Sakhua a engemaw berin a tibeidawng che a nih chuan, eng sakhua pawh rin mai chu harsa i ti ngei ang. Mahse, i rin tlâk sakhaw pakhat a awm tih hria ang che. Isua leia a awm lai khân, a hnungzuitu mi rinawm ho khat chu lakhâwmin, Pathian tehnate mila nung tûrin a zirtîr a ni. Krista zuitu dik tak—Kristian tehnate mila nun tum tlattu—an la awm a. Anni chu khawiah nge i hmuh theih ang?

Thuziak hmasaa kan sawi tâk Eslelle-i chuan: “Jehova Thuhretu nêna Bible kan han zir chuan Bible hriatna ka nei chho ta a. Johana 8:32-a: ‘Thutak in hria ang a, thutak chuan bâwih a bân ang che u,’ tih thu chu ka hre thiam ta thuai a ni,” tiin a sawi.

Thuziak hmasaa kan sawi tâk Ray-a pawhin: “Jehova Thuhretute nêna Bible ka han zir chuan, Pathian chu mihringte hrehawm tawrhnaa mawhphurtu a ni lo tih ka hre ta a. Pathian chuan suahsualna awm a la phal chhan ṭha tak a neih rualin, tihtâwp thuai a tiam bawk tih ka hriat avângin ka lâwm hle a ni,” a ti bawk.

Mi tam zâwkte’n nungchang tehna hniam tak an neih laia thil dik tih chu a awlsam lo ngei mai. Mahse, chu chu thil theih a ni. Mi tam tak chuan Bible thu hre thiam tûr leh nunpui tûra ṭanpuitu neih chu an duh a. Chuvângin, Jehova Thuhretute chuan khawvêl pumah mi maktaduai têlte chu in lama tlawhin Bible an zirpui a ni. Mi tam tak chuan chawlhkâr tinin Bible zirtîrna dik tak chu an zir a. Chutianga an tih avâng chuan Siamtu an hnaihin, nun hlim lehzual an nei a ni. *

Jehova Thuhretute i tawn leh hunah an sakhua an rin nachhan chu engvângin nge i zawh loh vang? An zirtîrna leh an chanchin chu chhût chiang la. Tichuan, i rin theih sakhua a awm a nih chuan nangmah ngeiin thu tlûkna siam ang che. (w13-E 07/01)