Inbiak Pawhna Ṭha Neiin In Inneihna Tinghet Rawh U
“A âwm tak thu sawi hi tangkaraw bâwma rangkachak apple ang a ni.”—THUF. 25:11.
1. Engtin nge inbiak pawhna ṭha chuan inneihna a ṭanpui?
CANADA rama unaupa pakhat chuan: “Tu dang aiin ka nupui chu hun ka hmanpui ang. Amah nên chuan nuna hlimna ka neihte hi a lêtin a pung a, hrehawmna ka tawrhte hi a chanvein a kiam a ni,” tiin a sawi. Australia rama pa pakhat chuan: “Kum 11 kan inneih chhûng hian, ka nupui nêna inbe lovin ni khat tê pawh ka liamtîr lo. Kan inring tawn a, kan inneihna pawh a nghet ṭha hle. Hei hi awmze nei taka inbiak pawhna kan neih reng vâng a ni,” tiin a sawi. Costa Rica rama unaunu chuan: “Inbiak pawhna ṭha chuan kan inneihna a tinghet mai ni lovin, Jehova min hnaihtîr a, thlêmna lak ata min vênghim a, nupa angin inlungrual takin min awmtîr a; tin, kan inhmangaihna a tizual a ni,” tiin a sawi bawk.
2. Eng thilin nge inbiak pawhna ṭha neihna tûr dâl thei?
2 I kawppui nên chuan inbiak pawhna ṭha in nei nge ni a, awmze nei taka titina neih chu harsa in ti zâwk? Inneihna chuan hnamzia leh seilen dân târ langtu miziate pawh tiamin, ze hran nei mi ṭha famkim lo pahnihte chu a awmduntîr avângin harsatna a chhuak thei chu hriat thiam awm tak a ni. (Rom 3:23) Chu bâkah, nupate chuan inbiak dân hmang inang lo an nei mai thei a. Chhan ṭha tak neiin, inneihna lam zir bing mi John M. Gottman-a leh Nan Silver-i chuan: “Inneihna nghet nei tûr chuan huaisen te, tumruh te, leh rilru dam hma te a ngai a ni,” tiin an sawi a ni.
3. Engin nge nupate chu an inneihna tinghet tûra ṭanpui?
3 Inneihna hlawhtling chu thawhrimna aṭanga lo awm a ni chiang hle a. Mahse, a rah chhuahah chuan hlimna nasa tak a tel a. Nupa inhmangaih takte chuan nun hlim tak an nei thei a ni. (Thur. 9:9) Isaaka leh Rebeki inneihna duhawm tak kha han ngaihtuah teh. (Gen. 24:67) Hun engemaw chen an inneih hnuah pawh an inhmangaih tawnna chu a daih thu kan hre lo. Chutiang chuan tûn laia nupa tam takte chungchâng pawh kan sawi ve thei a ni. An hlawhtlinna thurûk chu eng nge ni? Hriat thiamna te, hmangaihna te, zah thiamna te, leh inngaihtlâwmnate neia lantîrna hmangin, an ngaihtuahna leh rilru veizâwngte chu dik tak leh ngilnei taka inhrilh tawn dân an zir hi an hlawhtlinna thurûk chu a ni. Kan hmuh tûr angin, hêng mizia bul puite hi inneihnaah a awm reng chuan inbiak pawhna ṭha tak a awm reng ṭhîn.
INHRIAT THIAMNA NEI RAWH U
4, 5. Engtin nge thil hriat thiamna chuan nupate chu inhre thiam tawn lehzual tûra a ṭanpui? Entîrna pe rawh.
4 Thufingte 16:20 chuan: “Thu chîk taka dâwn mi chuan thil ṭha a dawng ang,” tiin a sawi a. Chu chu inneihna leh chhûngkaw nun nêna inkûngkaih thilah a dik ngei a ni. (Thufingte 24:3 chhiar rawh.) Hriat thiamna leh finna neihna bul ber chu Pathian Thu aṭangin a ni. Genesis 2:18 chuan Pathianin hmeichhia chu mipa ang ni lovin, a kawppui tûr atâna a siam thu min hrilh a. Hmeichhe dinhmun chu mi a biak pawh dânah a lang a ni. A mi azir ni mah se, a tlângpui thuin hmeichhiate chuan an rilru veizâwng te, mi chanchin te, leh inlaichînna chungchângte sawi chu an duh ṭhîn. Hmangaih tak leh nêlawm taka biakna chuan hmeichhiate chu hmangaih leh duh tak nia inhriatna a neihtîr avângin chûng chu an lâwm a. Kawng lehlamah chuan, mipa tam takte chuan an rilru veizâwngte an sawi chhuak duh ṭhîn lo va, thiltih te, harsatna te, leh a chinfel dân tûrte an sawi chhuak duh zâwk ṭhîn a. Tin, mipate chuan zah taka cheibâwl an duh a ni.
5 Britain rama unaunu pakhat chuan: “Ka pasal chuan ka thusawite ngaithla tluan hmasa lova, harsatna chinfel mai chu a duh ṭhîn a. Ka duh chu, ‘thingpui in dûn a, hriat thiampuina nêna min ngaihthlâksak’ a nih avângin a beidawnthlâk thei hle,” a ti. Pasal pakhat chuan: “Ka nupui nêna kan inneih hlim chuan a buaina neih engpawh chinfel nghâl zung zung duhna ka nei a. Mahse, a thil duh ber chu ngaihthlâksak a ni tih ka hre chhuak rang khawp mai,” tiin a ziak ve bawk. (Thuf. 18:13; Jak. 1:19) Hriat thiamna nei pasal chuan a nupui rilru veizâwng chu a hria a, chumi mil chuan a be ṭhîn a. Chutih rual chuan, a nupui hnênah chuan a ngaihtuahna leh rilru put hmang chu a tân a pawimawh tih a hriattîr a ni. (1 Pet. 3:7) Chutiang bawkin, nupui chuan a pasal thil thlîr dân chu hriat thiam a tum ve tûr a ni a. Nupate chu an inhriat thiam a, an inhlut tawn a, Bible-a târ lan an mawhphurhnate an hlen chhuah hian, inneihna hlimawm an nei a. Chu bâkah, thu tlûkna fing leh inbûk tâwk an siam thei bawk a ni.
6, 7. (a) Eng kawngin nge Thuhriltu 3:7-a thu bul hmuh chuan nupate chu hriat thiamna lantîr tûra a ṭanpui thei? (b) Engtin nge nupui chuan hriat thiamna a lantîr theih a, pasal chuan eng ti tûrin nge ṭan a lâk ang?
6 Hriat thiamna nei nupate chuan “Ngawih hun a awm a, ṭawng hun a awm,” tih an hre bawk a. (Thur. 3:1, 7) Kum sâwm lai pasal nei tawh unaunu chuan: “Tûnah chuan harsatna sawi chhuah loh hun a awm tih ka hre thiam ta. Ka pasal chu a hna leh mawhphurhna dang avângin a buai lutuk a nih chuan, thil engemaw ka sawi chhuah hmain ka nghâk deuh phawt ṭhîn a. Chumi avâng chuan tluang takin kan titi theih phah ṭhîn,” tiin a sawi. Nupui thil hre thiam takte chuan “a âwm tak,” a nih loh leh a hun taka thu sawi chu hriat a nuam a, lawm a hlawh tih an hria a, zahngai takin an ṭawng bawk ṭhîn a ni.—Thufingte 25:11 chhiar rawh.
Inneihnaah thil tê thamte’n lian tham takin thil a tidanglam thei
7 Kristian pasal chuan a nupui thu sawi ngaihthlâk bâkah, ama ngaih dân fiah taka sawi chhuah tumin a tih tûr chu a hlen tûr a ni. Kum 27 lai nupui nei tawh kohhran upa pakhat chuan heti hian a sawi a ni: “Ka nupui hnêna ka rilru chhûngril phawrh tûrin hma ka lâk fê a ngai a ni,” tiin. Kum 24 lai nupui nei tawh unaupa pakhat chuan heti hian a sawi bawk: “‘He buaina hi ka sawi chhuah loh chuan a reh mai ang,’ tiin ka ngaihtuah a, sawi chhuak lovin ka awm ṭhîn a. Mahse, ka rilru veizâwng lan chhuahtîr chu chak lohna hriltu a ni lo tih ka hre chhuak a ni. Mahni rilru veizâwng sawi chhuah harsa ka tih hunah thu sawi tûr dik tak, a hun taka sawi chhuak thei tûrin ka ṭawngṭai a. Tichuan, thâwk lain, ka ṭawng chhuak ta ṭhîn a ni,” tiin. A sawina hmun leh hun dik pawh a ṭangkai bawk a, nupate chuan anmahni chauhva ni châng emaw, Bible emaw an chhiar dun hunah an sawi chhuak thei a ni.
8. Kristian nupate chuan an inneihna tihlawhtling tûrin eng chêttîrtu dang nge an neih?
8 Nupate tâna thil pawimawh chu ṭawngṭai leh an inbiak pawhna tihṭhat lehzual duhna nasa tak neih hi a ni. Kan thiltih dân hlui thlâk danglam chu a harsa ngei mai. Mahse, nupate’n Pathian Jehova an hmangaih a, a thlarau thianghlim an dîl a, an inneihna chu an ngaihhlut chuan, mi tam takte neih loh chêttîrtu chu an nei tihna a ni. Kum 26 lai pasal lo nei tawh chuan heti hian a ziak a: “Ka pasal nên chuan inneihna chungchâng Jehova thlîr dân chu kan ngai thutak hle a; chuvângin inṭhen chu a ngaihtuah pawh kan ngaihtuah ngai lo. Chu chuan sawi dunna hmanga buainate chingfel tûrin nasa lehzualin ṭan min lâktîr a ni,” tiin. Chutianga rinawmna leh Pathian ngaihsakna chuan amah a tilâwmin, a malsâwmna a thlen a ni.—Sâm 127:1.
HMANGAIHNAAH CHUAN ṬHANG CHHO RAWH U
9, 10. Eng kawngin nge nupate chuan an inhmangaihna an tihngheh theih?
9 Hmangaihna, “phuar famkimna” hi inneihnaa mize pawimawh ber a ni a. (Kol. 3:14) Nupa rinawmte’n hlimna leh harsatna an paltlang dun hian an inhmangaihna dik chu a lo ṭhang chho va. Ṭhian ṭha lehzual an lo ni a, an inṭhianna chu an ngaihlu zual a ni. Chutiang inneihna chu, TV leh film-a kan hmuh anga thiltih lian tham tlêm tê chauh ni lovin, thiltih tê nau tam tak inbelhkhâwm hmanga chhawmnun a ni—inkuah te, thusawi duhawm tak te, inngaihsakna thiltih te, hlim taka innuih te, a nih loh leh tih tak zet a “vawiin ni i hmang nuam em?” tihte hmang hian. Hêng thil tê thamte hian inneihnaah lian tham takin thil a tidanglam thei a. Kum 19 lai hlim taka innei tawh nupate chuan “thil chinchâng hriat nân ringawtin” chhûnah phone hmanga an inbiak loh leh message talin thu an inthawn ṭhin thu a pasal chuan a sawi a ni.
10 Hmangaihna chuan nupate chu inhre chiang lehzual tûrin a chêttîr bawk a. (Phil. 2:4) Chutianga inhriatna chuan an ṭha famkim lo chung pawhin an inhmangaihna chu a tinghet lehzual sauh a ni. Inneihna hlawhtling chuan ngai a awh reng lo, a ṭhang chho zêlin, a nghet zual zêl a ni. Chuvângin, nupui pasal nei tawh i nih chuan heti hian inzâwt ang che: ‘Ka kawppui chu ka hre chiang em? Thil engemaw chungchânga a rilru veizâwng leh a ngaihtuahna ka hre thiam em? Atîra ka duhna a miziate kha thlîr lêtin ka kawppui chu engtianga zingin nge ka ngaihtuah ṭhin?’ tiin.
INZAH TAWN RAWH U
11. Engvângin nge inneihna hlawhtling nei tûrin inzah tawnna neih chu a pawimawh? Entîrna pe rawh.
11 Nupa hlim berte pawh nupa ṭha famkim an ni chuang lo va, nupa inhmangaih takte pawh an thu a inhmu reng lo thei a ni. Abrahama leh Sarite pawh an thu a inhmu reng bîk lo. (Gen. 21:9-11) Mahse, chu chuan an inneihna a tiderthâwng chuang lo. Engvângin nge? Inzah thiam taka an incheibâwl tawn vâng a ni. Entîr nân, Abrahama chuan Sari hnênah “khawngaih takin” tih ṭawngkam a hmang a. (Gen. 12:11, 13) Sari ve thung chuan Abraham thu a zâwm a, a “lalpa” angin a ngai hial a ni. (Gen. 18:12) Nupate chuan inzah tawnna an tlâkchham hian, chu chu an ṭawngkam leh an aw chhuakah a lang ṭhîn. (Thuf. 12:18) Chu buaina a lo chhuah chhan an chinfel loh chuan, an inneihna chuan chhiat lam a pan thei a ni.—Jakoba 3:7-10, 17, 18 chhiar rawh.
12. Engvângin nge innei hlimte chuan inzah thiam taka thu sawi tûrin ṭan an lâk lehzual ang?
12 Innei hlimte chuan boruak ṭha leh inbiak pawhna ṭha an neih theih nân, ngilnei tak leh inzah thiam taka inbe tûrin ṭan an la lehzual tûr a ni a. Pasal pakhat chuan: “Inneih atîr lam kumte chu hun hlimawm tak a nih rualin, a châng chuan a beidawnthlâk thei bawk a. I nupui rilru veizâwng te, tuizâwng te, leh mamawhte hriat i tum ang bawka, i nupui pawhin hriat che a tum lai hian thil awm dân chu a kal tluang lo deuh thei tlat! Mahse, a âwm tâwk hriatna te, fiamthu thiamna te, thuhnuairawlhna te, dawhtheihna te, leh Jehova rinchhanna ang chi mize nghette i neih chuan inlaichînna ṭha in nei thei ang,” tiin a sawi a ni. Chu chu a va dik êm!
THUHNUAIRAWLHNA DIK TAK LANTIR RAWH U
13. Engvângin nge inngaihtlâwmna chu inneihna nghet leh hlimawm neih nâna thil pawimawh tak a nih?
13 Nupa inkâra inbiak pawhna ṭha chu huan kal tlanga luang luitui dam diai ang a ni a. Chu lui chu luang reng tûrin ‘thuhnuairawlhna,’ a nih loh leh inngaihtlâwmna chuan hmun pawimawh tak a luah a ni. (1 Pet. 3:8) Kum 11 lai nupui lo nei tawh unaupa pakhat chuan: “Inngaihtlâwmna chuan ‘Pawi ka ti khawp mai,’ ti tûra min chêttîr avângin, chu chu inhmuh thiam lohna chinfelna ṭha leh rang ber a ni,” tiin a sawi. Kum 20 lai hlim taka nupui nei tawh upa pakhat chuan: “‘Ka hmangaih che,’ tih aia ‘Pawi ka ti khawp mai,’ tih a pawimawh zâwk châng a awm,” a ti. “Inngaihtlâwmna neih theih dân rang ber chu ṭawngṭai hi a ni. Ka nupui nêna ṭawngṭaia Jehova kan pan dun hian, kan ṭhat famkim lohna leh Pathian khawngaihna kan hre chhuak ṭhîn a. Chu inhriat chhuahna mak tak chuan thil thlîr dân dik nei tûrin min ṭanpui,” tiin a sawi belh a ni.
In inneihnaah inbiak pawhna ṭha tak nei rawh u
14. Engtin nge chapona chuan inneihna a nghawng theih?
14 Chapona erawh chuan chu mi kalh chiah chu a thlen a. Chu chuan ngaihdam dîl duhna leh dîl nâna ṭûl huaisenna a lâk bo avângin inbiak pawhna chu a tichhia a ni. Mi chapo chuan inngaitlâwm taka, “Pawi ka ti khawp mai; khawngaihin min ngaidam rawh,” tia sawi ai chuan, chhuanlam a siam ṭhîn a. Mahni tlin lohna huaisen taka pawm ai chuan, mi dangte tlin lohna a sawi zâwk a ni. A rilru a nat hunah remna siam ai chuan thinurah a tlâk a, ṭawngkam vîn tak hmangin emaw, ngawih hmakna hmangin emaw a thungrûl pawh a ni thei a ni. (Thur. 7:9) Ni e, chapona chu inneihna tân tûr hlauhawm ang a ni thei a. “Pathianin mi chapote a dodâl a, inngaitlâwm te erawh chu khawngaihna a pe ṭhîn,” tih hriat reng chu a ṭha a ni.—Jak. 4:6.
15. Ephesi 4:26, 27-a awm thu bul nunpuina chuan nupate chu an inkâra inhmuh thiam lohna chingfel tûra a ṭanpui theih dân hrilhfiah rawh.
15 Chapona lang chhuak lo tûra ngaih chu a âtthlâk ngei ang. Keimahnia awm chapona chu kan hriat a, kan siam ṭhat vat a ngai a ni. Paula chuan a Kristian unaute hnênah: “In thinur chu niin tlâkpui suh se; Diabola chu hmun kian hek suh u,” tiin a hrilh a. (Eph. 4:26, 27) Pathian Thu zawm lohna chuan ṭûl lo taka rilru hahna a thlen thei a ni. Unaunu pakhat chuan: “Ka pasal nên chuan Ephesi 4:26, 27 thute nunpui loh châng kan nei a. Chu thil avâng chuan muhîl thei lovin zân hrehawm tak ka hman phah ṭhîn a ni,” tiin pawiti takin a sawi a ni. Inrem leh tum chunga a hma thei ang bera buaina sawi dun chu a va ṭha zâwk tak êm! Nupate tân an thinurna reh deuh tûra hun inpêk chu a ngai ngei ang. Rilru put hmang dik nei tûra Jehova hnêna ṭanpuina dîl pawh thil âwm tak a ni. Chu rilru dikah chuan inngaihtlâwmna a tel a, chu chuan dinhmun tizual theitu mahni inngaihtuah aia buaina chu ngaihtuah zâwk tûrin a ṭanpui ang che.—Kolossa 3:12, 13 chhiar rawh.
16. Engtin nge inngaihtlâwmna chuan nupate chu mahni theihna thlîr dân dik nei tûra a ṭanpui?
16 Inngaihtlâwmna leh mahni tlin tâwk hriatna chuan nupate chu an kawppuite mize ṭha leh theihnate hlut tûrin a ṭanpui a ni. Entîr nân: Nupui chuan chhûngkaw tâna ṭangkai taka a hman talent engemaw tak a nei mai thei a. A pasal chu inngaitlâwm tak leh mahni tlin tâwk hria a nih chuan chu chu tlâwm lâk phah nân a hmang lo vang a, a nupui a hlutzia lantîrin a theihnate chu hmang tûrin a fuih zâwk ang. (Thuf. 31:10, 28; Eph. 5:28, 29) Chutih rual chuan, nupui inngaitlâwm leh mahni tlin tâwk hria chuan a theihnate chu tlâng hriatah a pho chhuak lo vang a, a pasal pawh a hmusit hek lo vang. A nihna takah chuan, an pahnihin “tisa pum khat” an ni a, pakhat rilru natna chu a pakhat tân pawh rilru natna a ni ve a ni.—Mt. 19:4, 5.
17. Inneite chu hlim taka awm tûr leh Pathian chawimawi tûrin engin nge ṭanpui thei?
17 In inneihna chu Abrahama leh Sari emaw, Isaaka leh Rebeki emawte angin—hlim tak, daih rei tak, leh Jehova chawimawina thlentu ni ve se in duh ngei ang. Chutiang a nih chuan, inneihna chungchânga Pathian thlîr dân nei tlat ang che u. A Thu-ah chuan hriat thiamna leh finna zawng ang che u. I kawppui chu ngaihlu taka ngaihtuah chungin, hmangaihna dik—“[“Jehova,” NW] meialh nasa tak mai chu” neih tum tlat ang che u. (HTK. 8:6) Inngaihtlâwmna nei tûrin ṭan la bawk rawh u. In kawppui chu zah thiam takin cheibâwl rawh u. Chûng thilte in tih chuan, in inneihna chuan nangmahni leh in Pa vâna mi tân hlimna a thlen ang. (Thuf. 27:11) Kum 27 lai nupui nei tawh pasal pakhat thuziak: “Ka nupui tel lova nun chu a ngaih pawh ka ngaihtuah thei lo. Nî tin mai hian kan inneihna hi a nghet zual zêl a. Chu chu Jehova kan hmangaih vâng leh kan inbiak pawh ziah vâng a ni,” tih chu i rilru chuan a ṭâwmpui ngei ang. (w13-E 05/15)
