Bible sawi dân chuan mi zawng zawng hi sual nei vek kan ni a. Sual lam tih duhna chu mihring hmasa ber Adama hnên aṭangin kan rochung a ni. Chuvângin, a châng chuan thil ṭha lote kan ti a, a hnuah kan inchhîr leh a ni. Pathian Fapa, Isua Krista chuan kan tâna a nun pein kan sual man chu a pe tla tawh a. Tlanna atâna a inthawina pêk chuan kan sualte ngaihdamna a awmtîr a. Chu chu Pathian thilthlâwnpêk a ni.—Rom 3:23, 24 chhiar rawh.

Mi ṭhenkhat chuan sual pawi tak an tih avângin Pathianin ngaidam thei lo tûrah an ngai a. Mahse, Pathian Thu chuan: “A Fapa Isua thisenin kan sualte zawng zawng min tlenfaisak ṭhîn,” a ti chu a lâwmawm hle. (1 Johana 1:7) Pathian Jehova chuan inchhîrna rilru put hmang dik tak kan neih chuan sual pawi takte pawh min ngaidam duh a ni.—Isaia 1:18 chhiar rawh.

Pathian Jehova ngaihdam nih kan duh chuan, a kawng te, a thurâwn te, leh kan laka a thil beiseite hre tûrin a chanchin kan zir a ngai a. (Johana 17:3) Ani chuan an nungchang ṭha lote sim a, insiamṭhat tumte hnênah chuan ngaihdamna phal takin a pe a ni.—Tirhkohte 3:19 chhiar rawh.

Pathian lawmzâwng mi nih hi kan tân thil harsa lutuk a ni lo. Pathian Jehova chuan kan chak lohnate a hria a. Ani chu mi khawngaih thei leh ngilnei tak a ni. A khawngaihna chuan amah tihlâwm dân hriat belh châkna a pe che a ni lâwm ni?—Sâm 103:13, 14 chhiar rawh. (w13-E 05/01)