A hnên aṭanga zir tûr kan neih mi sual chu milema Isua biak mêk hi a ni a. Chu mi sual chuan a thil sual tih chu pawi a ti êm êm a ni. Isua hnênah: “I ram i thlen hunah mi hre reng ang che,” tiin a dîl a. He milema i hmuh ang hian, Isua chuan chu mi sual chu a bia a ni. A hnêna Isua sawi chu i hria em?— * “Ka hnênah Paradis-ah i awm ve ang,” tiin thu a tiam a ni.

Paradise chu eng ang nge a nih i rin?— A chhânna dik kan hriat theih nân Pathianin mihring hmasa ber, Evi leh Adama tâna a siam Paradise chungchâng i lo sawi ang. Chu Paradise chu khawiah nge a awm? Leiah nge, vânah?—

Leiah a awm i tih chuan i ti dik a ni. Chuvângin, mi sual chu “Paradise-a” awm tûr anga kan ngaihtuah chuan, he lei Paradise-a a chan huna awm tûr angin kan ngaihtuah tûr a ni. Chu Paradise chu eng ang nge a nih ang?— I lo en ang aw.

Pathian Jehova’n nupa tuak hmasa ber Evi leh Adama a siam hnu khân, he leia paradis-ah chuan a dah thu Bible-in a sawi a ni. Chu chu ‘Eden huan’ tia koh a ni a. ‘Eden huan’ mawi dân tûr chu i mitthla thei em?— Tûn laia mite’n an hmuh tawh zawng zawng aia hmun ṭha leh mawi a ni ngei tih a chiang a ni.

Eng nge i ngaih dân? A thil sual tih avânga pawi titu mi sual nên Isua chu he leiah hian a awm ang em?— Awm lo vang, Isua chuan vânah Lal anga rorêlin, lei Paradise hi a rawn awp dâwn a. Chuvângin, Isua hnênah mi sual a awm ang tih awmzia chu thihna ata a kai tho ang a, ani chu Paradise-ah ṭha taka enkawlin a awm dâwn tihna a ni. Mahse, engvângin nge Isua chuan chu  mi sual chu Paradise-a a awmtîr ang?— Chu mi chungchâng chu i lo sawi ang.

Chu mi sual chuan thil ṭha lo tak zawng a ti ngei mai. Mahse, leia mi tlûklehdingâwn tam takte pawhin chutiang thil ṭha lo chu an ti ve tho a ni. Mahse, an zînga a tam zâwkte’n thil sual an tih chhan chu Jehova’n an tih atâna a duh leh a chanchin zirtîr an la nih ngai loh vâng a ni.

Chuvângin, Isua thinga khaikân a nih laia a biaka pawh kha tiamin, chutiang mite chu he lei Paradise-a kaihthawh leh an ni ang. Anni chu Pathian duhzâwng zirtîr an ni ang a. Chutih hunah chuan Jehova an hmangaihna chu an târ lang thei ang.

An târ lan theih dân chu i hria em?— Pathianin ti tûra a duhte tiin an târ lang thei a ni. Chutih huna Paradise-a nun a, Jehova leh mi dang hmangaihtute zînga awm chu a va ropui dâwn em! (w13-E 06/01)