HE MAGAZINE kâwma zawhna i hmuh hian mak i ti em? Ṭhenkhat chuan mak an ti a, mahse, tûn laia mi tam tak chuan Pathian chu a nunrâwn leh râwn loh an ngaihtuah a—a nih loh leh a nunrâwng niin an ngai a ni. Engvângin nge?

Leilung chhiatnaa dam khawchhuak mi ṭhenkhat chuan: “Engvângin nge chûng thilte thlen chu Pathianin rem a tih? Min ngaihsak lo nge ni a, a nunrâwng zâwk?” tiin an zâwt a ni.

Mi dangte pawh Bible an chhiar hian chutiang bawk chuan an buai a. Nova leh tui lêt chungchânga thilthleng chanchin angte an chhiar hian, ‘Engvângin nge hmangaihna Pathian chuan mipui chuti zozaite chu a tihhlum? A nunrâwng em ni?’ tiin an ngaihtuah a ni.

Hetiang zawhnate hi inzawh châng i nei em? A nih loh leh, Pathian chu nunrâwng anga ngaite hnênah chhânna pêk ngaihna hre lovin i awm ngai em? A enga pawh chu ni se, min ṭanpui thei zawhna dang pakhat lo ngaihtuah ta ila.

A awlsam zâwnga sawi chuan, nunrâwnna kan huat chhan chu thil dik leh dik lo hriatna kan neih vâng a ni. He mi chungchângah hian ramsate nên kan inang lo hle. Min Siamtu chuan “ama anpuiin” min siam a ni. (Genesis 1:27) Chu chu eng tihna nge ni? Ani chuan a miziate leh nungchang tehna, thil dik leh dik lo hriat theihnate lantîr theihna min pe a ni. Hei hi han ngaihtuah teh: Pathian hnên aṭanga thil dik leh dik lo hriat theihna kan dawn avânga nunrâwnna kan huat chuan, Pathian pawhin a haw hle tih a chiang a ni lâwm ni?

Chutianga chhût chu a dik tih Bible chuan a nemnghet a, Pathianin Bible-ah: “Ka awm dânte hi in awm dânte aiin a sâng zâwk si a, ka ngaihtuahte pawh hi in ngaihtuahte aiin a sâng zâwk bawk a ni,” tiin a sawi. (Isaia 55:9) Pathian chu nunrâwng anga kan ruat a nih chuan, Bible thusawi kalhzâwng chiah, kan awm dânte hi a awm dân aia sâng zâwk niin kan sawi tihna a ni dâwn lâwm ni? Chuvângin, ngaih dân siam fel hmaa thu tam zâwk lâk khâwm chu a finthlâk hle ngei ang. Chuti chu, Pathian a nunrâwn leh râwn loh lam ni lovin, a thiltih ṭhenkhata nunrâwng anga a lan chhan chu kan zâwt zâwk tûr a ni. Min ṭanpui tûrin “nunrâwnna” tih awmzia dik tak chu i lo ngaihtuah ang u.

Mi tuemaw nunrâwng kan tih hian a rilru put hmang chungchângah thu tlûkna kan siam tihna a ni. Mi nunrâwng chu mi dangte hrehawm tawrhnaa hlimna neitu emaw, an mangannaa ngaihsak lotu emaw a ni a. Chuvângin, a fapa rilru tihnat tum avânga thununtu pa ber chu mi nunrâwng a ni a. Mahse, a fapa zirtîr nân leh vênhim nâna thununtu pa ber chu mi ṭha a ni thung. Tuemawin i chungchângah thu tlûkna dik lo a siam ngai tawh a nih chuan, mite rilru put hmang chu hriat sual awlsam tak a ni tih i hre chiang ngei ang.

Mi ṭhenkhatte’n Pathian chu nunrâwng anga an ngaih chhan pahnih—tûn laia thleng ṭhîn leilung chhiatnate leh Bible-a chuang Pathian rorêlna—chungchângte hi i lo ngaihtuah ang u. Chûng chuan Pathian hi nunrâwng angin a lantîr tak zet ang emaw chu? (w13-E 05/01)