1, 2. Tûn laiah Isua chuan tu hmangin nge min châwm a, engvângin nge chu a mi hman kan hriat chu a pawimawh?

“UNAUTE U, ka mamawh lai berin ka mamawh tak thuziakte chu vawi duai lo min pe ṭhîn,” tiin unaunu pakhat chuan kan world headquarter-a thawk unaute hnêna lâwmthu a sawinaah a ziak a ni. Chutiang chuan i inhre ngai ve em? Tam tak chu an inhre ṭhîn a ni. Chu chu mak kan ti tûr a ni em? Ni lo ve.

² A hun taka thlarau lam chaw kan dawnte chuan kohhran Lû, Isua’n min châwm tûra a thutiam a hlenzia a târ lang a ni. Tute hmangin nge min châwm? A lo kal leh hun tûr chhinchhiahna a pêk khân, Isua chuan a chhûngte hnêna ‘a hun apianga chaw’ pe tûrin “bawi rinawm, fing tak” a hmang dâwn tih a sawi a. * (Matthaia 24:45-47 chhiar rawh.) Chu bawi chu a ni, Isua’n he tâwpna huna a hnungzuitu dik takte châwm nâna a mi hman chu. Bâwih rinawm kan hriat chu a pawimawh a ni—kan thlarau lam hrisêlna leh Pathian nêna kan inlaichînna chu he a mi hman hriatnaah hian a innghat si a.—Mt. 4:4; Joh. 17:3.

3. Bâwih rinawm tehkhin thu chungchângah kan thu leh hla chhuahte chuan tûn hmain eng nge a sawi?

³ A nih chuan, engtin nge bâwih rinawm chungchânga Isua tehkhin thu chu kan hriat thiam tâk ang? Tûn hma chuan, kan thu leh hla chhuah chuan a hnuaia mi ang hian a sawi a ni: C.E. 33 Pentikos nî khân Isua chuan a chhûngte chungah bâwih rinawm chu hotuah a ruat a. Bâwih tih chuan chu mi hun aṭanga leia hriak thih Kristian awm zawng zawng a pâwl angin a entîr a. A chhûngte chuan chhûng hriak thihte bawk chu a mi mal angin a kâwk a ni. Kum 1919 khân Isua chuan bâwih rinawm chu “a neih zawng zawng”—lei lama a Lalram hmakhua zawng zawng—chunga hotuah a siam a ni, tiin. Mahse, ṭha taka zirna leh ṭawngṭai chunga chhût ngun lehzualna chuan bâwih rinawm leh fing tak chungchânga Isua thute kan  hriat thiamna chu tihfiah a lo ngai ta a ni. (Thuf. 4:18) Vân lam beiseina nei emaw, lei lam beiseina nei emaw pawh ni ila, chu tehkhin thu leh chuta kan tel ve dân chu i lo bih chiang ang u.

4-6. Engvângin nge Isua bâwih rinawm tehkhin thu chu kum 1914 hnuah chauh a thleng famkim ṭan kan tih theih?

⁴ Bâwih rinawm leh fing tak tehkhin thua a chung leh hnuai thute chuan a thlen famkim hun chu C.E. 33 Pentikost nîah ni lovin, he tâwpna hunah a ni tih a târ lang a. Bible-in chutiang thu tâwp min siamtîr dân i lo en ang u.

⁵ Bâwih rinawm tehkhin thu chu Isua’n ‘a lo kal lehna leh khawvêl tâwpna chhinchhiahna’ chungchânga a hrilh lâwkna zînga mi a ni. (Mt. 24:3) Matthaia 24:4-22-a chhinchhiah hrilh lâwkna a tîr lam chuan thlen famkimna pahnih a nei a; a hmasa zâwk chu C.E.33 aṭanga C.E. 70-ah, leh a pahnihna chu kan hun laiah a kim chang zâwkin a thleng famkim a ni. Hei hi bâwih rinawm chungchânga Isua thusawi pawhin thlen famkimna pahnih a nei dâwn tihna a ni em? Ni lo ve.

⁶ Matthaia 24:29-a chhinchhiah thute aṭanga inṭanin, Isua chuan kan hun laia thil thleng tûrte chu a thlûr bing a ni. (Matthaia 24:30, 42, 44 chhiar rawh.) Hrehawm nasa tak chhûnga thil thleng tûr chu sawiin, mite chuan “Mihring Fapa . . . vân chhûm chunga lo kal an hmu ang,” a ti a. Tichuan, ni hnuhnûng chhûnga awmte tân: “Eng niah nge in Lalpa a lo kal dâwn in hre si lo,” “In rin loh hunah Mihring Fapa a lo kal dawn si a,” tia sawiin, harhvang taka awm tûrin a fuih a ni. * Helai thu nêna inzawmin, ni hnuhnûnga thilthleng tûr chungchâng a sawinaah Isua chuan bâwih rinawm tehkhin thu hi a sawi a ni. Chuvângin, bâwih rinawm chungchânga a thu sawite hi kum 1914-a ni hnuhnûng a inṭan hnuah chauh a thleng famkim ṭan kan ti thei ang. Chutianga thu tâwp siam chu a âwm hle a ni. Engvângin nge?

7. Buh seng hun a inṭan chuan eng zawhna pawimawh tak nge lo chhuak a, engvângin nge?

⁷ ‘Bâwih rinawm leh fing tak chu tu ber nge ni ang le?’ tih zawhna hi han ngaihtuah lawk teh. Kum zabi khatnaah khan chu zawhna zawh chhan tûr chu a awm meuh lo. Thuziak hmasaa kan hmuh thawh angin, tirhkohte chuan Pathian ṭanpuina finfiah nân, thilmak an ti thei a, thilmak tih theihna pawh an pe chhâwng thei hial a ni. (Tirh. 5:12) Chuvâng chuan, hmahruai tûra Krista ruat chu tu ber nge ni ang, tiin engvângin nge an zawh tehlul ang? Mahse, kum 1914-ah chuan dinhmun chu a dang lam hle a. Chu mi kum chuan buh seng hun chu a inṭan a. A tâwpah chuan bul lem leh buh tak thliar hun chu a lo thleng ta a ni. (Mt. 13:36-43) Buh seng hun a inṭan chuan zawhna pawimawh tak a lo chhuak a: Isua zuitu dik tak nia inchhâl Kristian der tam tak zîngah chuan, engtin nge buh tak—hriak thih Kristian—chu hriat theih an nih ang? tih hi a ni. Bâwih rinawm tehkhin thu chuan a chhânna min pe a. Krista zuitu hriak thihte chu thlarau lamah ṭha taka châwmte an ni ang, tiin.

8. Engvângin nge bâwih rinawm chu hriak thih Kristiante hmanga din tûr a ni chu thil inâwm tak a nih?

⁸ Bâwih rinawm chu hriak thih Kristiante hmanga din a ni tûr a ni a. Chûng mite chu “puithiamho” tia koh an ni a, ‘thim ata chhuaka, a êng mak taka lût tûra [anmahni] kotu ṭhatna entîr,’ a nih loh leh puang chhuak tûra tih an ni. (1 Pet. 2:9) Chûng “puithiamho” chuan an rinpuite thutak an zirtîr chu thil inâwm tak a ni.—Mal. 2:7; Thup. 12:17.

9. Hriak thih zawng zawng chu bâwih rinawm zînga mi an ni em? Hrilhfiah rawh.

⁹ Leia hriak thih zawng zawng chu bâwih rinawm zînga mi an ni em? Ni lo ve. A nihna takah  chuan khawvêl puma an Kristian unaute hnêna thlarau lam chaw semnaah hriak thih zawng zawng chuan chanvo an nei lo. Buh tak zîngah chuan hriak thih unaupa, an tualchhûng kohhranah kohhranho rawngbâwltu emaw, upa emaw anga rawngbâwlte an awm thei a. In tinah leh an kohhranahte chuan an zirtîr a, anni chuan headquarter aṭanga kaihhruaina chu rinawm takin an thlâwp a ni. Mahse, khawvêl puma thlarau lam chaw sem chhuahnaah an tel ve lo. Chu bâkah, hriak thih zîngah chuan kohhrana zirtîrtu nih tum ngai lo tûr, unaunu inngaitlâwm takte pawh an awm bawk a ni.—1 Kor. 11:3; 14:34.

10. Tu nge bâwih rinawm leh fing chu?

¹⁰ A nih chuan, bâwih rinawm leh fing tak chu tu nge ni ta ang? Isua’n mi tlêmtê hmanga mi tam tak a châwm dân nêna inmilin, chu bâwih chu Krista lo awm leh chhûnga thlarau lam chaw buatsaihna leh sem chhuahnaa mi mal taka tel hriak thih Kristian unaupa tlêmtête hmanga din a ni. Hun hnuhnûng chhûng zawng hian hriak thih unaupate hmanga din bâwih rinawm chuan headquarter-ah rawng an bâwl vek a. Tûn hnai kum sâwmbiahte khân chu bâwih chu Jehova Thuhretute Governing Body tia hriat a ni. Mahse, Isua tehkhin thua “bawi” tih ṭawngkam hi mi pakhat sawina a ni a, chu chuan bâwih hlâwm khat a kâwk tih chhinchhiah ang che. Chuvângin, Governing Body thu tlûkna siamte pawh chu a huhova siam a ni.

11, 12. (a) Bâwih rinawm leh fing chu eng thil pahnih chungah nge hotua siam a nih? (b) Engtik khân nge Isua chuan bâwih rinawm chu a chhûngte chunga hotua a siam a, tute nge a thlan?

¹¹ Isua tehkhin thuah khân, bâwih rinawm leh fing chu thil pahnihah hotua siam a ni a. A hmasa zâwk chu a chhûngte chunga hotua siam a ni a, a pahnihna chu a pu thil neih zawng zawng chunga hotua siam a ni. Chu tehkhin thu chu he tâwpna huna thleng famkim chauh a nih avângin hotua siamna pahnihte pawh chu kum 1914-a inṭan lal thuneihna changa Isua a rawn awm leh hnua thleng tûr a ni.

¹² Engtik khân nge Isua chuan bâwih rinawm chu a chhûngte chunga hotua a siam? Chu mi chhâng tûr chuan buh seng hun inṭanna, kum 1914-a kan kîr leh chu a ngai a. A hmaa kan hriat tawh angin, chutih hun lai chuan pâwl tam tak chu Kristianah an inchhâl a. Khawi pâwl aṭangin nge Isua chuan  bâwih rinawm tûr a thlan ang a, a siam ang? Chu zawhna chu a Pa nêna biak in, a nih loh leh biakna atâna thlarau lama ruahmanna an endik hun—kum 1914 atanga kum 1919 tir lam—hnuah chhân a ni. * (Mal. 3:1) Jehova leh a Thu ngaihsakna târ langtu Bible Zirlai rinawm tlêmtê an awm avângin anni chu an chungah an lâwm hle a ni. Chûng mite chu thenfai an ngai ngei mai a; mahse, hun rei lote awh fiahna leh thenfaina hun chhûng chuan inngaitlâwm takin an chhâng lêt a ni. (Mal. 3:2-4) Chûng Bible Zirlai rinawmte chu buh tak, Kristian dikte an ni a. Kum 1919-a thlarau lama harh tharna hunah, Isua chuan hriak thih unau puitling takte zîng ata ṭhenkhat chu thlang chhuakin, bâwih rinawm leh fing takah a siam a, a chhûngte chunga hotuah a siam bawk a ni.

13. A chhûngte zîngah chuan tute nge tel a, engvângin nge?

¹³ A nih chuan, tute nge a chhûngte chu ni ta ang? A tâwi zâwnga sawi chuan châwmna dawngtute an ni. Ni hnuhnûng tîr lamah chuan, a chhûngte chu hriak thih an ni vek a. A hnuah chuan, a chhûngte zîngah berâm dang zînga mipui tam tak pawh an lo tel ta a ni. Tûnah chuan berâm dangte chu Krista kaihhruaina hnuaia ‘pâwl khata’ siam zînga a tam zâwk an ni tawh a. (Joh. 10:16) A pawl hnih chuan bâwih rinawm sem chhuah a hun taka thlarau lam chaw thuhmun chu an hlâwkpui a ni. Tûn laia bâwih rinawm leh fing, Governing Body member-te chungchâng ve hi le? Hêng unaute pawh hian thlarau lama châwmna chu an mamawh ve tho a ni. Chuvângin, Isua hnungzuitu dik dangte ang bawkin a mi malin a chhûngte zînga mi an ni tih inngaitlâwm takin an pawm a ni.

14. (a) Bâwih rinawm chu eng mawhphurhna nge pêk a nih a, chutah chuan eng nge tel? (b) Isua chuan bâwih rinawm leh fing tak hnênah eng vaukhânna nge a pêk? (‘Bawi Sual Chuan Heti Hian Ti Ta Sela . . . ’ tih bâwm chu en rawh.)

¹⁴ Isua chuan bâwih rinawm leh fing tak chungah chuan mawhphurhna rit tak a nghat a. Bible hun lai chuan, bâwih rin tlâk, a nih loh leh sum enkawltu chu in chhûng enkawltu ber a ni. (Lk. 12:42) Chuvângin, bâwih rinawm leh fing pawhin rinna chhûngkua enkawl tûrin mawhphurhna a nei a ni. Chutah chuan a thil neihte, thu hrilhna te, inkhâwmpui program te, thu hrilh rawngbâwlna leh mi mal leh kohhran zirnaa hman tûr Bible thu leh hla tihchhuah te enkawl pawh a tel a. A chhûngte chuan bâwih pâwl sem chhuah thlarau lam châwmna chu an rinchhan a ni.

15, 16. Eng hunah nge Isua’n bawih rinawm chu a neih zawng zawng chunga hotua a siam?

¹⁵ Eng hunah nge Isua chuan bâwih chu “a neih zawng zawng chungah” hotua a siam? Isua chuan: “A pu a lo kal huna bawi chutiang tia a rawn hmuh a chu a eng a thâwl ang. Tih tak meuhvin ka hrilh a che u, a neih zawng zawng chungah hotuah a siam ang,” tiin a sawi a. (Mt. 24:46, 47) Isua’n a bâwih a neih zawng zawng chunga hotua siamna chu a lo kal a, bâwih chu “chutiang tia” a rawn hmuh hnu, rinawm taka thlarau lam chaw sem chhuaka a rawn hmuh hnuah a ni tih chhinchhiah rawh. Chuvângin, a chhûngte chunga hotua a siamna leh a neih zawng zawng chunga hotua a siamna inkârah chuan hun âwl a awm dâwn a ni. Isua chuan bâwih chu a neih zawng zawng chunga hotua a siam dân leh a siam hun hre thiam tur chuan, thil pahnih kan hriat a ngai a ni: A lo kal hun leh a thilneih zînga telte chu.

¹⁶ Engtikah nge Isua a lo kal? A chhânna chu a chung leh a hnuai thuah hmuh theih a ni. Châng hmasate chuan Isua “lo kal” tia a sawi khân, he khawvêl tâwpa rorêlna thu puang a, a hlen chhuah hun tur a kâwk a. * (Mt. 24:30, 42, 44) Chuvângin, bâwih rinawm tehkhin thua târ lan Isua ‘lo kalna’ chu hrehawm nasa tak chhûnga thleng tûr a ni.

17. Isua thil neihah chuan engte nge tel?

¹⁷ Isua ‘neih zawng zawngah’ chuan engte nge tel? Isua chuan “zawng zawng” tih thu mal hi lei lama a thil neihte chauh sawi nân a hmang lo. Anihna takah chuan, Isua chuan vânah pawh nasa takin thu a nei a ni. “Lei leh vâna thuneihna zawng zawng ka hnênah pêk a ni tawh,” tiin a sawi. (Mt. 28:18; Eph. 1:19-23) A thil neihah chuan kum 1914 aṭanga a neih a,  a hnungzuitu hriak thihte a ṭâwmpui tûr Messia Lalram pawh a tel a ni.—Thup. 11:15.

18. Engvângin nge Isua chuan bâwih rinawm chu a neih zawng zawng chunga hotuah lâwm taka a siam ang?

¹⁸ Kan sawi tâkte ngaihtuahna aṭangin eng thutâwp nge kan siam theih? Hrehawm nasa tak chhûnga rorêl tura a lo kal hunah, Isua chuan bâwih rinawmin rinawm takin a chhûngte hnênah a hun apianga thlarau lam chaw a sem tih a hmu ang. Chutah Isua chuan anni chu a thil neih zawng zawng chungah lâwm takin hotuah a siam ang. Bâwih rinawm zinga mite chuan an vân lam lâwmman, Krista rorêlpuitu nihna an dawn hunah he hotu nihna hi an chang dâwn a ni.

19. Bâwih rinawm chuan hriak thih dangte aiin vânah lâwmman ropui zâwk an dawng ang em? Hrilhfiah rawh.

¹⁹ Bâwih rinawm chuan hriak thih dangte aiin vânah lâwmman ropui zâwk an dawng ang em? Dawng lo vang. Tum khat mi tlêmtê hnêna lâwmman pêk tiam chu a tawpah chuan mi dangte pawhin an ṭâwmpui ve thei a ni. Entir nan, a thih hma zâna a tirhkoh rinawm 11-te hnêna Isua thusawi hi ngaihtuah teh. (Luka 22:28-30 chhiar rawh.) Isua chuan chu mipa tlêmtê hnênah chuan an rinawmna avângin lâwmman ṭha tak a tiam a ni. Anni chuan thu neihna lalṭhutphah chu an ṭâwmpui ang. Mahse, kum engemawti hnuah chuan, mi 1,44,000-te chuan lalṭhutphaha ṭhuin, a lalna chu an ṭâwmpui dâwn tih a târ lang a ni. (Thup. 1:1; 3:21) Chutiang bawkin, Matthaia 24:47-a a lan angin, mipa tlêmtê—bâwih rinawma ṭang hriak thih unaupate—chu a neih zawng zawng chunga hotuah a ruat dâwn tih a tiam a. Mahse, a nihna takah chuan, mi 1,44,000-te chuan vâna Isua thu neihna nasa tak chu an ṭâwmpui dâwn a ni.—Thup. 20:4, 6.

20. Engvângin nge Isua’n bawih rinawm chu a ruat a, eng tih nge kan tum tlat ang?

²⁰ Kum zabi khatnaa tih dân tur a lo hnutchhiah ang khân, bawi rinawm leh fing tak hmangin Isua chuan—mi tlêmtê hmangin mi tam tak a châwm a ni. Isua chuan hriak thih an ni emaw, beram dang an ni emaw amah zuitu dik takte’n ni hnuhnûng chhûng zawnga thlarau lam chaw a hun taka an dawn theih nân chu bâwih rinawm chu a ruat a ni. Bawi rinawm leh fing tak siamtu hriak thih unaute chu rinawm taka ṭanpuiin anmahni kan ngaihhlutzia lantir zêl chu i tum ang u.—Heb. 13:7, 17. (w13-E 07/15)