NOVA leh a chhûngte chu ruahpui a han sûr tâkah chuan an awm khâwm a. Hetianga an awm lai hi han mitthla teh: thim zînga sahriak khâwnvâr phe zawk zawkin an hmai a han ên lai te, lâwng chunga ruah sûr thla buan buan ri an ngaihthlâk laia an meng kâwk kâwk lai te, leh lawng pangte tuifâwnin a rawn theh thâwm an ngaihthlâk laite chu. A thâwm chu a na ngawt ang le.

Nova’n a hmangaih tak a chhûngte, a nupui rinawm tak leh a fapa chak tak pathumte leh an nupuite a han en kual lai chuan a thinlung chu lâwmna hlîrin a khat ngei ang. Chu hun harsa takah chuan, a hmangaih berte a bula an awm a hmuhna chuan a ti thlamuang mai thei a ni. An vai chuan an himin an dam ṭha a. Thâwm a rin êm avângin, an vaia hriat theih tûra ringin a chhûngkua chu lâwm avânga ṭawngṭaina a neihpui ngei ang.

Nova chuan rinna chak tak a nei a. Chuvângin a Pathian, Jehova chuan amah leh a chhûngkua chu a vênghim a ni. (Hebrai 11:7) Ruahpui a rawn sûr ṭan tâkah chuan rinna an neih chu a ngai tawh lo tihna em ni? Chumi nêna inkalh takin, hun harsa tak an la tawn tûr atân chuan an la mamawh zêl dâwn a ni. Hun khirh tak kan tawn mêk lai hian chutiang tho chuan rinna kan mamawh a ni. Chuvângin, Nova rinna aṭanga kan zir theih chu i lo en ang u.

Pâwn lamah chuan “ni sawmli leh zan sawmli” chhûng ruah nasa takin a la sûr zêl a. (Genesis 7: 11, 12) Tui chuan a chîm sâng chho tual tual a ni. Nova chuan a Pathian Jehova’n mi felte a vênhim rualin mi sualte chu a hrem tih a hmu thei.

Tuilêt chuan vântirhkoh zînga helna chhuak chu a titâwp ta a. Setana rilru put hmang, mahni hmasialnain a thunun vântirhkoh tam takte chuan vâna “an awmna pângngai” kalsanin, leia hmeichhiate chu rawn awmpuiin an inthlahpawlh a, Milianho tia koh fate an nei ta a ni. (Juda 6; Genesis 6:4) Jehova thil siam zînga ropui ber, mihringte a hnuhhniam lehzual avângin chu helna lang chhuakah chuan Setana chu a lâwm hle ngei ang.

Mahse, tuilêtin a han chîm sân tâkah chuan. Vântirhkoh helte chu an mihring taksa pu leh ngai tawh lo tûra kalsan a, thlarau khawvêla kîr luihtîr an ni a. Anni chuan an nupuite leh an fate chu tuilêta mi dangte ruala thi tûrin an kalsan ta a ni.

Tuilêt hma kum zabi sarih dâwn laia, Enoka hun lai aṭang tawh khân Pathian Jehova chuan Pathian ngaihsak lo mi suaksualte chu a tih boral tûr thu a lo vaukhân lâwk tawh a. (Genesis 5:24; Juda 14, 15) Chuta ṭang chuan mite chu an sual zual deuh deuh a; leilung an tichhia a, tharum thawhnain an tikhat a ni. Tûnah chuan an chungah chhiatna a thleng ta. Nova leh a chhûngte chuan chutianga hremna a thlen avâng chuan an lâwm em?

Lâwm lo! An Pathian ngilnei tak lah a lâwm hek lo. (Ezekiela 33:11) Jehova chuan mi a tam thei ang berte chhandam nân engkim a ti a ni. Enoka chu vaukhânna a pêktîr tawh a, Nova pawh lawng a tuktîr tawh bawk. Nova leh a chhûngkua chuan kum tam tak chhûng chu mite hmuh theih vekin hna hautak tak chu an thawkrim hle a. Chu bâkah, Jehova chuan Nova chu “felna thu hriltu” anga thawk tûrin a hrilh bawk a ni. (2 Petera 2:5) A hun hmaa lo awm tawh Enoka ang bawkin, khawvêla lo thleng tûr rorêlna chungchângah mite chu a vaukhân a. Engtin nge an chhân lêt? Vân aṭanga thilthleng lo thlîrtu  Isua chuan Nova hun laia mite chungchâng chu: “Tui a lo lêt a, an zaa a lâk bo vek hma loh chuan engmah an hre lo,” tiin a sawi leh a ni.—Matthaia 24:39.

Jehova’n lawng kawngkhâr a khâr aṭanga ni 40 chhûnga Nova leh a chhûngte tâna thil awm dân tûr chu han mitthla teh. Nî tin maia ruah sûr buan buan reng mai nên, lawng chhûnga awm mi pariatte tân chuan, inngaihsak tawn te, an awmna enkawl te, leh an awmpui ramsate mamawh ngaihtuahsak chu ni tin nun dân phung ang mai a ni tawh a ni. Mahse, thâwklehkhatah lawng pumpui chu a nghîng lawih a. Lawng chu a che ṭan ta! Tuiin a chîm sân zêl tâkah chuan lawng chu “lei chung lamah a sêp kâng ta” tual tual a. (Genesis 7:17) Engkimtithei Pathian Jehova thiltihtheihna lan chhuahna mak tak a va ni êm!

Nova chu a chhûngte nêna an him vâng chauh ni lovin, lawng pâwna boral tate vaukhân tûra Jehova’n ngilnei taka anmahni a hman avângin a lâwm hle ngei ang. Kum tam tak rim taka an thawh chhûng khân an thawhrimna chu awmze nei lo tak angin a lang mai thei a. Mite chuan an chhâng lêt ṭha ta si lo! Han ngaihtuah teh—Nova chuan Tuilêt hma kha chuan unaunute, unaupate, leh vahte a neih ngei hmêl a; mahse, a chhûngkua bîktê chauh lo chuan a thusawi chu an ngaithla lo. (Genesis 5:30) Tûnah chuan, chûng mi pariatte chu lawng chhûngah him takin an awm tawh a, mite chhanhim an nih theih nâna hun an lo sên tawh zawng zawng chu ngaihtuah lêtin chutianga an lo tih avâng chuan an rilru a hahdam phah ngei ang.

Nova hun lai aṭang tawhin Pathian Jehova chu a danglam lo. (Malakia 3:6) Isua Krista chuan kan hun lai hi “Nova dam lai” nên a inan thu a sawi a. (Matthaia 24:37) Khawvêl bawlhhlawh tak tihchhiat a nih huna tâwp tûr, buaina nasa tak thlen hunah kan awm a. Chutiang bawkin tûn laiah hian Pathian mite chuan a ngaithla apiangte hnênah vaukhânna thu an sawi a ni. Chu chu i chhâng lêt ang em? Chu nun chhanhimna thutak chu i pawm tawh a nih chuan, mi dangte hnêna puan chhuahnaah i tel ve ang em? Nova leh a chhûngte chuan kan vai atâna entawn tûr ṭha tak an siam a ni.

Tui chunga lawng a chêt ṭan laia lawng rit tak a han insâwi ri vêl chu a chhûnga awmte chuan an hre ngei ang. Nova chu tuifâwn nasat lam leh lawng  ngheh ṭhat dânin a tibuai em? Buai lo. Chûng chu tûn laia ringhleltute buaina a ni mai thei a, Nova erawh chuan a ringhlel ve lo. Bible chuan: “Rinnain Nova chu . . . lawng a tu,” tih a sawi. (Hebrai 11:7) Eng a rinna nge? Jehova chuan Nova leh a ruala Tuilêta chhanhimte hnênah chuan inremna ṭha tak a siam a. (Genesis 6:18, 19) Lei leh vân, leh a chhûnga thil nung zawng zawng siamtu chuan chu lawng chu ṭha takin a remkhâwm thei dâwn lâwm ni? Thei teh lul mai! Jehova’n a thutiam a hlen dâwn tih Nova chuan a ring thlap a. Amah leh a chhûngte chu ‘tuia chhandamin’ an awm ta ngei a ni.—1 Petera 3:20.

Ni 40 leh zan 40 a ral hnu chuan ruah chu a bâng ta hrâm a. Kan Calendar hman lai aṭanga chhût chuan chu chu B.C.E. 2370, December vêl a ni. Lawng chhûnga awm Nova leh a chhûngte chuan thil dangdai tak tak an tawng zawm zêl a. Thil nung tinrênga khat, chu lawng chu tuipui zau tak tlâng chip thlenga chîm pil khawp hialah chuan a lâng zêl a ni. (Genesis 7:19, 20) Nova chuan a fapa, Sema, Hama, leh Japhetha te’n ramsa zawng zawngte châwm a, tifai a, hrisêl taka an enkawl theih nân ruahmanna a siam nasat dân tûr chu kan ngaihtuah thei ang. Ramsa hlauhawm tak takte lawnga luhtîr theitu Pathian bawk chuan Tuilêt chhûng chuan a thunun thei dâwn tih a chiang a ni. *

Nova chuan lawng chhûnga an awm laia thilthlengte chu kim takin a chhinchhiah ngei ang. Chu chuan ruah sûr ṭan hun leh tâwp hun min hrilh a. Tuiin leilung chu ni 150 a chîm tih min hrilh bawk a ni. A tâwpah chuan tui chu a lo kâm ṭan a. Ni chhinchhiahtlâk tak ni khat chu a lo thleng a, lawng chu zâwitêin “Ararat tlângah chuan a lo innghat ta a,” chu chu tûn laia Turkey hmun hi a ni. Chu chu B.C.E. 2369 April thlaa thleng a nih hmêl. Ni 73-a ral hnu, June thlaah chuan tlângchhîpte chu a lo lang ṭan ta a. Thla thum a ral hnu September thlaah Nova chuan lawng khuhna, a nih loh leh a chung a ṭhenlai chu a la thla ṭan a. Lawng chhûnga ni êng leh boruak thianghlim a han luh tâkah chuan chu hna hautak tak mai thawhna chu malsâwmin a awm ta a ni. A hma pawhin Nova chuan boruak chu a him a, chênna atâna a tlâk tawh leh tawh loh a enchhin a. Choâk a thlawh chhuahtîr a, a thlâwk a thlâwk vêl a; tichuan, ṭhuro chu a thlawh chhuahtîr leh a, a tâwpa fûkna a hmuh hma loh chuan a kîr leh ṭhîn a ni.—Genesis 7:24–8:13.

Nova chuan a hun duanah thlarau lam thil a la dah pawimawh ber a rinawm. An ṭawngṭaiho lai leh anmahni vênghimtu an Pa vâna mi chungchâng an sawiho lai vêl chu kan mitthla thei âwm e. Nova chuan thutlûkna pawimawh a siam rêng rêngin Jehova a rinchhan a. Lawnga kum khat aia tam an awm hnua lei chu a “ro zo tawh” tih a han hmuh hnu pawh chuan kawngka chu a hawng nghâl mai lo va, a chhuak nghâl mai bawk hek lo. (Genesis 8:14) Jehova thu a ngaichâng hrih a ni!

Tûn laia chhûngkaw lûte pawhin chu mi rinawm hnên aṭang chuan thil tam tak an zir thei a. Nova chuan fel tak, taima tak, leh dawhthei takin thil a ti a, a enkawlna hnuaia awmte pawh a vênghim vek a ni. Thil dang zawng zawng aiin Pathian Jehova duhzâwng chu a ngai pawimawh ber zâwk a. Hêng thilah hian Nova kan entawn chuan kan hmangaihte tân malsâwmna kan thlen dâwn a ni.

A tâwpah chuan Jehova thupêk chu a lo thleng ta a. Nova chu: “Lawng ata chhuak rawh, nang leh i nupui leh i fapate leh i fapate nupuite pawh i hnênah chhuak ve rawh se,” tiin a hrilh a. Thuâwih takin an chhûngkua chuan an chhuak a, ramsate pawhin an zui chhuak ta a ni. Engtin nge an chhuah? An intibuai nuai nuai em? Intibuai lo ve! “Anmahni chi awm dân ang ṭheuhvin lawng ata chu an chhuak” tih Bible chuan a sawi. (Genesis 8:15-19) Nova leh a chhûngte chu pâwna an han chhuah chuan, tlâng aṭanga thlifîm tak dawngin, Ararat tlâng aṭang chuan an hawi vêl a, leilung thianghlim tak chu an hmu thei a ni. Milianhote, vântirhkoh hel hmangte, mi suaksual zawng zawngte, leh tharum thawhna te pawh hmuh tûr a awm tawh lo! * Mihringte chuan a thara ṭan leh theihna hun remchâng an nei dâwn a ni.

Nova chuan a tih tûr a hria a. Pathian biaknain a ṭan a ni. Maichâm a siam a. Pathianin sa thiang  anga a thlîr—lawng chhûnga “tuak sarih” zîng ata—ran ṭhenkhat chu Pathian Jehova hnêna hâlral thil hlanah a hmang a ni. (Genesis 7:2; 8:20) Chu chuan Jehova a tilâwm em?

Bible chuan: “LALPAN rimtui chu a hria a,” tiin thu thlamuanawm takin a chhâng a ni. Mihringte’n tharum thawhnaa khawvêl an tih khah laia Pathian thinlung an tihnatna chu a duhzâwng tih tum tlattu leia betu rinawm chhûngkua hmuh nuam tak leh muanawm tak chuan a rawn thlâkthleng ta a. Jehova chuan anni chu ṭha famkim tûrin a phût lo. Chu Bible châng vêk chuan: “Mihring rilru ngaihtuahnate chu an naupan têt ata a sual si a,” tiin a sawi chhunzawm a ni. (Genesis 8:21) Jehova’n dawhthei tak chunga khawngaihna a lantîr zawm zêl dân chu han ngaihtuah teh.

Pathianin leilung ânchhia a lawh chu a titâwp a. Adama leh Evi an hel lai aṭang tawh khân, harsa taka thlai thar chhuah a nih nân Pathian chuan chu ânchhia chu a lo lawh tawh a ni. Nova pa Lameka chuan a fapa chu a hmingah Nova a sa a, a awmzia chu “Châwl,” a nih loh leh “Thlamuanna” tihna a nih hmêl; a fapa chuan chu ânchhe lak ata mihringte chu chawlhnaah a hruai lût dâwn tih a lo sawi lâwk a ni. Nova chuan chu hrilh lâwkna chu a thleng famkim dâwn tih leh leilung chu a hma zawng aiin thlai chîn nân a ṭha tawh zâwk dâwn tih a han hriat chuan a hmêlah hlimna a lang chhuak ngei ang. Nova’n lo neia thlai a chîng nghâl pawh chu a mak lo ve!—Genesis 3:17, 18; 5:28, 29; 9:20.

Chutih rualin Jehova chuan Nova thlahte hnênah an nun kaihruaitu tûr dân chiang leh tluangtlam tak ṭhenkhat chu a pe a—chûng zîngah chuan tualthah leh thisen hman sual khapna a tel a ni. Pathian chuan leia awm zawng zawngte tihboral nân tuilêt a thlentîr leh tawh ngai dâwn lo tih tiamin mihringte chu thu a thlunpui a. A thutiam a rintlâkzia lantîr nân Jehova chuan thilthleng ropui tak, chhimbâl chu a hmasa ber atân a zâmtîr ta a ni. Tûn thleng hian, chhimbâl kan hmuh apiangin hmangaih taka Jehova thutiam thlamuanawm tak chu min hriat chhuahtîr ṭhîn a ni.—Genesis 9:1-17.

Nova chanchin chu thawnthu mai ni se chuan, chu chhimbâl a tâwp rual chuan tâwp ve mai tûr a ni a. Mahse, Nova chu mihring awm tak tak a ni a; ani chuan a nunah thil tam tak a tawng a ni. Chûng hun lai chuan mite chu an dam rei hle a, chu mi rinawm chuan kum 350 lai a la tawrh chhuah a ngai a; chûng kum chhûng chuan hrehawm tam tak a tuar a ni. Ṭum khat chu zu a ruih lutuk avângin thil pawi tak a ti a, a tupa Kanaana’n thil sual lehzual a han tih chuan a pawina chu a belhchhah a—chu chuan a chhûngteah thil pawi tak a thlen a ni. A thlahte milem biakna leh tharum thawhna suala an tlûk luh lai hmu khawpin Nimroda hun lai thlengin a dam a. A ṭha lamah chuan, a fapa Shema’n rinna kawnga entawn tûr ṭha tak a chhûngkaw tâna a siam lai chu a hmu hman thung a ni.—Genesis 9:21-28; 10:8-11; 11:1-11.

Harsatnate kan tâwk chung pawhin Nova angin kan rinawm reng a ngai a ni. Kan chhehvêla mite’n Pathian dik an ngaihsak lo emaw, an kalsan hial emaw a nih pawhin Nova chu kan entawn tlat a ngai a. Chutianga chhel taka rinawmna chu Jehova chuan a ngaihlu hle a ni. Isua Krista sawi angin: “A tâwp thlenga tuar peih apiang chu, chu mi ngei chu chhandamin a awm ang.”—Matthaia 24:13. (w13-E 08/01)