1. (a) Kristian chuan Jehova mizia engte nge a ngaihtuah mai theih? (b) Engtin nge Pathian mizia bih chianna chu kan hlâwkpui ang?

JEHOVA chungchâng i ngaihtuah hian a mizia engte nge i rilruah lo lang? Kan zînga tam tak chuan hmangaihna te, rorêl dikna te, finna te, thiltihtheihna te chu kan ngaihtuah ngei ang. Mahse, Jehova chuan mize duhawm tam tak a nei tih kan hria a. A nihna takah chuan, Jehova mize hrang hrang 40 aia tam ziah chhuah theih a ni a, chûngte chu kan thu leh hlaahte chuan tihchhuah a ni. Mi mal ang emaw, chhûngkua ang emawa thu leh hla chhuah hmanga kan hmuh chhuah tûr Jehova mizia mi hîp thei takte hlutzia chu han ngaihtuah teh! Eng kawngtein nge chutianga zirna chu kan hlâwkpui theih ang? Chu chuan kan Pa vâna mi kan ngaihhlutna a tizual thei a. Jehova kan ngaihhlutna a zual poh leh amah hnaih leh entawn kan tumna pawh a zual sauh a ni.—Jos. 23:8; Sâm 73:28.

2. (a) Jehova miziate kan ngaihhlut theih dân entîrna pe rawh. (b) Eng nge kan ngaihtuah ang?

² Mahse, thil engemaw “ngaihlu” tih awmzia hi eng nge ni? Heta kan hman tûr thu mal angin, thil engemaw a hlutna âwm tâwk hriatna a ni. Chutiang ngaihhlutna chu a zual tial tial thei a. Entîr nân: Chawhmeh chi thar pakhat chu a rim tui tak han hnîm a, a tuina hriat nâna kan han tem chhin hian kan duh chhovin kan ngaihlu tial tial a, a hnuah mahni ngeiin kan siam ve ta ṭhîn a ni. Chutiang bawkin, Pathian mize pakhat chu kan han hriat ṭan a, kan ngaihtuah zui a, kan nuna kan entawn hian kan ngaihhlutna chu kan tizual tial tial a ni. (Eph. 5:1) He thuziak leh a dawta thuziak pahnihte tum ber chu Pathian mize bulpuite aia kan ngaihtuah vak ṭhin loh a mize dangte ngaihhlutna tihzual a ni a. A mize tinte chu: Eng nge a awmzia? Engtin nge Pathian Jehova’n chu mizia chu a târ lan? He mizia bîkah hian engtin nge Jehova chu kan entawn theih ang? tihte kan ngaihtuah ang.

3, 4. (a) Mi tuemaw pan nuam tak nihna chu engtin nge i hrilhfiah ang? (b) Engtin nge Jehova’n pan nuam tak a nihna chu a târ lan?

³ Pan nuam tak nihna mizia chu i lo sawiho phawt ang u. Mi tuemaw pan nuam tak a nihna chu engtin nge i hrilhfiah ang? ‘Mi ngilnei, mi ṭanpui tûra inpeih reng, biak awlsam tak,’ niin i sawi mai thei a. Mi tuemaw pan nuam a nih leh nih loh chu a thu sawi ngaihthlâkna leh a lan dân enna—a zaizir te, a hmêl lan dân te, leh chêtze dang dangte—aṭangin i hre thei ṭhîn a ni.

⁴ Engtin nge Jehova’n pan nuam tak a nihna chu a târ lan? Kan lei leh vân zau tak Siamtu engkimtithei ni mah se, Jehova chuan kan ṭawngṭaina ngaihthlâk leh chhân lêt chu a duhin, a châk bawk tih min tiam a. (Sâm 145:18; Isaia 30:18, 19 chhiar rawh.) Eng hunah leh khawi hmunah pawh Pathian chu kan duh chen chen kan be thei a. Kan pan avângin min hau ngai dâwn lo tih hriain, amah chu zalên takin kan pan thei a ni. (Sâm 65:2; Jak. 1:5) Pathian Thu chuan Jehova’n amah pan tûra min duhzia chu mihringte ṭawngkamin a târ lang a. Entîr nân, fakna hla phuahtu Davida chuan ‘LALPA mit chuan min en ṭhîn a,’ ‘a kut ding lamin min kai ṭhîn’ tih a ziak a ni. (Sâm 34:15; 63:8) Zâwlnei Isaia chuan: “Berâm note chu a bânin a pawm khâwm ang a, a ângchhûnga dahin a kalpui ang,” tia sawiin Jehova chu berâm vêngtu nên a khaikhin a ni. (Is. 40:11) Han mitthla teh! Berâmte ngaihsak tak berâm vêngtu ângchhûnga berâm no awm ang maiin Jehova chuan amah kan hnaih a duh a ni. Pan nuam tak Pa kan va nei tak êm! Hemi chungchângah hian engtin nge Jehova chu kan entawn theih ang?

5. Engvângin nge upate tân pan nuam tak nih chu a pawimawh?

⁵ Tûn hnai mai khân khawmualpui hrang hranga awm Thuhretu ṭhahnemngai takte chu, “Upain a neih miziate zîngah a eng nge i hlut ber?” tia zawh an ni a. An vai deuh thaw  chuan, “Pan nuam tak a nihna,” tiin an chhâng a ni. Kristian tinte chuan chu mizia chu an neih a ngai ngei mai; mahse, upate chu pan nuam tak an nih a pawimawh lehzual a ni. (Is. 32:1, 2) He mizia hi pawimawh hle nia a hriat chhan sawiin unaunu pakhat chuan: “Upa chu pan nuam a nih chauhvin, mize ṭha dang a neih mai theihte chu kan hlâwkpui thei ang,” a ti a. Chu thlîr dân dikna chu i hmu thiam em? Mahse, engin nge mi chu pan nuam tak nihtîr?

6. Pan nuam tak nih theih dân ber chu eng nge?

⁶ Pan nuam tak nih theih dân ber chu mite chunga tih tak zeta ngaihsakna lantîr hi a ni a. Upa chuan mi dangte a ngaihsak a, an tâna inpêk a inhuam chuan, naupangte pawh tiamin a Kristian unaute chuan chu mizia chu an hre thei ngei ang. (Mk. 10:13-16) Kum 12 mi Carlos-a chuan: “Hall chhûnga upate nui hmêl leh ngilnei tak chu ka hmu a, chu chu anmahni ka duh chhan a ni,” tiin a sawi. Upa tân chuan pan nuam tak a nih thu sawi mai chu a tâwk lo va, chu mizia chu a lantîr ngei a ngai a ni. (1 Joh. 3:18) Chu chu engtin nge an tih theih ang?

7. Engvângin nge inkhâwmpui badge belna chuan titina a thlen ṭhin a, chuta ṭang chuan eng nge kan zir theih?

⁷ He khaikhinna hi han ngaihtuah teh. Tûn hnai mai khân unaupa pakhat chuan ram danga inkhâwmpui a chhim hnua thlawhnaa a thlawh hâwnnaah inkhâwmpui badge chu a la bel zêl a. Thlawhna chhûnga thawk mi pakhat chuan a badge bela “I Ram Lo Thleng Rawh Se!” tih inziak chu a hmu a, unaupa hnênah chuan “Ni e, lo thleng rawh se—hemi chungchâng hi kan sawi belh a ngai a ni,” a ti a. A hnuah chuan, an titi ta a, chu pa chuan lâwm takin kan magazine-te chu a dawng ta a ni. Kan zînga tam tak pawhin chutiang thil tawn chu kan nei a. Engvângin nge inkhâwmpui badge chuan titina a thlen fo ṭhin? Chu badge belna chu, “Min pan hreh suh. Ka kalna tûr mi zâwt rawh,” tia mite hnêna hrilhna ang a ni a. Badge chu mite hnêna kan rinna chungchâng hrilh kan inhuamzia târ lanna a ni. Chutiang bawkin Kristian upate chuan an Kristian unaute hnênah: “Min pan hreh suh,” tia hrilh an duhzia târ lan an duh a ni. Chutianga an târ lan theih dân ṭhenkhat chu eng nge ni?

8. Engtin nge upate chuan mi dangte ngaihsak tak zetna an lantîr a, chu chuan engtin nge kohhranah nghawng a neih?

⁸ Ram hrang hrangah tih dân a inang lo thei a; mahse, a tlângpuiin kan unaute hlim taka kan nuih a, lo lawm nâna kan chibai a, hahdam taka kan lo biak hian anmahni kan ngaihsak tak zet tih kan lantîr a ni. Chu chu tuin nge ti hmasa ang? Isua entawn tûr siam chu lo chhinchhiah teh. A zirtîrte a hmuhin, “Isua chu an hnênah a lo kal a, anniho chu a bia,” tih Matthaia chuan a sawi. (Mt. 28:18) Chutiang bawkin, tûn laia upate pawhin an Kristian unaute chu panin, an be hmasa ṭhîn a ni. Chu chuan engtin nge kohhranah nghawng a neih? Kum 88 mi pioneer unaunu pakhat chuan: “Kingdom Hall ka luha upate’n hlim hmêl taka min nuih a, mi tichak thei tak thute min hrilhna chuan anni chu min ngainattîr a ni,” tiin a sawi. Unaunu rinawm tak pakhat pawhin: “Thil tê thamtê anga ngaih theih ni mah se, upain inkhâwmnaa hlim hmêl pu chunga min lo lawm hian chu chuan ka tân awmzia a nei thûk hle a ni,” tiin a sawi ve bawk.

9, 10. (a) Eng entawn tûr ṭha nge Jehova’n a siam? (b) Engtin nge upate chu mi dangte pan theiha an insiam ang?

⁹ Pan theiha kan awm loh chuan pan nuam kan ni thei lo tih a chiang hle a. Jehova chuan hemi chungchângah hian entawn tûr ṭha tak a siam a ni. “Ani chuan min hlat lo ṭheuh si a.” (Tirh. 17:27) Mi dangte tâna upate pan theih an nih dân kawng khat chu Kristian inkhâwm hma leh hnua an unau—apui apangte be tûra hun insiam hi a ni. Pioneer thawk  unaupa chuan: “Upain ka dam ṭhat leh ṭhat lohte min zawh hnua ka chhânna a nghah hian ngaihhlut niin ka inhria,” tiin a sawi. Kum 50 vêl lai Jehova rawng lo bâwl tawh unaunu pakhat chuan: “Inkhâwm hma leh hnua min biak nâna an hun petu upate chuan hlu nia inhriatna min neihtîr a ni,” tiin a sawi bawk.

¹⁰ Berâm vêngtu Kristiante chuan mawhphurhna dang tam tak pawh an nei ngei mai. Mahse, inkhâwmnaa an tum ber tûr chu berâmte ngaihsak a ni.

11, 12. (a) Duhsak bîk neih lohnaah chuan eng nge tel? (b) Engtin nge Bible chuan Jehova chu duhsak bîk nei lo tih a târ lan?

¹¹ Jehova mize duhawm tak dang leh chu duhsak bîk neih lohna hi a ni. Duhsak bîk nei lo tih awmzia chu eng nge ni? Chutah chuan dik taka thil tihna a tel a, inpâwng huatna emaw, thleibîk neihna emaw laka fihlîmna a tel bawk a ni. Duhsak bîk neih lohna dik takah chuan thil pahnih: mite chunga rilru put hmang leh thiltih a tel a. Engvângin nge chu thil pahnih chu a ngaih? Mi chu duhsak bîk nei lo a nih chauhvin mi zawng zawngte chu thleibîk nei lova a cheibâwl theih dâwn vâng a ni. Kristian Grik Pathian Lehkha Thu-ah chuan “duhsak bîk nei lo” nihna tak chu “mi hmêl en” lo tihna a ni a, a awmzia chu hmêl lan dân leh dinhmun azir ni lovin, an mizia azirin an phû tâwk anga zahna lantîr tihna a ni. (Tirh. 10:34; Kingdom Interlinear) Chuvângin, duhsak bîk nei lo chuan mite chu an pâwn lam lan dân leh dinhmun azir ni lovin, an mizia azirin an phû tâwk ang zahna a lantîr ang.

¹² Jehova chu duhsak bîk neih lohna kawnga entawn tûr ropui ber a ni. A Thu chuan “mi duhsak bîk a nei lo” tih a sawi a. (Tirhkohte 10:34, 35; Deuteronomy 10:17 chhiar rawh.) Mosia hun laia thil thleng chuan chu chu a târ lang a ni.

13, 14. (a) Zelophehada fanu pangate chuan eng dinhmun nge an tawn? (b) Engtin nge Jehova chuan duhsak bîk a nei lo tih a târ lan?

¹³ Israel mite’n Ram Tiam an luh hma lawk khân pasal la nei lo unau pangate chuan harsatna an tâwk a. Chu chu eng nge? Israel chhûngkaw dangte ang bawkin an chhûngkua pawhin an pa chanpual ram chu an chang ve dâwn tih an hria a. (Num. 26:52-55) Mahse, Manassea hnama mi, an pa Zelophehada chu a thi tawh a. An hnam dânah chuan, an chanpual ram chu Zelophehada fapate hnêna hlan chhâwn tûr ni mah se, ani chuan fanute chauh a nei a ni. (Num. 26:33) Ram rochung tûr fapa an awm loh chuan an chhûngkaw ram chu an chhûngkhatte hnêna pein, an fanute chu chhûngkaw ro chang lovin an dah mai dâwn em ni?

¹⁴ Unau pangate chu Mosia hnênah kalin: “Fapa a neih loh avâng maiin engah nge kan pa hming chu a thlahte zîng ata a bo vang?” tiin an zâwt a. “Kan pa unaute zîngah chanvo min pe ve rawh,” tiin an ngên a ni. Mosia  chuan ‘dânin tumah ngaihthiamna a nei bîk lo,’ tiin a chhâng mai em? Chhâng mai lo, an thu chu “LALPA hmaah a thlen a.” (Num. 27:2-5) Eng chhânna nge a hmuh? Jehova chuan Mosia hnênah: “Zelophehada fanute chuan an ti dik a ni: an pa unaute zîngah chanvo i siam ngei tûr a ni a, an pa chanvo chu i pe tûr a ni,” tiin a hrilh a. Jehova chuan chu aia tam pawh chu a ti a ni. Chu ngaihthiamna chu dânah telhtîrin Mosia chu: “Mi, fapa nei lova a thih chuan a ro chu a fanute in pe tûr a ni,” tiin a hrilh a. (Num. 27:6-8; Jos. 17:1-6) Chuta ṭang chuan Israel hmeichhia chutiang harsatna nei zawng zawngte chuan rochan an nei thei dâwn ta a ni.

15. (a) Engtin nge Jehova chuan dinhmun chhe taka awm a mite pawh a cheibâwl? (b) Eng Bible thuziak dangin nge Jehova duhsak bîk neih lohna târ lang?

¹⁵ Chu thutlûkna chu a ngilneihthlâkin, duhsak bîk neih lohna a va ni êm! Jehova chuan chûng hmeichhia, dinhmun chhe taka awmte chu dinhmun ṭha zâwka ding Israel hmeichhiate ang thovin zahawm takin a cheibâwl a. (Sâm 68:5) Hei hi Jehova’n a chhiahhlawh zawng zawngte duhsak bîk nei lova a cheibâwlzia târ langtu Bible-a kan hmuh thutak duhawm tam takte zînga pakhat mai a ni.—1 Sam. 16:1-13; Tirh. 10:30-35, 44-48.

16. Engtin nge duhsak bîk neih lohna chu kan neih chhoh theih ang?

¹⁶ Jehova duhsak bîk neih lohna chu engtin nge kan entawn theih? Duhsak bîk neih lohna chuan hmêlhmang pahnih a nei tih hre reng ang che. Duhsak bîk nei lo kan nih chauhvin mi dangte chu thlei bîk nei lovin kan cheibâwl thei ang. Kan vai hian rilru inhawng tak leh duhsak bîk nei lo ni anga inngaih chu kan duh ṭheuh va. Chuti chung chuan mahni rilru put hmang dik taka chhût erawh chu a awlsam ṭhîn lo tih i pawm ngei ang. Chuvângin, duhsak bîk nei lo nia hriat kan nih leh nih loh hre chhuak tûrin eng nge kan tih theih ang? Isua chuan mite’n amah an sawi dân hriat a duh khân, a ṭhian rin takte hnênah chuan: “Miten Mihring Fapa hi tunge a ni an tih?” tiin a zâwt a ni. (Mt. 16:13, 14) Hemi kawngah hian Isua chu kan entawn dâwn lâwm ni? Duhsak bîk nei lo nia hriat hlawh i nih leh nih loh chu dik taka thil sawi ṭhîn nia i hriat i ṭhian tuemaw chu i zâwt thei ang. Ani chuan chi, hnam, a nih loh leh dinhmun avânga mite thliar hran deuhna nei angin ngai ta che se, eng nge i tih ang? Pathian Jehova hnênah tih tak zeta ṭawngṭaiin i rilru put hmang chu hrilh la, duhsak bîk a neih lohna rilru put hmang ang chu nei lehzual thei tûra ṭanpui tûr chein ngên ang che.—Mt. 7:7; Kol. 3:10, 11.

17. Eng kawngtein nge mi dangte chu duhsak bîk nei lova kan cheibâwl theih?

¹⁷ Kristian kohhranah chuan kan unau zawng zawngte chu zah tak leh hmangaih taka cheibâwl vekin Jehova entawn kan duhzia kan târ lang a ni. Entîr nân, khualchhâwn thiamna kan lantîr hunah pawh kan seilen dân nêna inang lo tak takte leh rethei te, fahrah te, a nih loh leh hmeithaite pawh tiamin unau zawng zawngte sâwm kan duh a. (Galatia 2:10; Jakoba 1:27 chhiar rawh.) Chu bâkah, Lalram thu hrilhnaah ram dang mite pawh tiamin, dinhmun inang lo tak takte hnênah pawh chanchin ṭha chu duhsak bîk nei lovin kan hrilh vek a ni. Bible ṭanchhan thu leh hla chhuahte chu ṭawng 600 vêl laia kan hmu thei hi kan lâwm hle a ni. Duhsak bîk neih lohzia lantîrna finfiahtu a va ni tak êm!

18. Jehova pan nuam a nihna leh duhsak bîk a neih lohna chu i ngaihlu tih engtin nge a mi mal taka i târ lan ang?

¹⁸ Jehova chu pan nuam a nihzia leh duhsak bîk nei lo a nihzia ngaihtuah nâna hun kan hman hian, amah kan ngaihhlutna chu a zual sauh a. Chu chuan kan unaute leh thu hrilhnaa kan tawnte kan cheibâwl dânah Jehova miziate entawn duh tak zetna min neihtîr tûr a ni. (w13-E 06/15)