1, 2. (a) Jehova nêna inlaichînna ṭha nei tûrin eng thilte nge pawimawh? (b) Mite’n Pathian thununna an chhân lêt dân chungchânga Bible-a thuziakte bih chianna chu engtin nge kan hlâwkpui ang?

“KEI atân erawh zawng Pathian hnaih hi a ṭha a ni: Lalpa PATHIAN chu ka inhumhimnaah ka hmang a.” (Sâm 73:28) Hetah hian fakna hla phuahtu chuan Pathian a rin tlatzia a sawi chhuak a. Eng dinhmunin nge chu thutâwp pawimawh tak chu siamtîr? Atîr lamah chuan mi suaksualte thlamuang taka an awm a hmuhna chuan fakna hla phuahtu chu a tithinur a. “Athlâwn maiin a ni, ka thinlung hi ka tihfai a, ka kutte sawisêlbonaa ka sil ni,” tiin a rûm a ni. (Sâm 73:2, 3, 13, 21) Mahse, ‘Pathian hmun thianghlima a luh’ chuan a ngaihtuahna a siam ṭha theiin, Pathian nêna an inlaichînna hnai tak pawh a nei lêt leh thei ta a ni. (Sâm 73:16-18) He thiltawn hian Pathian ṭih mi chu thil pawimawh tak a zirtîr a ni: Jehova nêna inlaichînna hnai tak nei tûr chuan A mite zînga awm a, thununna pawm leh nunpui a pawimawh hle, tih chu.—Sâm 73:24.

² Keini pawhin Pathian dik leh nung nêna inlaichînna hnai tak neih chu kan duh a. Chutiang ni thei tûr chuan, amah tilâwmtu kan nih theih nâna a zilhna emaw, a thununna emaw kan insiam ṭhattîr chu a va pawimawh tak êm! Hmân lai chuan, Pathianin a mi mal ang leh a hnam angin a thununna chhân lêt theihna hun remchâng chu zahngai takin a pe ṭhîn a. An chhân lêt dân chungchâng thuziakte chu ‘keimahni min zirtîrna tûr’ leh ‘hun tâwp lo thlennate min zilhna tûrin’ Bible-ah chhinchhiah a ni. (Rom 15:4; 1 Kor. 10:11) Chûng thuziakte bih chianna chuan Jehova mizia hriat thiamna min pein, min siam ṭhatna kan hlâwkpui theih dân min hmuhtîr bawk ang.

3. Isaia 64:8 leh Jeremia 18:1-6-ah engtin nge Jehova’n mite chunga thu a neih dân târ lan a nih? (A thupui bula milem chu en rawh.)

³ Jehova’n mi mal leh hnamte chunga thuneihna a neih dân chu entîrna anga târ langin, Isaia 64:8 chuan: “Aw LALPA, nang chu kan pa i ni a; keini hi bellei kan ni a, nang min vawtu i ni; tichuan kan za hian i kut chhuak kan ni,” tiin a sawi a. Bêlvawtu chuan bellei chungah chuan a duh ang anga siam tûrin thuneihna pumhlûm a nei a. Bellei chuan bel vawtu hnênah siam a nih dân tûr chungchângah eng mah a sawi thei lo. Mihring leh Pathian inkârah pawh chutiang tho chu a ni. Belleiin bêlvawtu vuak dân a sawisêl thei lo ang bawkin, mihring chuan Pathianin amah a siam dân a sawisêl thei lo.—Jeremia 18:1-6 chhiar rawh.

4. Pathian chuan mite emaw, hnamte emaw chu a duh ang angin a siam chhuak em? Hrilhfiah rawh.

⁴ Jehova’n hmân lai Israel mite chungah chuan bêlvawtuin bellei chunga thil a tih theihna chu a târ lang a. Mahse danglamna nasa tak a awm. Bêlvawtu chuan bellei tlang aṭanga siam theih eng ang bêl pawh a siam thei a. Jehova chuan mite emaw, hnamte emaw chu a ṭhen mi ṭhaah leh a ṭhen mi sualah a duh ang angin a siam chhuak em ni? Bible chhânna chu a ni lo, tih a ni. Jehova chuan mihringte hnênah thilpêk hlu tak—zalên taka duh thlan theihna chu a pe a. Ani chuan chu a thilpêk engmah lova chantîr zâwngin a thuneihna sâng tak chu a hmang lo. Mihringte chuan Siamtu, Jehova siam ṭhata awm chu an thlan a ngai a ni.—Jeremia 18:7-10 chhiar rawh.

5. Mihringte’n Jehova siam ṭhatna an hnâwl hunah, ani chuan an chungah eng thuneihna nge a lantîr?

⁵ Mihringte chuan luhlul takin Bêlvawtu Ropui siam ṭhatna chu hnâwl ta tlat se, engtin nge ni ang? Chuti chu, Pathian chuan engtin nge a thuneihna chu a hman theih ang? Bellei chu hman tum a nihna tûrah hman tlâk loh ni ta se, engtin nge ni ang han ngaihtuah teh? Bêlvawtu chuan chu bellei chu bêl dangah a siam leh thei a, a nih loh leh a paih mai thei bawk! Bellei chu hmantlâk loh a nih erawh chuan bêlvawtu thiam loh a ni tlângpui ṭhîn. Bêl anga min Vawtu chu chutiang a ni ngai lo. (Deut. 32:4) Miin Jehova siam ṭhatna anga awm a duh loh chuan, ama thiam loh a ni ziah ṭhîn. Jehova chuan mihringte’n a siam ṭhatna an chhân lêt dân mil zêlin anmahni a dâwr dân ti dang lamin bêlvawtu neih ang thuneihna chu an chungah a lantîr a. Ṭha taka chhâng lêttute chuan an ṭangkaipui a ni. Entîr nân, Kristian hriak thihte chu ‘khawngaihna bêl,’ ‘bêl hlu takah’ siam an ni a. Kawng lehlamah chuan, luhlul taka Pathian dodâltute chu ‘thinurna bêl boral tlâkte’ ang an ni.—Rom 9:10-23.

6, 7. Engtin nge Lal Davida leh Lal Saula chu Jehova zilhna an chhân lêt dânah an dang lam?

⁶ Jehova’n mite a siam ṭhat dân kawng khat chu zilhna emaw, thununna emaw hmangin a ni a. A siam ṭhatte chunga thuneihna a lantîr dân chu Israel lal pahnih—Saula leh Davida-te chanchin ngaihtuahna aṭangin kan hmu thei a ni. Lal Davida’n Bath-sebi a uirê khân, a thiltih chuan amah leh mi dangte chungah nghawng ṭha lo tak a nei a. Davida chu lal ni mah se, Jehova chuan thununna khauh tak pêk a ṭhulh chuang lo. Pathian chuan a zâwlnei Nathana chu Davida hnêna thu khauh tak sawi tûrin a tîr a. (2 Sam. 12:1-12) Engtin nge Davida chuan a chhân lêt? Ani chuan pawi a ti hle a, a inlam lêt a. Davida chu Pathian khawngaihna dawngtu a lo ni ta a ni.—2 Samuela 12:13 chhiar rawh.

⁷ Chu mi nêna inkalh takin, Davida hmaa lalna chelhtu, Lal Saula chuan zilhna chu a chhâng lêt ṭha lo a ni. Jehova chuan Saula chu zâwlnei Samuela hmangin thupêk chiang tak: Amalek-ho leh an ran zawng zawngte chu zuah lova, tihboral vek tûr thu, a pe a ni. Saula chuan chu Pathian thupêk chu a zâwm lo va. Lal Agaga leh ran a ṭha ṭhate chu a zuah a ni. Engvângin nge? Engemaw chenah chuan amah  inchawimawi a duh vâng a ni. (1 Sam. 15:1-3, 7-9, 12) Zilh a nih khân, Saula chuan a thinlung chu tinêmin, Bêlvawtu Ropui chu insiam ṭhattîr tûr a ni nâa le. Chutih ahnêkin, siam ṭhatna chu a hnâwl a ni. A thiltihah chuan thiam a inchantîr a. A ran lâkte chu inthawi nâna hman theih tûr a nih avângin a thiltih chu pawm theih niin chhuanlam a siam a, Saula zilhna chu a ngai pawimawh lo a ni. Jehova’n Saula chu lal atân a hnâwl ta a, ani chuan Pathian dik nêna inlaichînna ṭha a neih ṭhin chu a nei lêt leh ngai tawh lo a ni.—1 Samuela 15:13-15, 20-23 chhiar rawh.

8. Israel hnamin Jehova siam ṭhatna a chhân lêh dân aṭangin eng nge kan zir theih?

⁸ Jehova chuan mi mal chauh pawh ni lovin, hnamte pawh a siam ṭhatna chhân lêt theihna hun remchâng a pe a. B.C.E. 1513 khân, Israel hnam chu Aigupta sal tânna aṭanga chhuah zalên an niin, Pathian nên inlaichînna thu an thlung a. Israel chu a hnam thlan an ni a, Bêlvawtu Ropui siam ṭhata awm theihna hun remchâng an nei bawk a ni. Mahse, mite chuan Jehova mit hmuhah thil sual an tizawm zêl a, an chhehvêla hnam pathiante pawh an be ta hial a ni. An inhriat chhuah nân Jehova chuan zâwlneite chu a tîr nawn leh thîn a; mahse, Israelte chuan an ngaithla duh lo. (Jer. 35:12-15) An luhlul avângin Isrealte chu na taka thunun an ngai ta a. Bêl boral tlâkte angin Israel hnam sâwm hmâr lam lalram chu Assuria mite’n an hneh a, chhim lam hnam hnihte pawh Babulon mite’n an hneh ta bawk a ni. Chu chuan thil pawimawh tak min zirtîr tûr a va ni êm! Jehova min siam ṭhatna chuan ṭha taka kan chhân lêt chauhvin min ṭanpui ang.

9, 10. Engtin nge Ninevi mite chuan Pathian vaukhânna chu an chhân lêt?

 ⁹ Jehova chuan Assuria khawpui Ninevi-a chêngte hnênah pawh a vaukhânna chhân lêt theihna hun remchâng a pe bawk a. Jehova thu chu Jona hnênah a lo thleng a: “Tho la, Ninevi khua, khawpui ropui takah chuan kal la, a chung thu tlangaupui rawh; an suahsualna chu ka hmâah a lo thleng chho ta si a,” tiin. Ninevi khua chu tihchhiat phû hliah hliah a ni.—Jon. 1:1, 2; 3:1-4.

¹⁰ Mahse, Jona’n rorêlna thuchah a han puan chhuah chuan, “Ninevi mite chuan Pathian an ring ta a; chaw nghei tûr tiin an puang a, an zînga a lian ber aṭanga a tê ber thlengin saiip puan an sin ta a.” An lal chu “a lalṭhutphah aṭang chuan a tho va, a lal puan chu a hlîp thla a, saiip puan a sin a, vutah a ṭhu ta a.” Ninevi mite chuan Jehova’n siam ṭhat a tumna chu chhâng lêtin, an inchhîr a. Chuvângin, Jehova chuan chhiatna a thlen ta lo a ni.—Jon. 3:5-10.

11. Israel mite leh Ninevi mite a dâwrnaah Jehova mizia eng nge chiang taka lang?

¹¹ Hnam thlan an nih vâng maiin Israel mite chuan thununna an dawn loh phah lo. Kawng lehlamah chuan Ninevi mite chuan Pathian nêna inlaichînna thu an thlung lova. Chuti chung chuan, Jehova chuan an chungah a rorêlna thuchah chu a puan chhuahtîr tho va, anni chuan a kuta bellei nêm tak ang mai an nihzia an târ lan khân an chungah zahngaihna a lantîr a ni. Hêng entîrna pahnihte hian kan Pathian Jehova chu “tumah duhsak bîk nei lo” a nihzia a va târ lang chiang tak êm!—Deut. 10:17.

12, 13. (a) Mite’n a siam ṭhatna a chhânlêt hunah engvângin nge Pathian chuan a thiltum a thlâk danglam? (b) Saula leh Ninevi khaw chungah Jehova ‘inchhîrna’ chuan eng awmzia nge a neih?

¹² Pathianin min siam ṭhat a inhuam dân chuan nunnêm leh insiamrem thei tak a nihzia a târ lang a. Chu chu Jehova’n mite chunga a rorêlna dik ṭanchhana hma lâk a tum a, an chhân lêt avânga a rilru a thlâk lehna dinhmunahte khân a lang a ni. Pathian Lehkha Thu chuan Israel lal hmasa ber chungchângah Jehova chu ‘Saula lala a lo ruat ta chu a inchhîr’ tih a sawi a. (1 Sam. 15:11) Ninevi mite an lamlêt a, an sualte laka an hawikîr khân, Bible chuan: “Pathianin an thiltihte chu enin, an kawng ṭha lo chu an hawisan tih a hmu a; an hnêna a sawi tawh, tih a tum thil ṭha lo chu Pathian chuan a lamlêt a [a nih loh leh a inchhir a]; a ti ta lo a ni,” tiin a sawi.—Jon. 3:10.

¹³ “Inchhîr” tia lehlin Hebrai thu mal hian rilru put hmang emaw, thiltum emaw thlâkthlengna a kâwk a. Saula chunga Jehova rilru put hmang chu lal atâna a thlan aṭanga a hnâwl leh thlengin a inthlâk danglam a ni. Chu inthlâkthlengna chu Jehova’n Suala a thlannaah tihsual a neih vâng a ni lo va, Saula chuan rinna nei lova thil ti a, thu a âwih loh tâk vâng zâwk a ni. Ninevi mite chunga Pathian dik inchhîrna chu an chunga a thiltum a thlâkna hi a ni. Bêlvawtu kan Pathian Jehova chu nunnêm, insiamrem thei, khawngaih thei tak leh lainatnaa khat, thil sual titute’n a ṭha zâwnga an inthlâkthlengna ṭanchhana a thiltum thlâk huam a ni tih hriat chu a va thlamuanthlâk tak êm!

14. (a) Tûn laiah engtin nge Jehova’n min siam ṭhat? (b) Engtin nge Pathianin min siam ṭhatna chu kan chhân lêt ang?

¹⁴ Tûn laiah Jehova chuan a Thu, Bible, leh a inawpna pâwl hmangin min siam ṭha deuh ber a. (2 Tim. 3:16, 17) Chuta ṭanga kan dawn zilhna emaw, thununna emaw engpawh chu kan pawm tûr a ni lâwm ni? Kan baptisma channa chu engtianga rei tawh pawh niin, chanvo eng anga tam pawh chelh mah ila, Jehova zilhna chu kan chhâng lêt chhun zawm zêlin, bêl hlu takah kan insiamtîr tûr a ni.

15, 16. (a) Thununna avânga chanvo chân a nih hunah eng ang ngaihtuahna ṭha lo nge awm thei? Entîrna pe rawh. (b) Thununna avânga awm ngaihtuahna ṭha lo hmachhawn tûrin engin nge min ṭanpui thei?

 ¹⁵ Thununna ṭhenkhat chu kaihhruaina emaw, siam ṭhatna emaw angin kan dawng thei a. Mahse, ṭum dangah chuan thil dik kan tih loh avângin thunun kan ngai mai thei a ni. Chutiang thununnaah chuan chanvo chânna pawh a tel mai thei a. Upa anga rawngbâwl tawh ṭhîn Dennis-a * entîrna hi han ngaihtuah teh. Sumdâwnna thila thutlûkna fing lo tak siamin, thil sual a tih avângin, a rûka zilh a ni a. Upa a nih tawh loh thu kohhrana puan a nih zân chuan engtin nge Dennis-a chu a awm? Ani chuan: “Hlawhchham hle nia inhriatnain ka khat a ni. Kum 30 kal ta chhûng khân, chanvo tam tak ka lo chang tawh ṭhîn a. Regular pioneer ka thawk a, Bethel-ah rawng ka bâwl leh a, kohhranho rawngbâwltua ruat ka nih hnuah, upaa ruat ka ni leh ta a ni. Tichuan, district inkhâwmpuiah a vawi khatna atân thu ka sawi zo deuh chiah bawk a. Thâwk leh khatah chûngte chu ka chân ta vek a ni. Ka zahna bâkah, inawpna pâwlah chuan ka tân hmun a awm tawh lo niin ka hria a ni,” tiin a sawi.

¹⁶ Dennis-a chuan siam ṭhat a ngaihna a thil sual tih chu hawisanin, a kawng a thlâk a ngai a. Mahse, a ṭha lo zâwnga thil ngaihtuahna chu hneh tûrin engin nge ṭanpui? Ani chuan: “Thlarau lam hun duan ṭha vawn tlat chu ka tum a. Kristian inunauna aṭanga ka dawn ṭanpuina chu kan thu leh hla chhuahte aṭanga ka dawn fuihna ang chiahin ka tân a pawimawh a ni. Vênnainsâng, August 1, 2009 chhuak ‘Chanvo Ṭha I Chelh Tawh Ṭhîn Em? I Chelh Leh Thei Ang Em?’ tih thuziak chu ka ṭawngṭaina chhân nâna a mi mala ka dawn lehkha thawn ang mai a ni. Zilhna ka hlut ber chu ‘Kohhrana mawhphurhna dang i neih belh loh lai hian, thlarau lama chak chhoh chu tum tlat ang che,’ tih hi a ni,” tiin a sawi. Engtin nge Dennis-a chuan thununna chu a hlâwkpui? Kum engemaw zât a liam hnu chuan, ani chuan, “Jehova’n kohhranho rawngbâwltu anga rawngbâwl theihna chanvo nên mal min sâwm leh ta a ni,” tiin a sawi.

17. Kohhran aṭanga hnawhchhuahna chuan thil sual titu siam ṭhatna kawngah eng chanvo nge a neih theih? Entîrna pe rawh.

¹⁷ Kohhran aṭanga hnawhchhuahna pawh hi Jehova thununna dang leh a ni a. Chu chuan kohhran chu nghawng ṭha lo lakah a vênghim a, thil sual titu siam ṭhatna kawngah chanvo a nei thei a ni. (1 Kor. 5:6, 7, 11) Robert-a chu kum 16 dâwn lai hnawhchhuah a ni a, chumi chhûng chuan a nu leh pa, leh a unaute chuan thil sualtitute nêna inpâwl lo tûr leh chibai pawh bûk lo tûra Pathian Thu kaihhruaina chu nghet tak leh rinawm takin an zâwm tlat a. Kum engemaw zât kal ta khân Robert-a chu lâk luh a ni leh tawh a, thlarau lamah pawh hma a sâwn hle a ni. Kum tam tak hnua Jehova leh A mite hnêna kîr leh tûra amah chêttîrtu zawh a nih chuan, a chhûngte dinnghehnain a rilru a khawih hle tih a sawi a ni. “Ka chhûngte chuan ka dinhmun hre tûr talin, chhe tê pawhin min bia se chuan, chu tê pawh chuan min tilungâwiin, Pathian hnêna kîr leh duhna pawh min neihtîr lo vang,” tiin a sawi a ni.

18. Bêlvawtu Ropui kutah eng ang bellei nge i nih?

¹⁸ Chutiang chiah thununna chu kan mamawh lo mai thei a; mahse, Bêlvawtu Ropui kuta eng ang bellei nge kan nih ang? Thunun kan nih hunah engtin nge kan chhân lêt ang? Davida ang nge ni a, Saula ang kan nih ang? Bêlvawtu Ropui chu kan Pa a ni a. “LALPA chuan a hmangaihte chu a zilhhau ṭhîn a ni, pain fa a lâwm apiangte a zilhhau ṭhîn,” tih hi theihnghilh ngai suh ang che. Chuvângin, ‘LALPA thununna che ngainêp suh la, a zilhhauna che ning hek suh.’—Thuf. 3:11, 12. (w13-E 06/15)