MANGANG ngai lo leh ṭanpuina mamawh lo tunge awm? Manganna kan tawh azirin, min lainattu leh kan tawh ang tâwktu ṭhian thlan chu kan duh ngei ang. Mi chu lainatna leh thiltawn a neih kawpna chuan ṭhian duhawm takah a siam a ni.

Ṭawngṭaina chungchângah pawh ṭhenkhat chuan chutiang bawk chuan an ngai a. Pathian—an tâna sâng lutuk leh ropui tak nia an hriat—pan ai chuan mi thianghlimte pan chu an duh zâwk. Chûng mi thianghlimte chuan mihringte tawn tlânglâwn tak fiahna leh harsatnate an tawn ve tho avângin, an chunga lainatna ngah lehzual tûrin an ngai a ni. Entîr nân, an thil ngaih pawimawh tak hlohtute chuan thil hloh leh rûkte enkawltu nia ngaih Padua khawchhuak “Mi Thianghlim” Anthony-a pan chu an duh ngei ang a. Ran dam lo tâna ṭawngṭaisak tûr chuan Assisi khawchhuak “Mi Thianghlim” Francis-a an pan duh ang a, a nih loh leh an thil hloh avanga beisei bote chuan, “Mi Thianghlim” Jude Thaddeus-a chu an pan duh ngei bawk ang.

Mahse, Bible aṭangin mi thianghlimte hnêna ṭawngṭai chu thil dik a nih leh nih loh engtin nge kan hriat chian theih ang? Kan ṭawngṭainate chu Pathian hnêna kan rilru sawi chhuahna a nih avângin: Pathianin kan ṭawngṭaina a ngaithla em? tih hriat chu kan duh ngei ang. Pathianin mi thianghlimte hnêna ṭawngṭai chu engtin nge a ngaih ang? tih pawh hi kan ngaihtuah bawk tûr a ni dâwn lawm ni?

Mi thianghlimte hnêna ṭawngṭai ṭhinna hian mi thianghlimte’n mite tâna an dîlsakna, a nih loh leh anmahni palai anga hmanna thurin, Catholic Kohhran zirtîrna chu a ṭanchhan a. New Catholic Encyclopedia sawi dânin a tum ber chu “mi thianghlimte hmanga Pathian khawngaihna dîl a ni.” Chuvângin, mi thianghlimte hnêna mi a ṭawngṭai chhan chu chûng mite chuan Pathian hmaa dinhmun ṭha bîk an neih avângin, anmahni kal tlanga a bîk taka duhsakna dawn theih a inbeisei vâng a ni.

Chutiang thurin chu Bible-in a zirtîr em? Tirhkoh Paula chuan a lehkha thawnah mi thianghlimte hnêna ṭawngṭaina tûr chhan ṭha tak a pe niin ṭhenkhat chuan an sawi a. Entîr nân, Rom khuaa Kristiante hnênah chuan: “Unaute u, . . . mi ṭawngṭaipui hrâm hrâm tûrin Lalpa Isua Krista leh thlarau thianghlim hmangaihnain ka ngên chiam a che u,” tiin a ziak a ni. (Rom 15:30, 31) Paula chuan a Kristian unate chu amah leh Pathian inkâra palaia ṭang tûrin a ngên tihna a ni em? Ni lo ve. Chutiang chu ni se chuan, anni chuan Krista tirhkoh, amah Paula hnênah chuan an tâna palaia ṭang tûrin an ngên zâwk ngei ang. Min ṭawngṭaisak tûra Kristian unaute ngen chu thil âwm tak a nih thu Paula chuan a târ lang mai zâwk a ni. Chu chu, vâna awm nia kan rin tuemaw hnêna Pathian hmaa min dîlsak  tûra ṭawngṭai nên chuan a inang lo hle. Engvângin nge?

Tirhkoh Johana Chanchin Ṭha ziakah, Isua chuan: “Keimah hi kawng leh thutak leh nunna ka ni; keimaha kal lo chu tumah Pa hnênah an thleng ngai lo,” tiin a sawi a. (Johana 14:6) ‘Ka hminga Pa hnêna in dîl apiang a pe dâwn che u a ni,’ tiin a sawi bawk a ni. (Johana 15:16, C.L. Re-edited) Isua chuan a hnêna ṭawngṭai tûrin min ti lo va, Pathian hnênah min dîlsak tûr thu a sawi zâwk a ni. Kan ṭawngṭaina ngaihthlâk a nih theih nân chuan Pathian hnênah Isua kal tlang chauhvin kan dîl tûr a ni.

Isua chuan a zirtîrte’n ṭawngṭai dân zirtîr tûra an ngen khân heti hian a chhâng a ni: “In ṭawngṭai chuan heti hian ti ang che u, ‘Kan Pa, i hming zahawm rawh se,’” tiin. (Luka 11:2) Ni e, Kan ṭawngṭai ‘apiangin,’ Pathian hnênah chauh lo chuan Isua, a nih loh leh mi dang tuma hnênah kan ṭawngṭai tûr a ni lo. Isua zirtîrna chiang takte chu ngaihtuahin, mi dang min dîlsaktute emaw, “mi thianghlimte” emaw kal tlang ni lovin, Pathian hnênah Isua Krista kal tlanga ṭawngṭai tûr nia thutâwp siam chu thil âwm tak a ni lâwm ni?

Ṭawngṭaina chu kan biaknaa thil pawimawh tak a ni a, Pathian hnênah ni lova, mi dangte hnêna ṭawngṭai chu Bible zirtîrna nên a inkalh a ni. (Johana 4:23, 24; Thu Puan 19:9, 10) Chuvâng chuan, Pathian hnênah chauh kan ṭawngṭai tûr a ni.

Isua chuan Tlâng chunga a Thusawiah a pa hnêna ei tûr dîltu fa chungchâng entîrna a sawi a. Pa chuan a fa chu chhangpêr aiah lung a pe ang em? A nih loh leh, sangha aiah leh rûl tûr nei a pe ang em? (Matthaia 7:9, 10) Hmangaihna ngah nu leh pa tumahin chutiang chuan an ti teuh lovang!

Chutiang chi tehkhin thu chu nu leh pate thlîrna lam aṭangin han ngaihtuah teh. I fa chuan thil engemaw tihtak zetin a dîl che angin han ngaihtuah ta la. I fa nên chuan inlaichînna ṭha tak in nei chhovin, a tân chuan englai pawhin pan nuam tak i ni reng ṭhîn a ni. Chuti chung pawh chuan, i lo chhân lêt dân tûr nia a ngaihah hlohthâwnna a neih avângin i hnêna dîlsak tûr chein mi dang a ngên ta a ni. Engtin nge i ngaih? Chu mi chauh kaltlanga biak pawh che a tum ziah a nih chuan, chutianga tih zawm zêl chu a tum dâwn tih a lang chiang hle a ni. Chu ruahmanna avâng chuan i lâwm ang em? Lâwm hauh lo vang! Hmangaihna ngah tak nu leh pate chuan an fate’n anmahni ngei bia a, hreh miah lova an mamawhte an dîl chu an duh a ni.

Isua chuan naupangin chhangpêr a dîl chungchânga tehkhin thu a sawi nêna inmil takin mipuite chu heti hian a hrilh a ni: “Chutichuan, nangni mi sual mahin in fate thil ṭha pêk nachâng in hriat chuan, in Pa vâna mi chuan a dîltute chu thil ṭha a pe zâwk êm êm dâwn lo vem ni?,” tiin. (Matthaia 7:11) Nu leh pate’n an fate hnêna thil ṭha pêk an duhna chu a nasa hle tih rinhlelh rual a ni lo va. Kan Pa vâna mi’n kan ṭawngṭaina ngaihthlâk leh chhân a duhna phei chu a nasa lehzual a ni.

Mi mal tlin lohnate avânga kan rilru a hah hunah Pathian chuan amah pan tûrin min duh a. Ani chuan kan ṭawngṭaina ngaithla tûrin mi dangte a ruat lo. Bible chuan: “I rit phurh chu LALPA chungah nghat la, tichuan anin a tichak ang che,” tiin min fuih a ni. (Sâm 55:22) Chuvângin, min dîlsak tûra mi thianghlimte emaw, mi dangte emaw rinchhan ai chuan Pathian Jehova nêna inlaichînna ṭha lehzual neih chhoh kan tum zâwk tûr a ni.

Kan Pa vâna mi chuan a mi mal takin min ngaihsak a. Harsatna kan tawh hunah min ṭanpui a duh a, amah hnaih tûrin min sâwm bawk a ni. (Jakoba 4:8) “Ṭawngṭaina ngaithlatu” kan Pa leh kan Pathian hnaih theihna hun ṭha kan neih avângin kan va hlim tak êm! (w13-E 06/01)