Bible chuan a chhan bul ber pahnih a târ lang a. Pakhatnaah, mihringte chuan thil ropui takte hlen chhuak mah se, mahni pheikhai hruai thei tûra siam an ni lo. A pahnihnaah, mihringte ruahmanna a hlawhchham chhan chu ‘khawvêl pumhlûm hi mi sual thu thua a awm’ vâng a ni a, chu mi sual chu Diabol-Setana a ni. Chuvângin, mihringte ṭan lâkna chuan khawvêl remna a thlen thei lo a ni.—Jeremia 10:23; 1 Johana 5:19 chhiar rawh.

Mihringte hmasialna leh tumsânna chuan khawvêla remna thlentîr chu a tiharsa bawk a ni. Mite chu thil dik ngaina tûr leh inngaihsak tawn tûra zirtîr theitu khawvêl sawrkâr chauhvin khawvêlah hian remna a thlentîr ang.—Isaia 32:17; 48:18, 22 chhiar rawh.

Pathian Engkimtitheia chuan mihringte chunga rorêltu tûr sawrkâr pakhat din a tiam a. Chu chuan mihring sawrkârte chu a rawn thlâk ang a. (Daniela 2:44) Pathian Fapa, Isua chuan Remna Lal niin ro a rêl ang. Ani chuan lei chung zawng zawng ata suahsualna a nuai bo ang a, mite chu remna kawng a zirtîr ang.—Isaia 9:6, 7; 11:4, 9 chhiar rawh.

Isua kaihhruaina hnuaiah, khawvêl puma mi maktaduai têlte chuan mite chu mi dangte nên inrem taka awm theih dân zirtîr nân Pathian Thu, Bible chu an hmang mêk a. Khawvêlah hian remna chu a takin a rawn thleng thuai ang.—Isaia 2:3, 4; 54:13 chhiar rawh. (w13-E 06/01)