1, 2. Jehova ṭhiante chuan eng hun remchâng nge an neih?

KRISTIAN nu pakhat Monika-i chuan heti hian a sawi a ni: “Ka pasal nên chuan kum 35 dâwn lai kan innei tawh a. Kan inhre chiang hle a ni. Mahse, chûng kumte a liam hnu pawh chuan thil thar kan la inzir tawn zêl a ni!” tiin. Chutiang chu inneihna leh inṭhianna tam takah pawh a thleng ve tih rinhlelh rual a ni lo.

² Kan hmangaihte hriat chian lehzual chu nuam kan ti a. Mahse, inṭhianna kan neih theih zawng zawngah Jehova nêna kan inṭhianna aia pawimawh zâwk a awm lo. A chanchin chu kan hre kim ngai lo vang. (Rom 11:33) Chatuanin Pathian Jehova miziate zir theihna hun remchâng kan nei ang a, chûng a miziate chu kan ngaihlu telh telh bawk ang.—Thur. 3:11.

3. He thuziakah hian eng nge kan ngaihtuah ang?

³ Thuziak hmasa chuan Jehova pan nuam tak a nihna leh duhsak bîk a neih lohna ngaihlu lehzual tûrin min ṭanpui tawh a. Tûnah chuan Jehova mize duhawm tak dang pahnih—a thilphalna leh nunnêmna chu i lo ngaihtuah ang u. Chutianga kan ngaihtuah chuan, ‘LALPA chu engkim chungah pawh a ṭha a; a lainatnate chu a thil siam zawng zawng chungah a awm,’ tih chiang lehzualin kan lo hre dâwn a ni.—Sâm 145:9.

4. Thilphalna dik tak awmze ril zâwk chu eng nge?

⁴ Thilphal tih awmzia chu eng nge ni? Tirhkohte 20:35-a chhinchhiah Isua thu sawi: “Englo lâk aiin pêkin lukhâwng a nei zâwk,” tihah hian a chhânna kan hmu a ni. Isua chuan he thu sawi tluangtlam tak hmang hian thilphalna dik tak, awmze ril zâwk chu a târ lang a. Mi thilphal tak chuan a hun te, a chakna te, leh a thil neihte chu mi dangte hlâwkpui tûrin phal tak leh lâwm takin a hmang ṭhîn. Thilphalna chu thilpêk len lamah ni lovin, a  petu rilru put hmang aṭanga teh a ni zâwk ṭhîn. (2 Korinth 9:7 chhiar rawh.) Kan Pathian Jehova aia thilphal zâwk tumah an awm lo.

5. Eng kawngin nge Jehova chuan a thilphalna a târ lan?

⁵ Engtin nge Jehova’n thilphalna a lan chhuahtîr? Ani chuan amah la be rih lote pawh tiamin, mihring zawng zawngte mamawh chu a pe a. Jehova chu ‘engkim chungah a ṭha’ tak zet a ni. Ani chuan “mi sualte leh mi ṭhate chungah chuan a nî a chhuahtîr ṭhîn a, mi felte leh mi fel lote chungah pawh ruah a s leh mṭhîn.” (Mt. 5:45) Chuvâng chuan a ni tirhkoh Paula’n ring lotute hnêna thu a sawi pawh khân, Jehova chuan “thil a ti ṭha ṭhîn a, vân ata ruahte leh kum ṭhat kumte a pe che u a, in rilru ei tûr leh lâwmnain a tikhah ṭhin che u kha,” tiin a sawi thei a ni. (Tirh. 14:17) Jehova chu mihring zawng zawng chungah a thilphal tih a chiang hle.—Lk. 6:35.

6, 7. (a) Jehova chuan tute mamawh pêk nge nuam a tih lehzual? (b) Pathianin amah betu rinawmte mamawh a pêk dân entîrna pe rawh.

⁶ Jehova chuan amah betu rinawmte mamawh pêk chu nuam a ti lehzual a. Lal Davida chuan heti hian a sawi a ni: “Naupang ka lo ni tawh a, tûnah tar ka lo ni ta a, nimahsela mi fel chu kalsana a awm ka hmu ngai lo va, a thlahte chaw khawn pawh ka hmu ngai hek lo,” tiin. (Sâm 37:25) Kristian rinawm tam takte chuan chutianga Jehova enkawlna lan chhuahna chu an tawng a ni. Entîrna pakhat lo ngaihtuah ta ila.

⁷ Kum engemaw zât kaltaah khân, hunbi kima rawngbâwltu Nancy-i chu dinhmun harsa takah a ding a. Heti hian a sawi a ni: “Ka in luah man $66 chu atûka pêk ngei a ngai a. Chu pawisa neih theih dân tûr rêng chu ka hre lo. Ka harsatna chungchângah chuan ka ṭawngṭai a, tichuan waitress hna thawk tûrin ka chhuak leh ta a. Kan buai vak loh lai chawlhkâr a nih ṭhin avângin chu mi tlai chuan lâwmman (tips) tam tak dawn ka inbeisei lo a ni. Mak tak maiin chu mi zân chuan ka thawhna restaurant-ah chuan mi tam tak an rawn châwl a. Bân a lo hun meuh chuan, ka lâwmman dawnte chu ka han chhiar khâwm a, $66 a lo tling dêr mai,” tiin. Nancy-i chuan a mamawh zât chiah mai chu Jehova’n phal takin a pe tih a ring tlat a ni.—Mt. 6:33.

8. Jehova’n phal taka min pêk thilpêk ropui ber chu eng nge?

⁸ Jehova’n phal taka min pêk thilpêk ropui ber chu mi tin tâna neih theih a ni a. Chu chu eng nge? A Fapa tlanna inthawina a ni. Isua chuan: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tiin a sawi. (Joh. 3:16) Heta “khawvêl” tia sawi hi mihringte sawina a ni. Ni e, Jehova’n phal taka min pêk thilpêk ropui ber chu a pawm duh apiangte tâna neih theih a ni a. Isua chunga rinna lantîrtute chuan nunna—chatuan nunna chu an nei ang! (Joh. 10:10) Hei aia Jehova thilphalzia finfiahna ropui zâwk a awm thei dâwn em ni?

9. Engtin nge Jehova thilphalna chu kan entawn theih ang?

⁹ Engtin nge Jehova thilphalna chu kan entawn theih ang? Jehova chuan kan ‘lâwmna tûrin tam takin min pe a,’ chuvângin, mi dangte chungah pawh “thil phala thawhlâwm” thawh kan peih tûr a ni, chutiang chuan an lâwmna kan awmtîr a. (1 Tim. 6:17-19) Kan thil neihte chu kan hmangaihte hnêna thilpêkte pêk nân leh ṭanpui ngaite ṭanpui nân lâwm takin kan hmang a ni. (Deuteronomy 15:7 chhiar rawh.) Thil phal tak ni reng tûrin engin nge min ṭanpui thei? Kristian ṭhenkhat chuan he tih dân ṭangkai tak hi an hmang a ni: Thilpêk an dawn apiangin mi dangte hnênah pawh pêk ve theihna hun remchâng zawn chu. Kristian kohhranah unau thilphal tam takte an awm a ni.

10. Thilphalna kan lantîr theih dân kawng ṭha ber pakhat chu eng nge?

¹⁰ Thilphalna kan lantîr theih dân kawng ṭha berte zînga pakhat chu ṭawngkam leh thiltih hmanga mahni inpêkna hi a ni. Chu chu engtin nge kan tih theih? Mi dangte ṭanpui nân leh fuih nâna kan hun, leh tha leh zungte hmanna hmangin a ni. (Gal. 6:10) Hemi chungchânga kan nih dân enfiah nân, hetiang hian kan inzâwt thei a ni: ‘Mi dangte tâna inpêk huam ang leh an thil lungkhamte ngaihthlâksaktu angin mite’n min ngai em? Mi tuemawin hna thawhpui tûra min sâwm hunah a theih phawt chuan ka pui ṭhîn em? Engtik khân nge chhûngkaw zînga mi emaw, kohhrana unau emaw chu tih tak zeta ka fak hnuhnûn ber?’ tiin. ‘Thil kan pêk’ ṭhin hian Jehova leh kan ṭhiante kan hnaih lehzual ngei ang.—Lk. 6:38; Thuf. 19:17.

11. Jehova laka kan thilphal theih dân kawng ṭhenkhat chu eng nge?

¹¹ Jehova lakah pawh thilphalna kan lantîr ve thei a. Pathian Lehkha Thu chuan: ‘I sumin LALPA chawimawi rawh,’ tiin min fuih a. (Thuf. 3:9) Chûng ‘sum,’ a nih loh leh thil  hluteah chuan a rawngbâwl nâna phal taka kan hman theih, kan hun, tha leh zung, leh thil neihte a tel a ni. Naupangte pawhin Jehova laka thilphal an zir ve thei a. Pa pakhat Jason-a chuan: “Kan chhûngkuain Kingdom Hall-a thawhlâwm kan thawh hian kan fa, nupangte chu thawhlâwm bâwmah pawisa kan thlâktîr ṭhîn a. Thawhlâwm an han thlâk hian ‘Jehova hnêna thil engemaw an pêk’ avângin anni chu an hlim hle a ni,” tiin a sawi. An naupan laia Jehova hnêna hlim taka thil pe ṭhîntute chuan an puitlin hnuah pawh phal takin an pe chhunzawm tlângpui a ni.—Thuf. 22:6.

12. Nunnêm tih awmzia chu eng nge?

¹² Jehova mize duhawm tak dang leh chu nunnêmna hi a ni a. Nunnêm tih awmzia chu eng nge ni? Atîra ziak thu mal “nunnêmna” tia lehlin ṭhin hi New World Translation chuan “inphahhniam” tiin a dah a. (Tit. 3:1, 2; ftn) Mi nunnêm chuan a ziak ang thlapa dân hman ziah a phût tlat lova; khirh lutuk, khauh lutuk, a nih loh leh nunrâwng tak a ni hek lo. Chu ai mah chuan, mi dangte a dâwrnaah zaidam leh an dinhmunte ngaihtuah tel a tum zâwk a. Mi dangte thu sawi ngaihthlâk a duh a, a âwm a nih chuan an duhzâwng laka inphahhniam, a nih loh leh tihhlawhtlinsakin, ama thil phût chu siamrem a inhuam a ni.

13, 14. (a) Engtin nge Jehova chuan nunnêmna a lantîr? (b) Pathianin Lota a dâwr dân aṭangin nunnêmna chungchângah eng nge kan zir theih?

¹³ Engtin nge Jehova’n nunnêmna a lantîr? A chhiahhlawhte rilru tûr a ngaihtuah a, an dîlna chu a tihhlawhtlinsak ṭhîn. Entîr nân, Pathian Jehova’n mi fel Lota a dâwr dân kha ngaihtuah teh. Ani chuan Sodom leh Gomorra tihchhiat a tum khân, Lota hnênah chuan tlânga tlân chhe tûrin kaihhruaina chiang tak a pe a. Mahse, ani chuan chhan engemaw avângin hmun danga tlân chhiat a dîl a ni. Han ngaihtuah teh—Lota chuan Pathian hnênah A kaihhruaina thlâk danglam tûrin a dîl a nih chu!—Genesis 19:17-20 chhiar rawh.

¹⁴ Mi ṭhenkhat tân chuan Lota chu chak lo emaw, thu âwih lo emaw anga ngaih mai chu a awl thei a ni. Jehova chuan khawi hmunah pawh Lota chu a chhanhim theih avângin Lota chuan hlauh chhan tûr a nei lo. Amaherawhchu, a hlauh tlat si avângin Jehova chu a inphahhniam, a nih loh leh Lota duh dân chu a tihhlawhtlinsak a. Tihboral a tum khawpuiah chuan tlânchhiat a phalsak ta a ni. (Genesis 19:21, 22 chhiar rawh.) Jehova chu a khirh lutuk lova, a khauh lutuk lo tih a chiang hle. Ani chu a inphahhniamin, a nunnêm a ni.

15, 16. Engtin nge Mosia dân chuan Jehova nunnêmna a lantîr? (A thupui bula milem en rawh)

¹⁵ Mosia Dâna lang Jehova nunnêmna entîrna dang leh hi han ngaihtuah teh. Israel mi chu inthawi nâna berâm no emaw, kel no emaw hlân tûra a retheih lutuk chuan, ṭhuro pahnih emaw, parva pahnih emaw a hlân thei ang. Mahse, Israel mi chu a retheih lutuk avânga parva pahnih pawh a neih zawh loh chuan engtin nge ni ang? Chutiang a nih chuan, Jehova chuan chu mi rethei takin chhangphut tlêmte a pêk chu a phalsak a ni. Amaherawhchu, he thil pawimawh tak hi chhinchhiah ang che: chu chu, chhangphut apiang ni lovin, “chhangphut dip tak,” mikhual zahawmte tâna an hman ṭhin ang a nih a ngai a ni. (Gen. 18:6) Chu chu engvângin nge thil pawimawh a nih?—Leviticus 5:7, 11 chhiar rawh.

¹⁶ Israel mi rethei tak angah han inmitthla teh. Chhangphut tlêmte kenga biak bûka inthawina hlân tûra i lo kal chuan, Israel mi hausa zâwkte’n ran an rawn ken chu i hmu a. Inthawi nâna chhangphut i ken chu pawimawh tham lo anga i ngaih avângin i zak mai thei a ni. Tichuan, Jehova mit hmuhah chuan i thil hlan chu a pawimawh a ni tih i hre chhuak ta a. Engvângin nge? Pakhatnaah chuan, Jehova’n chhangphut chu a dip ṭha tak a phût a. Chu chu, Jehova’n Israel mi rethei zâwkte hnênah:  ‘Mi dangte hlan ang i hlân thei lo tih ka hria a; mahse, i neih ṭhat ber min hlân tih ka hre bawk a ni,’ tia a sawi ang a ni. Jehova chuan a chhiahhlawhte tlin tâwk leh dinhmun chu ngaihtuahin nunnêmna a lantîr tak zet a ni.—Sâm 103:14.

17. Jehova pawm theih rawngbâwlna chu engtin nge i hriat chian theih?

¹⁷ Jehova nunnêmna chuan thinlung zawng zawnga a rawng kan bâwlna a pawm tih kan hriatna aṭangin thlamuanna kan nei thei a. (Kol. 3:23, 24) Italy rama unaunu tar tawh tak pakhat Constance-i chuan heti hian a sawi a ni: “Min Siamtu chungchâng mite hnêna hrilh chu nuam ka tih ber a ni a. Chuvângin, thu ka hrilin, mite Bible ka zirtîr chhunzawm zêl a ni. Ka hrisêl loh avângin ka thawk tam thei lo va; chuvâng chuan pawi ka ti ṭhîn. Mahse, Jehova chuan ka tih theih tâwk a hria a, ka theih ang ka tih chu a ngaihlu tih ka hria a ni,” tiin.

18. Nu leh pate’n Jehova an entawn theih dân kawng khat chu eng nge?

¹⁸ Jehova nunnêmna chu engtin nge kan entawn theih ang? Jehova’n Lota a dâwr dân kha han ngaihtuah lêt leh teh. Jehova chu thuneihna changtu a ni a; mahse, ngilnei takin Lota’n a rilru a sawi chhuah chu a ngaithla a. Lota dîlna chu a phalsak ta a ni. Nu leh pa i nih chuan Jehova chu i entawn thei ang em? I fate ngenna chu ngaithlain, a inâwm a nih chuan an duh ang chu i remtihsak thei ang em? Hemi nêna inmilin Vênnainsâng, September 1, 2007 chhuak chuan nu leh pa ṭhenkhatte’n chhûngkaw dân an zam hunah an fate râwn an duh mai theih thu a târ lang a ni. Entîr nân, nu leh pate chuan an fate ina an haw hun tûr bituk chungchângah duh thlan theihna an nei a. Chuti chung pawhin, Kristian nu leh pate chuan ina thlen hun tûr an ruat chungchângah an fate’n ngaih dân an sawi chu an ngaihthlâksak mai thei bawk. Thil ṭhenkhatah chuan, an fate duhzâwng chu Bible thu bulte nên a inkalh loh phawt chuan nu leh pate chuan an phalsak mai thei a ni. Nu leh pate chuan chûng chhûngkaw dân zam chungchânga an fate ngaih dân an ngaihtuah tel chuan, naupangte chuan dân zamte chu an hre thiamin, an zâwm duh zâwk thei tih an hria ang.

19. Engtin nge upate chuan Jehova nunnêmna entawn an tum tlat theih?

¹⁹ Kohhran upate chuan an Kristian unaute dinhmun chu hre thiamin Jehova nunnêmna entawn an tum tlat a. Jehova chuan Israel mi rethei zâwkte thil hlan pawh a hlut tih ngaihtuah lêt leh ang che. Chutiang bawk chuan, unau ṭhenkhat chu hrisêl lohna emaw, kum upatna emaw avângin rawngbâwlnaah an tih theih a tlêm hle a. Chûng unau duhawm takte chu an tlin tâwk a tlêm avângin lunghnual ta se engtin nge ni ang? Upate chuan theih tâwpa rawng an bâwl avângin Jehova chuan a hmangaih tih ngilnei takin anni chu an hriattîr thei a ni.—Mk. 12:41-44.

20. Nunnêmna chu Pathian rawngbâwlnaa inhman hrehna a ni em? Hrilhfiah rawh.

²⁰ Nunnêmna chu Pathian rawngbâwlnaa inhman hrehna mizia, mahni inkhawngaihna nêna hriat pawlh chu kan duh lo ngei ang. (Mt. 16:22) Mahni inthlahdahin, kan rilru put hmang chu nunnêm vâng nia sawiin, insawi thiam nâna hman chu kan duh lo a ni. Chu ai chuan, kan vai hian Lalram hmakhaw thlâwptu nih chu kan ‘tum hrâm hrâm’ zâwk a ngai a ni. (Lk. 13:24) Thu bul pahnih inbûk tâwktîr chu kan tum tlat a. Kawng khatah chuan, kan rawngbâwlnaah inthlahdah lovin, theih tâwp kan chhuah a. Kawng lehlamah chuan, Jehova’n kan pêk theih aia tam min dîl ngai lo tih kan hria a ni. Kan theih tâwp kan chhuah hian, ani chu a lâwm tih kan chiang thei a. Chutianga lâwm nachâng hria leh nunnêm Pu ber rawng bâwlsak chu nuam kan ti a ni lâwm ni? A dawta thuziakah chuan Jehova mize duhawm tak dang pahnihte chu kan sawi belh ang.—Sâm 73:28. (w13-E 06/15)