1. (a) Buh lem leh buh tak tehkhin thu chu tawitêin sawi rawh. (b) Chu tehkhin thu awmzia chu Isua’n engtin nge a hrilhfiah?

ISUA Lalram tehkhin thu sawite zînga pakhat chu lova buh chi ṭha thehtu leh buh zînga buh lem thehtu hmêlma chungchâng a ni a. Buh lem chuan buh tak chu a dîp a; mahse, lo neitu chuan a bâwihte chu ‘buh seng thlenga ṭo zatîr’ tûrin thu a pe a ni. Buh seng hunah chuan, buh lem chu hâl ralin, buh tak erawh chu seng khâwm a ni a. Isua ngei chuan chu a tehkhin thu sawi chu a hrilhfiah a ni. (Matthaia 13:24-30, 37-43 chhiar rawh.) Chu tehkhin thu chuan eng nge a târ lan? (“Buh Lem leh Buh Tak” tih chart chu en rawh.)

2. (a) Lo neitu lova thilthleng chuan eng nge a entîr? (b) Tehkhin thua a eng lai hi nge kan thlûr bing ang?

² Chu lova thilthleng chuan Isua’n buh tak—a Lalrama ro a rêl pui tûr hriak thih Kristiante—a lâk khâwm dân tûr leh a lâk khâwm hun tûr chu a târ lang a ni. Buh chi thehna chu C.E. 33 Pentikost nî khân a inṭan a. He khawvêl tâwpa la nungdam hriak thihte’n chhinchhiahna hnuhnûng ber an dawn a, vâna lâk chhoh an nih hunah chuan chu lâk khâwmna chu zawh fel a ni ang. (Mt. 24:31; Thup. 7:1-4) Tlâng chhîpa khaw hawina hmunin mi chu a chhehvêl zau tak a hmuhtîr thei ang bawkin, he tehkhin thu hian kum 2,000 vêl chhûnga thilthleng tûrte min hmuhtîr thei a ni. Kan thlîrna aṭangin, Lalram nêna inkûngkaih eng hmasâwnna nge kan hmuha kan hriat? Tehkhin thu chuan chi theh hun, ṭhan chhoh hun, leh a seng hun a sawifiah a. He thuziak hian a seng hun chu a thlûr bing dâwn a ni. *

3. (a) Kum zabi khatna hnu lamah chuan eng thilte nge thleng? (b) Matthaia 13:28 nêna in milin eng zawhna nge zawh a nih a, tute’n nge zâwt? (Endnote en bawk rawh.)

³ C.E. kum zabi pahnihna a rawn her chhuah a, Kristian  nia inchhâlte he khawvêla hmuh theiha an rawn awm chuan “buh lem chu a lo lang” ta a. (Mt. 13:26) Kum zabi palinaah chuan, buh lem ang Kristiante chuan hriak thih Kristiante chu an tam hneh hle tawh a ni. Tehkhin thuah khân bâwihte chuan an pu hnênah buh lemte pawt phawi mai tûrin an dîl tih hre chhuak leh ang che. * (Mt. 13:28) Engtin nge an pu ber chuan a chhân lêt?

4. (a) Pu ber, Isua chhânna chuan eng nge a târ lan? (b) Engtik khân nge buh tak ang Kristiante chu hriat theih an lo nih?

⁴ Buh lem leh buh tak chungchâng sawiin Isua chuan: “Buh seng thlengin ṭo za rawh se,” tiin a sawi a. He thupêk hian kum zabi pakhatna aṭanga tûn thlengin leiah hian buh tak ang hriak thih Kristian ṭhenkhat an awm reng tih a târ lang a ni. A hnuah Isua’n a zirtîrte hnêna: “Kei kumkhuain, khawvêl tâwp thleng pawhin, in hnênah ka awm zêl ang,” tia a sawi khân leiah buh tak a awm reng tih chu a nemnghet a ni. (Mt. 28:20) Chuvângin, Isua’n hriak thih Kristiante chu a tâwp thlengin a vênghim dâwn. Nimahsela, buh lem ang Kristiante’n an dîp hneh êm avângin chu hun rei tak chhûnga buh tak chu tute nge an nih chiang takin kan hre thei lo. Mahse, buh seng hun hma kum 30 vêlah khân buh tak pâwl chu chiang lehzuala hriat theih a lo ni ta a ni. Chu chu engtin nge a lo nih?

5. Kum zabi khatnaah khân engtin nge Malakia hrilh lâwkna chu a thlen famkim?

⁵ Isua’n buh lem leh buh tak tehkhin thu a sawi hma kum zabi engemaw zâtah khân, Jehova chuan a zâwlnei Malakia chu Isua tehkhin thua lang thilthleng tûrte sawi lâwk tûrin thlarauvin a thâwk khum a. (Malakia 3:1-4 chhiar rawh.) Baptistu Johana chu ‘kawng buatsaihtu tirhkoh’ a ni. (Mt. 11:10, 11) C.E 29-a a lo kal  khân, Israel hnam tâna rorêlna chu a lo thleng ṭêp tawh a ni. Isua chu tirhkoh pahnihna a ni a. Ani chuan Jerusalem biak in chu vawi hnih lai a thian fai a—a hmasa zâwk chu a rawngbâwl ṭan tirh lamah leh a hnunûng zâwk chu a tâwp lamah a ni. (Mt. 21:12, 13; Joh. 2:14-17) Chuvângin, Isua then faina hna chuan hun engemaw chen a awh a ni.

6. (a) Malakia hrilh lâwkna thlen famkimna ropui zâwk chu eng nge ni? (b) Isua chuan eng hun chhûngin nge thlarau lam biak in a endik? (Endnote en bawk rawh.)

⁶ Malakia hrilh lâwkna thlen famkimna ropui zâwk chu eng nge ni? Kum 1914 hma lam kum sâwmbi engemaw zât chhûng khân, C.T. Russell-a leh a ṭhian ṭhate chuan Baptistu Johana thawh ang hna chu an thawk a. Chu hna pawimawh takah chuan Bible thutak din chantîr leh a tel a ni. Bible Zirlaite chuan Krista tlanna inthawina awmzia dik tak an zirtîr a, hremhmun meidîl chungchânga dâwt thu chu an hai lang a, Jentailte Nî a kin thuai tûr thu an puang chhuak bawk a ni. Chuti chung chuan, Krista hnungzuitu nia inchhâl sakhaw pâwl tam tak an la awm a. Chuvângin, zawhna pawimawh tak chhân ngai ta chu: Chûng pâwlte zîngah chuan tu nge buh tak ni ta ang? tih hi a ni. Chu zawhna chhâng tûr chuan, Isua chuan kum 1914 khân thlarau lam biak in chu a endik ṭan a. Chu endikna leh then faina chuan hun engemaw chen—kum 1914 aṭanga 1919 tîr lam thleng—a awh a ni. *

7. Kum 1914-a Isua’n endikna a ṭan khân eng nge a hmuh?

⁷ Isua’n endikna a neih ṭan khân, eng nge a hmuh? Bible Zirlai tlêm tê ṭhahnemngai takte chuan taima taka thu hrilh hna beihpui thlâknaah an chakna leh an sum leh paite chu kum 30 aia tam an lo hmang tawh tih a hmu a ni. *  Tlêm hle mah se, Setana buh lemte dîp rala awm lo va, nghet taka ding buh tak hmuh chu Isua leh vântirhkohte tân chuan a va hlimawm dâwn êm! Chuti chung chuan, hriak thih, ‘Levia fate tihthianghlim’ chu a ngai tho a ni. (Mal. 3:2, 3; 1 Pet. 4:17) Engvângin nge?

8. Kum 1914 hnu khân eng thil nge thleng chho?

⁸ Kum 1914 tâwp lamah chuan Bible Zirlai ṭhenkhat chu vâna an la kal loh avângin an lunghnual a. Kum 1915 leh 1916 chhûng khân inawpna pâwl pâwn lam aṭanga dodâlna chuan an thu hrilhna chu a tiṭhuanawp a. Chu aia pawi zâwk chu, kum 1916 October thlaa Unau Russell-a thih hnu chuan inawpna pâwl chhûng lam aṭanga dodâlna a lo chhuak kha a ni. Watch Tower Bible and Tract Society director pasarihte zînga palite chu hruaitu atâna Unau Rutherford-a thlan a nih khân an hel a. Unaute zîngah inṭhen darhna awmtîr an tum a; mahse, August 1917 khân Bethel chu an chhuahsan a ni—thenfaina a va ni tak êm! Chu bâkah, Bible Zirlai ṭhenkhat chuan mihring hlauhna an nei bawk a. Chuti chung chuan, a pâwl angin Isua thenfaina hna chu ṭha taka chhâng lêtin, a ṭûl ang angin an inthlâkthleng a ni. Chuvângin, Isua chuan anni chu buh tak, Kristian dikte angin a ruat a, Kristianna ram kohhrana awm zawng zawng pawh tiamin Kristian der zawng zawngte erawh chu a hnâwl vek a ni. (Mal. 3:5; 2 Tim. 2:19) A dawtah eng thil nge thleng? Chumi hre tûr chuan kan ngaihtuah mêk buh lem leh buh tak tehkhin thuah khân i kîr leh ang u.

9, 10. (a) Buh seng hun chungchângah eng nge kan ngaihtuah ang? (b) Buh seng hun chhûngin eng nge thleng hmasa ber?

⁹ Isua chuan: “Buh seng chu khawvêl tâwpna tûr a ni,” a ti a. (Mt. 13:39) Chu buh seng hun chu kum 1914 khân a inṭan a ni. Chu mi huna thleng tûr Isua sawi lâwk thil pangate chu kan ngaihtuah ang.

¹⁰ A hmasa ber chu, buh lem lâk khâwmna a ni. Isua chuan: “Buh seng hunah chuan buh âttute hnênah, Buh lem chu la khâwm hmasa zet ula, . . . têl rawh u, . . . ka la ti ang e,” a ti a. Kum 1914 hnu khân, vântirhkohte chuan buh lem ang Kristiante chu hriak thih “ram fate” laka thliar hrangin an ‘la khâwm’ ṭan a ni.—Mt. 13:30, 38, 41.

11. Tûn thleng hian Kristian derte laka Kristian dikte tihrangtu chu eng nge ni?

¹¹ Lâk khâwm hna thawh chhoh zêl a nih rualin, chu pâwl hnihte inan lohna pawh chu a lo lang chiang cho zêl a. (Thup. 18:1, 4) Kum 1919-ah chuan Babulon Khaw Ropui chu a tlâwm ta tih a lang chiang a ni. Engin nge Kristian dikte chu a derte laka tidang lam bîk? Thu hrilhna hian a ni. Bible Zirlaite zînga hma hruaitute chuan Lalram thu hrilhnaa tel a pawimawhzia chu an sawi uar ṭan a. Entîr nân, To Whom the Work Is Entrusted, tih lehkhabu tê kum 1919-a tih chhuah chuan hriak thih Kristian zawng zawng chu in tina thu hril tûrin a fuih a. Chu chuan heti hian a sawi: He hna hi a lian tham hle a, mahse, Lalpa hna a ni a, a chakna hmangin kan thawk ang. Chu hnaa tel ve theihna chanvo hlu chu i nei a ni,” tiin. Chu chu eng anga chhân lêt nge a nih? Chuta ṭang chuan Bible Zirlaite chuan an thu hrilhna chu an la ngawrh ta hle tih kum 1922 Vênnainsâng chuan a sawi a ni. Rei pawh a rial hmain in tina thu hrilhna chu chûng Kristian rinawmte chhinchhiahna ber a lo ni ta a, tûn thleng hian a la ni reng a ni.

12. Eng hun aṭangin nge buh takte chu seng luh a nih?

¹² A pahnihna chu, buh tak seng luhna a ni. Isua chuan a vântirhkohte hnênah: “Buh . . . chu ka buh inah seng lût rawh u,” tiin thu a pe a. (Mt. 13:30) Kum 1919 aṭang khân hriak thihte chu Kristian kohhran din thar lehah chuan seng luh an ni a. Khawvêl tâwp thlenga la nung dam tûr hriak thih Kristiante tân chuan seng luhna hnuhnûng ber chu an vân lâwmman an dawn hunah a thleng ang.—Dan. 7:18, 22, 27.

13. Kristianna ram pawh tiamin Babulon Khaw Ropui neih mêk rilru put hmang chungchângah Thu Puan 18:7 chuan eng nge a târ lan?

¹³ A pathumna chu, ṭah leh ha ṭhialna a ni.  Vântirhkohte’n buh lemte an têl hnu chuan eng thil nge thleng? Buh lemte dinhmun sawiin, Isua chuan: “Chutah chuan ṭah leh ha ṭhial chu a awm ang,” tiin a sawi a. (Mt. 13:42) Tûnah chu thil chu a thleng mêk em? Thleng lo. Tûn laiah, nawhchizuara tel a nih angin Kristianna ram chuan: “Lalnuah ka ṭhu a ni, hmeithai rêng ka ni lo va, lungngaihna ka hmu hauh lo vang,” tiin a la sawi reng a ni. (Thup. 18:7) Dik takin, Kristianna ram chuan thu nei hle niin a inngai a, politics hruaitute chunga ‘lalnu anga ṭhu’ ang hialin a inruat a ni. Tûnah rih chuan buh lemin a entîrte chu an ṭap lo va, an uangthuang zâwk mah a ni. Thil awm dân erawh a inthlâk thleng ang.

14. (a) Eng hunah leh eng vângin nge Kristian derte chuan an ‘ha an ṭhial ang’? (b) Engtin nge Matthaia 13:42-na kan hriat thiam dân siamremna chu Sâm 112:10 thu nên a inrem? (Endnote en rawh.)

¹⁴ Sakhuana pâwl dik lo zawng zawng tihchhiat a nih hnu, hrehawm nasa tak chhûngin, tûn hmaa chûng sakhaw dik lo vuantute chuan bihrûkna tûr hmun him an zawng ang a; mahse, an hmu lo vang. (Lk. 23:30; Thup. 6:15-17) Tichuan, chhiatna laka tal chhuah theihna a awm lo tih hriain, nasa taka ṭapin, thinur takin an ‘ha an ṭhial ang.’ Isua chuan hrehawm nasa tak chungchâng a hrilh lâwknaah chu mi hun chhûng chuan “an âwmte an inchûm ang,” tih a sawi lâwk a ni. *—Mt. 24:30; Thup. 1:7.

15. Buh lem chungah eng thil nge thleng ang a, engtikah nge a thlen ang?

¹⁵ A palina chu, rawhtuina meia paih a ni. Buh lem têl khâwm chungah chuan eng thil nge thleng dâwn? Vântirhkohte chuan “rawh tuina meiah chuan an paih ang.” (Mt. 13:42) Chumi awmzia chu tihboral hlenna a ni. Chuvângin, sakhaw dik lo vuantute chu hrehawm nasa tak tâwp lam, Armageddon-ah tihboral an ni ang.—Mal. 4:1.

16, 17. (a) Isua tehkhin thuah khân a tâwpa thilthleng tûr a sawi chu eng nge ni? (b) Engvângin nge chu thil chu kan hma lama lo thleng famkim tûr anga thu tâwp kan siam?

¹⁶ A pangana chu, nî anga ênna a ni. Isua chuan a hrilh lâwkna chu: “Chu mi hunah chuan mi felte chu an pa ramah chuan ni angin an êng tawh ang,” tia sawiin a titâwp a. (Mt. 13:43) Chu chu engtikah nge a lo thlen ang a, khawiah nge a thlen ang? Hêng thute hi kan hmaa lo thleng famkim tûr a ni a. Isua sawi lâwk chu he leia tûn laia thleng mêk tûr ni lovin, nakina vâna thleng tûr a ni. * Chutianga thu tâwp siam a nih chhan pahnih chu i lo ngaihtuah ang u.

¹⁷ A hmasain, “engtikah nge” tih zawhna chu lo ngaihtuah ta ila. Isua chuan: “Chu mi hunah chuan mi felte chu . . . ni angin an êng tawh ang,” tiin a sawi a. “Chu mi hunah chuan” tih ṭawngkam chuan Isua sawi zawh tâk chiah thilthleng, ‘rawh tuina meia buh lemte paihna’ chu  a kâwk a ni. Chu chu hrehawm nasa tak tâwp lama thleng tûr a ni a. Chuvângin, hriak thihte nasa taka ‘ênna’ pawh nakin huna thleng tûr a ni ngei ang. A dawtah chuan “khawiah nge” tih zawhna chu ngaihtuah ta ila. Isua chuan mi felte chu, chu ‘ramah chuan an êng’ dâwn tih a sawi a. Chu chu eng tihna nge ni? Hrehawm nasa tak hmasa lam a liam hnua leia Kristian hriak thih rinawm la awm zawng zawngte chuan chhinchhiahna hnuhnûng ber chu an lo dawng sa vek tawh dâwn a ni. Tichuan, hrehawm nasa tak chungchânga Isua hrilh lâwknain a târ lan angin, vâna lâwr khâwm an ni ang. (Mt. 24:31) Armageddon indona a tâwp hnu lawkah chuan vânah, “an pa ramah” chuan nî angin an êng ang a, ‘Berâm No nupui neihnaah’ Isua mo hlim tak angin an tel ang.—Thup. 19:6-9.

18, 19. Eng kawngin nge buh lem leh buh tak chungchânga Isua tehkhin thu hriat thiamna chu a mi mal taka kan hlâwkpui theih?

¹⁸ He tehkhin thuin hriat thiamna zau tak min pêk hi engtin nge a mi mal taka kan hlâwkpui? Kan hlâwkpui theih dân kawng thum hi han ngaihtuah teh. Pakhatnaah chuan kan hriatna a tipung a ni. He tehkhin thu hian Jehova’n suahsualna awm a phal chhan pawimawh tak a târ lang a. Ani chuan “khawngaihna bêlte”—buh tak pâwl—a buatsaih nân ‘thinurna bêlte chu a dawh hrâm hrâm’ a ni. * (Rom 9:22-24) Pahnihnaah chuan kan rinna a tinghet a ni. Tâwpna a hnaih rual hian, kan hmêlmate chuan min bei nasa zual sauh dâwn a, ‘mahse min hneh lo vang.’ (Jeremia 1:19 chhiar rawh.) Jehova’n buh takte chu kum tam tak chhûng a lo vênhim tawh angin, kan Pa vâna mi chuan Isua leh a vântirhkohte hmangin hun lo la awm tûrah pawh ‘kumkhuain min awmpui zêl ang.’—Mt. 28:20.

¹⁹ Pathumnaah chuan tehkhin thu chuan buh tak hre hrang tûrin min ṭanpui a ni. Engvângin nge chu chu thil pawimawh tak a nih? Ni hnuhnûng chungchânga Isua hrilh lâwkna sawi thui taka zawhna a siam a chhânna hmu tûr chuan buh tak ang Kristiante hriat hran chu a pawimawh a ni. Ani chuan: “Bawi rinawm, fing tak . . . chu, tu ber nge ni ang le?” tiin a zâwt a ni. (Mt. 24:45) A dawta thuziak pahnihte hian chu zawhna chhânna lungawithlâk tak chu a pe ang. (w13-E 07/15)