Sum Chungchângah Sakhuanna I Ring Thei Em?
Estelle-i * chu fa nei duah chung pawhin a inkhâwm ziah a. Ani chuan, “Kan kohhran rawngbâwltu hnênah chuan Bible zir ka duh thu ka hrilh a,” tiin a sawi. Mahse, chu rawngbâwltu chuan zirtîr a tum ngai lo. A tâwpah phei chuan Estelle-i chu a inkhâwm ngai ta lo va. “Kohhrana sum enkawltute chuan ka inkhâwm thei lo a nih pawhin pawisa thawn mai tûrin lehkha min thawn a. ‘Ka inkhâwm loh pawhin pawi an ti lova, ka sum chiah an duh a ni,’ tiin ka ngaihtuah ta a,” tih a sawi zawm a ni.
Sakhaw ngaihsak mi tak Angelina-i chuan: “Kan kohhranah chuan inkhâwm apiangin vawi thum ngawt thawhlâwm khawn a ni ṭhîn a, thawh tûra beisei kan ni ziah bawk. Pawisa an khawn reng mai a. ‘Pathian thlarau an nei lo a nih hi,’ tiin ka ngaihtuah a ni,” tiin a sawi.
In vêngchhûnga kohhrante chuan mite sum thawhtîr nân tih dân hrang hrang an hmang em? Chu chu Bible nên a inmil em?
BIBLE ZIRTIRNA CHU ENG NGE NI?
Kristianna dintu Isua chuan: “Athlâwnin in hmu a, athlâwnin pe ang che u,” a ti a. (Matthaia 10:8) Bible thuchah chu a hlu hle a, a duhtu apiangte tâna hmuh theih a ni tûr a ni.
Kristian hmasate khân kohhrana sênsote chu engtin nge an phuhrûk?
‘Pathian chuan hlim taka petu chu a hmangaih’ avângin mi tinin ‘ui chunga pe lovin, pêk loh theih loh anga ngaia pe hek lovin, an thinlunga an tum ang zêlin an pe a ni.’ (2 Korinth 9:7) Tirhkoh Paula chuan: “In zîngah tumah kan tihhautak lohna tûr che uin achhûn azâna thawkin, Pathian chanchin ṭha kan hrilh ṭhin che u kha,” tiin a sawi a. (1 Thessalonika 2:9) Paula chuan mahni intodelh chunga rawng a bâwl theih nân puan in a siam ṭhîn a ni.—Tirhkohte 18:2, 3.
JEHOVA THUHRETUTE CHU HE MI KAWNGAH ENG NGE AN AN?
Jehova Thuhretute chuan Kingdom Hall tia koh in pângngai tak chu inkhâwm nân an hmang tlângpui a. Engtin nge sênsote chu an phuhrûk? Anni chuan thawhlâwm an khawn ngai lova, thawhlâwm ipte pawh a sem chhuak ngai hek lo. Chu ai chuan, inkhâwmna ngaihlu apiangte chuan Kingdom Hall-a thawhlâwm bâwmah an thlâk thei a ni.
Sakhuana chu engtianga chhawmdâwl tûr nge ni ang?
He magazine chhut chhuahna leh thawn chhuahna atân insênso a ngai ngei mai. Chutichung pawhin, TV leh chanchinbu vêla an rawngbâwlna chhuaha thawhlâwm an khawn lai chu i hmu ngai lo vang. Ngaih pawimawh ber chu Bible thutak sem chhuah hi a ni.
Eng nge i ngaih dân: Hetiang kawnga sênsote phuhrûk tum chu Isua thusawi leh Kristian hmasate entawn tûr siam nên inmilin i hria em? (w13-E 07/01)
^ par. 2 He thuziak inzawma hming ṭhenkhat hi thlâk a ni.
