1, 2. Pathian pawm hlawh tûrin ‘eng ang mi nge kan nih ang’?

MI DANGTE min ngaih dân tûr ngaih pawimawh chu thil pângngai tak a ni a. Mahse, Kristiante kan nih angin, Jehova’n min ngaih dân tûr chu kan ngaihsak zâwk tûr a ni lâwm ni? Tihah chuan, Ani chu lei leh vâna ropui ber leh, “nunna tuikhur” a ni si a.—Sâm 36:9.

² Jehova thlîrna aṭanga ‘mi eng ang nge kan nih’ tûr chungchângah tirhkoh Petera chuan ‘awm dân thianghlim leh Pathian ngaihsaka’ awm tûrin min fuih a ni. (2 Petera 3:11-12 chhiar rawh.) Pathian pawm hlawh tûr chuan, kan “awm dân” chu a thianghlim tûr a ni a, chu chu nungchang lam te, rilru lam te, leh thlarau lamahte a thianghlim tûr tihna a ni. Chu bâkah, amah ṭih a, rinawm taka vuan tlat chungin ‘Pathian chu kan ngaihsak’ tûr a ni a. A nih chuan, a pawm nih tumnaah chuan kan nungchang chauh ni lovin, kan chhûngril nihna pawh a tel a ni. Jehova chu ‘thinlung fiahtu’ a nih avângin, kan nungchang a thianghlim leh thianghlim loh te, a hnêna kan inpumpêk pumhlûm leh pumhlûm lohte chu a hria a ni.—1 Chro. 29:17.

3. Pathian nêna kan inlaichînna chungchângah eng zawhnate nge kan ngaihtuah ang?

³ Diabol-Setana chuan Pathian pawm kan nih chu a duh lo. Jehova nêna kan inlaichîn a tâwp theih nân theih tâwp a chhuah hial a ni. Setana chuan min thlêm thlu tûr leh Pathian kan biakna laka min la pêng tûrin dâwtthu a hmang hreh lo. (Joh. 8:44; 2 Kor. 11:13-15) Chuvângin: ‘Engtin nge Setana’n mite a bum? Jehova nêna kan inlaichînna vênghim tûrin eng nge ka tih theih?’ tia kan inzawh chu a finthlâk a ni.

4. Pathian nêna kan inlaichînna tichhiat nân Setana’n eng nge tih a tum ber a, engvângin nge?

⁴ “Mi tin mahni châknaa hruai bo leh hîpa an awm chuan thlêmna an tâwk a ni zâwk e. Tin, châkna chuan no a pai a, sual a hring ṭhîn a; tin, sual chuan a lo puitlinin thihna a hring ṭhîn,” tiin zirtîr Jakoba chuan a ziak a. (Jak. 1:14, 15) Pathian kan vawn tlatna tihchhiat tumin, Setana chuan kan châkna lo chhuahna—kan thinlung neih chu a tum ber a ni.

5, 6. (a) Setana’n eng hmangin nge min beih? (b) Satana’n kan thinlunga châkna sual awmtîr tûrin eng nge a hman a, chûng thilte hmanna kawnga a tawn hriat ngah dân chu eng nge ni?

⁵ Setana chuan kan thinlung beih nân eng nge a hman? Bible chuan: “Khawvêl pumhlûm hi mi sual thu thuin a awm,” tih a sawi a. (1 Joh. 5:19) Setana hmanruaah chuan “khawvêla thil awmte” a tel a ni. (1 Johana 2:15, 16 chhiar rawh.) Setana chuan kum sâng têl chu mite bum nân khawvêl hi fingthiam takin a hmang a. He khawvêla kan awm avângin, a thiltih verther takte laka kan invên a ngai a ni.—Joh. 17:15.

⁶ Satana chuan kan thinlungah châkna sualte neihtîr min tum a ni. Chumi atâna Setana thil hman pathumte chu tirhkoh Johana’n a sawi a: (1) “tisa châkna te,” (2) “mit châkna te,” leh (3) “dam chhûng ropuina lem te” a ni. Setana’n thlalêraah khân chhûng thilte chu Isua thlêm nân a hmang a. Chûng thangte chu kum tam tak a lo hman tawh avângin, tûn laiah hian a hmang thiam tawh hle a, mi tinte rilru âwn zâwngin a siamrem a ni. Hemi laka invênhim nâna kan thiltih theihte chu kan ngaihtuah hmain, Diabola’n hmanraw ṭhenkhat Evi laka hlawhtling taka a hman dân leh Pathian Fapa laka a hlawhtlin loh dân chu i lo en phawt ang u.

7. Engtin nge Setana’n Evi thlêm nân “tisa châkna” chu a hman?

⁷ Mihringte chuan nun nân ei tûr an mamawh a. Siamtu chuan leilung hi ei tûr hnianghnar tak pe chhuak tûrin a siam a ni. Setana chuan Pathian duhzâwng tihna laka min lâk pên nân chaw châkna pângngai tak chu hman a tum thei a. Evi chunga a thil tih dân hi lo ngaihtuah teh. (Genesis 3:1-6 chhiar rawh.) Setana chuan Evi hnênah thih kher ngai lovin “a chhia leh a ṭha hriatna” thei rah a ei thei a, a ei nî apangin Pathian ang a lo ni ang tih a hrilh a ni. (Gen. 2:9) Chuvângin, Evi chuan nung tûrin Pathian thu a awih kher a ngaih loh thu Diabola’n a sawi tihna a ni. Dâwt chiang tak a va ni em! A rilrua chu ngaih dân tuhsak a nih hnuah Evi chuan duh thlan tûr pahnih a nei ta a: Chu ngaih dân chu a hnâwl thei a, thei rah ringawt chu ngaihtuah ngut ngutin ei a châkna a tizual thei bawk a ni. Huana thei  dang zawng zawngte a ei thei chung pawhin, huan lai taka thingkûng chungchânga Setana thusawi chu ngaihtuah ngut ngutin, “a lo va, a ei ta a.” Chutiang chuan, Siamtu khap thil tih châkna chu Setana’n Evi a neihtîr a ni.

8. “Tisa châkna” hmangin engtin nge Setana’n Isua a thlêm a, engvângin nge chu thlêmna chu a hlawhtlin loh?

⁸ Setana chuan chu tih dân bawk chu thlalêra Isua a thlêm khân a hmang a. Ni 40 leh zan 40 chaw a nghei hnua Isua chaw châkna chu hmang ṭangkaiin Setana chuan a thlêm a. “Pathian Fapa i nih chuan he lung hi chhanga chang tûrin thu pe rawh,” a ti a. (Lk. 4:1-3) Isua chuan duh thlan tûr pahnih a nei a: Chaw a mamawhna phuhru tûr maiin a thiltih theihna mak tak chu a hmang thei a, a hmang lo thei bawk a ni. Chutiang thiltih theihna chu mahni hmasial nâna hman tûr a ni lo tih a hria a. Rilṭâm hle mah se, Jehova nêna an inlaichînna vawn ṭhat chu a rilṭâmna phuhrûk aiin a dah pawimawh zâwk a ni. Isua chuan: “‘Mihring hi chhang chauhvin an nung lo vang a, Pathian kaa thu tin chhuakin an nung zâwk ang,’ tih ziak a ni,” tiin a chhâng a ni.—Mt. 4:4.

9. “Mit châkna” chu eng nge ni a, engtin nge Setana chuan chu châkna chu Evi thlêm nân a hman?

⁹ Johana pawhin “mit châkna” chu thlêmna angin a târ lang bawk a. Chu chuan miin thil engemaw a en ringawtna aṭangin châkna a nei ṭan thei tih a târ lang a ni. Evi chungchângah khân, Setana chuan chu châkna chu hmangin: “In mit a lo vâr ang,” tiin a sawi a. Thei rah ei phal loh chu Evi’n a en rei poh leh a tân a îtawm tial tial a. “Mit la tak a ni tih” a hmu a ni.

10. Setana’n Isua thlêm nân eng kawngin nge “mit châkna” chu a hman a, engtin nge Isua’n a chhân lêt?

¹⁰ Isua chungchângah engtin nge ni ve? Setana’n Isua chu “mit khap kâr lovah khawvêl ram zawng zawng a entîr a. Tin, diabola chuan a hnênah, ‘Hêng zawng zawng chunga thuneihna leh a ropuina hi ka pe ang che,’” a ti a ni. (Lk. 4:5, 6) Isua thil hmuh chu leia ram tak takte a ni lova, an ropuina chu inlârnaah a hmu a ni zâwk. Setana chuan Isua chu a thil hmuh hmanga thlêm theih a inbeisei a ni ngei ang. Setana chuan zak lo takin: “Chibai mi bûk la, a zain i ta a ni vek ang,” a ti a. (Lk. 4:7) Isua chuan Setana’n ni tûra a duh ang mi nih chu engti zâwng mahin a duh lo a ni. “‘Lalpa i Pathian chibai bûk la, ama rawng chauh bâwl rawh,’ tih ziak a ni,” tiin a chhâng lêt nghâl vat a ni.—Lk. 4:8.

11. Engtin nge Evi chu Setana’n a bum?

¹¹ Khawvêla thil awmte a târ lannaah, Johana chuan “dam chhûng ropuina lem” chungchâng a sawi a. Adama leh Evi chu  leilunga mihring awmchhun an nih lai khân, anni chuan “dam chhûng ropuina lem” chu mi dang hmaah an lantîr thei lo ngei mai. Mahse, chapona an târ lang a ni. Evi a thlêm lai khân, Setana chuan Pathianin a tâna thil ropui engemaw sûm tlat angin a sawi a. Diabola chuan Evi hnênah “a chhia leh a ṭha hriatna thing rah” an ei nî apangin, ‘a chhia leh a ṭha hriain Pathian ang an lo ni dâwn’ tih a hrilh a. (Gen. 2:17; 3:5) Chutiang chuan Setana’n Jehova laka zalênna an neih theih tûr thu a hrilh a ni. Chu dâwt thu pawm tûra Evi chêttîrtu ber chu chapona niin a lang. Thi tak tak dâwn lo anga inngaiin ei pal loh thei rah chu a ei ta a ni. A va tisual tak êm!

12. Setana’n Isua thlêm a tum dân kawng dang chu eng nge ni a, engtin nge Isua’n a chhân lêt?

¹² Evi nêna inang lo takin, Isua chuan inngaihtlâwmna chungchângah entawn tûr ṭha a va siam tak êm! Setana chuan kawng dangin thlêm a tum a, mahse, Isua chuan Pathian fiahna thlen thei thil engemaw tih chu ngaihtuah pawh a ngaihtuah lo a ni. Chu chu chapona thiltih a ni dâwn si a! Isua chuan “‘Lalpa i Pathian fiah suh,’ tih a ni e,” tiin chiang tak leh tlang takin a chhâng zâwk a ni.—Luka 4:9-12 chhiar rawh.

13, 14. Tûn laiah Setana’n thlêmna ṭhenkhat a hman dân hrilhfiah rawh.

¹³ Tûn laiah pawh Setana chuan Evi leh Isua thlêm nâna a hman hmanrua ang bawk kha a hmang a. ‘Tisa châknaa’ hîp nân, Diabola chuan a khawvêl chu nungchang ṭhat lohna leh a lutuka ei leh in chawi lâr nân a hmang a ni. A bîk takin Internet-a saruak lem leh thuziakte hmangin, “mit châkna” chu a entu fîmkhur lo takte thlêm thlûk nân a hmang a. “Dam chhûng ropuina lem” chuan mite chu chapo tûr te, hausakna âtchilh tûr te, thuneihna duh tûr te, leh hming thanna duh tûrtein a va thlêm nasa êm!

¹⁴ “Khawvêla thil awmte” chu sangha mantu tawktarh ang a ni a. Ei châkawm tak angin a lang mai thei; mahse, a nghakuai nêna belhbawm tlat a ni. Setana chuan mite’n nî tin mamawh pangngai anga an ngaih thilte chu Pathian dân nêna inkalh thilte tihduhtîr nân a hmang a. Mahse, hriat thiam mai theih loh chûng thlêmnate chu kan thil châk zawng thunun nân leh kan thinlung tihbawlhhlawh nâna duan a ni a. Chûngte chu Pathian duhzâwng tih aia kan mi mal  mamawhte leh nawmsaknate dah pawimawh zâwk tûra duan a ni bawk. Chûng thlêmnate bum chuan kan awm ang em?

15. Setana thlêmna donaah engtin nge Isua kan entawn theih?

¹⁵ Evi chu Setana thlêmnate lakah a tlâwm a, Isua erawh chuan hlawhtling takin a do thei a ni. Ani chuan thlêm a nih apiangin “tih ziak a ni,” a nih loh leh “tih a ni e” tia sawiin Pathian Lehkha Thu aṭangin chhânna a pe ṭhîn a ni. Bible taima taka kan zir chuan kan lo hre chiang ang a, thlêmna kan tawh hunah ngaihtuahna ngil tak nei tûra min ṭanpui thei Bible chângte kan hre chhuak thei ang. (Sâm 1:1, 2) Pathian chunga rinawm Bible-a entawn tûrte hriat chhuahna chuan anmahni entawn tûrin min ṭanpui bawk ang. (Rom 15:4) Jehova ṭihna dik tak neih a, a hmangaih zâwng hmangaih a, a huat zâwng huatna chuan min vênghim dâwn a ni.—Sâm 97:10.

16, 17. Kan “ngaihruat thiamna” chuan mi eng ang nge kan nih tûrah eng nghawng nge a neih theih?

¹⁶ Tirhkoh Paula chuan khawvêl thununa awm lovin, Pathian ngaihtuahna thununa kan lo awm theih nân “ngaihruat thiamna” hmang tûrin min fuih a. (Rom 12:1, 2, NW) Kan thil ngaihtuahte thunun tlat a ṭûlzia sawiin, Paula chuan: “Hnialnate leh thil sâng tinrêng Pathian hriatna dâl tûra sâng taka siamte chu ṭhiatin, ngaihtuahna tinrêng Krista thu âwihna salah kan hruai a,” tiin a sawi. (2 Kor. 10:5) Kan ngaihtuahna chuan mi eng ang nge kan nih tûrah nghawng nasa tak a neih avângin, min tichak thei thilte kan “ngaihtuah” zawm zêl a ngai a ni.—Phil 4:8.

¹⁷ Ngaihtuahna ṭha lo leh châkna ṭha lo kan neih chuan kan thianghlim kan beisei thei lova. Jehova chu “thinlung thianghlim” takin kan hmangaih ngei tûr a ni. (1 Tim. 1:5) Mahse, kan thinlung chu bumhmang ber a ni a, ‘khawvêla thil awmte’n’ min nghawng nasat dân chu kan hre lo pawh a ni thei. (Jer. 17:9) Chuvângin, Bible kan zirna aṭanga dik taka mahni inbih chiangin, ‘rinnaah chuan kan awm emaw, mahni ngei inchhinin; kan infiah ṭhîn’ tûr a ni lâwm ni?—2 Kor. 13:5.

18, 19. Engvângin nge Jehova duhzâwng mi ang nih kan tum tlat ang?

¹⁸ “Khawvêla thil awmte” do tûra min ṭanpui thei thil dang leh chu Johana ziak: “Khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang,” tih hriat reng hi a ni. (1 Joh. 2:17) Setana khawvêl chu awm hlen tûr leh tak viau angin a lang mai thei a. Mahse, tâwp nî a la nei ngei dâwn a ni. Setana khawvêlin a pêk theih thil engmah hian a daih rei dâwn lo. Chumi hriat rengna chuan Diabola hmanruate buma awm lo tûrin min ṭanpui ang.

¹⁹ Tirhkoh Petera chuan “Pathian ni lo thlen hun tûr chu beisei leh ṭhahnemngai taka duhin, . . . chu mi nî a thlen avângin vânte lo kângin a boral ang a, thil bulte pawh chu meia em tuiin a awm tawh ang,” tih kan nghah ruala Pathian pawm mi ni tûrin min fuih a ni. (2 Pet. 3:11, 12) Nakin lawkah chu ni chu a lo thleng ang a, Jehova chuan Setana khawvêla tel zawng zawngte chu a tiboral vek ang. Chumi a lo thlen hma zawng chuan, Setana’n Evi leh Isua a thlêm anga min thlêm nân “khawvêla thil awmte” chu a hmang zawm zêl ang. Evi angin mahni châkna phuhrûk kan tum tûr a ni lo. Chutianga kan tih chuan Setana chu kan pathianah kan pawm tihna a ni dâwn a ni. Engtiang khawpa duhawm leh mi hîp thei anga lantîr ni mah se, chûng thilte chu dovin, Isua ang kan nih a ngai a ni. Jehova duhzâwng mi ang nih ṭheuh chu i tum tlat ang u. (w13-E 08/15)