ṬHIAN ngaihsân tak nei angah han inchan ta la, mahse, ani chuan i hriat thiam theih loh thil engemaw a ti a ni. Mi dangte chuan a thiltih dân sawisêlin, a rilru put hmangah a nunrâwng tiin a ngaih dân an siam a. Chu chu i pawmpui nghâl mai dâwn nge ni a, i ṭhianpa insawi dân chu i ngaithla hrih phawt zâwk dâwn? Ani chu a thiamthu sawi tûrin chumi hmunah chuan awm lo mah se, dawhtheihna lantîrin, i ngaichâng phawt ang em?

I chhân hmain, thil hriat belh chu i duh ngei a rinawm. Heti hian i inzâwt thei a ni, ‘Ka ṭhianpa chu eng ang takin nge ka hriat chian a, amah ngaihsân chhan tûr eng nge ka neih?’ tiin. Chu chu thil inâwm tak a ni. Chutiang bawkin, Pathian chu nunrâwng anga kan ruat hmain, hetiang bawk hian kan ngaihtuah tûr a ni dâwn lâwm ni?

Pathian thiltih ṭhenkhat chu hriat thiam harsa i ti emaw, thlen a rem tih avângin a ngaihna i hre lo emaw pawh a ni thei. Mi tam tak chuan Pathian chu a nunrâwng tiin an hrilh ang che a, an ngaih dân ang ṭâwmpui tûr pawhin an fuih ang che. Mahse, Pathian chanchin i hriat belh hma loh zawng i nghâk hrih ang em? A chhânna chu Pathian i hriat chian dânah a innghat thei a ni. Heti hian inzâwt ang che, ‘Pathian chu ka tân eng ang ṭhian nge a nih?’ tiin.

I nunah harsatna i tâwk a nih chuan Pathian chu ka ṭhian a ni lo tia sawi mai duhna pawh i nei thei. Mahse, hei hi han ngaihtuah lawk teh: Pathian chu harsatna tawhtîrtu che nge a nih a, malsâwmtu che zâwk? tih hi. Kan hriat tawh angin, “he khawvêl lal” chu Jehova ni lovin Setana a ni a. (Johana 12:31) Khawvêla lungngaih manganna leh rorêl dik lohnate awmtîrtu chu Setana a ni. Chu bâkah, kan hrehawm tawrhna tam takte chu kan ṭhat famkim loh vâng leh sawi lâwk theih loh dinhmun lo thlengte vâng a ni tih i pawm dâwn lâwm ni?

Kawng leh lamah chuan, Pathian chuan eng chungah nge mawh a phurh? A chungchânga hêng Bible thusawite hi han ngaihtuah teh: ani chu “lei leh vân siamtu” a ni; a hnathawhte zîngah chuan “mak taka siam” kan taksa a tel; Jehova chu “Pathian i nunna . . . a kuta kawltu” a ni, tihte hi. (Sâm 124:8; 139:14; Daniela 5:23) Chûng zawng zawngte awmzia chu eng nge ni?

Chumi awmzia chu kan nun chhan leh kan awm chhan hi Siamtu vâng liau liau a ni tihna a ni a. (Tirhkohte 17:28) Nunna thilthlâwnpêk te, kan chhehvêl mawi tak te, hmangaihna leh inṭhianna duhawm tak te, tema hriat theihna, khawiha hriat theihna, benga hriat theihna leh rim hriat theihna te—hêng zawng zawngte hi Pathian thilpêk vek a ni, tihna a ni bawk. (Jakoba 1:17) Chûng malsâwmna min pêkte avângin ani chuan kan ngaihsân leh rin a phu tih i pawm dâwn lâwm ni?

Pathian rin chu a harsa i ti pawh a ni thei. Amah ring tûrin i la hre chiang lo nia inhriatna pawh i nei mai thei bawk. Chu chu hriat thiamawm tak a ni. Hêng thuziak tâwi têahte hian mi ṭhenkhatin Pathian chu nunrâwng anga an ngaih chhan zawng zawngte chu kan telh kim vek thei lo va. Mahse, Pathian hre chiang lehzual tûra theih tâwp chhuah chu a manhla dâwn lâwm ni? * Chutianga i tih chuan Pathian chungchânga thu dik chu i lo hria ang tih kan ring tlat a ni. Pathian chu a nunrâwng em? Chumi kalh chiah chu a ni zâwk a ni: “Pathian chu hmangaihna a ni si a.”—1 Johana 4:8. (w13-E 05/01)