1, 2. Ni hnuhnûng chungchânga eng hrilh lâwknain nge Isua zirtîrte ngaihven hlawh a, engvângin nge?

PETERA, Jakoba, Johana leh Andria te chu a tâwpah chuan an Pu hovin a falin an awm thei ta hrâm a. Isua’n a hmaa biak in tihchhiat tûr thu a sawi chuan an rilru a tibuai hle a ni. (Mk. 13:1-4) Chuvângin, heti hian an zâwt a: “Chûng chu engtikah nge a lo awm ang? i lo kal lehna leh khawvêl tâwpna chhinchhiahna chu engnge ni ang? min hrilh rawh,” tiin. (Mt. 24:1-3) Isua chuan an hnênah nun thlâkthlengna nasa tak thlentu mai ni lo, Setana khawvêl suaksual tâwpna târ langtu ni bawk thilthlengte, a nih loh leh dinhmunte chu a hrilh ṭan ta a. Thilthleng tûr pakhat chuan Isua zirtîrte ngaihven a hlawh bîk ngei ang. Indona te, ṭâm te, sualna pung ang chi thil lungchhiatthlâk takte a sawi hnuah, Isua chuan ni hnuhnûng chhinchhiahna tûr thil ṭha engemaw tak a sawi lâwk bawk a ni: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tiin.—Mt. 24:7-14.

² Isua zirtîrte chuan Krista nên Ram chanchin ṭha an hril a. (Lk. 8:1; 9:1, 2) Anni chuan: “Buh seng tûr a tam hle a, nimahsela a thawktute an tlêm; chutichuan a buh seng tûra thawktu tûrte tîr tûrin buh Neitupa hnênah chuan ngên rawh u,” tia a sawi chu an hre chhuak ngei ang. (Lk. 10:2) Mahse, engtin nge “hnam zawng zawng hriattîrna tûrin khawvêl zawng zawngah” thu an hrilh theih ang? Hna thawktu tûrte chu khawi aṭangin nge an lo kal ang? Chumi nîa Isua bula an ṭhut lai chuan nakin hun tûr lo hre lâwk thei se la chuan aw! Matthaia 24:14-a kan chhiar thu tlêm tête thlen famkimna hmuh chu mak an ti hle ngei ang.

3. Engtin nge Luka 21:34 hi tûn laiah a thlen famkim a, engtin nge mahni kan inbih chian ang?

 ³ Isua hrilh lâwkna thlen famkimna hunah kan awm mêk a. Mi maktaduai telte chu lei pum puia Lalram chanchin ṭha hril tûrin an thawkho a ni. (Is. 60:22) Mahse, Isua chuan hêng ni hnuhnûngah hian mi ṭhenkhatte chuan an nuna chanchin ṭha hrilh hna dah hmasak ber chu harsa an ti ang tih a sawi a. Anni chu thil dangah pêngin, an “rilru a khat lutuk,” a nih loh leh a hah dâwn a ni. (Luka 21:34 chhiar rawh.) Chûng thute thlen famkimna pawh chu kan hmu bawk a. Pathian mite zînga ṭhenkhat chu thil danga lâk pênin an awm a ni. Chu chu hnathawh te, zirna sâng te, khawvêl thil neihte nêna inkûngkaiha an thutlûkna siamah leh inkhelhna leh intihhlimna atâna an hun sên zâtahte a lang a ni. Mi dangte chu nêksâwrna leh nî tina damchhûng khawsak ngaihtuahna avângin an chau va. Hetiang hian inzâwt rawh: ‘Eng nge ka dinhmun chu ni? Ka thu thlûkna siamte chuan nuna ka dah pawimawhte chungchângah eng nge a târ lan?’ tiin.

4. (a) Paula’n Philippi khuaa Kristiante tân eng nge a ṭawngṭaisak a, engvângin nge? (b) He thuziakah leh a dawta thuziakah eng nge kan ngaihtuah ang a, chu chuan eng thil tum nge a neih?

⁴ Kum zabi khatnaa Kristiante kha thlarau lam thilte dah pawimawh reng tûrin an thawhrim a ngai a. Tirhkoh Paula chuan Philippi khuaa mite’n ‘thil pawimawh zâwkte chu an fiah’ theih nân ṭawngṭaisak an ngai tih a hria a ni. (Phil. 1:9-11, NW) Tirhkoh Paula angin, chutih hun laia mi a tam zâwkte chu “hlau lovin Pathian thu hrilh kawngah an huai nasa lehzual a ni.” (Phil. 1:12-14) Chutiang bawkin, tûn laiah pawh kan zînga a tam zâwkte chuan Pathian Thu chu huaisen takin kan hril a. Chuti chung chuan, Jehova inawpna pâwlin tûn laia a thil hlen chhuahte ngaihtuahna chuan hna pawimawh ber thu hrilhna ngaihsak lehzual tûrin min ṭanpui thei ang em? Tehrêng mai! He thuziakah hian, Jehova’n Matthaia 24:14 thleng famkim tûra ruahmanna a siamte chu i lo ngaihtuah ang u. A inawpna pâwlin a ngaih pawimawh ber chu eng nge ni a, engtin nge chu mi hriat thiamna chuan keimahni leh kan chhûngte a chêttîr theih ang? A dawta thuziakah chuan, chhel taka tuar chhuak tûr leh Jehova inawpna pâwl ruala kê pên zêl tûra min ṭanpui thei thilte chu kan ngaihtuah ang.

5, 6. (a) Engvângin nge Jehova’n a inawpna pâwl vân lam pêng chu inlârnaah a hmuhtîr? (b)  Ezekiela’n inlârnaah eng nge a hmuh?

⁵ Pathian Jehova chuan a Thu-a telh loh thil tam tak a nei a. Entîr nân, thluak hna thawh dân emaw, lei leh vân inher kual dân emaw hriat chu thil phûrawm tak tûr ni mah se, Pathian chuan kimchang takin min hrilh lo! Chu ai mahin, Jehova chuan a thiltumte hre thiam tûr leh chu mi mila nung thei tûra kan mamawh hriattîrna chu min pe zâwk a ni. (2 Tim. 3:16, 17) Chutih laia, Jehova inawpna pâwl hmuh theih loh pêng chanchin hriat thiamna min pe pawh hi a va ngaihvenawm tak êm! Jehova vân lam ruahmanna chungchânga Isaia te, Ezekiela te, Daniela te ziak leh Johana ziak Thu Puan bua kan hmuhte chhiar chu kan phûr hle a. (Is. 6:1-4; Ezek. 1:4-14, 22-24; Dan. 7:9-14; Thup. 4:1-11) Chu chu Jehova’n puan zâr pawt chho va, vân lam thilte min entîr ang mai a ni. Engvângin nge chûng thute min hriattîr?

⁶ Jehova chuan lei leh vân huap inawpna pâwl zînga mi kan ni tih theihnghilh ngai lo tûrin min duh a. Jehova thiltumte thlâwpin thil kan hmuh theih mai aia tam a thleng mêk a ni. Entîr nân, Ezekiela chuan vân tawlailîrin a entîr Jehova inawpna pâwl hmuh theih loh pêng chu a hmu a. Chu tawlailîr chu a chak êm êm a, inher lovin a kawng a thlâk  nghâl zung zung thei bawk a ni. (Ezek. 1:15-21) Tawlailîr kete a vir apiangin, hmun hla tak tak a thleng thei a. Inlârnaah Ezekiela chuan chu tawlailîr Khalhtu chu a hmu thuak bawk a. Heti hian a sawi a ni: “Ṭhihna puak sur ang maiin ka hmu a, . . . mei ang mai niin ka hmu a. . . . Hei hi LALPA ropuina lan dân ang chu a ni,” tiin. (Ezek. 1:25-28) Ezekiela tân chuan chu inlârna hmuh chu a va mak ropui dâwn êm! Ani chuan Jehova’n a inawpna pâwl chu a thunun tlat tih leh a thlarau thianghlim hmangin kawng engkimah a kaihruai tih a hmu a ni. Jehova inawpna pâwl vân lam pêngin hma lam a pan zêl dân târ lanna ṭha a va ni êm!

7. Engtin nge Daniela hmuh inlârna chuan rin tlatna min pêk?

⁷ Daniela inlârna hmuh pawhin rin tlatna min pe a. Jehova chu meialh ang lalṭhutthlênga ṭhu “Hmâkhawsânga,” anga hmuhtîr a ni. Chu lalṭhutthlêng chuan tawlailîr ke a nei a ni. (Dan. 7:9) Jehova chuan a inawpna pâwl chu hma lam pan zêl ang leh a thiltumte tipuitling mêk anga Daniela’n a hmuh chu a duh a. Daniela chuan “mihring fapa ang,” Isua chu Jehova inawpna pawl lei lam pêng enkawl tûra Pathianin a ruat lai a hmu a ni. Krista rorêlna ṭha famkim chu hun rei lo tê atân mai a ni lo. Chu ai chuan, “a rorêlna chu rorêlna hlun, ral ngai lo tûr a ni a, a ram chu tihchhiat rual a ni lo vang.” (Dan. 7:13, 14) Jehova ring tlat tûr leh a thil hlenchhuahte hre tûra chêttîrin kan awm a. Ani chuan “rorêlna te, ropuina te, ram te” chu fiahna tuar chhuak tawh a Fapa, Isua hnênah a pe a ni. Jehova chuan a Fapa chu a ring a. Chuvângin, keini pawhin Isua hruaitu nihna chu kan ring ve thei a ni.

8. Jehova hnên aṭanga inlârna an hmuh chuan Ezekiela leh Isaia chungah eng nghawng nge a neih a, chu chuan engtin nge kan chungah nghawng a neih ang?

 ⁸ Engtin nge Jehova inawpna pâwl hmuh theih loh chungchâng hriatna chuan min nghawng ang? Ezekiela angin, Jehova thil hlen chhuahte chuan mak tihna leh inngaihtlâwmna min neihtîr ngei ang. (Ezek. 1:28) Jehova inawpna pâwl chungchâng chhût ngunna chuan Isaia ang bawkin thil ti tûrin min chêttîr thei a. Jehova thiltihte mi dangte hnêna hrilh theihna hun remchâng a neih chuan, hreh miah lovin a pawm nghâl a ni. (Isaia 6:5, 8, 9 chhiar rawh.) Isaia chuan Jehova ṭanpuina nên chuan harsatna eng pawh hlawhtling takin a hmachhawn thei tih a ring tlat a. Chutiang bawkin, Jehova inawpna pâwl hmuh theih loh pêng chanchin hriatna chuan mak tihna nei tûr leh thil ti tûrin min chêttîr tûr a ni. Hma lam pan reng a, Jehova thiltumte hlen chhuahna ngaihsak tlat chu inawpna pâwl ngaihtuahna chuan min va tiphûr tak êm!

9, 10. Engvângin nge Jehova inawpna pâwl hmuh theih pêng chu din a ngaih?

⁹ Jehova chuan a Fapa hmangin a inawpna pâwl hmuh theih loh pêng nêna thawk dûn tûr lei lam pêng a din a. Engvângin nge Matthaia 24:14-a târ lan hna chu hlen chhuak tûrin hmuh theih lei lam pêng din a ngaih? A chhan pathum lo ngaihtuah ta ila.

¹⁰ A pakhatnaah, Isua chuan he thu hrilhna hi a zirtîrte’n “kâwlkil thleng pawhin” an thawk dâwn tih a sawi a. (Tirh. 1:8) A pahnihnaah, thu hrilh rawngbâwlna thawktute hnêna thlarau lam chaw pe tûr leh an mamawh enkawl tûra ruahmanna neih a ngaih dâwn vâng a ni. (Joh. 21:15-17) A pathumnaah, chûng chanchin ṭha hriltute chu Jehova be tûr leh chanchin ṭha hrilh hna thawh dân tûr zirtîrna dawng tûra an kal khâwm theih nâna ruahmanna chu siam a ngaih vâng a ni. (Heb. 10:24, 25) Hêng thiltumte hi tihpalh thil thua tihpuitlin theih a ni lo. Krista hnung zuitute an hlawhtlin theihna tûrin chu hna chu ṭha taka ruahman a ngai a ni.

11. Engtin nge Jehova inawpna pâwl siam ruahmannate chu kan thlâwp tih kan târ lan?

¹¹ Engtin nge Jehova inawpna pâwl siam ruahmannate kan thlâwpzia kan târ lan? Kawng pawimawh tak pakhat chu Jehova leh Isua’n kan thu hrilh rawngbâwlnaa hmahruai tûra an ruatte chungah englai pawha rinna nghah hi a ni. Kan zînga hmahruaitute ngaihsakna la thei thiltih, thilthleng tam tak tûn lai khawvêlah hian a awm a. Chuti chung pawhin, Jehova inawpna pâwl hmuh theih pêng chuan eng nge a dah pawimawh tlat reng?

12, 13. Engtin nge Kristian upate’n an chanvo an hlen a, chu chu engvângin nge i tân thil phûrawm tak a nih?

¹² Khawvêl puma tawn hriat ngah Kristian upate chu an rawngbâwlna rama Lalram thu hrilh hna enkawl tûr leh tihmasâwn tûra ruat an ni a. Hêng unaupate hian thu thlûkna an siam hunah Pathian Thu aṭanga kawhhmuhna an zawng a, chu chu ‘an kê atân khawnvâr leh an kawng atan êng’ nihtîrin, tih tak zetin an ṭawngṭai a, Jehova kaihhruaina an zawng a ni.—Sâm 119:105; Mt. 7:7, 8.

¹³ Kum zabi khatnaa hma hruaitute ang bawkin, tûn laia thu hrilhna enkawltu Kristian upate chu ‘thua rawngbâwlnaah’ an inpumpêk a. (Tirh. 6:4) Tualchhûngah leh khawvêl pumpuia chanchin ṭha hrilhnain hma a sâwn hian an hlim hle a ni. (Tirh. 21:19, 20) Anni chuan dân leh dun tam tak an siam lo va. Chu ai mah chuan, thu hrilh hnain hma a sâwn zêl theih nâna a ṭûl ang ruahman an siam pahin, Pathian Lehkha Thu leh Pathian thlarau thianghlim kaihhruaina  an zui tlat zâwk a ni. (Tirhkohte 15:28 chhiar rawh.) Chutianga tiin, hêng mawhphurhna chang unaupate hian tualchhûng kohhrana mi zawng zawng tân entawn tûr ṭha an siam a ni.—Eph. 4:11-13.

14, 15. (a) Khawvêl pum huap thu hrilhna ṭanpui tûrin eng ruahmannate nge siam a nih? (b) Lalram thu hrilhna ṭanpuinaa chanvo i neih chu engtin nge i ngaih?

¹⁴ Mi tam takte’n kan hmuh loh hna hautakte zîngah chuan kan thu leh hla chhuah te, inkhâwm te, leh inkhâwmpuite atâna thlarau lam chaw buatsaih hi a tel a. Mi a tam thei ang berte’n anmahni ṭawng ngeia “Pathian thiltih ropuite” an zir theih nân mi sang têlte chuan hah pawh sawi lovin thlarau lam chaw chu ṭawng 600 vêlin an letling a ni. (Tirh. 2:7-11) Unau ṭhalaite chuan kan thu leh hlate chhut chhuahna leh a bua siamna hmunah khâwl changkâng takte hmangin hna an thawk a. Tichuan, thu leh hla chhuahte chu hmun kilkhâwr bera awm kohhranahte pawh tiamin khawvêl hmun tinah thawn darh leh a ni.

¹⁵ Tualchhûng kohhran nêna chanchin ṭha hrilhna kan ngaih pawimawh ber theih nân ruahmanna tam tak siam a ni a. Entîr nân, Kingdom Hall leh Assembly Hall saknaa ṭanpui tûr te, leilung chhiatna tuarte emaw, damdawi lama rang taka inenkawlna mamawhte emaw ṭanpui tûr te, inkhâwmpuina tûr ruahman tûr te, leh theocratic school-a zirtîr tûrtein mi sâng tam takte chu mahni duh thuin an inpe a, hêng hnate hi lang vak si lova thawh reng hnate zînga ṭhenkhat chauh a ni. Hêng zawng zawngin a tum chu eng nge ni? Chanchin ṭha kan hrilh theih nân, thlarau lama hma kan sâwn theih nân, leh mi dangte Jehova betu ni tûra ṭanpui nân a ni. Jehova inawpna pâwl lei lam pêng chuan thil pawimawhte chu a la dah hmasa reng em? A dah hmasa tih a chiang hle!

16. Nang leh i chhûngkaw tâna Bible zirnaa zir tûr ṭha tak chu eng nge ni?

¹⁶ Jehova inawpna pâwl hna thawh dân ngaihtuah lêt nân a khât tâwkin hun kan hmang ṭhîn em? Ṭhenkhatte chuan chhûngkuaa Pathian biakna an neih hun emaw, mahnia inzirna an neih hun emawa chûng thilte chungchâng zir chianna leh rilrua chhût ngunna an telh ṭhîn a ni. Isaia te, Ezekiela te, Daniela te, leh Johana te hnêna inlârna pêkte chu zir a phûrawm hle a. Jehovah’s Witnesses—Proclaimers of God’s Kingdom tih lehkhabu leh thu leh hla chhuah dangte emaw, in ṭawnga hmuh theih DVD emawte chuan inawpna pâwl hriatthiamna phûrawm tak a pe che a ni.

17, 18. (a) Engtin nge he thuziak hi i hlâwkpui? (b) Eng zawhnate nge kan sawiho vang?

¹⁷ Jehova’n a inawpna pâwl hmanga a hlen chhuahte chhût ngun chu kan tân a ṭha a ni. He inawpna pâwl ṭha tak rual hian, thil pawimawh zâwkte ngaihtuah tlat chu i tum ang u. Chutianga tihna chuan: “Chu mi avâng chuan khawngaihna kan hmuh ang zêla he rawngbâwlna hi kan neih avângin kan dawl lo va,” tia ziaktu Paula ang bawka tumruhna nei tûrin min thuam nghet ang. (2 Kor. 4:1) Ani chuan a hna thawhpuite chu: “Thil ṭha tih i ning suh ang u; kan inthlahdah loh zawngin a hun takah chuan kan seng dâwn si a,” tiin a fuih bawk a ni.—Gal. 6:9.

¹⁸ Kan nî tin hun hman dâna thil pawimawh zâwkte kan fiah theih nân a mi mal ang emaw, chhûngkua ang emawa insiam rem ngai a awm em? Thu hrilh rawngbâwlna pawimawh tak hi kan ngaihsak lehzual theih nân kan nun kan tisamkhai theiin, kan rilru la pêng thei thilte chu kan titlêm thei ang em? A dawta thuziakah chuan Jehova inawpna pâwl ruala kê pên tûra min ṭanpuitu tûr thil pangate chu kan ngaihtuah ang. (w13-E 04/15)