna chuan Pathian lawm hlawh tûr leh nun awmze nei tak nei tûrin min ṭanpui ang.

Isua zirtîrnaah chuan a kal anga kal tûra min ṭanpui thei thu bulte a tel a. Chûng zînga tam tak chu Tlâng Chunga Thusawi hmingthang takah kan hmu thei a ni. Chûng thu bul tlêm azâwng leh kan nunpui theih dân chu i lo ngaihtuah ang u.

HE THU BULIN NUN AWMZE NEI TAK MIN NEIHTIR DAN: Isua chuan mihringte hi thlarau lam mamawh neia siam an ni tih a târ lang a.

Hetiang zawhnate chhânna hi hriat kan duh ṭheuh a ni: Eng nge ka pian chhan? Engvângin nge he leiah hian hrehawm tawrhna a tam êm êm? Pathian hian min ngaihsak tak tak em? Thih hnu piah lam ram a awm em? Hêng zawhnate chhânna hriat hi nun awmze nei tak neih nân a pawimawh a ni. Isua chuan hêng zawhnate chhâng theitu rin tlâk tak awmchhun chu Pathian Thu a ni tih a hria a. A Pa hnêna a ṭawngṭainaah: “I thu chu thutak a ni,” tiin a sawi a ni. (Johana 17:17) A nih leh, Pathian Thu chuan kan thlarau lam mamawh phuhru tûrin min ṭanpui thei tak zet em?

THILTHLENG TAK TAK: Esa chu band lâr tak pakhata zaitu ber a nih angin, rock star hmingthang tak ni thei reng a ni a.

Chuti chung pawhin, Esa chuan thil engemaw kim lo awm niin a hre tlat a. Ani chuan: “Band-a awm chu nuam ti hle mah ila, nun awmze nei zâwk neih chu ka duh ngawih ngawih a ni,” tiin a sawi. Amaherawhchu, a hnuah chuan, Jehova Thuhretu zînga pakhat nên an inhmêlhriat ṭan a. Esa chuan: “Zawhna tam tak ka zâwt ta mial mial a. Bible aṭanga a chhânna mi hmin thei takte chu mak ka ti hle a, chuvângin Bible min zirpui chu ka remti ta a ni,” tiin a sawi a. A Bible zirna chuan a rilru a khawih hle a, Pathian Jehova hnêna a nun pumpêk tûr khawp hialin a chêttîr ta a ni. “Tûn hma chuan, buaina leh harsatna ka tâwk fo ṭhîn a. Tûnah chuan ka nun hian thiltum dik tak a nei ta,” tiin a sawi.

HE THU BULIN NUN AWMZE NEI TAK MIN NEIHTIR DAN: Khawngaihnaah chuan mi dangte chunga lainatna lantîr, an chunga ngilneihna leh ngaihtuahna lantîr a tel a.

Isua chuan retheite hnênah khawngaihna a lantîr a ni. A lainatna nasa tak avângin mi dangte harsatna sut kian sak tûrin hma a la ṭhîn. (Matthaia 14:14; 20:30-34) Khawngaihna lantîr kawnga Isua kan entawn chuan, kan nunin awmzia a nei lehzualin, mi dangte chunga khawngaihna lantîrtute chu an hlim a ni. (Tirhkohte 20:35) Kan ṭawngkam chhuak leh thiltih ngilnei takte hmangin khawngaihna kan lantîr thei a, chu chuan kan ṭanpuina mamawhtute chu a chhâwk zângkhai ngei ang. Khawngaihna lantîrna chuan kan ṭhatna a belhchhah tak zet em?

THILTHLENG TAK TAK: Maria-i leh a pasal Carlos-a chu mi khawngaih thei tak an ni a.

Maria-i Pa chuan a nupui a sûn a, tûn hnaiah khumbetin a na a ni. Maria-i leh Carlos-a chuan an inah hruaiin, a mamawh ang angin an enkawl a. Anni chuan mut kham loh châng an ngah hlein, a pa chuan zun thlum natna khirh tak a neih avânga hmanhmawh  taka damdawi in panpui châng pawh an nei a ni. A châng chuan an hah thei hle a. Mahse, Isua sawi ang ngeiin anni chu an hlim a ni, Maria-i pa mamawh ang zêlin an enkawl tih hriatna aṭangin lungâwina nasa tak an nei a ni.

HE THU BULIN NUN AWMZE NEI TAK MIN NEIHTIR DAN: Engtin nge remna siamtu nihna chuan nun awmze nei lehzual min neihtîr theih?

Pakhatah chuan, kan chhehvêla mite nêna kan inlaichînna a ṭha lehzual a ni. Bible thurâwn: “A theih phawt chuan nangmahni lam tal, mi zawng zawng nên inremin awm rawh u,” tih chu kan nunpui tûr a ni. (Rom 12:18) “Mi zawng zawng” tihah chuan chhûngkaw zînga mite leh mi dang kan rinpui ni lote pawh an tel a. “Mi zawng zawng” nêna inremna chuan nun awmze nei lehzual min neihtîr thei tak zet em?

THILTHLENG TAK TAK: Nair-i thiltawn hi han ngaihtuah teh.

Kum tam tak chhûng chu inrem a tum tlatna fiahtu nêkchêpna tam tak a hma chhawn a, a bîk takin a chhûngkuaah a ni. Kum 15 vêl kal taa, a pasalin a chhuahsan aṭang khân, amah chauhvin a fate chu a enkawl a. A fapa pakhat chuan ruihhlo a ngaih avângin thunun theih lohva a awm bâkah amah leh a fanu chu a vau ṭhîn a ni. Nair-i chuan Bible aṭanga a thil zirte’n chutiang dinhmun khirh tak hnuaia remna siamtu ni tûrin chakna a pe niin a hria a ni. Ani chuan inhnial buai loh chu a tum a. Mi dangte chunga khawngaihna leh lainatna neih tumin, hriatthiam a tum tlat a ni. (Ephesi 4:31, 32) Remna siamtu nih a tumna chuan a chhûngkaw zînga mite leh mi dangte nêna inlaichînna ṭha ber a neihtîr niin a hre tlat a ni.

Isua zirtîrna fing tak kan zui chuan nunah hlimna leh lungâwina kan nei ang. Amaherawhchu, nun awmze nei tak neih theih nân nakin hun tûr pawh kan hriat a ngai bawk a ni. Tihah chuan, nakin hun tûr kan thil hriat awmchhun chu kan la tar ang a, kan dam lo vang a, kan thi dâwn tih chauh ni sela, engtin nge nunin awmzia a neih theih tehrêng ang? Chuti chung pawhin, hêngte hi he khawvêla nun awm dân dik tak a ni.

Amaherawhchu, chanchin ṭha a awm tlat! Jehova chuan “Isua kal anga kal” tum zawng zawngte tân malsâwmna tam tak a dah khâwl a ni. Ani chuan, a thiltum ang ngeiin mi rinawmte hriselna ṭha famkima chatuana an nunna tûr, felna khawvêl thar a tiam chu a rawn thlentîr thuai ang. A Thu chuan: “‘Ngai teh, Pathian bâwktê chu mihring zîngah a lo awm ta, ani chu an hnênah a awm ang a, anni chu a mite an ni ang a, Pathian ngei chu an hnênah a awm ang a, an Pathian a ni bawk ang; an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,’ a tih ka hria,” a ti a ni.—Thu Puan 21:3, 4.

He thuziak inzawm hmasa bera târ lan tâk kum 84 mi Maria-i chu hêng thute a lo thlen hun hmuh a inbeiseina chuan a tihlim a. Nang, i hlimpui ve em? Pathian Ram a lo thlen huna kan neih tûr “nunna taktak” chungchâng hriat belh chu i duh ang em? (1 Timothea 6:19) I duh a nih chuan, in vênga Jehova Thuhretute hnênah i zâwt thei ang a, a nih loh leh he magazine chhuahtute hnênah lehkha i thawn thei ang. * (w13-E 04/01)