1, 2. (a) Pathian rawngbâwl tûra i thu tlûkna chu engtin nge i siam? (b) Kan thlarau lam rochan chungchângah eng zawhnate nge kan inzawh theih?

KEINI mi maktaduai têlte hian Jehova rawngbâwl tûr leh Isua Krista hniakhnung zui tûrin duh thlanna fing kan siam tawh a. (Mt. 16:24; 1 Pet. 2:21) Pathian hnêna kan inpumpêkna nun hi holam takin kan la lo. Kan duh thlanna chu Bible châng ṭhenkhat a pâwnlânga hriatna maiah ni lovin, ngun taka Pathian Thu zirnaah a innghat zâwk a ni. Chuvângin, ‘amah Pathian tak chauh leh a tirh Isua Krista hriatna’ neite hmaa Jehova’n a dah rochan chungchâng chipchiar tak kan hriatte chuan rinna a tichak a ni.—Joh. 17:3; Rom 12:2.

² Kristian kan nihna vawng reng tûrin, kan Pa vâna mi tilâwmtu duh thlannate chu kan siam tûr a ni a. Chuvângin, he thuziak hian hêng zawhna pawimawh takte hi a chhâng ang: Kan rochan chu eng nge ni? Chu chu engtin nge kan thlîr ang? Engtin nge kan rochan chu kan chang ngei tih kan chian ang? Duh thlanna fing siam tûrin engin nge min ṭanpui ang? tihte hi.

3. (a) Hriak thihte chuan eng rochan nge an dawn ang? (b)  ‘Berâm dangte’ chuan eng rochan nge an dawn ang?

³ Kristian tlêm tê chuan “rochan chhe thei lo, bawlhhlawh kai lo, chuai thei lo”—vâna Krista nêna rorêl theihna chanvo hlu tak dawn chu an inbeisei a. (1 Pet. 1:3, 4) Chu rochan dawng tûr chuan, anni chu an ‘piang thar’ tûr a ni. (Joh. 3:1-3) Pathian Ram chanchin ṭha hrilnaa Isua hnungzui hriak thihte thawhpuitu, a ‘berâm dangte’ rochan tûr chu eng nge ni? (Joh. 10:16) Berâm dangte chuan sual nei Adama leh Evi’n an dawn ngai loh —hrehawm tawrhna, thihna, a nih loh leh lungngaihna awm lo lei paradise-a chatuan nunna chu an dawng ang. (Thup. 21:1-4) Chuvângin, Isua chuan a ruala thi mi sual hnênah: “Vawiinah hian tih tak meuhvin ka hrilh a che, ka hnênah Paradis-ah i awm ve ang,” tiin a chhâng thei a ni.—Lk. 23:42, 43, NW.

4. Eng malsâwmnate nge tûnah ngei pawh kan neih?

⁴ Tûnah ngei pawh hian kan rochan hmêl hmang ṭhenkhat chu kan chên reng tawh a. “Krista Isuaa tlanna awm” chu kan rin avângin, chhûngrila thlamuanna leh Pathian nêna inlaichînna ṭha kan nei a ni. (Rom 3:23-25) Pathian Thua awm thutiam ropui tak takte chu fiah takin kan hre thiam a. Chu bâkah, khawvêl puma inunauna duhawm tak zînga kan telna chuan hlimna nasa tak min neihtîr a ni. Jehova Thuhretute zînga mi nih chu chanvo ropui a va ni tak êm! Kan rochan kan hlut hle pawh hi a mak lo ve!

5. Setana chuan Pathian mite chungah eng nge tih a tum a, a ngamthlêmnate do hneh tûrin engin nge min ṭanpui thei?

⁵ Mahse, kan rochan ropui tak vawng reng thei tûr chuan, Setana thangte lakah kan harhvâng reng tûr a ni a. Ani chuan Pathian mite chu an rochan chântîr thei tûr thu tlûkna siamtîr chu a tum reng a. (Num. 25:1-3, 9) Setana chuan a tâwpna a hnai tawh tih hriain, min hruai sual a tum nasa lehzual sauh a ni. (Thu Puan 12:12, 17 chhiar rawh.) Englai pawha ‘Diabola ngamthlêmnate do’ hneh tûr chuan, kan rochan chu kan hlut hle tûr a ni. (Eph. 6:11) Chumi chungchângah chuan thlahtu Isaaka fapa Esauva vaukhânna entîrna chuan rilrua vawn reng tlâk zir tûr a pai a ni.

6, 7. Tu nge Esauva chu ni a, eng rochan nge dawn tûr a neih?

⁶ Kum 4000 dâwn lai kal ta khân, Isaaka leh Rebeki chuan fa phîr Esauva leh Jakoba an nei a. An lo seilen chuan an rilru put hmang leh an thil tih duhte chu a inang lo hle a. “Esauva chu sa pêl thiam tak, mi ramvachal,” a nih laiin, “Jakoba erawh chu mi ni chuah, puan in lamtea awm mi a ni.” (Gen. 25:27) Mi rinawm leh pawisawi lo tak a nih avângin, ani chu mi ni chuah, a nih loh leh sawisêl bo a ni.

⁷ Esauva leh Jakoba chu kum 15 mi an nih chuan an pu Abrahama chu a boral a, a hnêna Jehova thutiam erawh chu a boral ve lo. A hnuah Jehova’n Isaaka hnênah tiam nawn lehin, Abrahama thlahah khawvêla chi tin an la thawven tûr thu a sawi a ni. (Genesis 26:3-5 chhiar rawh.) Chu thutiam chuan Messia—Genesis 3:15-a sawi ‘thlah’ rinawm—chu Abrahama thlah aṭanga lo awm tûr a nih thu a târ lang a. Isaaka fapa piang hmasa ber a nih angin, Esauva chuan chu thutiam chu dawng tûrin dikna a nei a ni. Esauva tân rochan ropui tûr a va ni tak êm! Ani chuan a rochan chu a hlut em?

8, 9. (a) Esauva chuan a rochan chungchângah eng duh thlanna nge a siam? (b) Kum emaw zât a liam hnuah, Esauva chuan a duh thlanna siam chungchângah eng nge a hriat chhuah a, engtin nge a chhân lêt?

⁸ Ni khat chu lo aṭanga Esauva a lo haw chuan Jakoba’n “englo a chhûm kawi” chu a hmu a. Esauva chuan “Khawngaih takin i englo sen chhum kawi ngei kha mi eitîr teh khai; ka chau êm mai,” a ti a. Chhâng lêtin Jakoba chuan Esauva hnênah: “I fa tîr nihna mi leitîr zet la le,” a ti a. Esauva chuan eng duh thlanna nge a siam tâk? Ani chuan: “Fa tîr nihna mai hi ka tân engnge sâwt ang?” a ti a. Ni e, Esauva chuan a fa tîr nihna aiin englo sen chhum kawi thlêngkum khat lek chu a thlang ta zâwk a nih chu! An indâwrna chu dân ang thlap a nih theih nân Jakoba chuan, “Ka hnênah chhia chham zet rawh le,” a ti tlat a. Esauva chuan a fa tîr nihna chu hreh miah lovin a pe phal ta a. Chu mi hnu chuan, “Jakoba chuan Esauva chu chhang leh dailuah chhum kawi a pe a; tichuan a eiin a in a, a tho va, a kal ta a: chutiang  chuan Esauva chuan a fa tîr nihna chu a ngainêp a ni.”—Gen. 25:29-34.

⁹ Kum emaw zât a liam hnuah, Isaaka’n a thih a hnai tawh tih a hriat khân, Rebeki chuan Esauva chân tâk fa tîr nihna chu Jakoba’n a chan ngei theih nân ruahmanna a siam a. Esauva’n duh thlanna âtthlâk tak a siam tih a han hriat chhuah meuh chuan Isaaka hnênah: “Aw ka pa, kei hi, kei pawh hi mal mi sâwm ve lul rawh, . . . Malsâwmna mi la zuahsak lâwm ni?” tiin a ngên a. Isaaka’n Jakoba hnêna a pêk tawh malsâwmnate chu a thlâk theih tawh loh thu a hrilh chuan, “Esauva chu ring takin a ṭap ta,” a ni.—Gen. 27:30-38.

10. Engtin nge Jehova chuan Esauva leh Jakoba chu a thlîr a, engvângin nge?

¹⁰ Bible-ah Esauva rilru put hmang eng nge langsâr bîk? A rochan aṭanga lo awm tûr nakina malsâwmnate dawn aiin, a tisa châknate tihpuitlin chu a ngai pawimawh zâwk tih hi, a ni. Esauva chuan a fa tîr nihna chu a ngainêp a, Pathian a hmangaih tak tak lo niin a lang. Chu bâkah, ani chuan a thiltihin a thlahte chunga nghawng a neih dân tûr chu a pawisa lo a ni. Jakoba erawh chuan a rochan chu a hlut hle thung. Entîr nân, ani chuan nupui tûr thlanna kawngah a nu leh pate kaihhruaina a zâwm a. (Gen. 27:46–28:3) Jakoba chuan dawhtheihna leh inpêkna neih ngai duh thlanna a siam avângin, Messia thlahtu a lo ni ta a ni. Engtin nge Pathian chuan Esauva leh Jakoba chu a thlîr? Zâwlnei Malakia hmangin, Jehova chuan: “Jakoba chu ka hmangaih a; Esauva erawh chu ka hua,” tiin a sawi a ni.—Mal. 1:2, 3.

11. (a) Engvângin nge Esauva entîrna chu keini Kristiante tân a pawimawh? (b) Engvângin nge Paula chuan Esauva thiltih leh inngaihna chu a sawi kawp?

¹¹ Bible-in Esauva chungchâng a sawi chuan tûn laia Kristiante tân pawimawhna a nei em? Nei tehrêng mai. Tirhkoh Paula chuan: “Inngaih hmang emaw, Esauva anga Pathian zah lo mi emaw an lo awm dah ang e. Ani chuan a fa tîr nihna chu chaw vawi khat eiah a hralh a,” tia sawiin a Kristian unaute chu fîmkhur tûrin a vaukhân a ni. (Heb. 12:16) Chu vaukhânna chu tûn laia Kristiante tân pawh a ni a. Tisa châkna hneha awm lo tûr leh kan thlarau lam rochan hloh lo tûrin thil thianghlimte chu kan ngaihlu zêl tûr a ni. Mahse, engvângin nge Paula’n Esauva thiltih leh inngaihna chu a sawi kawp? Esauva neih ang tisa lam rilru neite tân inngaihna ang chi, tisa châkna sual atâna thil thianghlimte kalsan mai a awlsam vâng a ni.

12. (a) Engtin nge Setana chuan kan nun kawngah thlêmnate a awmtîr? (b) Duh thlanna harsa tak kan siam a ngaih huna min ṭanpui thei tûr Bible entîrna sawi rawh.

¹² Jehova chhiahhlawh kan nih angin,  nungchang bawlhhlawhna lama min thlêm thei dinhmunte chu kan zawng lo ngei mai. Chu ai chuan Pathian Jehova hnênah a thu âwih lo tûra tuemawin min thlêm hunah min tlâwmtîr lo tûrin kan dîl zâwk a ni. (Mt. 6:13) Mahse, he khawvêl chhe tak kâra kan rinawmna vawn reng kan tum lai hian, Setana chuan thlarau lama min tihchhiat chu a tum reng thung a. (Eph. 6:12) He khawvêl suaksual pathian a nih angin, Diabola chuan mi ṭha famkim lote tâna thlêmna tlânglâwn takte awmtîrin kan châkna ṭha famkim lo chu hman khaw loh dân a hria a ni. (1 Kor. 10:8, 13) Entîr nân, i châkna chu a dik lo zâwnga phuhru tûra thlêma awm angin han inmitthla teh. Eng duh thlanna nge i siam ang? Esauva ang maiin, i châkna chu i phuhru nghâl mai dâwn nge ni a, Jakoba fapa Josefa’n Potiphara nupui thlêmna a chhân lêt ang chiah khân i dovin, chuta ṭang chuan i tlân chhe nghâl zâwk dâwn?—Genesis 39:10-12 chhiar rawh.

13. (a) Tûn laiah engtin nge mi tam takte chuan Josefa anga thil an tih a, engtin nge ṭhenkhatte erawh chuan Esauva anga thil an tih thung? (b) Esauva anga thil ti tute entîrna chuan eng thil pawimawh nge min hriattîr?

¹³ Kan unau tam takte chu Esauva ang emaw, Josefa ang emawa thil ti tûra duh thlanna siam a ngaihna dinhmunah an ding ṭhîn a. An za deuhthaw chuan fing taka thil tiin, Jehova thinlung an tilâwm a ni. (Thuf. 27:11) Kan Kristian unau ṭhenkhatte erawh chuan thlêmna an tawh hunah an thlarau lam rochan chu dinhmun hlauhawma dahin, Esauva anga thil tih chu an thlang thung a. A nihna takah chuan, kum tina hnawh chhuahte zînga tam tak chu nungchang bawlhhlawhna vâng a ni. Kan rinawmna fiah a nih hmaa kan thinlung buatsaih nghâl chu a va pawimawh tak êm! (Sâm 78:8) Thlêmna do thei tûr leh a hnua duh thlanna fing siam thei tûra min ṭanpui tûrin a lo berah pawh tihtheih thil pahnih kan nei a ni.

14. Eng zawhnate ngaihtuahnain nge ‘sual lam chu hua a, ṭha lam pawm tlat’ tûrin min ṭanpui ang?

¹⁴ A hmasa zâwk chu kan thiltihte’n a nghawng tûr ngaihtuah a ni a. Kan thlarau lam rochan kan hlut dân chu, chu rochan min Petu Jehova kan hmangaihna nasat dânah a innghat thui hle a ni. Tihah chuan, mi tuemaw kan hmangaih hian a rilru tihnat chu kan duh si lo va. Chu ai mah chuan, a pawm zâwng mi nih kan tum tlat zâwk a ni. Chutiang a nih avângin, tisa châkna thianghlim lo takte ti ta ila, chu chuan keimahni leh mi dangte chunga nghawng a neih dân tûr kan ngaihtuah tûr a ni. Heti hian kan inzâwt tûr a ni: ‘Engtin nge ka tisa lam thiltih chuan Jehova nêna kan inlaichînna a nghawng ang? Chu thil sual tih chuan ka chhûngte chungah eng nghawng nge a neih ang? Engtin nge kohhrana ka unaute a nghawng ang? Mi dangte ka titlu ang em?’ tiin. (Phil. 1:10, 11) Heti hian kan inzâwt bawk tûr a ni: ‘Rei lo tê atâna tisa châkna suala inhnamhawihna chuan a hnua rilru hahna a thlen tûr chu a phu em? Esauva anga a tâwpa ka thiltih ka hriat chhuah hunah nasa taka ṭah chu ka duh tak zet em?’ tiin. (Heb. 12:17) Chutiang zawhnate ngaihtuahna chuan ‘sual lam chu hua a, ṭha lam pawm tlat’ tûrin min ṭanpui ang a. (Rom 12:9) A bîk takin, Jehova hmangaihna chuan kan rochan pawm tlat a, vênghim tûrin min chêttîr ang.—Sâm 73:28.

15. Engin nge kan thlarau lam nun tiderthâwngtu thilte laka kan invênna chu tinghet thei?

¹⁵ A pahnihna chu kan invênna tihngheh sauh hi a ni. Pathian Jehova chuan kan thlarau lam nun tiderthâwngtu khawvêl thilte laka kan invênna tinghet sauh tûrin thil tam tak min pe a. Chutah chuan Bible zir te, inkhâwm  te, thu hrilh te, leh ṭawngṭai te a tel a ni. (1 Kor. 15:58) Jehova hnêna ṭawngṭaia kan thinlung kan leihbuak a, Kristian rawngbâwlnaa awmze nei taka kan tel apiangin thlêmna do tûrin kan intichak sauh tihna a ni. (1 Timothea 6:12, 19 chhiar rawh.) Engemaw chen chu kan invênna ngheh zâwng chu kan ṭan lâk dânah a innghat a. (Gal. 6:7) Chu chu Thufingte bung hnihnaah târ lan a ni.

16, 17. Engtin nge duh thlanna fing siam tûra kan mamawh thiamna kan neih theih ang?

¹⁶ Thufingte bung 2-na chuan finna leh ngaihtuah theihna nei tûrin min fuih a. Chûngte chuan thil dik leh dik lo, leh mahni inthununna leh mahni duh zâwng ûm luat tuknate chu min thliar hrantîr thei a ni. Mahse, chutianga tihna kawnga kan hlawhtlin dâwn leh dâwn loh chu ṭan lâk kan inhuam leh huam lohvah a innghat a. Chu thu bul dikzia chu chiang taka târ langin, Bible chuan: “Ka fapa, ka thute i dawn a, ka thupêkte i khâwl khâwm a, finna lama i beng i chhit a, i thinlung hriatna lam atân i pêk chuan; a ni, hriatna i auh va, hriat thiam theihna pawh i auh chuan, tangkarua anga i zawn a, ro phûm rûk anga i zawn chuan, LALPA ṭih nachâng i lo hria ang a, Pathian hriatna chu i chhar chhuak ang. LALPA chuan finna a pe ṭhîn a, a kâ aṭang chuan finna leh hriat thiamna a lo chhuak ṭhîn,” tiin a sawi a ni.—Thuf. 2:1-6.

¹⁷ Chuti a nih chuan, duh thlanna fing siam tûra kan mamawh thiamna kan neih leh neih loh chu Thufingtea a sawite kan zawm leh zawm lovah a innghat tih a chiang hle. Jehova thute mila thil kan tih a, a kaihhruaina dîla kan ṭawngṭai fan fan a, amah hriatna chu lunghlu thuhrûk zawn ang maia kan zawn chuan, thlêmnate chu kan do hneh thei ang.

18. Eng nge tih kan tum tlat ang a, engvângin nge?

¹⁸ Pathian Jehova chuan chûng thilpêkte zawnga rim taka thawkte hnênah chuan hriatna, hriatthiamna, ngaihruat thiamna, leh finna a pe a. Chûng thilpêkte chu kan zawn nasat a, kan hman nasat zawh poh leh a Petu, Jehova chu kan hnaih lehzual ang a. Thlêmna kan hmachhawn hunah Pathian Jehova nêna kan inlaichînna ṭha tak kan neih chuan min vênghim thung ang. Jehova kan hnaihna leh kan ṭihna chuan thil sual tihna lak ata min vênghim dâwn a ni. (Sâm 25:14; Jak. 4:8) Jehova nêna inṭhianna kan neih leh Pathian aṭanga chhuak finna nunpuina chuan Jehova thinlung tilâwmtu duh thlanna siam tûr leh kan rochan vênghim zêl tûrin min chêttîr ṭheuh rawh se. (w13-E 05/15)