1, 2. Nu leh pate leh fate inkârah eng ang rilru nge awm tlângpui a, eng harsatnate nge awm ṭhîn?

“I NU leh pate chu naktûkah an thi dâwn tih engtin emaw hre ta la, vawiinah eng nge hrilh i duh ber ang?” Chu zawhna chu United States rama naupang tam takte hnênah zawh a ni a. Anmahni tibuaitu harsatna leh inngeih lohnate lam ngaihtuah ai chuan, naupang zaa 95 vêlte chuan an nu leh pate chu: “Ka thiam lo a ni,” tih leh “Ka hmangaih lutuk che,” tih an hrilh tûr thu an sawi a ni.—For Parents Only, by Shaunti Feldhahn and Lisa Rice.

² A tlângpuiin, naupangte chuan an nu leh pate chu an hmangaih a, nu leh pate pawhin an fate chu an hmangaih bawk a. Chu chu Kristian chhûngkuaah a dik bîk a ni. Nu leh pate leh fate chuan inpawh taka awm an duh chung pawhin, a châng chuan inbiak pawhna neih a har ṭhîn. Inbiak pawhna chu tlang tak leh inpawh taka neih a nih pawhin, engvângin nge thu ṭhenkhat chu sawiho duh miah loh a nih ṭhin? Inbiak pawhna tiharsatu thil ṭhenkhatte chu eng nge ni? Engtin nge chûng chu hmachhawn theih a nih?

3. (a) Engvângin nge chhûngkaw tam tak tân inbiak pawhna ṭha neih a harsat? (b) Engvângin nge hmân lai Israel rama chhûngkuate tân hun hman tlân chu a harsat loh?

³ Chûngkaw tam tak chuan awmze nei taka inbiak pawh nân hun tam tâwk neih chu harsa an ti a. Mahse, chutiang chu tûn hma aṭanga thil nih dân a ni lo. Mosia chuan fa nei Israel mipate chu: “In fate ṭhahnemngai takin [Pathian thu] in zirtîr ang a, in ina in ṭhut lai te, kawnga in kal lai te, in mut lai te, in thawh hun tein in sawi ṭhîn tûr a ni,” tiin thu a pe a ni. (Deut. 6:6, 7) Naupangte chuan inah an nute bula an awm loh vêk pawhin, hnathawhna hmunah emaw, lovah emaw an pate bulah hun an hmang ṭhîn a. Naupangte leh an nu leh pate tân awm tlân leh titiho theihna hun tam tak  a awm a ni. Chuvângin, nu leh pate chu an fate mamawh te, châkzâwng te, leh miziate hre thei tûr dinhmunah an ding a. Chutiang bawkin, naupangte tân pawh an nu leh pate hriat chianna hun remchâng ṭha tâwk a awm a ni.

4. Engvângin nge tûn laia chhûngkaw tam tak tân inbiak pawhna neih chu a harsat?

⁴ Tûn lai nun nên chuan a va inang lo tak êm! Ram ṭhenkhatah chuan naupang chu school kal hmaa zir lâwkna hmunah an kal ṭan a, a châng phei chuan kum hnih mi lek an nih aṭangin an kal ṭan ṭhîn a ni. Nu leh pa tam tak chuan in kalsanin hna an thawk a. Nu leh pate leh an fate hun hman tlân theih hun tawi tê chhûng chu inbiak pawh nâna hman ai chuan computer khawih nân te, TV en nân te, leh electronic thil dang khawih nânte hman a ni zâwk ṭhîn. Chûngkaw tam takah chuan nu leh pate leh fate chu inpawh lo takin an awm a, inhmêl hriat lo an ni ringawt tawh mai. Awmze nei taka titina phei chu an nei ngai mang meuh lo a ni.

5, 6. Engtin nge nu leh pa ṭhenkhat chuan an fate hun an hmanpui tam lehzual theih nân hun tam zâwk an “lei” theih?

⁵ In chhûngkuaa hun tam lehzual in hman theih nân thil dang tih nâna i hun hmante chu i “lei” thei ang em? (Ephesi 5:15, 16 chhiar rawh.) Chhûngkaw ṭhenkhat chuan TV en hun emaw, computer hman hun emaw tihtlêm chu an remti a. Chhûngkaw dangte erawh chuan ni khatah vawi khat tal chaw eiho an tum tlat a ni. Chhûngkuaa Pathian biakna nei tûra ruahmanna chuan nu leh pate leh naupangte inhnaih tawn a, thlarau lam thil ṭha taka sawiho theihna hun remchâng a va pe tak êm! He thiltum atâna chawlhkâr khata dârkâr khat emaw, a aia tam emaw hun siam chu tih ṭanna ṭha tak a ni a; mahse, titina ril tak nei tûr chuan chu aia tam tih a ngai a ni. Chumi atân chuan, inbiak pawhna neih ziah a ngai a. I fate school kal hmain, anmahni tiphur thei thil engemaw hrilh la, ni châng sawipui la, a nih loh leh ṭawngṭaipui ang che. Chutianga tihna chuan an ni hman dân chu nasa takin a ti danglam ang.

⁶ Nu leh pa ṭhenkhat chuan an fate hun an  hmanpui tam lehzual theih nân an nun dân phung an ti danglam a. Entîr nân, fa naupang pahnih nei Laura-i * chuan a fate hun a hmanpui tam lehzual theih nân a hna chu a chawlhsan a ni. Ani chuan: “Zîng lamah chuan hnathawhna lam emaw, school lam emaw pan tûrin kan hmanhmawh ṭheuh va. Tlai lama ina ka lo haw chuan, ka fate chu nau awmtuin a lo mut fel dêr tawh ṭhîn. Hna ka bânsan avângin sum tlêm zâwka kan nun ngai mah se, tûnah chuan ka fate ngaihtuahna leh harsatnate ka hriatpui lehzual niin ka inhria. Ṭawngṭainaa an thu chhamte ka ngaithla a, anmahni ka kaihruai thei a, ka fuihin, ka zirtîr thei a ni,” tiin a sawi a ni.

7. Naupangte leh nu leh pate insawisêl tawnna ber pakhat chu eng nge ni?

⁷ Ṭhalai tam takte biang biakna an neih hnuah For Parents Only tih lehkhabu ziaktute chuan inbiak pawhna dâltu thil dang chu an hmu chhuak a. Heti hian an sawi a ni: “Naupangte’n an nu leh pate an sawisêlna ber pakhat chu, ‘Ka thu sawi an ngaithla lo,’ tih hi a ni,” tiin. Chu buaina chu anmahni lam aṭang chauhvin a ni lo. Nu leh pate pawhin chutiang tho chuan an sawi ve bawk a. Inbiak pawhna ṭha nei tûrin chhûngkuate chu an inngaithla tawn tûr mai ni lovin, tih tak zetin an inngaithla tawn tûr a ni.—Jakoba 1:19 chhiar rawh.

8. Engtin nge nu leh pate chuan an fate thusawi an ngaihthlâk tak zet theih?

⁸ Nu leh pate u, in fate thu sawi chu in ngaithla tak zet em? Chu chu i chauh hunah emaw, thil holam tak chungchânga titi nia i inhriat hunah emaw a harsa thei a. Mahse, i tâna holam tak anga lang chu i fa tân chuan thil pawimawh tak a ni thei a ni. “Ngaihthlâk chuh” tih awmzia chu i fa thusawi ngaihsak chauh ni lovin, a sawi dân ngaihsak pawh a tel bawk. Naupangin thu a sawi rîk chhuah dân leh a taksa chêt vêl dân chuan a rilru awm dân chu min hriat thiamtîr a ni. Zawhna zawh pawh a pawimawh bawk a. Bible chuan: “Mihring ngaihtuahna hi tuichhunchhuah thûk taka tui ang a ni a; mahse, mifing chuan a phawrh chhuak thei a ni,” tiin a sawi. (Thuf. 20:5, Today’s English Version) I fate chu thil sawi nuam vak lo an tihte i sawipui hunah hriat thiamna neih a ngai lehzual a ni.

9. Engvângin nge fate’n an nu leh pate thu an âwih ang?

⁹ Naupangte u, in nu leh pate thu in zâwm em? Pathian Thu chuan: “Ka fapa, i pa zirtîrna che chu ngaithla la, i nu zirtîrna che chu hawisan suh,” a ti a. (Thuf. 1:8) In nu leh pate chuan an hmangaih che u a, thinlung tak aṭangin in ṭhatna tûr an duhsak che u avângin an thu ngaihthlâk a, zawm chu a finthlâk a ni tih hre reng ang che u. (Eph. 6:1) In nu leh pate nêna inbiak pawhna ṭha in neih a, an hmangaih che u tih in hriat chuan an thuâwih chu a awlsam lehzual ṭhîn. Chuvângin, in nu leh pate chu in ngaih dân hrilh ang che u. Chu chuan nangmahni hre thiam tûrin anni chu a ṭanpui ang. Chutih rual chuan, anni pawh in hriat thiam a ngai bawk a ni.

10. Bible-a Rehoboama chanchin aṭangin eng nge kan zir?

¹⁰ In rualpui ṭhalaite hnên aṭanga thurâwn lâk kawngah chuan in fîmkhur a ngai a. Anni chuan in hriat duhzâwng thute an hrilh che u pawh a ni thei; mahse, an thurâwn pêkte chuan a ṭanpui hauh lo vang che u. In tân a hlauhawm zâwk mah thei a ni. Upa zâwkte finna leh thiltawn angte an neih loh avângin ṭhalai tam zâwkte chuan thil thui takin an thlîr thei lo va, an thiltih sawh khâwk tûr pawh an ngaihtuah thiam hek lo. Lal Solomona fapa Rehoboama entîrna kha hre reng ang che u. Israel lal a han nih khân upa zâwkte thurâwn zawm chu a tân a finthlâk hle zâwk tûr. Mahse, a rualpui ṭhalaite thurâwn âtthlâk tak chu a zâwm ta zâwk a. Chuvâng chuan a lalrama mi a tam zâwkte chuan an thlâwp ta lo a ni. (1 Lal. 12:1-17) Rehoboama  kawng zawh finthlâk lo tak entawn aiin, in nu leh pate nêna inbiak pawhna ṭha tak nei tûrin ṭan la ang che u. An hnênah in ngaihtuahna hrilh ula. An fuihnate chu hlâwkpuiin, an finna aṭangin inzir ang che u.—Thuf. 13:20.

11. Nu leh pate chu pan nuam an nih loh chuan eng thil nge thleng thei?

¹¹ Nu leh pate u, in fate’n an kum rualpuite hnên aṭanga thurâwn an lâk in duh loh chuan, pan nuam leh biak nuam tak nih tum ang che u. Unaunu tleirâwl pakhat chuan: “Mipa hming ka’n sawi ṭan dêk dêk a, ka nu leh pate ngaih a ṭha lo nghâl a. A hrehawmin, sawi zawm ka hreh phah ṭhîn,” tiin a ziak a ni. Unaunu tleirâwl pakhat pawhin: “Tleirâwl tam tak chuan an nu leh pate hnên aṭangin thurâwn lâk an duh a; mahse, an lo lâk thutaksak loh chuan an fate chuan thiltawn nei tlêm zâwk pawh ni se, an thusawi lo lâk thutaksaktute chu an pan mai ṭhîn,” tiin a ziak bawk. In fate thu sawi apiang chu lainatna nêna ngaihthlâk in inhuam chuan, anni chuan thu an hrilh duh che uin, in kaihhruaina chu an zâwm ang.

12. Engtin nge nu leh pate chhan lêt dân chuan an fate nêna an inbiak pawhna a dâl theih?

¹² Nu leh pate’n an fate thu hrilh chu an lo lâk vûngsak nghâl vakna leh a ni lo zâwnga an lo lâksakna chuan inbiak pawh a tiharsa thei bawk. Kristian nu leh pate’n an fate vênhim an duh chu a hriatthiam awm hle. Hêng ‘ni hnuhnûngte’ hi thlarau lam leh thil danga hlauhawmnain a khat si a. (2 Tim. 3:1-5) Mahse, nu leh pate’n vênhimna nia an ngaih chu an fate tân chuan khuahkhirhna angin a lang thei a ni.

13. Engvângin nge nu leh pate tân an ngaih dân sawi chhuak nghâl ṭhîn lo tûra fîmkhur a ngaih?

¹³ Nu leh pate tân an ngaih dân sawi chhuak nghâl ṭhîn lo tûra fîmkhur chu a finthlâk a. In fate’n rilru tina thei thil engemaw an sawi laia lo ngawih reng chu thil awlsam a ni lo ngei ang. Mahse, chhân lêt hmaa ṭha taka ngaihthlâksak chu a pawimawh hle a ni. Lal fing Solomona chuan: “Ngaihthlâka hmâa chhân chu a tân âtthlâk nihna leh mualphona a ni,” tiin a ziak a. (Thuf. 18:13) Ṭha taka in lo ngaihthlâk chuan in fate chuan an sawi zawm zêl ang. Ṭanpui thei dinhmuna in din hmain, thil nih dân chu kimchang taka in hriat vek a ngai a. An lungngaih avângin ṭawngkam “bung” tak an hmang pawh a ni thei. (Job. 6:1-3) Chuvângin, hmangaihna ngah nu leh pa in nih angin, in bengte chu hriat thiamna neih nân hmang ula, in leite chu thawi dam nân hmang ang che u.

14. Engvângin nge fate chuan thusawi an chuh loh vang?

¹⁴ Fate u, in nu leh pate chuan nangmahni zirtîr tûra Pathian pêk mawhphurhna an neih avângin, nangni pawhin an thusawi chu hnial nghâl mai lo ula, ‘thusawi chuh suh u.’ (Thuf. 22:6) Tûna in tawn mêk ang dinhmunte hi an lo tawng tawh pawh a ni thei a. Chu bâkah, an naupan laia an thil tihsual avânga inchhîrin, chutiang in tih ve loh nâna vênhim che u chu an duh tak zet pawh a ni thei. Chuvângin, in nu leh pate chu hmêlma ang ni lovin, lam ṭang angin leh dodâltu ni lovin, thurâwn petu angin thlîr ang che u. (Thufingte 1:5 chhiar rawh.) ‘In nu leh in pa chawimawi ula,’ an hmangaih che u angin in hmangaih ve tih lantîr rawh u. Chu chuan an tân ‘Lalpa thununnaah leh zilhnaa enkawl che u’ chu a tiawlsam ang.—Eph. 6:2, 4.

15. Engin nge dawhtheihna nei tûr leh kan hmangaihte chunga thinur lo tûra min ṭanpui ang?

¹⁵ Kan hmangaihte chungah dawhtheih loh châng kan nei a. “Kolossa khuaa Kristaa mi thianghlimte leh unau rinawmte hnênah,” tirhkoh Paula chuan: “Pasalte u, in nupuite hmangaih ula, an lakah vîn suh u. Pate u, in fate tinuar suh u, chutilochuan an bei a dawng dah ang e,” tiin a ziak a. (Kol. 1:1, 2; 3:19, 21) Ephesi khuaa mite hnênah pawh: “Khâkna te, thinurna te, tauhna te, ânna te, sawichhiatna te zawng zawng chu bânsanin awm rawh se,” tiin a fuih bawk a ni. (Eph. 4:31) Pathian thlarau rah  hmêlhmang—dawhtheihna te, thuhnuairawlhna te, insûmtheihna te neihna chuan lungngaih lai pawha rilru dam tak nei tûrin min ṭanpui ang.—Gal. 5:22, 23.

16. Engtin nge Isua chuan a zirtîrte a siam ṭhat a, engvângin nge chu chu a chhinchhiah tlâk?

¹⁶ Isua entawn tûr siam chu han ngaihtuah teh. A tirhkohte nêna zanriah hnuhnûng ber an kîl laia a lungngaih dân tûr kha han mitthla teh. Dârkâr rei lo têah muangchâng tak leh hrehawm nasa tak tuarin a thi dâwn tih a hria a. A Pa hming tihthianghlimna leh mihringte chhandamna chu a rinawmnaah a innghat a ni. Chuti chung pawhin, an zan riah kîl lai ngei chuan, “[tirhkohte] zîngah tu ber nge ropui bera a ruat tih thu-ah inhnialna a lo chhuak a.” Isua chuan anni chu a vîn lo va, an chungah lungnih lohna nasa tak a lantîr hek lo. Anni chu dam takin a chhûtpui zâwk a. Hun harsa tak a tawh laia amah an awmpui ṭhin thu a sawi chhuak a ni. Setana chuan anni chu buh thlei anga thlei tum tlat mah se, Isua chuan an rinawm dâwn tih a rinzia a târ lang a. Anni chu thu a thlunpui hial a ni.—Lk. 22:24-32.

17. Engin nge naupangte chu rilru dam tak nei tûra ṭanpui ang?

¹⁷ Naupangte tân pawh rilru dam taka awm a ngai a. A bîk takin, an han tleirâwl chhoh hian an nu leh pate kaihhruaina pêk chu anmahni rin lohna angin an ngai thei a ni. Chutianga a lan châng pawh awm thei mah se, in nu leh pate ngaihtuahna che u chu an hmangaihna lantîrna a ni tih hria ang che u. Rilru dam taka an thu ngaithlain, an kaihhruaina zâwm rawh u; tichuan, an zah in hlawhin, mi rintlâk angin hming in chher dâwn a ni. Chutiang nungchang chuan kawng ṭhenkhatah zalênna tam lehzual a neihtîr thei ang che u. Insûmtheihna neih chu a finthlâk a ni. “Mi â chuan a thinur thu zawng zawng a sawi chhuak a, mi fing erawh chuan an thup a, an ngawihpui ṭhîn,” tiin thufing chuan a sawi.—Thuf. 29:11.

18. Engtin nge hmangaihna chuan inbiak pawhna ṭha a awmtîr?

¹⁸ Chuvângin nu leh pa, leh fa duh takte u, in duhthusâmin in chhûngkuaah inbiak pawhna ṭha nei lo mah ula, lunghnual suh ang che u. Ṭan la zawm zêlin, thutakah awm reng rawh u. (3 Joh. 4) Khawvêl tharah chuan mi ṭha famkimte chuan inhriat sualna leh inhnialna awm lovin, ṭha famkimin an inbe thei tawh ang. Mahse, tûnah rih chuan kan vai hian a hnua kan inchhîr lehna tûr thil kan ti palh ṭhîn a. Chuvângin ngaihdam dîl hreh lo ula, ngaihdam pawh peih bawk ang che u. ‘Hmangaihnaah chuan insuih khâwm rawh u.’ (Kol. 2:2, 3) Hmangaihna chuan thil a tithei a. ‘Hmangaihnain a dawhthei a, ngil a nei bawk ṭhîn. A thinur duh lo va. Sual lam a ngaihtuah lo va. Engkim a tuar hrâm hrâm a, engkim a ring a, engkim a beisei a, engkim a tuar chhuak ṭhîn.’ (1 Kor. 13:4-7) Hmangaihna leh inbiak pawhna ṭha nei chho zêl ula, chu chuan in chhûngkuaah hlimna leh Jehova chawimawina a thlen dâwn a ni. (w13-E 05/15)